Azərbaycan bu gün çox

güclü hərbi potensiala malikdir

Biz çox güclü ordu yaratmışıq. Düşmən bilməlidir ki, onun bir dənə də olsun hərbi və ya strateji obyekti yoxdur ki, Azərbaycan Ordusu onu məhv edə bilməsin. Düşmənin bütün hərbi obyektləri, bütün strateji əhəmiyyətli məntəqələri Azərbaycan Ordusu tərəfindən məhv edilə bilər.

İlham ƏLİYEV

Azərbaycan Respublikasının Prezidenti

On illərdən bəri həll edilməmiş qalan Ermənistan – Azərbaycan, Dağlıq Qarabağ münaqişəsi region ölkələrinin inkişafına ciddi şəkildə mane olmaqdadır. Doğrudur, Azərbaycan digər Qafqaz ölkələrinə nisbətən sürətlə inkişaf edir. Ancaq ölkəmizin məcburən sürükləndiyi bu münaqişə olmasaydı, Azərbaycan indikindən qat-qat artıq sürətlə inkişaf edərdi. Ekspertlərin fikrincə, region ölkələrinin inkişafının qarşısını alan faktorların ən başlıcası beynəlxalq aləmdəki ikili standart müəllifləri və antiazərbaycan qüvvələrin himayədarlıq etdiyi işğalçı Ermənistan rəhbərliyidir.

Zaman beynəlxalq təşkilatların daha tez və Azərbaycanın ərazi bütövlüyünün bərpası çərçivəsində həll etmək istədiyi münaqişənin önünə daha bir kötük diyirləmişdir. Bu kötük ölkədəki sosial-iqtisadi problemlərin əlində əsir-yesir qalmış Ermənistan əhalisinin etiraz aksiyaları nəticəsində hakimiyyətə gəlmiş, populist küçə adamı imicindən uzaqlaşa bilməyən Nikol Paşinyandır. O, nəinki problemin həllinə töhfə verə bilmədi, hətta məsələnin daha da qəlizləşməsinə səbəb olan məsuliyyətsiz bəyanatlarla “tarixə düşdü”. Bu populist siyasətçi açıq şəkildə etiraf edir ki, Ermənistan sülh danışıqlarına deyil, müharibəyə üstünlük verir. Belə olan halda isə Azərbaycanın başqa yolu qalmır.

Məhz o səbəbdən də Azərbaycan Prezidenti İlham Əliyev ermənilərə xatırladır ki, bir neçə il əvvəl Ermənistan döyüş meydanında üzləşdiyi məğlubiyyətdən bu günə qədər də özünə gələ bilmir: “Bu gün Azərbaycan bayrağı Ağdərə, Füzuli, Cəbrayıl rayonlarının vaxtilə işğal altında olan torpaqlarında dalğalanır. Gün gələcək ki, bizim bayrağımız Şuşada və Xankəndidə dalğalanacaqdır”.

Daim sülh tərəfdarı olmuş Azərbaycan rəhbərliyi münaqişənin başlandığı günlərdən bəri işğalçılara dövri olaraq xatırladır ki, Ermənistanın işğalçılıq siyasətinin gələcəyi yoxdur: “Azərbaycan öz ərazi bütövlüyünü onsuz da bərpa edəcəkdir. Ancaq Ermənistan son illər ərzində bölgədə gedən regional əməkdaşlıq proseslərindən tam təcrid olunmuş vəziyyətdədir. Onlar siyasi səhnədə məğlub olublar, bütün aparıcı beynəlxalq təşkilatlar Azərbaycanın mövqeyini dəstəkləyir”.

Xatırladaq ki, BMT, onun Təhlükəsizlik Şurası, ATƏT, İslam Əməkdaşlıq Təşkilatı, Avropa Parlamenti, AŞPA, digər təşkilatlar Azərbaycanın ərazi bütövlüyünü tanıyır və Ermənistan --Azərbaycan, Dağlıq Qarabağ münaqişəsinin Azərbaycanın ərazi bütövlüyü çərçivəsində həll olunmasını tələb edən çoxsaylı qərar və qətnamələr qəbul etmişlər. Yəni, bu, Ermənistanın siyasi məğlubiyyətidir. Onlar diplomatik arenada məğlubiyyətə uğrayıblar. Dağlıq Qarabağda keçirilmiş qondarma “referendum” heç bir ölkə tərəfindən tanınmayıb, beynəlxalq təşkilatlar da bunu tanımayıblar. Bu, bir daha təsdiqləyir ki, Dağlıq Qarabağ Azərbaycanın torpağıdır, Azərbaycanın əzəli torpağıdır və Azərbaycanın ayrılmaz hissəsidir.

Prezident İlham Əliyevin fikrincə, Ermənistan--Azərbaycan, Dağlıq Qarabağ münaqişəsi yalnız ölkəmizin ərazi bütövlüyü çərçivəsində öz həllini tapa bilər. Bunun başqa yolu yoxdur: “Dəfələrlə demişəm, bir daha demək istəyirəm bunu hamı bilsin ki, Azərbaycan heç vaxt imkan verə bilməz ki, bizim tarixi torpaqlarımızda ikinci erməni dövləti yaradılsın. Dəfələrlə demişəm və bir daha demək istəyirəm ki, bugünkü Ermənistanın ərazisi tarixi Azərbaycan torpaqlarıdır. Bunu təsdiqləyən çoxsaylı kitablar, xəritələr var. Bu, tarixdir, tarixi həqiqətdir. Bunu bilməyənlər də bilsinlər və ən önəmlisi Azərbaycan gəncləri bunu bilsinlər. Bilsinlər ki, indiki Ermənistanın böyük hissəsi Azərbaycanın tarixi torpağıdır. Biz bunu heç vaxt unutmuruq və unutmayacağıq”.

Xatırladaq ki, dövlət başçımız bu il mayın 27-də “Buta” sarayında Azərbaycanın milli bayramı – Respublika Günü münasibətilə keçirilmiş rəsmi qəbulda geniş nitq söyləmişdi. Orada qeyd edilirdi ki, ölkəmizin hərbi qüdrəti güclənir. Ağdərə, Füzuli, Cəbrayıl rayonlarının bir hissəsi, Naxçıvan Muxtar Respublikasında keçirilən əməliyyat nəticəsində böyük torpaq sahəsi işğalçılardan azad edilmişdir. Hərbi qüdrətimizin artırılması nəticəsində bu gün Azərbaycan Ordusu beynəlxalq reytinqlərdə güclü ordular sırasındadır.

Bu, belə də olmalıdır. Çünki biz müharibə şəraitində yaşayırıq. Müharibə hələ bitməyib. Belə olan halda hərbi potensialımızın gücləndirilməsi əsas prioritet məsələlərdən biri olmalıdır. Bu istiqamətdə çox ciddi addımlar atılıb.

İşğalçılar da daxil olmaqla heç kəsin yaddından çıxmayıb ki, ötən ilin iyun ayın ayının 26-da Azərbaycan Respublikası Silahlı Qüvvələrinin yaradılmasının 100 illik yubileyi münasibətilə Bakının “Azadlıq” meydanında təntənəli hərbi parad keçirilmişdi. Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev, Birinci vitse-prezident Mehriban Əliyeva, dövlət və hökumət rəsmiləri, Milli Məclisin deputatları, xarici ölkələrin respublikamızdakı səfirləri, hərbi attaşeləri, beynəlxalq təşkilatların əməkdaşları, yubiley tədbiri ilə əlaqədar ölkəmizə gələn nümayəndə heyətlərinin rəhbərləri, müharibə veteranları və paytaxt ictimaiyyətinin nümayəndələri Azərbaycan Ordusunun hərbi paradda nümayiş etdirilən texnika, silah və sursatını, eləcə də, kadr potensialını izləmişdilər.

Müdafiə, Daxili işlər, Fövqəladə hallar nazirliklərinin, Dövlət təhlükəsizliyi, Dövlət sərhəd və Xüsusi Dövlət mühafizə xidmətlərinin, eləcə də Türkiyə Respublikası Silahlı Qüvvələrinin parad heyətindən ibarət 4 min nəfərədək şəxsi heyəti iştirak etdiyi təntənəli mərasimdə 240-dan çox hərbi texnika, gəmilər, 70-dən artıq uçuş vasitəsi, o cümlədən silahlanmaya yeni qəbul edilmiş ən müasir zirehli texnikalar, raket və artilleriya qurğuları, hava hücumundan müdafiə sistemləri, helikopterlər, pilotsuz uçuş aparatları kimi müxtəlif növ ən yeni silah və texnikalar nümayiş olunmuşdu.

Ən maraqlı məqam isə o idi ki, İrəvanda çoxballıq zəlzələ effekti verən bu hərbi paradın tribunasında Azərbaycan rəhbərliyi və hərbçilərimizin yanında Türkiyə, Pakistan, Belarus, Bəhreyn, Birləşmiş Ərəb Əmirlikləri, Gürcüstan, İran, İsrail, Qazaxıstan, Özbəkistan, Rusiya, Səudiyyə Ərəbistanı və Ukraynadan olan 100-dək nümayəndə dayanmışdı. Bu faktlardan xəbərdar olan Nikol Paşinyanın Azərbaycana müharibə çağırışları səsləndirməsi, sadəcə ağıldankəmlik əlamətidir.

Məhz həmin hərbi paradda geniş nitq söyləyən Azərbaycan Prezidenti İlham Əliyev dünya ictimaiyyətinə, Ermənistanın himayədarlarına və işğalçı ölkənin rəhbərliyinə açıq və konkret mesajlar göndərmişdi:

“Bundan sonra Azərbaycan Ordusu hər an hazır olmalıdır ki, öz ərazi bütövlüyünü bərpa etsin. Biz istəyirik ki, münaqişə sülh yolu ilə həll olunsun və Azərbaycanın apardığı siyasət bunun əyani sübutudur. Ancaq bir daha demək istəyirəm ki, biz bu vəziyyətlə heç vaxt barışmayacağıq. Biz çox güclü ordu yaratmışıq. Düşmən bilməlidir ki, onun bir dənə də olsun hərbi və ya strateji obyekti yoxdur ki, Azərbaycan Ordusu onu məhv edə bilməsin. Düşmənin bütün hərbi obyektləri, bütün strateji əhəmiyyətli məntəqələri Azərbaycan Ordusu tərəfindən məhv edilə bilər… Ona görə, hesab edirəm ki, məsələnin tezliklə danışıqlar yolu ilə ədalətli həlli, Azərbaycanın ərazi bütövlüyünün tezliklə bərpa edilməsi qarşı tərəfin də marağında olmalıdır”.

İttifaq MİRZƏBƏYLİ

Xalq qəzeti.- 2019.- 4 sentyabr.- S.1-2.