“Mirzə Cəlilin Azərbaycanı”

Mədəniyyət Nazirliyinin sifarişi ilə “Salnamə” kinostudiyasında “Mirzə Cəlilin Azərbaycanı” adlı tammetrajlı sənədli filmin çəkilişi davam edir.

Cəlil Məmmədquluzadənin 150 illik yubileyinə həsr olunmuş filmin çəkilişləri ədibin dünyaya gəldiyi Naxçıvan şəhərində, Nehrəm kəndində, Ağcabədi rayonunda və Qori şəhərində lentə alınıb. Süjetlər əsasən Mirzə Cəlilin əsərlərinin motivləri və personajları üzərində qurulub.

Rejissor Tahir Tahiroviç bu barədə danışarkən deyib: "Ağcabədinin Kəhrizli kəndində yaradılan ev muzeyində olduq. Orada böyük ədibin həyat və yaradıcılığına aid eksponatlar, ailəsinə məxsus məişət əşyaları, o cümlədən yazıçının əsərləri, müasirlərinə aid sənədlər, "Molla Nəsrəddin” jurnalının nömrələri nümayiş olunur.”

Filmə C.Məmmədquluzadə yaradıcılığının əsas hadisəsi olan "Molla Nəsrəddin” jurnalı ilə bağlı maraqlı faktlar da daxil edilmişdir.

Rejissor deyir: "Mən ssenariyə bir az fərqli yanaşdım. İstəyirəm ki, Mirzə Cəlilin yaratdığı obrazları real olaraq tamaşaçılara göstərək. Mirzə Cəlilin obrazları bu gün də bizim aramızda yaşayırlar. Məgər bu gün Kefli İsgəndərlər, Şeyx Nəsrullahlar yoxdurmu? Təbii ki, Mirzə Cəlil haqqında indiyə kimi yetərincə film çəkilib. Ancaq bu filmdə siz Mirzə Cəlili olduğu kimi görəcəksiniz. Biz sizə Mirzə Cəlilin Azərbaycanını göstərəcəyik”.

Filmin ssenari müəllifi Nadir Bədəlov, operatoru Elxan Rüstəmov, bəstəkarı Azər Hacıəsgərli, icraçı prodüseri Kamil Məmmədov, prodüseri Nazim Hüseynovdur.

Film noyabr ayında hazır olacaq.

M. MÜKƏRRƏMOĞLU

Xalq qəzeti.- 2019.- 7 sentyabr.- S.8.