“Globus Travel” Azərbaycanda turizm
sektorunun müxtəlif
sahələrində fəaliyyət göstərir
Azərbaycanda
turizm sektoru sürətlə inkişaf etməkdədir.
Ölkəmiz artıq dünya turistləri üçün cəlbedici
məkana çevrilib. Gözəl təbiəti, qədim tarixi abidələri, zəngin mətbəxi,
qonaqpərvərliyi, dövlət tərəfindən bu sahəyə
ayrılan diqqət, sahibkarlara yaradılan şərait, viza
sisteminin sadələşdirilməsi bu sahənin
inkişafına rəvac verir.
Son illər dünya turistlərinin diqqətini Azərbaycana cəlb etmək üçün müxtəlif istiqamətlərdə fəal işlər görülür. Azərbaycanın beynəlxalq aləmdə mövqeyinin daha da möhkəmlənməsi, ən nüfuzlu təşkilatlarda layiqincə təmsil olunması, ölkəmizin beynəlxalq arenada formalaşmış müsbət imici, respublikamızın dünyada sabitlik adası kimi qəbul edilməsi, ölkəmizə marağın artmasına səbəb olub və turizm sahəsinin də inkişafına zəmin yaradıb. Bütün bunlar Prezident İlham Əliyevin düşünülmüş, uzaqgörən siyasəti sayəsində əldə olunub və Azərbaycana beynəlxalq miqyasda böyük nüfuz qazandırıb.
Azərbaycana səfər edən hər bir qonaq əmindir ki, burada yüksək xidmət, qonaqpərvərliklə yanaşı, təhlükəsiz və xoş mühitlə qarşılaşacaq, eyni zamanda, gözəl istirahətdən zövq alacaqdır.
Prezident İlham Əliyev ölkəmizdə turizmin inkişafını vacib istiqamətlərdən biri kimi daim diqqətdə saxlayır. Dövlət başçısı dəfələrlə öz çıxışında bu məsələyə xüsusi diqqət yetirərək qeyd edib ki, Azərbaycandakı kurort mərkəzləri dünyada hazırda mövcud olan ən qabaqcıl, ən populyar kurort yerlərindən geri qalmamalıdır və qalmayacaqdır. Bu, ölkəmizə həm yeni investisiyalar gətirəcək, minlərlə, bəlkə də, on minlərlə yeni iş yeri açılacaqdır. Respublikamıza gələn turistlərin sayı daha çox olacaq və Azərbaycan turizm üçün çox cəlbedici ölkəyə çevriləcəkdir.
Qeyd edək ki, turizmin inkişafı ilə bağlı son vaxtlar ölkə Prezidenti bir neçə sərəncam verib və onların icrası istiqamətində tədbirlər həyata keçirilib. Dövlət başçısının 2016-cı il 1 sentyabr tarixli "Elektron vizaların verilməsi prosedurunun sadələşdirilməsi və “ASAN viza” sisteminin yaradılması haqqında", habelə 20 fevral 2017-ci il tarixli "Azərbaycan Respublikasına turist axınının sürətləndirilməsi ilə bağlı əlavə tədbirlər haqqında" sərəncamları ölkədə qeyri-neft sektorunun perspektivli sahələrindən olan turizmin inkişafına əhəmiyyətli təsir göstərilib. Cənab Prezidentin də qeyd etdiyi kimi, "ASAN viza" sistemi ölkəmizə səfər edən əcnəbi vətəndaşların sayının qısa müddətdə sürətli artımını təmin edib.
Strateji Yol Xəritəsində qeyd olunur ki, ölkədə turizm infrastrukturunun inkişaf etdirilməsi və beynəlxalq standartlara cavab verən turizm xidmətlərinin formalaşdırılması bu sahənin qanunvericilik bazasının və dövlət tənzimlənməsi mexanizmlərinin təkmilləşdirilməsini, mövcud turizm potensialından istifadə imkanlarının genişləndirilməsini, regionlarda turizm fəaliyyətinin stimullaşdırılmasını, yeni turizm marşrutlarının yaradılmasını, habelə rəqabətədavamlı qiymət təklifinin təmin edilməsini zəruri edir. Bu məqsədlə 20 aprel 2018-ci il tarixli Prezident sərəncamına əsasən, Azərbaycan Respublikasının Dövlət Turizm Agentliyi təşkil olunub. Bütün bunlar turizm sektorunda əsaslı yeniliklərin yaranmasına şərait yaratmışdır. Azərbaycan Respublikası Dövlət Turizm Agentliyinin yaradılması turizm sahəsində idarəçilik sisteminin təkmilləşdirilməsinə mühüm töhfədir. Agentlik yarandığı vaxtdan bu sahənin sürətli inkişafını təmin etmək üçün yeni layihələr həyata keçirir. Xüsusilə sahibkarların, şirkət rəhbərlərinin fəaliyyətinin koordinasiya olunmasının təmin edilməsi ilə bağlı mühüm işlər görür.
Məlumdur ki, turizm tələbinin ödənilməsi üçün lazım olan müxtəlif xidmətlər yeni iş yerləri üçün mənbə rolunu oynayan fəaliyyət növləri yaradır. Bu səbəbdən turizm inkişaf səviyyəsindən asılı olmayaraq, bütün ölkələrdə sosial inkişafın vacib elementi hesab olunur. Regionlar, eləcə də ümumilikdə, ölkə üzrə potensial imkanlardan tam və səmərəli istifadə, bu imkanları ölkənin milli maraqları çərçivəsində yerli və xarici turistlərin cəlb edilməsinə yönəldilməsi qarşıda duran başlıca vəzifələr kimi qəbul olunmalıdır. Turizmin regionlarda inkişafı bu müəssisələrin səmərəli fəaliyyəti, onların hər birinin turizm məqsədilə istehsal etdiyi məhsulun həcmi, iş yerlərinin təşkili və həmçinin, yaratdığı infrastruktur sferası ilə müəyyənləşir.
Ölkənin turizm sisteminin inkişafı və fəaliyyəti turizm şirkətləri tərəfindən həyata keçirilir və onlar turizm sisteminin inkişafında müstəsna rol oynayırlar. Turizm sahəsinə informasiya texnologiyaları və informasiya sistemlərinin tətbiqi bu sektorun inkişafının yeni aspektlərinin formalaşmasına səbəb olur. İnformasiya texnologiyaları turizmi insanın həyat fəaliyyətində əsas yerlərdən birinə çevrilməsinə yaxınlaşdırır. Biz də müntəzəm olaraq innovativ yeniliklərdən istifadə edərək, fəaliyyətimizi bu istiqamətdə qurur və ölkəmizin təqdimatını yüksək səviyyədə təqdim etməyə çalışırıq. Azərbaycanda turizm sahəsində sahibkarlığın inkişaf tempi ildən- ilə artır və sahibkarlara dövlət tərəfindən xüsusi dəstək göstərilir.
Biz ”Globus Travel” turizm şırkətini 2002-ci ildə Tovuz rayonunda təsis etmişik. Şirkətimiz
17 il ərzində böyük inkişaf yolu
keçmişdir. Bütün bu illər ərzində
çoxsaylı nailiyyətlərə imza atmışıq.
Bundan əlavə, ölkədə olan azsaylı şirkətlərdən
biriyik ki, turizm sektorunun bütün sahələrində fəaliyyət
göstəririk. Bu sahələrdən bəzilərini –
daxili turizmi xarici turizmi, B2B satış platformasını,
hava yolu nümayəndəliyini, gəlmə turizmi və MİCE-ni nümunə kimi
göstərə bilərik. “Globus Travel” Beynəlxaq Hava Nəqliyyatı
Assosiasiyasının və Azərbaycan Turizm
Assosiasiyasının üzvüdür və bu sektorda olan
bütün digər qurumlarla sıx əməkdaşlıq
edir.
Hazırda
Azərbaycanda bir neçə rəsmi
ofisimiz fəaliyyət göstərir. Bakı və Gəncə
şəhərlərinin hər birində 2, Şəmkir və
Tovuz rayonlarında isə 1 ofisimiz var. Biz bununla müştərilərimizə
maksimum yaxın olmağa çalışırıq. Əməkdaşlarımız
yüksək təlim görmüş peşəkar turizm
menecerləridir və istənilən müştərinin səyahət
ehtiyaclarına uyğun təklifləri təqdim etməyə
hazırdır.
Geniş B2B şəbəkəmiz olduğuna görə, daim çağrı mərkəzimiz və satış platformamız ilə subagent və korporativ şirkətlərə də turizm xidmətləri təqdim edə bilirik. Ümumiyyətlə, müasir dövrdə istənilən sektorda yüksək səmərəliliyi təmin etmək üçün texniki innovasiyaların tətbiqi zəruridir. Turizm sektoru da istisna deyil. Rəsmi ölkə nümayəndəsi olduğumuz IATI online B2B satış sistemi vasitəsilə subagentlərlə iş proseslərimizin böyük bir qismini texnoloji müstəviyə gətirməyə nail olmuşuq. Bu sistem vasitəsilə subagentlər online şəkildə aviabilet, otel, transfer, tur, kirayə evlər, tibbi turizm, viza dəstəyi, yaxta kirayəsi, qatar və avtobus biletləri daxil olmaqla çoxsaylı turizm xidmətlərindən bəhrələnə bilərlər.
Bizim şirkətimizin əsas hədəfi və seçdiyi yol ölkəmizi layiqincə təmsil etmək, eyni zamanda, Azərbaycana səfər edən qonaqlara yüksək xidmət göstərərək onları məmnun etməkdir. Ölkənin turizm sahəsində inkişafı və onun beynəlxalq aləmdə təmsili öhdəliyi milli turizm təşkilatlarının payına düşür.
Biz də öz üzərimizə düşən öhdəlikləri uğurla yerinə yetimək üçün mövcud imkanlardan maksimum istifadə etməyə çalışırıq.
Eldəniz SƏFƏROV,
“Globus Travel” şirkətinin baş
direktoru
Xalq qəzeti.- 2019.- 7 sentyabr.- S.7.