Maraqlı konsert proqramı

Üzeyir Hacıbəyli XI Beynəlxalq Musiqi Festivalı çərçivəsində Azərbaycan Dövlət Akademik Filarmoniyasında Xalq artisti, dirijor Fəxrəddin Kərimovun rəhbərliyi ilə Qara Qarayev adına Azərbaycan Dövlət Kamera Orkestrinin konserti keçirilib.

Məlumat üçün bildirək ki, bu orkestr 1964-cü ildə məşhur Azərbaycan bəstəkarları Qara Qarayev və Fikrət Əmirovun təşəbbüsü ilə yaradılmışdır. Orkestrin baş dirijoru və bədii rəhbəri respublikanın Xalq artisti, Dövlət mükafatları laureatı Nazim Rzayev olmuşdur. 1995-ci ildən 1997-ci ilədək kollektivə Yaşar İmanov rəhbərlik etmişdir. O vaxtdan orkestrə respublikanın Xalq artisti Teymur Göyçayev rəhbərlik etmiş, 2018-ci ildən etibarən bu kollektivin bədii rəhbəri və baş dirijoru Xalq artisti Fəxrəddin Kərimovdur.

Kollektiv dünyanın bir çox məşhur səhnələrində, nüfuzlu beynəlxalq festivallarda iştirak etmiş, xarici ölkələrdə Azərbaycan musiqi sənətini ləyaqətlə təmsil etmişdir. Orkestrin repertuarı Azərbaycan və xarici ölkə bəstəkarlarının əsərlərindən ibarətdir.

Dünənki konsertdə Xalq artisti, pianoçu Murad Adıgözəlzadə Azər Dadaşovun fortepiano və orkestr üçün konsertini, Rusiyanın tanınmış violin ifaçısı Alyona Bayeva isə SSRİ Xalq artisti Rodion Şedrinin “Concerto Cantabile” violin və simli orkestr üçün konsertini (Bakıda ilk dəfə səslənir) ifa etmişdir.

Bundan başqa, konsertin proqramına K.Yenkinsin simli orkestr üçün “Palladio” və P.Hindemitin simli kvartet üçün “Minimax” (Bakıda ilk ifa) əsərləri də daxil idi.

M. MÜKƏRRƏMOĞLU

Xalq qəzeti.- 2019.- 24 sentyabr.- S.7