XXI əsrin möhtəşəm Zəfər paradı

Azadlıq meydanında paradlar çox keçirilib. Ancaq bu paradın xüsusi önəmi var. Bu, Zəfər paradıdır. Bu, tarixi hadisədir. Paradların birində mən demişdim ki, parada 2016-cı ildə Lələtəpə yüksəkliyində qaldırılmış bayraq gətiriləcək. Demişdim ki, gün gələcək və bu gün işğaldan azad edilən torpaqlarda qaldırılan Azərbaycan Bayrağı Azadlıq meydanına gətiriləcək və bu gün gəldi. Bu tarixi günün şahidi bizik, Azərbaycan xalqıdır. Biz bundan sonra ancaq və ancaq irəli gedəcəyik.

İlham ƏLİYEV

Azərbaycan Respublikasının Prezidenti

Xalqımız 30 ildən bəri gözlədiyi tarixi qələbənin sevincini yaşayır. Prezident İlham Əliyevin Ali Baş Komandanlığı ilə qəhrəman ordumuzun işğala son qoyaraq, torpaqlarımızı azad etməsi qəlbimizi qürur hissi ilə doldurdu. Eyni zamanda, haqq-ədalət, ərazi bütövlüyümüz uğrunda, işğalçı siyasətə qarşı aparılan Vətən müharibəsinin nəticəsi olan bu qələbə xalqımızı daha da bütövləşdirdi, mübariz etdi, milli həmrəyliyimizi gücləndirdi və bir yumruq kimi birləşdrirdi. Dövlətimizin başçısının dediyi dəmir yumruq kimi.

Tarixdə əbədi qalacaq 44 günlük Vətən müharibəsi dövlətimizin və xalqımızın iftixar ünvanına çevrildi. Bundan sonra dünya ölkələri Azərbaycan xalqını daha yaxından tanıyacaq, onun qəhrəmanlığına, cəsurluğuna, bir qarış torpağının işğalda qalmasına dözməyən, bu yolda canından keçməyə hazır olan vətənpərvər kimi qəbul edəcək. İndiyədək də tanıyırdı, ancaq bundan sonra tam əmin olacaq. Bu gün böyükdən-kiçiyə vəzifəsindən, əqidəsindən, siyasi mənsubiyyətindən asılı olmayaraq, hər bir azərbaycanlı özünü daha vüqarlı, daha mətin hiss edir. Çünki artıq biz qalib bir xalqın nümayəndələri olmağımızla, torpaqlarımızı hərb meydanında , öz gücümüzlə – rəşadətli ordumuzun güdrəti ilə azad etməyimizlə fəxr edir və qürurlanırıq.

Bayramlarımız sırasında möhtəşəm tarixi gün

Vətən müharibəsi Azərbaycan tarixinə Zəfər Gününü yazdı. Hər birimizidə qürur hissi yaradan bu gün həm də dünya tarixinə düşdü. Çünki XXI əsrdə Zəfər Gününü qeyd edən, Zəfər paradı keçirən ilk və yeganə ölkə Azərbaycandır. Dünyanın inkişaf etmiş müstəqil dövlətləri ilə müqayisədə cəmi 29 illik müstəqillik tarixi olan bir ölkənin beynəlxalq aləmə səs salan belə möhtəşəm qələbə qazanması və Zəfər paradı keçirməsi, həqiqətən də, tarixdə silinməz iz qoyacaq bir hadisədir. Bayramlarımız sırasına daha bir möhtəşəm tarixi gün əlavə olundu. Bu tarix 30 il həsrətlə gözlədiyimiz sevinci yaşatdı bizə. Ən nüfuzlu beynəlxalq təşkilatların, o cümlədən, dünyanın ən güclü dövlətlərinin həmsədr olduğu ATƏT-in Minsk qrupunun 30 ilə yaxın müddətdə qarşısını almaqda aciz olduqları Ermənistan– Azərbaycan, Dağlıq Qarabağ münaqişəsi 44 gün ərzində Prezident , Ali Baş Komandan İlham Əliyevin rəhbərliyi, müzəffər ordumuzun qəhrəmanlığı sayəsində həllini tapdı. Azərbaycan Ordusu təcavüzkarı və onun havadarlarının hegemonluğuna, işğalına son qoydu, ermənilərin illərdir qurduğu istehkamları yarıb keçdi, hərbi texnikasını məhv etdi, hətta qənimət kimi də götürdü, Ermənistanı kapitulyasiyaya məcbur etdi.

Adı müstəqil, özü isə bir sıra dövlətlərin əlində alətə çevrilmiş Ermənistan Azərbayanın inkişafını gözü götürməyən qərəzli beynəlxalq təşkilatlar və Qərbin bir sıra dövlətləri üçün ölkəmizə qarşı sanki bir təhdid, təzyiq vasitəsinə çevrilmişdi. Hər dəfə ölkəmizdə dünya birliyinə səs salacaq bir tədbir keçiriləndə və ya hər hansısa bir uğur qazanılanda bir müddət sonra Ermənistan ordusu cəbhəboyu ərazilərdə təxribatlar törədir, yaşayış məntəqələrimizi yararsız hala salır, dinc əhalini qətlə yetirirdi. Sonra da vay-şüvənlik salaraq, guya, bütün bunların hamısının, hətta beynəlxalq hüquq normalarının Azərbaycan tərəfindən bilərəkdən pozulduğunu iddia edir, xarici himayədarlarının vasitəsilə bu barədə beynəlxalq aləmdə inam yaratmaq istəyirdi. Təəssüf ki, dünyada baş alıb gedən ikili standartlar, ədalətsizlik, islamofobiya buna təkan verirdi. Hətta sentyabrın 27-də təcavüzkar Ermənistanın açıq şəkildə başladığı müharibənin də səbəbini Azərbaycanda axtarmağa başlamışdılar. Ancaq fakt qarşısında aciz qaldılar. Bu dəfə istəklərinə, rəzil niyyətlərinə çata bilmədilər.

İkinci Qarabağ müharibəsində silahlı qüvvələrimiz işğalçı Ermənistan ordusunu darmadağın etdi və ərazi bütövlüyümüz təmin olundu. Azərbaycan dekabrın 10-da Bakının Azadlıq meydanında Zəfər paradı keçirdi. Parad qəlbi Vətən sevgisi ilə döyünən hər bir azərbaycanlının qürur və iftixar mənbəyinə çevrildi.

Azərbaycan xalqının əzmi, gücü və iradəsi, iqtisadi qüdrəti, müasir ordu quruculuğu və Prezident-xalq birliyi ölkəmizin İkinci Qarabağ müharibəsində qələbəsini təmin edən mühüm amillər oldu. Prezident İlham Əliyevin xalqımızın qüdrətinin və milli qürurumuzun təntənəsinə çevrilən, dövlətimizin nüfuzu və gələcək inkişafı baxımından müstəsna əhəmiyyət kəsb edən bu misilsiz qələbənin əbədiləşdirilməsi məqsədilə hər il təntənəli şəkildə qeyd etmək üçün xüsusi bayram gününün təsis edilməsi barədə imzaladığı sərəncama əsasən, noyabrın 8-i Zəfər Günüdür.

Bir millət, iki dövlət

Azərbaycan–Türkiyə sarsılmaz birliyi, vəhdəti , qardaşlıq və dostluq əlaqələri bütün sahələr üzrə isti münasibətləri dünyaya nümunədir. Həm sevincli, həm də kədərli günlərini birgə yaşayan, bir-birinə arxa, dayaq olan iki ölkənin dost münasibətləri Ermənistan – Azərbaycan, Dağlıq Qarabağ münaqişəsində də özünü açıq şəkildə büruzə verdi. Yeri gəlmişkən, 2012-ci ildə Türkiyənin Baş naziri (indiki Prezident) Rəcəb Tayyib Ərdoğan ABŞ Prezidenti Barak Obama ilə görüşündə Dağlıq Qarabağ münaqişəsinin həlli ilə bağlı aparılan danışıqların intensivləşdirilməsini təklif edib. Qardaş ölkə Prezidenti deyib ki, “əgər münaqişənin həlli üçün Azərbaycanla danışmaq lazımdırsa, Türkiyə bunu etməyə hazırdır. Lakin bir şərtlə ki, Fransa və Rusiya da, öz növbəsində, Ermənistanla bağlı tədbirlər görsünlər”. Həmin görüşdə Ərdoğan Obamanın diqqətinə çatdırıb kı, “Minsk triumviratı” artıq 20 ildir ki, Qarabağ nizamlanması ilə məşqul olur, lakin indiyədək heç bir nəticə əldə olunmayıb.

ATƏT-in Minsk qrupunun həmsədr dövlətlərindən biri –Rusiya Federasiyasının Prezidenti Vladimir Putinlə görüşlərində də Dağlıq Qarabağ münaqişəsinin beynəlxalq hüquq normaları çərçivəsində, ədalətli həllində mövqeyini israrlı şəkildə bildirib. Bununla yanaşı, qardaş ölkə Prezidenti dövlətimizin başçısı ilə çiyin-çiyinə verərək ölkəmizə qarşı siyasi təzyiqlərin qarşısını almaqda da qətiyyətli mübarizə aparıb. Sentyabrın 27-də Ermənistan ordusu Azərbaycana qarşı müharibəyə başlayanda Türkiyə həmin gündən bizim yanımızda oldu. Hətta tarixi Zəfər paradında da Azərbaycan– Türkiyə prezidentləri çiyin-çiyinə dayanmışdılar. Bu, dünyaya Azərbaycan–Türkiyə birliyinin sarsılmazlığı barədə növbəti mesaj idi.

Qardaş ölkə başçısının və türk hərbçilərinin də paradda iştirakı xüsusi qeyd edilməlidir. Vətən müharibəsində verdiyimiz 2783 şəhid əvəzinə, bu paradda 2783 mehmetcik iştirak edirdi. Bunun özü də çox mühüm mesaj – “sevinciniz-sevincimiz, kədəriniz - kədərimizdir” kəlamının reallığı idi.

Prezident İlham Əliyev Zəfər paradında çıxışında bir da bəyan etdi ki, Vətən müharibəsinin ilk günlərindən, daha doğrusu, ilk saatlarından Türkiyənin dəstəyini hiss edirdik. Türkiyə Prezidenti Rəcəb Tayyib Ərdoğan ilk saatlardan Azərbaycanın haqq işinə öz dəstəyini verdi. Onun açıq, birmənalı və sərt açıqlamaları Azərbaycan xalqını çox sevindirdi. Qardaş ölkə Prezidenti bu müharibədə ölkəmizin haqlı və Türkiyənin hər zaman Azərbaycanın yanında olduğunu demişdir. Bu, birliyimizin, qardaşlığımızın təzahürüdür.

Türkiyənin Azərbaycana verdiyi siyasi və mənəvi dəstək hər bir soydaşımızı, türk dünyasını qürurlandırır, sevindirir. Zəfər paradında qardaş ölkə rəhbərinin, həmçinin çoxsaylı nümayəndələrin, eləcə də hərbçilərin iştirakı bir daha birliyimizi həm xalqlarımıza, həm də bütün dünyaya göstərdi.

Türkiyə Prezidenti Zəfər paradındakı çıxışında Azərbaycanın 44 gün davam edən şanlı mübarizəsində şəhid olan igidlərə uca Allahdan rəhmət, qazilərimizə tezliklə sağalmalarını arzuladıqdan sonra Xalq şairimiz Bəxtiyar Vahabzadənin şeirindən iki bənd səsləndirməsi Azərbaycanla Türkiyənin “bir millət, iki dövlət” olduğunun bariz nümunəsi idi.

“Qarabağı otuz illik həsrətdən sonra ana Vətən ilə qovuşduran Azərbaycan Ordusunun şəxsi heyətini təbrik edirəm, onları dualarla cəbhəyə göndərən anaların əllərindən öpürəm “ – deyən qardaş ölkə Prezidenti bu mübarizədə ilk gündən Azərbaycanın yanında olduqlarını bir daha bəyan etdi: “Hörmətli qardaşım, əziz Azərbaycan xalqı! Türkiyə Azərbaycanın apardığı mübarizəyə ilk günlərdən bütün qurum və təşkilatları ilə dəstək vermiş, bütün imkanları ilə azərbaycanlı qardaşlarının yanında olmuşdur. Türkiyə olaraq, Azərbaycan ilə münasibətlərimizdə özümüzə hər zaman böyük lider Heydər Əliyevin “Bir millət, iki dövlət” şüarını rəhbər tutduq. Qazi Mustafa Kamal Atatürkün dəqiq ifadəsi ilə Azərbaycanın kədərini kədərimiz, sevincini sevincimiz bildik. Bu anlayışla Qarabağı otuz il boyunca sinəmizdə yara etdik. Bu gün də bu yaranın sağalmasının sevincini paylaşmaq, bu şanlı zəfəri birlikdə qeyd etmək üçün aranızdayıq”.

“Bu gün burada bütün qəlbimlə bir daha təkrarlamaq istəyirəm: Qarabağ Azərbaycandır! Qarabağ artıq Ana Vətəninə qovuşmuş, otuz illik həsrət sona çatmışdır. Türkiyə və Azərbaycan olaraq bundan sonrakı hədəfimiz bu torpaqları daha abad, daha inkişaf etmiş, uşaqlarımızın daha yaxşı yaşayacağı bir yerə çevirmək üçün mübarizə aparmaqdır. Türkiyə və Azərbaycan kürək-kürəyə verdikcə Allahın izni ilə çətinliklərin öhdəsindən gəlməyə, uğurdan-uğura çatmağa davam edəcəkdir” – deyən Türkiyə Prezidenti iki ölkə arasında dostluq və qardaşlıq münasibətlərinin bundan sonra daha da möhkəmlənəcəyini dünyaya bəyan etdi.

Ermənistana göz dağı

Zəfər paradı həm işğalçı –bundan sonra məğlub Ermənistana, həm də onun havadarlarına göz dağı oldu. Bu müharibə Ermənistana, təxminən, 3 milyard dollara başa gəldi. Bu da işğalçı ölkənin bir illik dövlət büdcəsinə bərabərdir. Bundan sonra Ermənistanın özünə gəlməsinə 40-50 il vaxt lazımdı. Ermənilər və havadarları Zəfər paradında bir daha Azərbaycan Ordusunun gücünü, müasir hərbi texnika və silahlarla, o cümlədən, müasir PUA-lar, raket sistemləri, hava hücumundan müdafiə sistemləri və digər müasir silah sistemləri ilə təmin olunduğunu gördülər.

Müzəffər ordumuzun Vətən müharibəsində məhv etdiyi Ermənistan ordusuna məxsus avtomobil və texnikaların nömrə nişanlarından ibarət nəhəng lövhənin nümayişi həm işğalçı ölkəyə, həm də havadarlarına göz dağı oldu. Lövhədə böyük hərflərlə əks olunmuş “Qarabağ Azərbaycandır!” şüarı Azərbaycan Silahlı Qüvvələrinə məxsus hərbi texnikanın üzərində yerləşdirilmişdi. Bu, həm də ərazi bütövlüyümüzün təmin olunması barədə dünyaya bir mesaj idi.

Prezident İlham Əliyev bütün siyasi təzyiqlərin qarşısını qətiyyətlə aldı, dünya erməniliyinin ölkəmizə qarşı diplomatik cəbhə yaratmasına imkan vermədi. Dövlətimizin başçısı bu qələbə ilə bütün dünyaya sübut etdi ki, güclü Azərbaycanın qarşısında Ermənistan heç vaxt dura bilməz. Eyni zamanda, heç bir qüvvə Azərbaycanın və onun başçısının iradəsinə təsir göstərə bilməz.

Dövlət başçısının dediyi kimi, Azərbaycan parlaq qələbə qazanaraq, Ermənistanı məğlub etdi, işğala son qoydu. Bu 44 günün hər günü bizim şanlı tariximizdir. Hər gün Azərbaycan Ordusu irəli gedirdi, hər gün yeni şəhərlər, kəndlər, qəsəbələr, yüksəkliklər azad edilirdi. Azərbaycan əsgəri, Azərbaycan zabiti bir amalla vuruşurdu ki, bu işğala son qoyulsun, bu haqsızlığa son qoyulsun, tarixi ədalət zəfər çalsın və buna nail olduq.

Əliqismət BƏDƏLOV

Xalq qəzeti 2020.- 15 dekabr.- S.4.