Gənclərə böyük etimad göstərilməsi onlara olan inam və qayğının təzahürüdür

Gənclər, əlbəttə ki, cəmiyyətimizin fəal üzvləri kimi ölkəmizin güclənməsində əsas rol oynayırlar. Mən gənclərin fəaliyyətini yüksək qiymətləndirirəm. Həm beynəlxalq müstəvidə, həm ölkə daxilində mən görürəm ki, bu gün böyüyən gənclər xalqa, dövlətə bağlıdırlar. Bu, çox önəmlidir. Gənclər gərək milli ruhda tərbiyə alsınlar. Biz milli dəyərlərimizi hər şeydən üstün tutmalıyıq.

İlham ƏLİYEV

Azərbaycan Respublikasının Prezidenti

Dövlət başçımızın siyasi kursunun prioritetlərindən birini gənclərə diqqət və qayğı, onlara böyük etimad göstərilməsi təşkil edir. Son illərdə bu istiqamətdə aparılan siyasət digər ölkələrə nümunədir. Prezident İlham Əliyevin “Bugünkü gənc sabah ölkəni idarə edəcəkdir” – fikri artıq dövlət idarəçiliyinin bütün sahələrində indidən özünü büruzə verir. Ölkə əhalisinin 30 faizdən çox hissəsini təşkil edən gənclərin hərtərəfli inkişafı məqsədilə onların dövlət idarəçiliyi sistemində iştirakının, səmərəli məşğulluğunun təmin edilməsi, potensialından dövlətimizin rifahı naminə istifadə olunması istiqamətində kompleks tədbirlərin görülməsi bu etimadın təsdiqidir.

Gənclər, daim hər bir cəmiyyətin aparıcı qüvvəsi olub və bu gün də belədir. Gənc nəslə göstərilən diqqət və qayğı, onların bilik və bacarıqlarının inkişaf etdirilməsinə, dünya birliyinə inteqrasiyasına əlverişli şəraitin yaradılması dövlətin parlaq gələcəyinin təminatıdır. Gənclərin problemlərinin həllinə dəstək, onlara göstərilən dövlət qayğısı yeni və müstəqil Azərbaycan dövlətinin siyasi kursunun mühüm tərkib hissələrindəndir.

2019-cu il, həm də islahatlar ili kimi yadda qaldı. Söz yox ki, son 16 ildə ölkəmizdə bütün sahələr üzrə islahatlar aparılır, ancaq yola saldığımız il köklü islahatların aparılması kimi yaddaşlara həkk olunub. Bu islahatlar yeni idarəçilik sisteminə keçid, əhalinin həyat səviyyəsinin daha da yaxşılaşdırılması, ölkəmizin beynəlxalq aləmdəki reytinqinin yüksəldilməsi ilə yanaşı, gənclərə böyük etimad göstərilməsi ilə də diqqəti cəlb etdi.

Prezident İlham Əliyev Anar Tağıyevi Yevlax Şəhər İcra Hakimiyyətinin başçısı, Elnur Rzayevi Xaçmaz Rayon İcra Hakimiyyətinin başçısı vəzifələrinə təyin olunması ilə əlaqədar qəbul etdiyi zaman səsləndirdiyi fikirlərdən bəzi məqamları xatırlatmaq yerinə düşərdi: “Siz gəncsiniz, birinizin 37, digərinizin 38 yaşı var. İndi Azərbaycanda gəncləşmə siyasəti aparılır. Bu, təbiidir, nəsillər dəyişir, yeni təfəkkürlü insanlar irəli çəkilir. Bu, təbii prosesdir və biz bu prosesdən kənarda qala bilmərik... Təbii ki, gəncləşmə prosesi getməlidir və burada söhbət təkcə yaşda deyil, təfəkkürdədir, işə yanaşmadadır. Siz indi mənim təyin etdiyim kadrlar kimi, elə işləməlisiniz ki, həm Yevlax camaatı, həm Xaçmaz camaatı minnətdarlıq bildirsin”.

Dövlətimizin başçısının vəzifəyə yeni təyin etdiyi gənclərə “Gedin işə başlayın və bir daha deyirəm ki, Prezidentin və xalqın yüksək etimadını doğruldun” – deməsi dövlət idarəçiliyində gənclərə göstərilən yüksək etimadın nümunəsidir.

Dövlətimizin başçısı ötən il Bakı Konqres Mərkəzində keçirilən Azərbaycan Gəncləri Gününə həsr olunmuş respublika toplantısında da ölkəmizin hərtərəfli inkişafında gənclərimizin çox böyük rolu olduğunu vurğulamışdı. Bu, əslində, gənclərimizin daha böyük hissəsinin dövlət idarəçiliyinə cəlb olunacağına bir mesaj idi. Çünki Prezident gənclərin müxtəlif sahələrdə uğurla fəaliyyət göstərdiyini, ölkəmizin ümumi inkişafına böyük töhfələr verdiyini də xatırlatdı. Dedi ki, bu gün Azərbaycan gəncləri cəmiyyətimizin fəal hissəsidir. Biz, haqlı olaraq, gənclərimizlə fəxr edə bilərik. Gənclər müxtəlif sahələrdə çox uğurla fəaliyyət göstərirlər, ölkəmizin ümumi inkişafına böyük töhfələr verirlər. Sonrakı proseslər də bunu təsdiqlədi. Son vaxtlar gənclərə böyük etimad göstərilərək mühüm vəzifələrə təyin edilməsi ölkə başçısının inam və etimadının təsdiqidir.

Gənclərimizin Vətənin müdafiəsi, ərazi bütövlüyümüzün təmin olunması yolunda canlarını qurban verərək, şəhidlik zirvəsinə yüksəlmələri onların hərbi vətənpərvərlik ruhunda yetişmələri üçün yaradılan əlverişli şəraitin göstəricisidir. Dövlət başçısı gənclərimizin bu qəhrəmanlığını, onların Vətənə, xalqa, millətə böyük məhəbbətlə bağlılığını, torpaqlarımızın azadlığı uğrunda canlarını qurban vermələrini yüksək qiymətləndirib: “Bizim gənclərimiz torpaq uğrunda, Vətən uğrunda vuruşurlar. Bizim şəhidlərimizin böyük əksəriyyəti gənclərimiz olubdur. Allah bütün şəhidlərimizə rəhmət eləsin! Bizim gənclərimiz hərbi qələbələrimizi şərtləndiriblər”.

Azərbaycanın müstəqillik tarixinə qürurverici fakt kimi həkk olunmuş 2016 -- cı ilin Aprel döyüşlərində gənclərimizin göstərdiyi qəhrəmanlıq heç zaman unudulmayacaq. Cəmi dörd gün davam edən həmin döyüşlərdə əsasən gənclərdən ibarət olan hərbçilərimiz düşmənlərimizə elə divan tutdular ki, hələ də özlərinə gələ bilməyiblər. Ölkə Prezidenti də gənclərimizin bu şücaətini yüksək qiymətləndirib: “Aprel döyüşləri bizim şanlı tarixi qələbəmizdir və bu əməliyyatlarda iştirak edənlərin mütləq əksəriyyəti gənclərdir. Biz bu əməliyyat nəticəsində uzun illər ərzində işğal altında qalan torpaqları işğalçılardan azad etdik. O torpaqlarda -- Lələtəpədə, Füzuli, Cəbrayıl, Ağdərə rayonlarının dağlarında Azərbaycan bayrağını ucaltdıq. Bu, böyük tarixi qələbədir. Bu qələbə bir daha onu göstərdi ki, Azərbaycan xalqı işğalla heç vaxt barışmayacaq, Azərbaycan əsgəri, Azərbaycan zabiti Vətən uğrunda, torpaq uğrunda canından keçməyə hazırdır. Bu qələbə ermənilərin uzun illər ərzində yaratdıqları mifi tamamilə darmadağın etdi. Bu qələbə göstərdi ki, biz döyüş meydanında da onlardan üstünük. Bu qələbə göstərdi ki, ən əlverişsiz hərbi mövqelərdən əks hücum əməliyyatı apararaq biz çox strateji mövqelərə sahib olduq. Bu gün ordu quruculuğu istiqamətində atılan addımlar təbiidir, zəruridir. Çünki biz müharibə şəraitində yaşayırıq, müharibə hələ bitməyib. Biz hər an hazır olmalıyıq ki, torpaqlarımızı işğalçılardan azad edək”.

Göründüyü kimi, təməli ümummilli lider Heydər Əliyev tərəfindən qoyulan dövlətin gənclər siyasətini Prezident İlham Əliyev uğurla davam etdirir. Bunun nəticəsini hər bir gənc gündəlik həyatında hiss edir. Bu gün Azərbaycan gəncləri bütün sahələrdə özlərini doğruldurlar. Bu da gənclərə qayğının dövlət siyasətinin mühüm tərkib hissəsinə çevrilməsindən irəli gəlir. Azərbaycan gəncliyi son illər ictimai həyatın bütün sferalarında daha çox fəallığı ilə diqqəti cəlb edir və siyasi, iqtisadi, humanitar, sosial tədbirlərin həyata keçirilməsində mühüm rol oynayır. Gənclərin fəaliyyəti üçün dövlətin yaratdığı geniş imkanlar nəticəsində onlar artıq cəmiyyətin avanqard qüvvəsinə çevrilib.

Təsadüfi deyil ki, ulu öndər Heydər Əliyev gənclərə xitabən “Biz müstəqil Azərbaycanın taleyini gələcəkdə sizə etibar edəcəyik, sizə tapşıracağıq”, – demişdir: “Siz Azərbaycanın bu günü və gələcəyisiniz. Sizin üzərinizə böyük vəzifələr düşür. Bu vəzifələr gələcəkdə daha da böyük olacaqdır. Siz, müstəqil Azərbaycanın XXI əsrdə yaradanlarısınız, quranlarısınız, inkişaf etdirənlərisiniz”.

Azərbaycanın beynəlxalq aləmdəki reytinqinin daha da yüksəlməsində, dünya dövlətləri sırasında öz layiqli yerini tutmasında bu gün aparıcı qüvvəyə çevrilmiş gənclərimizin rolu danılmazdır. Bu gün Azərbaycan gəncləri ölkəmizin suverenliyi və ərazi bütövlüyünün keşiyində ayıq-sayıq dayanır, peşəkar kadr olmaq üçün müxtəlif biliklərə yiyələnir, Dövlət bayrağımızı yüksəkliklərə qaldıraraq dünya səviyyəli idman yarışlarında, Olimpiya Oyunlarında fərqlənirlər.

Gənclik bir millətin gələcəyi üçün təməl daşıdır. Çünki hər bir ölkədə dövlətçiliyin, müstəqilliyin daha da möhkəmləndirilməsi, gələcəyin etibarlı təminatı intellektual səviyyəli gənc nəslin yetişdirilməsindən, onların aparıcı qüvvəyə çevrilməsindən asılıdır. Bu baxımdan, ölkəmizdə həyata keçirilən uğurlu gənclər siyasəti bir çox ölkələrə nümunədir. Məlum olduğu kimi, ulu öndər Heydər Əliyevin 1997-ci ildə imzaladığı sərəncamla “2 Fevral – Azərbaycan Gəncləri Günü” elan edilib. Həmin vaxtdan etibarən, ənənəvi olaraq hər il 2 fevral Azərbaycanda Gənclər Günü kimi təntənəli şəkildə qeyd olunur. Sevindirici haldır ki, Gənclər Günü MDB məkanında və Şərqi Avropa ölkələri arasında ilk dəfə olaraq məhz Azərbaycanda təsis olunub.

Dövlət quruculuğunda gənclərin iştirakına şərait yaradılması, gənclərin mənəvi inkişafı, onların vətənpərvərlik ruhunda tərbiyəsi, xarici ölkələrdə təhsil alması, sosial müdafiəyə ehtiyacı olanların problemlərinin həlli, gənclər təşkilatlarının daha da inkişafı üçün yaradılan yüksək şərait diqqət və qayğının nəticəsidir. Bu il fevralın 9-na təyin olunmuş parlament seçkilərində namizədliyi qeydə alınanlar sırasında gənclərin çoxluq təşkil etməsi, yeni formalaşacaq parlamentdə onlara göstərilən inam və etimadın bariz nümunəsidir.

Bütün bunlar bir daha təsdiqləyir ki, ölkədə həyata keçirilən gənclər siyasətinin məqsədi onların bütün təbəqələrinin hərtərəfli inkişafını, ölkənin ictimai-siyasi həyatında yaxından iştirakını, dünya birliyinə inteqrasiyasını təmin etməkdir. Dövlət başçımızın dediyi kimi, bizim gənclərimiz bu gün sərhədlərimizi qoruyur. Sərhədçilərimizin böyük əksəriyyəti gənclərdir. Bizim gənclərimiz ictimai asayişi qoruyur. Bu gün Azərbaycan dünya miqyasında ən təhlükəsiz ölkələrdən biridir. Bizim gənclərimiz müxtəlif sahələrdə uğurla fəaliyyət göstərirlər.

Əliqismət BƏDƏLOV

Xalq qəzeti.-2020.-1 fevral.-S.1.