Həzi Aslanovun yubileyi Belarusda qeyd olundu

Məlum olduğu kimi, Prezidenti İlham Əliyev ötən il dekabrın 29-da iki dəfə Sovet İttifaqı Qəhrəmanı, general-mayor Həzi Aslanovun 110 illiyinin keçirilməsi ilə bağlı sərəncam imzalamışdır. Sərəncamda deyilır: “…Dünyanın faşizmdən qurtulması uğrunda ağır döyüşlərdə Həzi Aslanov mahir hərbi sərkərdə istedadı nümayiş etdirmiş və hərb salnaməsində yeni parlaq səhifələr açmışdır. Onun göstərdiyi misilsiz şücaət və başçılıq etdiyi tank alayının müstəsna rəşadəti torpaqlarımızın işğaldan azad edilməsinə hər an hazır olan Azərbaycan Ordusunun bütün şəxsi heyəti üçün əsl qəhrəmanlıq nümunəsidir.”

Bu günlər ölkəmizdə və qəhrəmanın döyüş yolu keçdiyi məkanlarda bu yubiley təntənəli şəkildə qeyd olunur. Belə tədbirlərdən biri də Minskdə, Belarus Dövlət Böyük Vətən Müharibəsi Muzeyində Azərbaycanın Minskdəki səfirliyi tərəfindən keçirilmişdir.

Tədbirdə Belarusda akkreditə olunmuş diplomatik nümayəndəliklərin rəhbərləri, Belarus Ali Hərb Məktəbinin və Fövqəladə Hallar Nazirliyinin kursantları, yerli ictimaiyyətin nümayəndələri və diaspor təmsilçiləri iştirak etmişlər.

Mərasimdə çıxış edən Azərbaycanın Belarus Respublikasındakı səfiri Lətif Qəndilov Böyük Qələbənin 75 illiyi çərçivəsində keçirildiyini bildirmişdir. O demişdir: “Biz Həzi Aslanov kimi qəhrəmanlarımızın timsalında gənc nəslimizi yetişdiririk”.

L.Qəndilov “Baqration” əməliyyatının gedişində Həzi Aslanovun 35-ci qvardiya tank briqadasının Vileyka, Borisov, Smorqon və Minsk şəhərlərini azad etdiyini bildirmişdir. Səfir Həzi Aslanovun Vileyka şəhərini alman faşistlərindən bir güllə atmadan azad etməsinin onun böyük və istedadlı sərkərdə olmasının bariz nümunəsi olduğunu söyləmişdir. L.Qəndilov demişdir ki, yalnız 1944-cü ilin iyul ayında Həzi Aslanova Ali Baş Komandan İ.Stalin tərəfindən 8 dəfə təşəkkür elan edilmişdir. 34 yaşında iki dəfə Sovet İttifaqı Qəhrəmanı adına layiq görülmüş, ona general-mayor hərbi rütbəsi verilmişdir.

Belarus Müdafiə nazirinin müavini Sergey Patapenko çıxışında SSRİ xalqlarının çiyin-çiyinə döyüşdüklərini və Azərbaycan oğul və qızlarının qəhrəmanlıqları ilə fərqləndiklərini bildirmişdir. S.Patapenko ətraflı şəkildə Həzi Aslanovun Stalinqradda mühasirəyə düşmüş alman ordusuna köməyə gedən general Manşteynin qarşısını necə kəsdiyi haqqında və Baqration əməliyyatının həyata keçirilməsində göstərdiyi şücaət və qəhrəmanlıqlar barədə fəxrlə danışmışdır.

Belarus XİN-in xüsusi tapşırıqlar üzrə səfiri İqor Miqidoviç demişdir ki, Həzi Aslanov ölməz qəhrəmanlığı ilə Böyük Vətən müharibəsinin şərəfli səhifələrini yazmışdır.O, Həzi Aslanovun rəhbərliyi ilə təkcə Belarusun Borisov şəhərinin azad edilməsi əməliyyatında düşmənin 8 min nəfər şəxsi heyətinin məhv edildiyini xatırladıb: “Belarus xalqı iki dəfə Sovet İttifaqı Qəhrəmanı Həzi Aslanovu hörmətlə xatırlayır. Belarusun tarixinə qardaş Azərbaycandan olan qəhrəmanların adları əbədi yazılmışdır”.

“Belaya Rus” İctimai Birliyinin sədri Qennadi Davıdko, Belarus Veteranlar Cəmiyyətinin sədri İvan Qordeyçik tədbirin keçirilməsinə görə səfirliyə təşəkkürlərini bildirdilər. Belə tədbirlərin keçirilməsinin xalqlarımız arasında münasibətlərə əvəzsiz töhfə olduğunu dedilər.

Səfir L.Qəndilov Azərbaycan qəhrəmanının xatirəsini əziz tutduqlarına, respublikamızın suverenliyini və ərazi bütövlüyünü dəstəklədiklərinə görə Belarus xalqına və Prezident Aleksandr Lukaşenkoya təşəkkünü bildirmişdir. Tədbirin davamında Həzi Aslanova həsr olunmuş sənədli və bədii filmlər nümayiş etdirilmişdir. Tədbir iştirakçıları filmləri böyük maraqla izləmiş və alqışlarla qarşılamışlar.

Tədbir iştirakçıları, eyni zamanda, Belarusun azad olunmasında iştirak etmiş, Sovet İttifaqı Qəhrəmanı olan 14 azərbaycanlının şəkillərindən ibarət stendlə tanış olmuş və birgə fotoşəkil çəkdirmişlər. Tədbirin sonunda səfirlik tərəfindən ziyafət təşkil olunmuşdur.

M.MÜKƏRRƏMOĞLU,

Xalq qəzeti 2020.- 29 fevral.- S.15.