Prezident İlham Əliyev: “Biz sözümüzü tutan ölkəyik”

Torpaqlarımızı mütləq azad edəcəyik!

Məlum olduğu kimi, qlobal və regional münaqişələr hələ də bəşəriyyəti təhdid edən əsas faktorlardan biridir. Təkcə Yaxın Şərq deyil, həm də öz qaynar etno-siyasi intriqaları ilə həmişə gündəmdə olan Qafqaz regionu, xüsusilə, Cənubi Qafqaz bu gün də ən böyük və müxtəlif siyasi “dəyirmi masaların” əsas müzakirə mövzusudur. Məsələ bundadır ki, dövlətlərin suverenliyi və daxili işlərinə müdaxilələr, beynəlxalq hüququn norma və prinsiplərinə ikili yanaşma, həmçinin beynəlxalq münaqişələr, birtərəfli iqtisadi sanksiyalar, dözümsüzlük və humanitar böhran vəziyyəti daha da kəskinləşdirir. Faktiki olaraq, Ermənistanın Azərbaycanın tarixi ərazilərinin ekspansiyasına, əhalimizə qarşı etnik təmizləmə və maddi-mədəniyyət nümunələrinə qarşı vandalizm siyasətinə beynəlxalq təşkilatlar tərəfindən adekvat cavab verilmədikcə, regionda sabitliyin kəskin pozulması ehtimalı yüksəlir.

Bu gün Azərbaycanın hərtərəfli və dinamik şəkildə inkişafı, müstəqil, çoxşaxəli və milli maraqlara söykənən xarici siyasət kursu onun Cənubi Qafqaz regionunun ən çox inkişaf etmiş ölkəsi olaraq qalmasını təmin edib. Qısa müddətdə Ermənistanı darmadağın etmək üçün bütün imkanlara malik olan Azərbaycan beynəlxalq sülh çağırışlarına hələ də təmkinlə cavab verməkdədir. Lakin bunun qarşılığında qarşı tərəfdən real addımlar atılmır, işğal siyasəti davam etdirilir.

İyulun 6-da Prezident İlham Əliyevin Azərbaycan televiziyalarına genişməzmunlu müsahibəsində Ermənistan–Azərbaycan, Dağlıq Qarabağ münaqişəsinə, ATƏT-in və bir sıra beynəlxalq təşkilatların fəaliyyətinə dair önəmli məqamlara toxundu.

Öncə onu qeyd edək kİ, bu günlərdə Qoşulmama Hərəkatının sədri statusunda Prezident İlham Əliyevin BMT Baş Assambleyasının xüsusi sessiyasının keçirilməsi barədə təşəbbüsünün BMT-nin üzvü olan 130-dan çox dövlət tərəfindən dəstəklənməsi beynəlxalq ictimaiyyət tərəfindən ölkəmizə, eləcə də dövlətimizin başçısına olan böyük etimadın və hörmətin növbəti təsdiqi kimi tarixiləşdi. Lakin Azərbaycanın diplomatiya sahəsində uğurlarını həzm edə bilməyən Ermənistan, təbii ki, əsl sifətini göstərərək, bu təşəbbüsə qarşı çıxdı və bu, gözlənilən idi.

Dövlət başçısı bu məsələyə xüsusi toxunaraq bildirdi ki, Ermənistanın təşəbbüsün əleyhinə olmasının əsas səbəbi təcavüzkar ölkədə hökm sürən və dövlət tərəfindən təbliğ edilən Azərbaycanafobiyadır. Azərbaycan dövlətinə, Azərbaycan xalqına nifrətin təzahürü olmaqla yanaşı, bu təşəbbüsün əleyhinə çıxmaq ağılsızlıqdır və qeyri-rasional düşüncənin məhsuludur. Dövlət başçısı qeyd etdi ki, əslində, Ermənistan özünü çox gülünc vəziyyətə qoydu. Bizim təşəbbüsümüzü 130-dan çox ölkə rəsmən dəstəklədi, özü də fərdi qaydada. Təkcə bu fakt onu sübut edir ki, Ermənistan nəinki işğalçılıq siyasəti aparır, həm də dünya siyasətində normal təşəbbüslərin belə üzərinə gedərək, onların reallaşmamasına çalışır.

Azərbaycan Prezidenti xatırlatdı ki, doqquz il bundan əvvəl, yəni 2011-ci il oktyabrın 24-də ölkəmiz 2012-2013-cü illər üzrə BMT Təhlükəsizlik Şurasının qeyri-daimi üzvlüyünə keçirilən seçkilərdə BMT-yə üzv olan 193 dövlətdən 155-nin dəstəyi ilə inamlı qələbə qazanmışdır. Həqiqətən də, BMT Təhlükəsizlik Şurasına qeyri-daimi üzv qəbul olunması Azərbaycanın diplomatiya tarixində əldə edilmiş ən böyük nailiyyətlərdən biri olmaqla, ölkəmizin son illər dünya miqyasında artan siyasi nüfuzunun bariz nümunəsidir. Prezident İlham Əliyev bildirdi ki, o zaman Azərbaycandan əvvəl Ermənistan öz namizədliyini vermişdi: “...Ancaq görəndə ki, biz namizədliyimizi verdik, bizim qarşımızda aciz olduqlarını başa düşdülər və namizədliklərini sakitcə geri götürdülər – yəni, o diplomatik döyüş arenasından qaçdılar. Ondan beş il sonra döyüş meydanından qaçdılar və beləliklə, Azərbaycan işğal edilmiş torpaqların bir hissəsini işğalçılardan azad etdi. Ona görə bu, 10 ildən sonra yenidən bizə verilən böyük beynəlxalq dəstəkdir. Mən öz ölkəmizi heç kimlə müqayisə etmək istəmirəm. Amma hesab etmirəm ki, bir çox ölkələr BMT-də bu qədər dəstək qazana bilər. Bu, yenə də bizim dürüstlüyümüzün, sözümüzə əməl etməyimizin nəticəsidir. Mən dəfələrlə demişəm, bizim sözümüz imzamız qədər təsirlidir və bunun təsiri eynidir. Biz sözümüzü tutan ölkəyik.”

Hazırda Ermənistanda faşizm, milli ayrı-seçkilik ideologiyasının dövlət səviyyəsində qəbul olunduğunu vurğulayan Prezident İlham Əliyev xatırlatdı ki, düşmən ölkədə rejim dəyişə bilər, amma bu ölkənin faşist ideologiyası mahiyyəti dəyişməz olaraq qalır: “Faşist Njdeyə abidə ucaldan və bu abidəni müdafiə edən faşistdir. Bunu biz deyirik və artıq dünya miqyasında bu fakt haqqında kifayət qədər məlumat var. Mən bu məsələni qaldırmayana qədər heç kim bu haqda danışmırdı. Mən bu məsələni qaldırdım və buna geniş beynəlxalq dəstək təmin edildi. İndi artıq hər kəs bilir ki, Njde faşist olubdur. Bu faşist onların qəhrəmanlıq simvoludur. Onların işğalçılıq siyasəti ifşa edilib. Artıq son vaxtlar bütün aparıcı beynəlxalq təşkilatların sənədlərində Azərbaycanın ərazi bütövlüyü birmənalı şəkildə dəstəklənir və işğal haqqında kifayət qədər dolğun məlumat var.”

Ermənistan daxilində demokratiyanın, insan haqlarının pozulması hallarının geniş vüsət alması və Avropa təşkilatlarının bütün bunlara görməzlikdən gəlməsinə münasibət bildirən dövlət başçısı bildirdi ki, bunun əsas səbəbi erməni lobbisi və onun maliyyə vəsaitidir. Erməni lobbisi Ermənistanı bütün təşkilatlarda müdafiə edir: “Mən bunu şəxsən Avropa Şurası Parlament Assambleyasında Azərbaycan nümayəndə heyətinin başçısı kimi görmüşəm. Yəni, Ermənistan tamamilə tənqiddən kənarda idi. O vaxt ermənipərəst deputatlar və əslən Avropa ölkələrindən olan varlı ermənilər bütün imkanlardan, öz maliyyə imkanlarından istifadə edib Ermənistanı bütün tənqidlərdən qoruyurdular”.

Bu gün Ermənistan hakimiyyəti istənilən imkandan istifadə etməklə Azərbaycan həqiqətlərini ört-basdır etməyə, öz işğalçı, terrorçu və cani imiclərini pərdələməyə çalışsalar da, dünyanın mütərəqqi qüvvələri bunları bilməkdədir. Sözdə insan haqları müdafiəçisi kimi görünməyə çalışan Paşinyan iqtidarı Ermənistanın keçmişdə etdiyi cinayətlərə şərik olmamaqdan ötrü nəinki heç bir addım atmır, əksinə, bütün bu olanlarda öz günahlarına müxtəlif don geyindirmək, işğala haqq qazandırmaq siyasətini daha da təkmilləşdirməyə çalışırlar. Məsələn, Paşinyan iqtidarının təmsilçiləri demokratik imicə bürünməyə cəhd göstərsələr də, onların tarixində qara ləkə kimi yerini bərkidən Xocalı soyqırımını danmağa cəhd etmələri, etnik təmizləmə və işğala bəraət qazandırmaları günün reallığıdır.

Azərbaycan Prezidenti bu məsələ ilə bağlı bildirdi ki, Ermənistanda insan haqlarının və demokratiyanın pozulması bu günün işi deyil və bu ölkədə heç vaxt demokratiya olmayıb, çünki Xocalı soyqırımını törədən faşistlər demokrat ola bilməz. Eləcə də, başqasının torpağına göz dikən, bir milyon insanı evsiz-eşiksiz qoyan ölkə demokrat ola bilməz. Dövlət başçısı qeyd etdi ki, bir milyon Azərbaycan vətəndaşının və Ermənistanda yaşayan azərbaycanlıların elementar insan haqlarını pozmasına baxmayaraq, ermənilərə himayədarlıq edənlər, ilk növbədə, erməni lobbisi, onun pulları, ondan sonra Ermənistan hökumətinin Avropada çirkin lobbiçilik fəaliyyəti onları həmişə bu tənqiddən qoruyurdu. Prezident İlham Əliyev vurğuladı ki, bu fəaliyyət Avropada geniş araşdırılmalıdır: “… Bizdə kifayət qədər siqnallar var ki, bəzi siyasi xadimlər, deputatlar, bəzi Avropa ölkələrinin hökumət üzvləri Ermənistana xüsusi münasibət bəsləyirlər. Elə adamlar var ki, Dağlıq Qarabağa yüzlərlə səfər edib. Bunun arxasında nələr dayanır, hamımız yaxşı başa düşürük. Ona görə Avropanın hüquq-mühafizə orqanları bu məsələni, Ermənistan hökumətinin Avropada korrupsiyanın yayılmasına verdiyi dırnaqarası töhfəni, əlbəttə ki, Ermənistanın riyakar siyasətini araşdırsınlar. Çünki o, hər bir güc mərkəzinə o güc mərkəzinin eşitmək istədiyini deyir yalandan. O, bir neçə stulda oturmaq istəyir. Bu günə qədər buna müvəffəq olub. O, saxta tarixi, uydurulmuş, yüz il bundan əvvəl dırnaqarası hadisələri – soyqırımı istismar etmək istəyir. Özündən qurban, yazıq bir xalq düzəltmək istəyir. Halbuki hər kəs yaxşı bilir ki, ermənilər bizə qarşı soyqırımı törətmişlər. Budur, əsas amillər”.

Son Münxen Təhlükəsizlik Konfransındakı debatda Azərbaycan Prezidentinə bütün intellektual kriteriyalarda açıq-aşkar uduzan Nikol Paşinyan sələflərinin düşüncə tərzindən heç nə ilə fərqlənmir. N.Paşinyan Sarkisyan və Köçəryandan mahiyyətcə fərqlənməsə də, ən azı öz intellektual bəsitliyini gizlədə bilməməkdə də mahir olmadığını sübut etdi. Azərbaycan Prezidentinin xatırlatdığı Kürəkçay müqaviləsi faktının üzərindən keçmək istəyən, lakin daha dərin bir tarixi bataqlığıa düşən Paşinyan “Böyük Tiqran”a baş vurmaqla nəinki həmin debatın dinləyici auditoriyasının gülüşünə səbəb oldu, həm də Ermənistanın özündə belə qeyri-ciddi siyasətçi adlandırılaraq sərt tənqid olundu.

Prezident İlham Əliyev müsahibəsində bir daha Münxen Təhlükəsizlik Konfransındakı Kürəkçay sülh müqaviləsi haqqında çıxışını yada salaraq diqqətə çatdırdı ki, sənəddə açıq-aydın göstərilir müqaviləni kim bağlayıb, nə vaxt bağlayıb və erməni xalqı haqqında orada, ümumiyyətlə, söhbət belə getmir: “...Mənim çıxışımdan sonra Ermənistanda Kürəkçay sülh müqaviləsini əzbərləyirlər. Bu müqaviləni bir tərəfdən İbrahim xan və digər tərəfdən Rusiya generalı imzalayıblar. İbrahim xan Qarabağlı və Şuşalı – onun vəzifəsi haqqında bax, bu epitetlər, bu sözlər deyilmişdir. Beləliklə, bu tarixi həqiqət, əlbəttə ki, Ermənistan rəhbərliyi üçün gözlənilməz idi, yəqin bu tarixi bilmirdilər”.

Baxın Ermənistan rəhbərliyinin tarixi saxtalaşdırmaq səyi hansı məcrada irəliləyirsə, münaqişəni uzatmaq, status-kvonu saxlamaq, Azərbaycana qarşı ekspansiya siyasətini davam etdirmək cəhdləri də həmin çərçivədə reallaşdırılır.

Bu baxımdan, bir sıra beynəlxalq təşkilatların təmsilçilərinin terrorizmi, separatizmi dəstəkləyən, etnik təmizləmə və işğal həyata keçirən bir dövlətin siyasətinə qarşı konkret sərt mövqe, gərəkirsə, real təzyiq göstərmək təklifləri ilə çıxış etmələri əvəzinə Azərbaycandakı demokratiyadan danışmaları ədalətsiz yanaşmanın göstəricisidir. Ermənistanla bağlı əməli iş, təzyiq metodlarının zamanı gələndə nədənsə susmağa üstünlük verən beynəlxalq təşkilatların bəzi təmsilçiləri ermənilərin faktiki olaraq lobbiçiliyini edir və bu böyük korrupsiya ssenarilərinin tərkib hissəsinə çevrilirlər.

Beynəlxalq təşkilatların bu istiqamətdə fəaliyyətsizliyini ciddi tənqid edən və Ermənistanda baş verən hadisələrə heç bir reaksiya vermədiyini bildirən Prezident İlham Əliyev haqlı olaraq sual edir ki, haradadır ATƏT-in media üzrə nümayəndəsi? Hansı ki, gecə-gündüz Azərbaycan haqqında iftiralar uydurur və indi dəridən-qabıqdan çıxır ki, öz vəzifəsində qala bilsin.”...Niyə səsini çıxarmır? Niyə həbsxanada jurnalist öləndə səsini çıxarmayıb? Niyə pozuntular olanda səsini çıxarmayıb? Haradadır Avropa Şurası? Niyə Ermənistan tənqid olunmur? Niyə Ermənistan üzrə, siyasi məhbus üzrə məruzəçi təyin edilmir? Mən bütün bu sualları verirəm və bu suallar cavabsız qalır, bu suallara cavab verilmir. Çünki sərf etmir. Nə cavab verəcəklər? Cavab verəcəklər ki, biz saxtakarıq? Deməyəcəklər. Sadəcə olaraq, susmağa üstünlük verirlər”.

Prezident İlham Əliyev ATƏT-in Minsk qrupunun bəyanatlarına münasibət bildirərək qeyd etdi ki, Azərbaycan dövləti 1992-ci ildən münaqişənin nizama salınması üçün yaradılmış və tərəfsiz vasitəçilik missiyasını öz üzərinə götürmüş ATƏT-in Minsk qrupundan başqa bəyanatlar, konkret bəyanatlar gözləyir və onu eşitmək istəyir: “Ermənistanın baş naziri deyir “Qarabağ Ermənistandır”. Buna mən cavab verirəm və lazımi cavab verirəm. Amma Minsk qrupu niyə buna cavab vermir? Niyə cavab vermir ki, bu ifadə, əslində, Minsk qrupunun formalaşdırdığı danışıqların mahiyyətini alt-üst edir, danışıqları faktiki olaraq əhəmiyyətsiz edir. Minsk qrupunun həmsədrləri buna adekvat reaksiya veriblər? Verməyiblər!”

Eyni zamanda, dövlət başçısı qeyd etdi ki, Ermənistan tərəfi iki ildir danışıqların formatını dəyişmək istəyir və bəyan edir ki, Azərbaycan qondarma Dağlıq Qarabağın qondarma, saxta, dırnaqarası liderləri ilə danışıqlar aparmalıdır. Buna adekvat cavab verilmir: “...Bəli, bəzi mücərrəd sözlərlə, nala-mıxa vurmaqla cavab verilir. Axı, o dövr keçibdir. Biz aydınlıq tələb edirik. Bu addımlar kim tərəfindən atılır? Ermənistan tərəfindən. Biz danışıqlar formatına da sadiqik, danışıqların mahiyyətini də əsas götürürük. Əlbəttə ki, o mahiyyətdə bizi heç də hər şey qane etmir. Ancaq biz demişik, bizi nə qane etmir və nə qane edir. Ermənistan nə edir? “Qarabağ Ermənistandır” deməklə, tamamilə danışıqların mahiyyətini yerə vurur. “Formatı dəyişmək lazımdır” fikri danışıqları əhəmiyyətsiz edir. Yəni, buna adekvat reaksiya verilməlidir, yoxsa yox?! Qondarma Dağlıq Qarabağ respublikasının saxta seçkiləri nəticəsində seçilməmiş saxta prezident Şuşada andiçmə mərasimi keçirir. Buna adekvat cavab verilir, yoxsa yox?!”

Dövlət başçısı vurğuladı ki, Azərbaycan dövləti təcavüzkarla təcavüzə məruz qalanın adını çəkməyi, o cümlədən ATƏT-in Minsk qrupundan daha ciddi, konkret və məqsədə ünvanlanmış bəyanatlar gözləyir: “...Ermənistan işğal edilmiş torpaqlarda qanunsuz məskunlaşma aparır. Mən bu məsələni dəfələrlə qaldırmışam. Bizim bütün beynəlxalq təşkilatlardakı nümayəndə heyətlərinin üzvlərinə göstəriş verilib ki, bu məsələ onların gündəliyində bir nömrəli məsələ olmalıdır. Bu məsələ ilə bağlı Minsk qrupunun həmsədrləri açıqlama verir, yoxsa yox?! ATƏT-in axırıncı faktaraşdırıcı missiyası işğal olunmuş torpaqlarda 10 il bundan əvvəl olub. On il keçib. Son bir neçə il ərzində biz onlara təkidlə deyirik ki, yeni missiya getməlidir. Bu 10 il ərzində Ermənistan Suriyadan və başqa yerlərdən erməniləri oraya gətirib, onları zorla saxlayır. Bizim şəhərlərimizin tarixi adlarını dəyişdirir, işğal edilmiş torpaqlarda kilsələr tikir. Yəni, sabah deyəcək ki, bu, erməni torpağıdır. Dəfələrlə demişik onlara. Reaksiya var? Yoxdur! Yəni,10 il ərzində faktaraşdırıcı missiyanı göndərmək olmaz? İstəmirlər. Gedib nə görəcəklər?! Görəcəklər ki, orada məskunlaşma gedir. Amma bunu 10 il bundan əvvəl öz məruzələrində əks etdiriblər. Yəqin ki, indi əks etdirmək istəmirlər. Bu haqda bəyanat verib Minsk qrupu? Verməyib!”.

Azərbaycan Prezidenti İlham Əliyev bildirdi ki, bu gün faktiki olaraq danışıqlar prosesi getmir. Ermənistan və Azərbaycan xarici işlər nazirlərinin videokonfranslarının heç bir əhəmiyyəti yoxdur və bu, sadəcə olaraq, Minsk qrupunun sanki fəaliyyətdə olduğunu göstərir. Azərbaycan danışıqları imitasiya üçün aparası deyil və biz danışıqları mahiyyət üzrə aparmaq istəyirik... Əks halda, mənasız danışıqların aparılmasına heç bir ehtiyac qalmayacaq: “Bax, biz Minsk qrupundan bunu gözləyirik və öz mövqeyimizdə möhkəm dayanmışıq, haqq-ədalət bizim tərəfimizdədir. Biz haqlı olmağımızı həm beynəlxalq arenalarda göstərmişik, həm də döyüş meydanında və heç kimin Aprel döyüşləri yadından çıxmasın”.

Beləliklə, dövlət başçısı İlham Əliyevin son müsahibəsindəki qətiyyətli fikirlər bunu deməyə əsas verir ki, Azərbaycan Prezidenti ölkə ictimaiyyəti ilə bu məsələdə tam olaraq eyni düşünür. Dövlət başçısının fikirlərindən aydın şəkildə sezildi ki, biz sülhə yönəlik siyasət apardığımız kimi, hərbi eskalasiyalara da tam hazırıq və pik həddə bu hüququmuzu tam əlimizdə saxlayırıq.

Anar TURAN

Xalq qəzeti 2020.- 14 iyul.- S.6.