Azərbaycan Ordusu düşmən təxribatının layiqli cavabını verdi

Prezident İlham Əliyevin vaxtında atdığı addımlar nəticəsində Ermənistanın niyyəti ifşa edildi

Azərbaycan həm hərb meydanında, həm də diplomatik cəhbədə işğalçı Ermənistanın dərsini verir. İyulun 12-də təxribata əl atan rəsmi İrəvan Milli Ordumuzun gücünü gördü, layiq olduğu cavabı aldı. Nazirlər Kabinetinin 2020-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasda Prezident İlham Əliyev bildirdi ki, Ermənistana sarsıdıcı zərbələr endirildi və bu zərbələr onlara yaxşı dərs oldu. Lazım olan vaxtda lazım olan addımların atıldığını və bundan sonra da atılacağını vurğulayan ölkə başçısı diplomatiyada daha fəal olmağın vacibliyini də önə çəkdi. Prezident İlham Əliyev xalq-dövlət birliyinin çox güclü olduğunu bildirməklə yanaşı, bir daha bəyan etdi ki, Azərbaycan dövləti Vətənimizi qoruyur və qoruyacaq.

Beynəlxalq hüquq müstəvisində Ermənistanı küncə sıxışdıran Azərbaycanın istər iqtisadi, istər hərbi, istərsə də diplomatiya sahələrində böyük uğurlara imza atması işğalçı ölkədə böyük narahatlıq, təşviş doğurur. Azərbaycanın uğurla həyata keçirdiyi hücum diplomatiyası sayəsində Ermənistanın onsuz da yaxşı olmayan beynəlxalq imici daha bərbad vəziyyətə düşür, onun işğalçı ölkə, terroru, soyqırımı tarix boyu siyasətinin əsas elementi olaraq istifadə etdiyi üzə çıxır.

Baş nazir Nikol Paşinyanın hakimiyyətə gəlişindən sonra populist bəyanat və addımları ilə Ermənistan, sözün əsl mənasında, dalana dirənmiş vəziyyətdədir və ən əsası, işğalçı dövlətin Dağlıq Qarabağ münaqişəsi ilə əlaqədar dünyanı aldatmağa xidmət edən yalançı manevrlərinə artıq yer qalmamışdır və diqqəti daxilindəki problemlərdən, eləcə də işğalçılıq siyasətindən yayındırmağa can atır. Rəsmi İrəvanın iyulun 12-də Azərbaycanın Tovuz rayonu istiqamətində hərbi vəziyyəti gərginləşdirməyə çalışması məhz bu prizmadan qiymətləndirilməlidir.

Nazirlər Kabinetinin 2020-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasda Prezident İlham Əliyev bildirdi ki, Ermənistan bu təxribatın səbəbkarı kimi Azərbaycanı göstərməyə cəhd etmişdir, halbuki bu, heç bir məntiqə sığmır: “Bizim Ermənistanla Azərbaycanın dövlət sərhədində hər hansı bir hərbi məqsədimiz yoxdur. Bildiyiniz kimi, bir neçə il bundan əvvəl mənim tapşırığımla sərhədin bir hissəsinin qorunması Sərhəd Qoşunlarına həvalə olunubdur. Bu da onu göstərir ki, bizim bu istiqamətdə hər hansı bir hərbi planımız yoxdur və prinsip etibarilə hərbi məqsədlər nöqteyi-nəzərdən bunun heç bir əhəmiyyəti yoxdur”.

Bu gün dünya birmənalı şəkildə Ermənistanın Azərbaycan ərazilərini işğal etməsi faktını qəbul edir, beynəlxalq hüquq normalarına uyğun olaraq onu işğal altında saxladığı əraziləri azad etməyə çağırır. BMT, Avropa Şurası və digər nüfuzlu beynəlxalq təşkilatların qəbul etdikləri müvafiq qətnamələrdə, o cümlədən münaqişənin dinc yolla çözülməsi üçün vasitəçilik missiyasını yerinə yetirən ATƏT-in Minsk qrupunun irəli sürdüyü həll variantlarında Ermənistanın işğalçı dövlət kimi təqdim olunması bunun faktiki sübutudur.

Lakin beynəlxalq ictimaiyyət Ermənistanı işğalçı dövlət qismində qəbul etməsinə baxmayaraq, mənfur qonşumuz hələ də Azərbaycan ərazilərindən öz silahlı qüvvələrini çıxarmağa tələsmir, burada yaratdığı separatçı rejimə hərtərəfli dəstəyini davam etdirir, hətta onun fəaliyyətinə hüquqi don geyindirməyə çalışır. İşğalçılıq siyasətini ört-basdır etmək üçün hərbi təxribatlara əl atır, Azərbaycanın sərhəd ərazilərini atəşə tutur.

Ancaq bu dəfə də Ermənistanın nüfuzunu itirmiş Paşinyan hökuməti məqsədinə çata bilmədi. Prezident İlham Əliyev bəyan etdi ki, rəsmi İrəvanın çirkin əməldən sonra onun göstərişilə qisas əməliyyatının ikinci fazası başlamışdır: “Son iki gün ərzində düşmənə növbəti dəfə sarsıdıcı zərbələr endirildi. Bizdə olan məlumata görə, onlarla erməni hərbçi məhv edildi, onların sərhədboyu yerləşən dayaq məntəqələrinin böyük hissəsi darmadağın edildi. O cümlədən onların bəhanə kimi gətirdiyi məlum postun da bütün infrastrukturu darmadağın edildi, bu post artıq mövcud deyil. Düşmənin texnikası, silah-sursat anbarları, dayaq məntəqələri, avtomaşınlar, sisternlər, canlı qüvvənin yerləşdiyi yerlər Azərbaycan Ordusu tərəfindən dəqiq və sərrast atəşlə məhv edilmişdir”.

Ermənistanın Azərbaycana qarşı təcavüzü, erməni silahlı qüvvələri tərəfindən Dağlıq Qarabağ regionunun işğal edilməsi və bu bölgədə etnik təmizləmələr aparması hamıya məlumdur. Son günlərin hadisələri də erməni faşizminin mahiyyətini bir daha üzə çıxardı. Artıq heç kimə sirr deyil ki, işğalçı Ermənistan rəhbərliyi öz ambisiyaları naminə, nəyin bahasına olursa-olsun hakimiyyətdə qalmaq üçün başqa dövlətin sərhədlərini kobud şəkildə pozur. Ancaq erməni rəhbərliyi yenə də yanıldı. Prezident İlham Əliyev çıxışında bildirdi ki, son günlər ərzində Azərbaycan Ordusu bir daha öz üstünlüyünü göstərdi. “Mən hesab edirəm ki, bu əməliyyatın Azərbaycan Ordusunun şanlı tarixində öz yeri olacaq. Necə ki, 2016-cı ildə Aprel döyüşlərində düşmənə dərs verdik və Ağdərə, Füzuli, Cəbrayıl rayonlarının bir hissəsini düşməndən azad etdik. İki il bundan əvvəl – 2018-ci ildə uğurlu Naxçıvan əməliyyatı nəticəsində on min hektardan çox torpaq sahəsi Azərbaycan Ordusu tərəfindən götürüldü və işğalçılar o bölgələrdən qovuldu”. Ölkə başçısı, həmçinin Azərbaycan Ordusu tərəfindən götürülmüş strateji yüksəkliklərin Ermənistanın bir neçə yaşayış məntəqəsinə nəzarət etməsinə imkan verdiyini də bildirmişdir. Ermənistandan Dağlıq Qarabağa gedən avtomobil yolunun bizim nəzarətimizdə olduğunu vurğulayan ölkə başçısı əlavə etmişdir ki, vaxtilə – 1990-cı illərin əvvəllərində Naxçıvan ərazisinin bir hissəsini işğal etmiş Ermənistan qüvvələri həmin ərazilərdən qovuldu, çıxarıldı, o torpaqlarda Azərbaycan bayrağı ucaldıldı.

Azərbaycanın hücum diplomatiyasını, qlobal təhdidlərə qarşı adekvat reaksiyasını təmin edən dövlət başçısı İlham Əliyevin ölkəmizin diplomatik mövqeyini xeyli dərəcədə gücləndirməsi heç kimə sirr deyil. Milli mənafeləri önə çəkən bu qətiyyətli diplomatiya nəticəsində Azərbaycanın bölgədə, Avropa məkanında nüfuzu artmış, siyasi və iqtisadi mövqeyi möhkəmlənmişdir. Xüsusilə də Ermənistan-Azərbaycan, Dağlıq Qarabağ münaqişəsinin ədalətli həlli, diaspor və lobbi quruculuğu kimi prioritetlər həmişə aktual istiqamətlər olmuşdur. Bununla yanaşı, Prezident İlham Əliyev çıxışında belə mühüm vaxtda fəal diplomatik siyasətin yürüdülməsinin vacibliyini bir daha bildirdi: “Mən dəfələrlə demişəm ki, bizim diplomatiyamız hücum diplomatiyası olmalıdır, passiv, özünü müdafiə edən diplomatiya olmamalıdır. Kiminsə xoşuna gəlmək naminə öz sözünü deməkdən çəkinən diplomatiya olmamalıdır. Mən bunu dəfələrlə demişəm, həm müxtəlif tədbirlərdə, həm Xarici İşlər Nazirliyində, Azərbaycanın xarici ölkələrdəki səfirləri ilə görüşlərdə yol göstərmişəm ki, nə etməlisiniz”.

Hazırda dünyada ikili standartların tüğyan etdiyi, anti-Azərbaycan qüvvələrin ölkəmizin beynəlxalq aləmdə qazandığı uğurlara kölgə salmağa çalışdığı bir zamanda, “böyük güclər”in ölkələri öz təsir dairəsində saxlamaq cəhdlərinin gücləndiyi dövrdə düşünülmüş və milli maraqlarımızı özündə ehtiva edən xarici siyasətin daha da gücləndirilməsinə ehtiyac var. Prezident İlham Əliyev çıxışında verilən bəzi göstərişlərin həyatda öz əksini tapmadığını vurğulamaqla yanaşı, əlavə etdi ki, son vaxtlar bizim diplomatiyamız ölkəmizin uğurlu inkişafı ilə uzlaşmır, bəzi hallarda mənasız işlərlə, mənasız danışıqlarla məşğuldur.

Bir sözlə, acınacaqlı siyasi vəziyyətlə üzləşən N.Paşinyan növbəti təxribata əl atmaqla Ermənistanı iflasın astanasına sürükləyir. Böyük güclərin və erməni lobbisinin əlində oyuncağa çevilmiş Ermənistan rəhbərliyi belə təxribat törətməklə iyrənc və antihumanist məqsədlərini yerinə yetirməyə çalışır. Ancaq bu dəfə Azərbaycan işğalçının layiqli cavabını verdi. Xalqdan güc və ilham alan güclü ordumuz Ermənistana ağır zərbələr endirdi. Ən əsası, erməni işğalçıları Azərbaycan xalqının ordusunun və Prezidentinin ətrafında sıx birləşdiyinin də şahidi oldu. Nazirlər Kabinetinin 2020-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında “Əgər kimsə, hansısa vətənpərvər insan orduda xidmət etmək istəyirsə, mən bunu ancaq alqışlayıram”, – deyən Prezident İlham Əliyevin çağırışına səs verən minlərlə gənc Səfərbərlik və Hərbi Xidmətə Çağırış üzrə Dövlət Xidmətinin (SHXCDX) qeydiyyatda olduqları yerli idarə, şöbə və bölmələrinə gələrək könüllü olaraq orduda xidmət etmək haqqında öz arzularını ifadə edir və müvafiq qaydada qeydiyyata alınırlar. Əlbəttə, Azərbaycan Respublikasının ərazi bütövlüyünün müdafiəsi Azərbaycan Ordusu tərəfindən tam təmin edilir. Zərurət yarandığı halda ehtiyatda olan hərbi vəzifəlilər mövcud qanunvericiliyin tələblərinə əsasən SHXCDX -nin yerli struktur bölmələrinə çağırılaraq ölkənin müdafiəsinin və dövlətin təhlükəsizliyinin təmin edilməsi məqsədilə müvafiq tədbirlərə cəlb edilə bilərlər.

Beləliklə, Azərbaycan Ermənistanın Tovuzdakı çirkin təxribatına qarşı adekvat cəza tədbirləri həyata keçirir. Ermənistanın bu hadisənin məsuliyyətini Azərbaycanın üzərinə atmaq istəyi də fiaskoya uğradı. Prezident İlham Əliyevin vaxtında atdığı addımlar nəticəsində Ermənistanın niyyəti ifşa edildi. Güclü Ordumuzun son tutarlı addımları göstərdi ki, Azərbaycan torpaqlarını azad etmək üçün hər an istənilən tədbirləri görməyə hazırdır. Xalqın gücü və inamı, Prezident İlham Əliyevin qətiyyəti, Milli Ordumuzun rəşadəti məhz belə deməyə əsas verir.

Xalq qəzeti 2020.- 17 iyul.- S.3.