Vətəndaş məmnunluğunu ifadə edən sətirlər

30 ilə yaxındır ki, Ermənistan öz havadarlarının köməyi ilə Azərbaycan torpaqlarının, təqribən, 20 faizini işğal edib. Şübhəsiz, bu işğal faktı dinc yolla deyil, qanlı-qadalı döyüşlərin müşayiəti ilə baş verib. Şəhərlərimiz, kəndlərimiz darmadağın edilib, viran qoyulub, ötən əsrin ən dəhşətli faciələrindən olan Xocalı soyqırımı törədilib. On minlərlə dinc əhali öldürülüb, şikəst edilib, girov götürülüb. Dünya ictimaiyyəti isə müşahidəçi kimi, kənardan seyr edib, susub...

Doğrudur, işğal olunmuş torpaqların bir hissəsi mövcudluğunun axır günlərini yaşayan SSRİ rəhbərliyinin, sonuncu prezidenti Mixail Qorbaçovun razılığı və xeyir-duası ilə reallaşıb. Şübhəsiz, bu arada Azərbaycanın o vaxtkı rəhbərliyinin səriştəsizliyi, korafəhmliyi və satqınlığı da az rol oynamayıb.

Eləcə də, həmin dövrdə müxalifətdə olan və sonradan qeyri-qanuni yolla hakimiyyətə gələn AXC-Müsavat cütlüyünün yarıtmaz fəaliyyəti də ərazilərimizin düşmən tərəfindən işğal edilməsinə imkan verib. Təsəvvür edin ki, düşmən Dağlıq Qarabağ ətrafındakı rayonlarımızı bir-bir işğal edəndə hakimiyyəti zorla ələ keçirən AXC-Müsavat cütlüyü ölkədə vətəndaş müharibəsinə start vermişdi, daxildə qanlı “razborka” gedirdi. Ermənilər Kəlbəcəri işğal edəndə “özümüzünkülər” Gəncəni bombalayırdılar. Milli xəyanətkarlarımız alınmaz qala olan Şuşanı, ata malı kimi, ermənilərə satırdılar...

Belə bir acınacaqlı durumda Allahın bu millətə rəhmi gəldi, ulu öndər Heydər Əliyev xilaskar kimi siyasi hakimiyyətə qayıtdı. Ümummilli lider Azərbaycan Respublikasının bütün əyər-əskiklərinin aradan qaldırılması istiqamətində tədbirlər həyata keçirdi. Ermənistanla müharibədə atəşkəsə nail oldu. Birləşmiş Millətlər Təşkilatının Təhlükəsizlik Şurası Ermənistan qoşunlarının Azərbaycanın işğal olunmuş ərazilərindən tam və qeyd-şərtsiz çıxarılmasını nəzərdə tutan dörd qətnamə qəbul etdi. Aradan 27 il ötməsinə baxmayaraq, Ermənistan BMT TŞ-nin bu qətnamələrinə məhəl qoymaması bir yana qalsın, yenə də Azərbaycan torpaqlarını işğal etmək iddiasından da əl çəkmir. Ermənistan bir neçə dəfə, o cümlədən, 2016-cı ilin aprel, 2018-ci ilin may və nəhayət, bu ilin iyul a ylarında Azərbaycana qarşı təxribatlar törətmiş və hər dəfə işğalçı qoşunlar darmadağın edilərək geri oturdulmuş, xeyli ərazimiz düşməndən geri alınmışdır. Çünki bugünkü Azərbaycan güclü dövlətdir, qüdrətli ordusu var. Azərbaycan Silahlı Qüvvələri dünyanın 50 ən güclü ordusundan biridir, işğal olunmuş torpaqlarımızı geri almaq iqtidarındadır. Bugünkü Azərbaycan iqtidarının güclü iradəsi var və xalq onu yekdilliklə dəstəkləyir.

Azərbaycan Prezidenti İlham Əliyevin dediyi kimi, bizim siyasətimiz ədalətli siyasətdir. Bizim siyasətimiz həm də beynəlxalq hüquqa, tarixi ədalətə söykənir. Dünya dövlətlərinin də böyük əksəriyyəti hazırda Azərbaycanın haqq işini müdafiə edir. Bütün bunlar onu göstərir ki, Azərbaycan həm beynəlxalq müstəvidə, həm ölkə daxilində, həm də mənfur qonşumuzla mübarizədə böyük gücə çevrilib. Deməli, torpaqlarımızı dinc vasitələrlə olmasa da, hərbi yolla azad edəcəyimiz gün uzaqda deyil. Azərbaycan Prezidentinə ünvanlanmış vətəndaş məktublarında da bu əhval-ruhiyyə, minnətdarlıq hissi öz əksini tapır.

Ailəlikcə sağalıb evimizə qayıtdıq

Möhtərəm cənab Prezident!

Sizin Azərbaycana rəhbərlik etdiyiniz dövrdə ölkəmiz bütün sahələrdə tərəqqi edib və bu gün də inamla irəliləyir. Əsrlər boyu böyük tarixi və mədəni inkişaf yolu keçən qədim Azərbaycanın beynəlxalq aləmdə qazandığı etibar, söz sahibinə çevrilməsi, nəhəng dövlətlər arasında yüksək nüfuza malik olması Sizin dahiyanə təfəkkürünüz və böyük zəhmətinizin məntiqi nəticəsi kimi qəbul olunur.

Bütün dünyanı çənginə alan COVID-19 virusuna qarşı mübarizədə gördüyünüz tədbirlər bizi sevindirir və bundan qürur hissi duyuruq. Xüsusən də karantin dövrü ərzində vətəndaşlara göstərilən maddi və sosial yardımlar, maska istehsalı müəssisəsinin, modul tipli xəstəxanaların sürətli şəkildə istifadəyə verilməsi, yeni laboratoriyaların təcili olaraq alınıb ölkəmizə gətirilməsi və quraşdırılması təqdirəlayiqdir.

Bizim ailə üzvlərimiz bu günlərdə M.Ə.Mirqasımov adına Respublika Klinik Xəstəxanasında müalicə olunub evimizə yüksək əhval-ruhiyyə ilə qayıtdıq. Xəstəxanada bizə yüksək səviyyədə tibbi xidmət göstərildi.

Sonda böyük fəxr ilə qeyd etmək istəyirik ki, Azərbaycan Sizin rəhbərliyinizlə daha böyük nailiyyətlərə imza atacaq, yüksək uğurlar əldə edəcəkdir. Ölkəmizin inkişafı uğrunda apardığınız hər bir işdə Sizə uğurlar və cansağlığı arzulayırıq.

Hörmətlə,

Ceyran, Zenfira və Veydəddin PIRƏLIYEVLƏR,

Abşeron rayonu Xırdalan şəhəri

İnşallah, zəfər bizimdir

Cənab Ali Baş Komandan!

Yaşadığımız dünyanın indiki ağır vəziyyətində xalqımıza, Vətənimizə və biz gənclərə göstərdiyiniz maddi və mənəvi dəstəyinizə görə Sizə təşəkkür edirəm. Bir gənc olaraq tam gücümüzlə dövlətimizin və ordumuzun yanındayıq. Biz savaş əmrinizi səbirsizliklə gözləyirik. İnşallah, zəfər bizimdir!

Biz Vətənimizin əsgəriyik. Qələbə bizimdir, haqq bizim tərəfdədir. Birlikdə düşmənə layiqincə cavab verəcəyik. Şəhidlərimizin qanı yerdə qalmayacaq. Ordumuzun gücünü bütün dünya bilir. Vətəni qorumaq, dövlətçiliyimiz üçün mübarizə aparmaq bizim borcumuzdur.

Hörmətlə,

Elməddin MƏMMƏDLI, Yardımlı rayonu

Vətənə məhəbbət əməldə olmalıdır

Hörmətli Prezidentimiz!

Tariximizin hansı səhifəsini vərəqləsək, orada igid babalarımızın qəhrəmanlıqlarının izinə rast gəlirik. Çünki yaşadığımız torpağı qorumaq üçün Vətən uğrunda mübarizə əsas şərtdir. Bu gün zaman bizdən Vətənə məhəbbəti sözdə deyil, əməldə tələb edir.

Cənab Prezident, Siz bu sevgini gündəlik işinizdə, çəkdiyiniz zəhmətdə, qətiyyətli fəaliyyətinizdə nümayiş etdirirsiniz.

Mən ehtiyatda olan zabit kimi döyüş bölgəsinə yollanaraq Vətən qarşısındakı borcumu yerinə yetirməklə yanaşı, Sizə sədaqətimi də göstərmək, şəhidlərimizin qisasını almaq istəyirəm. Mübarizəmizdə daim Sizinləyik!

Hörmətlə,

Şahlar ASLANOV, Beyləqan rayonu, Birinci Aşıqlı kəndi

Dualarımız Sizinlədir

Hörmətli cənab Prezident!

Xalqımız Sizə arxalanır, hamımız Sizinləyik. Əminik ki, Sizin sayənizdə Qarabağı azad edəcəyik. Uca Yaradan bütün işlərinizdə köməyiniz olsun, Sizi bu xalqa çox görməsin! Siz xalq üçün gördüyünüz işlərlə adınızı artıq tarixə yazdırmısınız.

Xalqın igid oğlu, dualarımız Sizinlədir. Ulu öndərimiz Heydər Əliyevin başladığı yolu uğurla davam etdirməklə Azərbaycanı dünyaya tanıtdınız, ölkəmizi gözəlləşdirdiniz.

Sizin sayənizdə üçrəngli bayrağımız Qarabağda dalğalanacaq, həmin bölgələr də inkişaf edəcək, Azərbaycanın bir parçası kimi dünyada tanınacaq.

Uca Yaradan bu qələbəni qazanmaqda Sizə kömək olsun. Allah Sizi qorusun, cənab Prezident!

Hörmətlə,

Əsəd ƏHMƏDOV, Bakı şəhəri, Sabunçu rayonu

Sizin siyasətinizə inanırıq

Cənab Prezident!

Azərbaycan xalqı hər zaman erməni təxribatlarının şahidi olmuşdur. Mənfur düşmən bu gün də təxribatlarını davam etdirməkdədir. Ordumuzun sərrast atışları ilə susdurulan düşmən çoxlu sayda itki verməklə yanaşı, həm də əhəmiyyətli obyektlərini, texnikalarını itirdi və həmişəki kimi, digər dövlətlərdən, qurumlardan imdad diləməyə başladı. Budur, Azərbaycan Ordusunun qüdrəti. Məhz bu ordunun qüdrətinə əmin olan xalq Sizə və Sizin siyasətinizə güvənir. Sizə güvənən xalq, gənclər meydanlara axın edərək, həm dövlətə inamını, həm də orduya dəstəyini ifadə etdi. İnşallah, Sizin və ordumuzun sayəsində tezliklə bayrağımızı Qarabağda dalğalandıracağıq.

Hörmətlə,

Pərviz QULIYEV, Ağcabədi şəhəri

Vətən yolunda şəhid olmaq şərəfdir

Cənab Ali Baş Komandan!

Ulu öndərimiz Heydər Əliyevin və Sizin sayənizdə bu gün dünyanın önəmli enerji layihələrində Azərbaycanın rolu həlledicidir. Beynəlxalq güclərin Azərbaycanın iqtisadi və siyasi qüdrətini qəbul etməsinə və onunla hesablaşmasına dözməyən Ermənistan sərhədlərimizdə təxribat törətməyə cəhd etsə də, şanlı ordumuzdan layiqli cavab aldı.

Mən sovet ordusu sıralarında Uzaq Şərqdə xidmət etmişəm, hazırda ehtiyatda olan zabitəm. Hərbi taktika sahəsində bilik və təcrübələrimi bölüşmək, təmənnasız olaraq ordumuza xidmət etmək istəyirəm.

Vətən yolunda şəhid olmaq böyük şərəfdir. Mübariz İbrahimov və digər qəhrəmanlarımızın yüksəldiyi zirvəyə qalxmaq, xalq məhəbbətini qazanmaq, şəhidlərimizin qisasını almaq üçün müharibə zonasına – ön cəbhəyə getmək barədə əmrinizi gözləyirəm.

Allah Sizi və ordumuzu qorusun! Zəfər bizimdir!

Hörmətlə,

Eyyub HEYDƏROV, Bakı şəhəri, Yasamal rayonu

Beynəlxalq hüquq bizim tərəfimizdədir

Hörmətli cənab Prezident!

Dağlıq Qarabağ münaqişəsində beynəlxalq hüquq və dünya ictimaiyyəti Azərbaycanın tərəfindədir. Bu, Sizin illərdən bəri Azərbaycanın haqq səsini dünyaya çatdırmaq üçün gördüyünüz böyük işlərin nəticəsidir. Azərbaycanın inkişafı, nüfuzunun gündən-günə artması mənfur qonşularımızı narahat etməyə bilməz. Buna görə də Ermənistan hüquqi yollardan deyil, təxribatdan istifadə edir.

Ölkəmiz müstəqillik qazandığı vaxtdan sülh yolunun tərəfdarı olsa da, Sizin Qarabadağ məsələsində qətiyyətli mövqeyiniz var. Bu mövqe xalqın iradəsini ifadə edir.

Mən ehtiyatda olan zabitəm. Hərbi anda sədaqətimi bildirərək bu günlərdə cəbhə bölgəsində olan əsgər və zabitlərlə çiyin-çiyinə durmaq üçün döyüş bölgəsinə getməyə hazıram.

Hörmətlə,

Lətif İSMAYILOV, Bakı şəhəri, Nərimanov rayonu

Ordumuz müstəqilliyimizin qarantıdır

Hörmətli cənab Prezident!

Xalqımız ordumuzun dayağı, ordumuz müstəqilliyimizin qarantıdır. Mən fəxr edirəm ki, Azərbaycanın güclü ordusu var.

Cənab Ali Baş Komandan, qəhrəman ordumuz düşmənə bir daha öz gücünü göstərdi. Düşmən təxribatının qarşısı qətiyyətlə alındı. Güclü ordunun güclü əsgəri olaraq döyüşməyə, qələbə qazanmağa hazırıq. Hər birimiz o günü səbirsizliklə gözləyirik.

Cənab Ali Baş Komandan, Sizin əmrinizlə torpaqlarımızı düşməndən azad etməyə hazırıq.

Hörmətlə,

Anar ƏHMƏDOV, Samux rayonu

Təqdim etdi: Qüdrət PİRİYEV

Xalq qəzeti 2020.- 24 iyul.- S.5.