Azərbaycan Prezidenti Ermənistanın işğalçılıq siyasətini yenə ifşa etdi

Son günlərdə iyunun 18-də Şərq Tərəfdaşlığı ölkələrinin videokonfrans formatında keçirilmiş sammiti Azərbaycan Prezidenti İlham Əliyevin siyasi qətiyyətini və uzaqgörənliyini bir daha nümayiş etdirdi. Prezident İlham Əliyev çıxışında bildirdi ki, Azərbaycan Şərq Tərəfdaşlığının fəal üzvüdür. Avropa İttifaqı ölkələri ilə əməkdaşlıq ölkəmizin xarici siyasətində əsas prioritetlərdəndir. Azərbaycan Aİ-nin bir çox ölkələri ilə ikitərəfli əməkdaşlıq qurub, 9 dövlətlə strateji tərəfdaşlıq haqqında sənəd imzalayıb. Hazırda təşkilatla konstruktiv əməkdaşlıq şəraitində yeni tərəfdaşlıq sazişi üzərində iş gedir. Məsələyə münasibət bildirən Azərbaycan Dövlət İqtisad Universitetinin professoru, tarix elmləri doktoru Nizami SÜLEYMANOV bunları dedi:

– Aİ Azərbaycanın əsas ticarət tərəfdaşıdır. Beynəlxalq ticarət əlaqələrimizin təqribən 50 faizi Aİ ölkələrinin payına düşür. Azərbaycan uzun müddətdir ki, Avropa bazarlarına xam neft nəql edən etibarlı təchizatçıdır və Aİ-nin enerji təhlükəsizliyinin təmin olunmasında mühüm rol oynayır.

Prezident İlham Əliyev, təbii ki, bu dəfə də Ermənistanın işğalçılıq siyasətini ifşa etdi. Dövlət başçısı Ermənistanın Azərbaycan ərazilərini işğal etdiyini, həmin ərazilərdə qeyri-qanuni məskunlaşdırma siyasəti həyata keçirdiyini vurğuladı. İşğalla əlaqədar BMT Təhlükəsizlik Şurasının qəbul etdiyi məlum qətnamələrin hələ də Ermənistan tərəfindən icra edilmədiyini bildirdi: “Ermənistan bu qətnamələrə, habelə ATƏT, Qoşulmama Hərəkatı, NATO, Avropa Parlamenti və digər beynəlxalq təşkilatlar tərəfindən qəbul edilmiş müvafiq sənədlərə əməl etmək əvəzinə, işğal edilmiş ərazilərdə qeyri-qanuni məskunlaşma siyasəti həyata keçirir. Danışıqların mahiyyət və formatını məhv etməyə çalışan Ermənistanın baş nazirinin dediyinin əksi olaraq, Dağlıq Qarabağ Ermənistan deyil. Dağlıq Qarabağ Azərbaycandır! Və bütün dünya bunu belə tanıyır. Azərbaycanın ərazi bütövlüyü bərpa olunmalıdır”.

Azərbaycan liderinin tutarlı faktlarla məsələləri şərh etməsindən narahat olan Ermənistanın baş naziri Nikol Paşinyan isterik vəziyyətdə cavab verməyə çalışdı. Lakin onun gah ingilis, gah da erməni dilində danışması konfrans iştirakçılarının çaşqınlığına səbəb oldu və istehza doğurdu. O, ingilis dilində “danışarkən” “Dağlıq Qarabağ münaqişəsi”, ermənicə danışarkən isə “Artsax” ifadəsini işlətdi. Bu isə bir daha onu göstərir ki, Ermənistan rəhbərliyi hələ də işğal faktını gizlətməyə, işğalçı adını üzərinə götürmək məsuliyyətindən yaxa qurtarmağa çalışır.

Beləliklə, Paşinyan Aşqabadda keçirilmiş MDB dövlət başçılarının Zirvə görüşündə və Münxen Təhlükəsizlik Konfransında olduğu kimi, özünün savadsızlığı və siyasi kütlüyü ilə yenidən gülünc vəziyyətə düşdü. Onun Avropa İnsan Haqları Məhkəməsinin Ramil Səfərovla bağlı işinə toxunaraq qərarın mahiyyətini saxtalaşdırmağa və utanmadan iştirakçıları aldatmağa çalışması da Azərbaycan lideri tərəfindən ifşa olundu. Prezident İlham Əliyev bir daha söz alaraq səlis və mükəmməl ingilis dilində faktlara əsaslanaraq Paşinyanın yalanlarını alt-üst etdi: “Çıxışımda dediklərim beynəlxalq təşkilatların qətnamələrinə əsaslanan tarixi həqiqətdir. Birincisi, bu, hər kəsə bəlli olan bir faktdır ki, Ermənistan Azərbaycanın ərazisini işğal edib. İkincisi isə, Ermənistanın baş nazirinə terrorçuluq haqqında danışmağı məsləhət görməzdim, çünki erməni terrorçuları dünyaca məşhurdurlar. Parisin Orli Hava Limanında terror hadisəsi törədən Karapetyan soyadlı şəxs sonradan Ermənistana ekstradisiya edilib və Ermənistan prezidenti tərəfindən əfv edilib. Məhz buna görə belə məsələlər ətrafında müzakirə gedəndə ona sakit oturmağı tövsiyə edərdim”.

Paşinyanın çıxışı onun küçə adamı olaraq qaldığını nümayiş etdirdi. Paşinyan çıxışında Aİ-nin koronavirusla bağlı Ermənistana 92 milyon avro yardım ayırmasını yüksək qiymətləndirdi. Azərbaycan Prezidenti isə öz çıxışında bildirdi ki, Azərbaycan bu günə qədər 29 dövlətə humanitar yardım göstərib və pandemiya ilə mübarizə üçün Ümumdünya Səhiyyə Təşkilatına 10 milyon ABŞ dolları həcmində könüllü maliyyə yardımı ayırıb. Tək bu fakt Azərbaycanla Ermənistanın dünya üçün fərqini və dəyərini yaxşı izah edir. Azərbaycan Aİ ilə bərabərhüquqlu əməkdaşlıq edir. Ermənistan isə bu formatda əməkdaşlığa dilənçilik imkanı kimi baxır.

Sonda qeyd edək ki, Avropa İttifaqında ölkələrin ərazi bütövlüyünə hörmət prinsipi yüksələn xətlə inkişaf edir. Bu fikir Aİ Xarici İşlər Nazirləri Şurasının 11 may 2020-ci il tarixli “Şərq Tərəfdaşlığınin gələcəyi ilə bağlı yekunlar” sənədində də əksini tapıb. İnanırıq ki, beynəlxalq tədbirlərdə Azərbaycan Prezidenti tərəfindən gülünc vəziyyətə qoyulan Ermənistan son nəticədə işğalçılıq siyasətindən əl çəkmətyə məcbur olacaq.

Söhbəti qələmə aldı:

Paşa ƏMİRCANOV,

Xalq qəzeti. - 2020.- 23 iyun.- S.6.