Prezident İlham Əliyev Paşinyanı yerində oturtdu

Qərb Ermənistandakı repressiyalar və totalitar diktatura barədə şübhəli susqunluq nümayiş etdirir

Prezident İlham Əliyev bir gündə Ermənistanın baş naziri Nikol Paşinyanı iki dəfə yerində oturtdu: Birində açıq mətnlə “sakit otur” dedi; ikincidə isə əməli olaraq, imzaladığı sərəncamla yerində oturtdu. Prezident İlham Əliyev iyunun 18-də Şərq Tərəfdaşlığı ölkələrinin videokonfrans formatında keçirilən sammitində Nikol Paşinyanı yerində oturtduqdan dərhal sonra Göygöl rayonunun Gəncə–Kəlbəcər–Laçın (14 km)–Aşıqlı–Keşkü–Üçbulaq–Üçtəpə–Firuzabad avtomobil yolunun tikintisinə vəsait ayrılması haqqında sərəncam imzaladı. Söhbət hansısa yol tikintisindən getmir. Bu yol məhz Gəncədən Kəlbəcər-Laçına uzanır. Dövlət başçısı İlham Əliyev dünənki sammitdə erməni baş nazirinə dediklərindən sonra bir daha göstərdi ki, Azərbaycan suverenlik, ərazi bütövlüyü prinsiplərindən bir addım belə geri duran deyil.

Prezident İlham Əliyev Şərq Tərəfdaşlığı ölkələrinin sammitində vurğuladı ki, Azərbaycan və Avropa İttifaqı arasında paraflanan “Tərəfdaşlıq prioritetləri” sənədində hər iki tərəfin müstəqillik, suverenlik, ərazi bütövlüyü və beynəlxalq səviyyədə tanınmış sərhədlərin toxunulmazlığı prinsiplərinə sadiqdir. Həmçinin Ermənistanla Azərbaycan arasında olan münaqişə də eyni prinsiplər əsasında həll edilməlidir. Avropa İttifaqına üzv dövlətlərin və Şərq Tərəfdaşlığı ölkələrinin dövlət və hökumət başçılarının qatıldığı sammitdə Azərbaycan Prezidenti Ermənistan-Azərbaycan, Dağlıq Qarabağ münaqişəsinin həlli barədə ölkəmizin qəti və ədalətli mövqeyini bir daha beynəlxalq ictimaiyyətə çatdırdı və növbəti dəfə vurğuladı ki, “Dağlıq Qarabağ Azərbaycandır və bütün dünya bunu belə tanıyır”.

Videokonfrans zamanı Nikol Paşinyanın sərsəm replikası, təbii ki, cavabsız qalmadı. Azərbaycan Prezidentinin səsləndirdiyi təkzibedilməz faktlar və dəlillər Ermənistanın baş nazirini növbəti dəfə beynəlxalq ictimaiyyət qarşısında aciz vəziyyətə saldı. Prezident İlham Əliyevin şillə kimi cavabı sərt, qəti və arqumentlərlə erməni baş naziri yerində oturtdu: “Ermənistanın baş nazirinə irqçilik haqqında danışmağı məsləhət görməzdim, çünki erməni terrorçuları dünyaca məşhurdurlar. Parisin Orli Hava Limanında terror hadisəsi törədən Karapetyan soyadlı şəxs sonradan Ermənistana ekstradisiya edilib və Ermənistan prezidenti tərəfindən əfv olunub. Məhz buna görə belə məsələlər ətrafında müzakirə gedəndə ona sakit oturmağı tövsiyə edərdim.”

Beynəlxalq toplantılarda pafoslu çıxışlar etməklə, əslində, öz ölkəsində itirmiş olduğu nüfuzunu gücləndirməyə çalışan Nikol Paşinyanın düşdüyü bu acız durum Ermənistan müxalifətinin də diqqətindən yayınmadı. Sosial şəbəkələrdə Ermənistan baş nazirinin sammitdəki çıxışına rəy bildirən erməni müxalifəti onu sərt tənqid atəşinə tutdu. “Məxməri “inqilabçının” ucuz şouları davam edir” deyən kəsim Paşinyanın respublikanı idarə edə bilmədiyini, ölkəni bərbad vəziyyətə saldığını və iqtisadi böhranda boğulduqlarını, məhkəmələrdə ədalət prinsipinin korrupsiya bataqlığında basdırıldığını bildirirlər. Hakimiyyətə küçədən gəlmiş, küçə təfəkkürlü, yalnız dağıtmağı və məhv etməyi bacaran, hər şeyi sıfıra bərabərləşdirən, konfliktsiz mövcud ola bilməyən “inqilabçı” baş nazir Paşinyan isə özünün və hakimiyyətinin tənqid olunmasını həzm edə bilmir. Daha bir inqilab ərəfəsində olan Ermənistan Paşinyan əleyhdarlarının etirazları ilə qaynayır. Hazırda Ermənistanın siyasi gündəmində səriştəsiz Nikol Paşinyan hökumətinin istefası tələbinin əsas yer tutduğunu bütün dünya bilir.

Erməni mətbuatı Nikol Paşinyanın aqoniya vəziyyətində olduğunu bildirir və bunun əsas səbəbi kimi parlament müxalifətinin, xüsusilə də Çiçəklənən Ermənistan partiyasının və partiyanın sədri Qaqik Sarukyanın açıq şəkildə hökumətin tam tərkibdə istefaya getməli olduğu barədə bəyanatı göstərilir. Çünki müxalifətin istefaya çağırış tələbindən hiddətlənən Paşinyan narazıları susdurmaq, digərlərinin də gözünü qorxutmaq üçün Milli Təhlükəsizlik Xidmətinə Çiçəklənən Ermənistan partiyasının sədri Qaqik Sarukyana və tərəfdarlarına qarşı bir gündə üç cinayət işi açılmasına dair göstəriş verdi. Və çox qısa vaxtda Qaqik Sarukyanın deputat toxunulmazlığı ləğv olundu, üstəlik də Paşinyanın “Mənim addımım” fraksiyası 87 səslə cəmi 2 il öncə onları dəstəkləmiş olan Q.Sarukyanın azadlıqdan məhrum edilməsinə razılıq verdi.

Hadisənin sürəti insanı məəttəl qoyur: iyunun 5-də ÇEP-in Siyasi Şurasının iclasında hökumətin 100 faiz tərkibdə istefaya getməli olduğunu bəyan edən oliqarx, ölkədəki və parlamentdəki ən böyük müxalifətçi fraksiyanın rəhbəri, milyonçu Qaqik Sarukyan iyunun 16-da deputatlığa və azadlığa əlvida deməli oldu. Bu cür hadisələr Azərbaycanda yaşansaydı, indi bütün beynəlxalq təşkilatlar ayağa qalxıb insan hüquqlarının, söz və sərbəst toplaşma azadlığının pozulmasından danışar, saysız-hesabsız bəyanatlar verərdilər. Lakin Ermənistandakı siyasi gündəmə Avropa Xalq Partiyasının (EPP) sədri, Avropa Şurasının sabiq rəhbəri Donald Tuskdan başqa hansısa siyasi xadimin reaksiyasına hələ ki, rast gəlmirik. Paşinyan hökuməti Sarukyana qarşı hüquq çərçivəsində hərəkət etdiklərini bildirsə də, elə öz ölkəsindəki siyasi partiyalar və siyasətçilər bunun “siyasi təzyiq” vasitəsi, “repressiya”, “tiranlıq” olduğunu dönə-dönə bəyan edirlər. Paşinyanın əleyhdarlarını zərərsizləşdirmək üçün əlində olan bütün inzibati mexanizmlərdən istifadə etdiyi bildirilir.

Populist çıxışları ilə tanınan Paşinyanın hakimiyyətə gəldikdən sonra demokratiya adı altında ölkənin tanınmış siyasi və ictimai xadimlərinə qarşı yönəlmiş repressiv vasitələrdən geniş şəkildə istifadə etməsi və onları bir-bir sıradan çıxararaq zərərsizləşdirməsi heç kimə sirr deyil. Ermənistanın baş naziri öz siyasi rəqiblərini bir-bir həbsə atdırır, onları “asfalta uzatmaqla” hədələyir və gerçəkdə də asfalta uzadır. Paşinyan tərəfindən indiyədək Ermənistanın keçmiş rəhbərliyinə qarşı silsilə cinayət işləri açılıb və hazırda istintaqlar davam edir.

Ermənistanda baş verənlərin fonunda maraqlı olan və heyrət doğuran bilirsinizmi nədir? İstər Sarukyanla bağlı son hadisələr olsun, istər onun tərəfdarlarının parlament önündəki etiraz aksiyalarının qarşısının zorakılıqla alınması, ölkənin polis və təhlükəsizlik qüvvələri tərəfindən jurnalistlərə, dinc aksiya iştirakçılarına qarşı güc tətbiq edilməsi olsun, bütün bunlar nədənsə “azadlıq carçısı” olan bəzi beynəlxalq təşkilatların, beynəlxalq QHT-lərin, ümumən bir sıra Qərb təşkilatlarının səssizliyi fonunda müşahidə olunur. Halbuki, hadisələr zamanı insanların ifadə azadlığı, azad toplaşma hüququ, hüquq-mühafizə orqanları tərəfindən lüzumsuz yerə güc tətbiq olunmaması, KİV-in sərbəst fəaliyyətinə imkan yaradılması və s. kimi Qərbin “önəm verdiyi” bütün dəyərlər ayaq altına salınıb. Sual yaranır: Qərb niyə susur? ABŞ Dövlət Departamenti, Avropa Şurası Parlament Assambleyası, ATƏT-in Media Azadlığı üzrə nümayəndəsi, ABŞ-ın Ermənistandakı səfiri, Qərb ölkələrinin Ermənistandakı səfirlikləri özlərini elə aparırlar ki, sanki heç nə baş vermir. Əslində bu, ilk hadisə deyil ki, Qərb özünü görməməzliyə vurur. Ermənistanda müxalif siyasətçi və jurnalist Mher Yeqizaryan həbsxanada aclıq aksiyası nəticəsində vəfat etdikdə də Qərb reaksiya vermədi.

Hazırda Ermənistanda təkcə pandemiya böhranı deyil, həm də siyasi, iqtisadi böhran yaşanır. Ölkədə siyasi repressiyalar həyata keçirilir. Ermənistanda totalitar diktatura quran Paşinyanın yeganə məqsədi öz hakimiyyətinin ömrünü uzatmaq və rəqiblərinin bəyan etdiyi kimi ailəsinə sərvət toplamaqdır.

Amma nədənsə Azərbaycanofobiyadan ilhamlanan bəzi təşkilatlar, Avropa Şurası Parlament Assambleyası, ATƏT-in Media Azadlığı üzrə nümayəndəsi ölkəmizdə ən xırda məsələyə reaksiya verdikləri halda, Ermənistanda baş verən qanunsuzluğa qarşı bir dəfə də olsun hansısa ittiham səsləndirmirlər.

Jalə TOFİQQIZI,

M.Ə.Rəsulzadə bələdiyyəsi yerli sosial məsələlər daimi komissiyasının sədri

Xalq qəzeti. - 2020.- 21 iyun.- S.2.