Ermənistan siyasi partlayışın bir addımlığındadır

Dünyada baş alıb gedən ikili standartlar mərəzindən əl çəkə bilməyənlər bəzilərinə bir cür, başqa cür – ədalətsiz, haqsız mövqe sərgiləyirlər. Bunu hər zaman müstəqil dövlətçilik və inkişaf xətti ilə irəliləyən dövlətlərdən birinə çevrilən ölkəmizə qarşı münasibətdə açıq şəkildə görmüşük. Təəssüflər olsun ki, dünya birliyi, aparıcı beynəlxalq qurumlar, Qərb, Avropa təşkilatları tərəfindən bu münasibət müxtəlif formalarda yenə də davam etməkdədir. Bunu elə Avropa Şurası Parlament Assambleyasının, ATƏT-in Demokratik Təsisatlar və İnsan Haqları Bürosunun və digərlərinin timsalında daha aydın şəkildə görmək olar.

Belə qərəzli qurumlar hər fürsətdə Azərbaycana böhtan atmağa, imicinə, getdikcə artan nüfuzuna kölgə salmağa çalışır, guya, ölkəmizdə demokratiyanın, insan hüquqların pozulduğunu iddia edirlər. Halbuki, son 30 ildə hüquqları pozulmuş bir milyona yaxın azərbaycanlı -- qaçqın və məcburi köçkün haqqında bir kəlmə də olsun danışılmır, işğalçı və təcavüzkar Ermənistana “ gözün üstə qaşın var” demirlər. Əksinə, belə qərəzli beynəlxalq qurumlar daim işğalçı və təcavüzkar Ermənistanın mövqeyindən çıxış edir, ona dəstək nümayiş etdirir və bununla da özlərinin əsl mahiyyətlərini ortaya qoyurlar. Beynəlxalq təşkilatlar Ermənistanı nə qədər cidd –cəhdlə müdafiə etsələr də, bu ölkə bir o qədər beynəlxalq hüquqa qarşı hörmətsizlik edir. Hazırda Ermənistan siyasi partlayışın bir addımlığındadır.

Bir-birini əvəz edən hakimiyyət, hərbi xunta, cinayətkar rejim öz xalqının hüquqlarını hər gün pozmaqda, tapdalamaqdadır. Bu ölkədə baş verənlər bir daha təsdiqləyir ki, “demokrat” libasında “zühur” edən baş nazir Nikol Paşinyan demokratik dəyərlərin, insan hüquqlarının pozulması və tapdalanmasında sələflərindən--hərbi canilərdən, koçaryanlardan, sarkisyanlardan heç nə ilə fərqlənmir, əksinə, antidemokratikliyi, qəddarlığı ilə onlardan irəlidə gedir. O, hakimiyyətə gəldiyi gündən bütün siyasi rəqiblərinə qarşı repressiya, təqib siyasətinə keçib. Hətta, onu hakimiyyətə gətirən, lakin son zamanlar bəzi məsələlərdə mövqeləri uzlaşmayan tərəfdaşlarını da eyni üsullarla siyasi həyatdan təcrid edərək, təqib, təzyiq yolunu tutub.

Məlum olduğu kimi, bir neçə gün öncə, “Çiçəklənən Ermənistan” partiyasının sədri, ölkə parlamentindəki “Sarukyan” fraksiyasının lideri, milyonçu Qaqik Sarukyanın deputat toxunulmazlığı baş prokurorun təqdimatı ilə parlament tərəfindən ləğv edilib. O, ölkənin təhlükəsizlik qüvvələri tərəfindən ifadə vermək üçün istintaqa cəlb edilib və həbsi də istisna olunmur. Səbəb isə Sarukyanın məhz baş naziri tənqid etməsidir. Paşinyan hakimiyyətini tənqid etməsindən sonra təzyiqlərə məruz qalması baş verənlərin birbaşa siyasi təqib olduğunu sübut edir.

Ümumiyyətlə, hazırda Ermənistan insan haqlarının ən kobud şəkildə pozulduğu ölkələrdən biridir. Bunu yerli hüquq müdafiəçiləri də öz hesabatlarında ətraflı şəkildə göstərirlər. Bəs beynəlxalq hüquq-müdafiə təşkilatları, aparıcı Qərb qurumları necə? Əfsuslar olsun ki, adları çəkilən qurumlar da daxil olmaqla, digər beynəlxalq təşkilatlar Ermənistanda baş verən repressiyalarla bağlı bir kəlmə də danışmır, özlərini karlığa, korluğa, lallığa vururlar. Bəs onların bar-bar bağırdıqları dəyərlər, insan hüquqlarının aliliyinin təmin edilməsi, demokratik azadlıqların qorunması harada qaldı? Niyə özlərinin elan etdikləri, ortaya qoyduqları dəyərlərinə qarşı bu qədər dəyərsiz və sayğısız mövqe nümayiş etdirirlər? Səbəb aydındır: Paşinyanı hakimiyyətə gətirən dairələr müxtəlif vasitələrlə ona dəstək verməyə çalışırlar. Ancaq Paşinyan dayaz təfəkkürü, qeyri-ciddiliyi ilə həm özünü, həm də Ermənistanı çətin vəziyyətə salır.

Yeri gəlmişkən, bu günlərdə Şərq Tərəfdaşlığı ölkələrinin videokonfrans formatında keçirilən sammitində də bunun şahidi olduq. Bu sammit bir daha bədnam və sərsəm Paşinyanın timsalında Ermənistanın növbəti fiaskosuna çevrildi. Ermənistan baş nazirinin yersiz və avantürist replikasına cavabında Prezident İlham Əliyev Valday toplantısından, Aşqabad Sammitindən və Münxen Təhlükəsizlik Konfransından sonra Paşinyana və Ermənistana növbəti sarsıdıcı siyasi-diplomatik zərbəsini vurdu.

Həm Paşinyan, həm də Ermənistan uzun müddət növbəti uğursuzluğun təsirindən özünə gələ bilməyəcək.

Kamilə ƏLİYEVA,

Milli Məclisin deputatı, BDU-nun kafedra müdiri, professor

Xalq qəzeti. - 2020.- 21 iyun.- S.4.