Siz dünyaya nümunə göstərdiniz, cənab Prezident!

Dünyanın başı üzərində dörd aydır ki, bir kabus dolaşır – yeni növ koronavirus kabusu. Bu kabus bütün bəşəriyyəti “ölüm - qalım” dilemması qarşısında qoyub. Dünya, az qala, iflic vəziyyətinə düşüb. Təhlükəli xəstəliyə yoluxma, COVİD-19 pandemiyasından insan ölümü halları durmadan artır.

İlk dəfə Çin Xalq Respublikasının Vuhan vilayətindən dünyaya göz açan, son dərəcə təhlükəli olan bu virus, necə deyərlər, ildırım sürəti ilə dünyanın hər yerinə yayıldı. Xəstəliyin yayılma miqyası o qədər geniş idi ki, hətta dünyanın ən inkişaf etmiş dövlətlərinin səhiyyə sistemləri belə onun qarşısında davam gətirə bilmədi. Ölümsaçan infeksiyanın qabağını almaq, yoluxma zəncirini qırmaq mümkün olmadı.

Xəstəliyin ağır fəsadları üzə çıxdıqca koronavirusa qarşı mübarizə tədbirləri dünyanın, demək olar ki, bütün ölkələrində dövlət səviyyəsində təşkil olundu. Lakin bu xəstəliyə hərə bir cür yanaşdı. Bəziləri COVİD-19-u indiyədək elmə məlum olan infeksiyalardan hesab edərək bu işə başısoyuq münasibət bəslədilər, çox əhəmiyyət vermədilər. Şübhəsiz, belə qeyri-ciddi münasibəti pandemiya bağışlamadı, həmin dövlətlər çox ağır duruma düşdülər.

Lakin xəstəliyin amansızlığını qabaqcadan duyan ağıllı və tədbirli dövlət başçıları bu məsələyə çox ciddi yanaşdılar, sərt və önləyici tədbirlər görərək vəziyyəti öz nəzarəti altında saxlaya bildilər. İşə bu cür yanaşaraq, nikbinlik yaradan nəticələrə nail olmuş dövlətlərin arasında Azərbaycanımız xüsusilə seçilir. Dövlət başçımızın pandemiyaya qarşı mübarizədə çevik surətdə gördüyü preventiv tədbirlər öz bəhrəsini verdi. Sevindirici haldır ki, Azərbaycanın bu sahədə qazandığı uğurlar nəinki respublikada, hətta dünyanın çox yerində geniş əks-səda verir və təcrübəmiz öyrənilir. Vətəndaşlarımızdan və bir sıra xarici dövlətlərdən Prezident İlham Əliyevin ünvanına göndərilən saysız-hesabsız minnətdarlıq məktublarında da bu duyğular öz ifadəsini tapır. Onlardan bir neçəsini təqdim edirik.

Finlandiyadan məktub: Azərbaycanın bu bəladan ən az itkilərlə çıxacağına əminik

Möhtərəm cənab Prezident!

Biz Finlandiyada fəaliyyət göstərən Azərbaycan diaspor təşkilatları – Finlandiya Azərbaycan Assosiasiyası, Azərbaycan Qadınlar Cəmiyyəti, Finlandiya Azərbaycan Gənclər Birliyi Təşkilatı Sizin uzaqgörən və çevik qərarlarınız sayəsində ölkəmizdə COVID-19 pandemiyasının yayılmasının qarşısını almaq məqsədilə atdığınız addımları, xalqımızın sağlamlığının qorunması və rifahının daha da yaxşılaşdırılması üçün verdiyiniz mühüm qərarları, xaricdə yaşayan biz azərbaycanlıları diqqət mərkəzində saxlayaraq hər cür yardımların göstərilməsinə göstəriş verməyinizi yüksək qiymətləndir və minnətdarlığımızı bildiririk. Sizin harada yaşamasından asılı olmayaraq, bütün soydaşlarımıza verdiyiniz yüksək dəyər bizim Sizə olan inamımızı daha da möhkəmləndirir. Avropa ölkələri ilə müqayisədə Azərbaycanda COVID-19 virusuna yoluxma və bu virusdan ölüm hallarının dəfələrlə az olması Sizin müdrik qərarlarınız, yürütdüyünüz siyasət və gördüyünüz qabaqlayıcı tədbirlər sayəsindədir.

Cənab Prezident, çox sevindirici haldır ki, dünyada yaşayan bütün soydaşlarımız Sizin “Biz birlikdə güclüyük!” çağırışınız ətrafında sıx birləşdi. Əminik ki, Sizin və ölkəmizin Birinci vitse-prezidenti Mehriban Əliyevanın rəhbərliyi sayəsində Azərbaycan bu bəladan ən az itkilərlə tez bir zamanda çıxacaq. Bu nəcib işlərinizə görə Finlandiyadakı Azərbaycan icması adından Sizə və Mehriban xanıma təşəkkürümüzü bildiririk.

Hörmətlə,

Vasif Muradlı və Arzu Oqtay, Finlandiya Azərbaycan Assosiasiyası,

Finlandiya Respublikası, Espoo şəhəri.

Çindən məktub: Sizi çox sevir və dəstəkləyirik

Hörmətli cənab Prezident və Birinci vitse-prezident Mehriban xanım!

Sizi Çində yaşayan və pərəstişkarınız olan tələbələr adından salamlayırıq. Biz Çinin Quancou Universitetinin tələbələriyik. Bu gün Sizə məktub yazmaq imkanından şərəf hissi duyur və özümüzü xoşbəxt sayırıq. Bu fürsətdən istifadə edərək Sizə və ailənizə hər şeyin ən yaxşısını arzulayırıq.

Sizi uğurlu nailiyyətlərinizə görə təbrik edir və sülhsevər səyləriniz üçün Zati-alinizə təşəkkür edirik. Biz Sizi çox sevir və dəstəkləyirik. Hər zaman da dəstəkləyəcəyik. İnanırıq ki, böyük əməksevərliyiniz və müdrikliyiniz gələcəkdə xalqınıza daha xoşbəxt və daha parlaq həyat yaşadacaqdır.

Sizə bu işlərinizdə uğurlar arzulayırıq. Həyata keçirdiyiniz böyük işləri görmək üçün gələcəkdə Bakıya gəlməyi də planlaşdırırıq. Əgər Sizi gələcəkdə doğma şəhərimizdə görmək səadəti bizə nəsib olsa, gülərüz qonaqpərvərliyimizlə yanaşı, Sizə olan böyük hörmətimizi də məmnuniyyətlə nümayiş etdirərik.

Dünyada koronavirusun yayıldığı bir vaxtda Sizə, ailənizə və xalqınıza təhlükəsiz, sağlam həyat diləyirik!

Xoş günlər arzusu və hörmətlə,

Quancou Universitetinin tələbələri: Yanjie Qiao, Ren Zhi, Yanping Zhong, Xin Vang, Huan Zhang, Meng Vang, Yilian Gao, Caiyan Vu, Vei Qi.

Çin Xalq Respublikası, Quancou şəhəri.

Müraciətləriniz bizə toxtaqlıq verdi

Möhtərəm Prezidentimiz!

Bütün dünya təhlükəli virusa qarşı mübarizə aparır. Ölkələr tədbirlər görərək öz vətəndaşlarını xilas etməyə çalışır. Sizin qabaqlayıcı tədbirləriniz nəticəsində bizim vətəndaşlarımız bu bəlanı nisbətən yüngül itkilərlə keçirirlər.

Sizin və əziz Mehriban xanımın xalqa müraciəti qəlbimizi riqqətə gətirdi, bizə toxtaqlıq verdi. Bu müraciətlərdə bir daha xalqımızı necə sevdiyinizi, qeydinə qaldığınızı, onu bu bəladan qurtarmaq üçün necə çalışdığınızı göstərdiniz.

Sizin səmərəli fəaliyyətiniz nəticəsində, vaxtında qəbul olunan qərarlar sayəsində biz çətin günləri arxada qoyduq. Qısa zamanda səhiyyə, iqtisadiyyat, sosial sahədə görülən işləri təqdir edirik.

Mən on iki uşaq anasıyam, nəvə-nəticələrim var. Karantin rejimində onları görməmək mənə çətin olsa da, qaydalara riayət edib evdə qalıram. Bilirəm ki, Sizin sayənizdə bu çətin günlər tezliklə keçəcək.

Allahdan Sizə və ailənizə cansağlığı, uzun ömür arzulayıram. İnşallah, rəhbərliyinizlə bu təhlükə də sovuşacaq, xalqımız firavan günlərə dönəcəkdir. Mən də, ailəm də hər zaman Sizi dəstəkləyir, bundan sonra da dəstəkləyəcəyik.

Hörmətlə,

Zərnişan HÜSEYNOVA, Qəhrəman ana,

Neftçala rayonu, Xəzər kəndi.

Ölkəmizin üzərindəki qara buludların tezliklə çəkiləcəyinə inanıram

Möhtərəm cənab Prezident!

Dünyanı bürüyən COVID-19 pandemiyası dövründə ölkəmizdə qayğıya ehtiyacı olan təbəqələrin sosial müdafiəsini təmin etdiyinizə, iqtisadiyyatın təhlükəli riskdən qorunması yolunda həyata keçirdiyiniz tədbirlərə görə bir gənc olaraq Sizə minnətdarlığımı bildirirəm.

Ölkəmizə rəhbərlik etdiyiniz dövrdə xalqımızın rifah halının yaxşılaşdırılması, həyat səviyyəsinin yüksəldilməsi, insanların təhlükəsiz yaşayışı, əhalinin işlə təmin edilməsi, sağlamlığının qorunması üçün göstərdiyiniz hərtərəfli qayğı gözlərimiz qarşısında baş verib.

Əziz Prezidentim, Sizin bu ağır zamanda – pandemiya dövründə aztəminatlı ailələrə göstərdiyiniz qayğı xüsusilə diqqətçəkəndir. Bu yaxınlarda işsizliyə görə mən də 190 manat məbləğində birdəfəlik ödəniş aldım. Sözün düzü, bu, mənə xeyli kömək etdi, çətinliyimi qismən aradan qaldırdı.

Ölkəmizdə məlum səbəbdən işləyə bilməyən on minlərlə insana göstərdiyiniz qayğıya görə şəxsən öz adımdan və ailəmizin adından Sizə təşəkkürümü bildirirəm. İnanıram ki, ölkəmizin başı üzərini alan bu “qara buludlar” tezliklə çəkiləcək və Sizin rəhbərliyinizlə xalqımız daha gözəl günlər yaşayacaqdır.

Dərin hörmətlə,

Günay Şahin qızı ƏHMƏDOVA,

Ağdaş.

Sizə güvənirik

Çox hörmətli Prezident!

Ölkəmizdə şəhid ailələrinə olan yüksək münasibət Vətən yolunda həlak olanların ruhuna sonsuz ehtiram hissinizdən, şəhid ailələrinə olan böyük qayğınızdan irəli gəlir. Mən Heydər Əliyev Fondunun xəttilə müayinə və müalicə olunduğuma görə, Sizə və Mehriban xanım Əliyevaya sonsuz təşəkkürümü bildirirəm.

Əziz Prezidentimiz, ölkəmizdə koronavirusa qarşı mübarizə çərçivəsində vətəndaşların sağlamlığını düşünməyiniz, karantin dövründə maddi çətinliklərlə üzləşmiş ailələrə etdiyiniz yardımlar, pandemiyaya qarşı yüksək səviyyədə qabaqlayıcı tədbirlərin təşkili bir şəhid anası kimi ürəyimə rahatlıq gətirir.

Övladımın düşmənlə mübarizədə şəhid olması ilə nə qədər qürur duyuramsa, nəvə-nəticələrimin bu virusun qurbanına çevrilməsindən o qədər vahimələnirəm. Çox sağ olun ki, xalqımızı bu bəladan qorumaq üçün bütün imkanları səfərbər edirsiniz. Gördüyünüz bütün işlərə görə 117 ailə üzvüm – 17 övladım, 45 nəvə və 55 nəticəm adından Sizə dərin minnətdarlığımı bildirirəm. Azərbaycan xalqı hər bir işdə Sizə güvənir, dəstəyinizi, gücünüzü daim hiss edir, Sizinlə qürur duyur. Tanrı Sizi və xalqımızı qorusun!

Hörmətlə,

Saray FƏRZIYEVA, şəhid anası,

Astara rayonu.

Sizə min alqış olsun!

Hörmətli cənab Prezident!

Ölçüyəgəlməz xidmətlərinizə görə Sizə minnətdarıq. Mən gənc dövlətimizin dünya olkələri arasında böyük nüfuza malik olmasından qürur duyuram.

Siz xalqın çətin anlarında, təbii fəlakətlər zamanı vətəndaşın yanında oldunuz. Məcburi köçkünlərə qayğınız isə ölçüyəgəlməzdir. Münxendəki görüşdə Paşinyana dərs verməyiniz isə Sizə olan sevgimizi qat-qat artırdı.

Son zamanlar ölüm kabusuna çevrilmiş, dünya iqtisadiyyatını iflic vəziyyətə salmış, bəşəriyyətə qlobal təhlükə yaradan koronavirus pandemiyası ölkəmizə də təsirsiz ötüşməmişdir.

Mənim yaşım 65-i ötmüşdür. Pandemiya ilə mübarizə tədbirləri haqqında məlumatları, Sizin çıxışlarınızı mətbuatdan izləyirəm. Hər gün qürur hissi keçirirəm. Görürük ki, Sizin üçün hər bir Azərbaycan vətəndaşının sağlamlığının qorunması bu gün hər şeydən irəlidir. Mən də xalqımızı həmrəyliyə səsləyən “Biz birlikdə güclüyük!” çağırışı edən rəhbərə “min alqış olsun!” – deyirəm.

Yaranmış iqtisadi vəziyyətdə də Siz birinci növbədə vətəndaşlarımızı düşündünüz. Atdığınız hər bir addım bizdə nikbinlik yaradır.

Heydər Əliyev Mərkəzinin binasının üzərində pandemiyadan daha çox ziyan görən ölkələrin bayrağının dalğalandırılması Azərbaycanın bütün dünyada sülh, dostluq, tolerantlığın insanlığa sevgi mesajı idi.

Böyük Yaradan adı Azərbaycan dövlətçilik tarixinə əbədi həkk olunmuş ümummilli liderimiz Heydər Əliyevin davamçısı kimi Sizi hifz etsin!

Hörmətlə,

Kamil Həsənxan oğlu ƏHMƏDOV, Qubadlı rayonundan məcburi köçkün,

Sumqayıt şəhəri.

Təqdim etdi: Qüdrət PİRİYEV,

Xalq qəzeti.-2020.-1 may.-S.3.