Prezidentə təşəkkür məktubları: Siz xalqımızın xilaskarısınız, Allah da Sizi qorusun!

Azərbaycanda koronavirus pandemiyasına qarşı mübarizə davam etməkdədir. Prezident İlham Əliyevin rəhbərliyi ilə görülən ardıcıl tədbirlər nəticəsində artıq xüsusi karantin rejiminin yumşaldılması istiqamətində addımlar atılır. Bütün bunlar ölkədə görülmüş qabaqlayıcı tədbirlərin səmərəliliyindən xəbər verir. Prezident İlham Əliyev ayrı-ayrı görüşləri zamanı dəfələrlə bəyan edib ki, bizim əsas məqsədimiz yoluxma hallarında müşahidə olunan artımın qabağını almaq, yoluxma zəncirini qırmaq olub. Dövlət başçısı deyib: “Görülmüş bütün tədbirlər bu məqsədi güdürdü ki, biz bu vəziyyətdən az itkilərlə çıxaq, vətəndaşlara kömək göstərək, onları bu bəladan qoruyaq və onların sosial müdafiəsini təmin edək. Bu günə qədər həm məhdudlaşdırıcı tədbirlərin görülməsi, bu tədbirlərin mərhələ-mərhələ sərtləşdirilməsi, eyni zamanda, pandemiyadan ziyan çəkmiş sahələrdə çalışan insanların sosial müdafiəsinin təmin edilməsi, hesab edirəm ki, bizim düzgün siyasətimizi əks etdirir”.

Təbii ki, görülmüş tədbirlər bu gün öz müsbət nəticəsini verməkdədir. Neçə vaxtdır ki, Azərbaycanda COVİD-19-a qarşı mübarizədə müsbət dinamika özünü göstərir, xəstəlikdən sağalma halları yoluxma hallarını üstələyir. Bunu Azərbaycan dövlətinin, şəxsən Prezident İlham Əliyevin və Azərbaycan səhiyyəsinin böyük qələbəsi hesab etmək olar.

Prezidentin təşəbbüsü ilə həm də pandemiyadan ən çox zərər çəkən sahələrdə işləyən insanların əmək haqlarının əhəmiyyətli hissəsi dövlət tərəfindən qarşılanır. Bu kateqoriyaya aid olan 600 minə yaxın insan bu gün dövlətdən maddi dəstək alır. Dövlət sektorunda işləyənlərin əmək haqları tam ödənilir. Hazırda bir milyona yaxın insanın böyük əksəriyyəti işləmir, ancaq dövlət onların maaşını verir. Yəni, bu, bir daha Azərbaycan dövlətinin humanist mahiyyətini göstərir. Bir daha təsdiq olunur ki, Azərbaycan Prezidentinin siyasətinin mərkəzində Azərbaycan vətəndaşı dayanır.

Bu gün 20-dən çox dövlət xəstəxanasında koronavirus xəstələri müalicə olunur. Bu xəstəxanaların əksəriyyəti son 16 il ərzində tikilib. O cümlədən, 575 çarpayılıq “Yeni klinika” bu gün ölkəmizin ən müasir səhiyyə ocağıdır və indi orada 100- dən çox xəstə müalicə alır. Eyni zamanda, Prezident İlham Əliyevin təşəbbüsü ilə tikilmiş ATU-nun Tədris-Terapevtik və Cərrahiyyə klinikalarında da xəstələr müalicə alırlar. Bölgələrdəki mərkəzi rayon xəstəxanalarında, o cümlədən Goranboy, Qazax və Şəmkir şəhərlərindəki xəstəxanalarda da xəstələr yerləşdirilib. Dövlət başçısının göstərişi ilə hazırda ölkəmizdə modul tipli 10 xəstəxana da inşa edilməkdədir.

Son günlər ərzində Azərbaycan Prezidentinə ünvanlanan minlərlə məktub da göstərir ki, xalq dövlət tərəfindən görülmüş bütün bu tədbirləri, çox yüksək qiymətləndirir. Xüsusən, insanların sosial müdafiəsinin daha da gücləndirilməsi ilə bağlı tədbirlər insanlarımız tərəfindən razılıq hissi ilə qarşılanır.

Hacıqabul rayonundan 13 yaşlı Tahirov Emil Prezidentə təşəkkürünü belə ifadə edib: “Möhtərəm cənab Prezident! Sizi səmimi qəlbdən salamlayıram. Ölkəmizdə pandemiya ilə mübarizədə yaxşı nəticələr əldə olunmasına görə Sizə təşəkkür edirəm. Bu nəticələrdə Sizin böyük əməyiniz var.

Azərbaycanda təhsilə böyük diqqət göstərilir. Buna görə də Sizə və Mehriban xanıma minnətdarlığımı bildirir, yeni uğurlar arzulayıram. Hər şeyə görə çox sağ olun, əziz Prezidentimiz!”

Mingəçevir şəhərində məskunlaşmış Ağdam rayonundan məcburi köçkün Xuduyev Təvəkkül məktubunda ölkəmizin dilbər guşələrindən birində anadan olduğunu, lakin mənfur ermənilərin işğalçılıq siyasəti üzündən elindən, yurdundan köçkün düşdüyünü, hazırda dövlət tərəfindən Mingəçevir şəhərində salınmış Yeni Həyat qəsəbəsində yaşadığını bildirir. Onun yazdığına görə, işsiz kimi qeydiyyatda olub. Xüsusi karantin rejimi ilə əlaqədar heç bir işlə məşğul olmasa da, dövlətimiz onu birdəfəlik ödəmə ilə təmin edir. O, bu maddi dəstəyə, eləcə də koronovirusla mübarizədə həyata keçirilən digər tədbirlərə görə qəsəbə sakinləri adından dövlət başçısına minnətdarlığını ifadə edib: “Allah Sizi və xalqımızı qorusun!”

Yardımlı rayonundan Canəliyev Alıqulu Bəgəli oğlu və Mirağazadə Əhmədağa Mirağa oğlu Prezidentə ünvanladıqları məktubda ulu öndər Heydər Əliyevin 1993-cü ildə Azərbaycanı böyük bəladan qurtardığını yaxşı xatırladıqlarını, indi isə onun layiqli davamçısı kimi Prezident İlham Əliyevin xalqı bu ağır xəstəlikdən qurtarmaq üçün var gücü ilə çalıışdığını qeyd edirlər: “Siz vədlərinizi öz işinizlə sübut etdirsiniz. Hər bir azərbaycanlı Sizin üçün insan amilindən yüksək bir amalın olmadığını dərk edir. Cənab Prezident, Siz çox uzaqgörən, humanist, müdrik və alicənab insansınız. Tutduğunuz bu haqq yolunda Sizə uğurlar arzulayırıq. Bizə göstərdiyiniz bu qayğı və diqqətə görə Sizə Yardımlı rayonunun Sırıq və Tilə kəndlərinin ağsaqqalları adından dərin təşəkkürümüzü bildiririk”.

Bakının Nərimanov rayonundan olan sakinlər Mikayılov Səhrab Mürşüd oğlu, Həsənov Miri Bilal oğlu və İbrahimova Səmayə Abdulla qızı birgə məktublarında dünyəvi bəla olan koronavirusla bağlı ölkəmizdə görülmüş qabaqlayıcı tədbirlərə və xalqımızı böyük fəlakətdən xilas etdiyinə görə Azərbaycan Prezidentinə təşəkkürlərini bildirirlər. Onların fikrincə, yaşadığımız bu gərgin günlərdə vətəndaşlarımızın maddi vəziyyətinin nəzərə alınması, onların hərtərəfli qayğı ilə əhatə olunması xüsusi minnətdarlığa layiqdir: “Biz, sadə vətəndaşlar fəxr edirik ki, millətimizin qeydinə qalan, onun sağlamlığını hər şeydən üstün tutan Sizin kimi Prezidentimiz var!”

Salyan rayonunun Kərimbəyli kəndindən Fətiyev Aqil Kamil oğlu, Hüseynov Orxan Mehdi oğlu, Vəliyeva Humay Xeybər qızı, Əkbərova Səbinə Famil qızı, Mahmudov Fərəhman Ağahüseyn oğlu və başqaları yazırlar: “Hörmətli cənab Prezident! Bu gün dünyanın böyük bir bəla ilə üz-üzə qaldığının şahidiyik. Dünyada qlobal pandemiya hesab olunan koronavirus (COVİD-19) infeksiyasının ölkəmizdə yayılmasının qarşısının alınması və vətəndaşlarımızın təhlükəsizliyinin təmin edilməsi məqsədilə verdiyiniz qərarlar, gördüyünüz təxirəsalınmaz tədbirlər, ən əsası, Sizin çağırışınızla xalqımızın həmrəyliyə dəvət olunması çox mühüm təşəbbüs və addımlardan oldu.

Cənab Prezident, Siz hər zaman vətəndaşların yanında olub, onların sevincinə də, kədərinə də şərik çıxmısınız. Biz Azərbaycan xalqı olaraq inanırıq ki, Sizin rəhbərliyinizlə bu çətin günlərdən də alnıaçıq çıxacağıq. Yaşlı nəslin nümayəndələri olaraq dövlətimiz tərəfindən bizə göstərilən qayğıya görə Sizə minnətdarıq. Siz xalqımızın xilaskarısınız, Allah da Sizi qorusun!”

Ucar şəhərindən Maxsudov Hamiz və Ələsgərov Xəzər də dövlət başçısının Azərbaycan xalqının sağlamlığı, sosial rifahı üçün göstərdiyi fədakarlıqları çox yüksək qiymətləndirdiklərini ifadə ediblər. Onların fikrincə, xalqımız bu ağır bəladan məhz Prezidentin həyata keçirdiyi məqsədyönlü işlər, vaxtında gördüyü tədbirlər hesabına xilas ola bilib. Azərbaycan lideri bütün dünyaya sübut edib ki, hər bir işdə olduğu kimi, koronavirusla mübarizədə də doğru yol tutmuşuq. Uğurlu yol seçmək və bu yolla inamla addımlamaq böyük bacarıq və qətiyyət tələb edir. “Cənab Prezident, Sizi dəstəkləyir, Sizə uzun ömür, cansağlığı arzulayırıq! Siz Azərbaycan xalqının fəxrisiniz!”

Goranboy rayonunun Qarqucaq kəndindən Nəcəfov İlham İsa oğlu Azərbaycan Prezidentinin apardığı siyasəti bəyəndiyini və alqışladığını bildirir, xüsusilə, pandemiya dövründə daim xalqın yanında olduğunu qeyd edir: “Biz Milli Qəhrəman ailəsi olaraq, daim Sizin qayğı və diqqətinizi hiss etmişik. Cənab Prezident, əminəm ki, Sizin Ali Baş Komandan kimi apardığınız ordu quruculuğu sayəsində milli ordumuz və xalqımız erməni mənfurlarını işğal edilmiş ərazilərimizdən qovub çıxararaq Azərbaycan bayrağını o torpaqlarda dalğalandıracaq”.

Yardımlı rayonunun Ostayır kəndindən 90 yaşlı Nəbiyev Ağagül ulu öndər Heydər Əliyevin dövründə uzun illər məsul vəzifələrdə çalışdığını, indiki koronavirus zamanında xalqımızın sağlamlığı üçün Prezident İlham Əliyevin rəhbərliyi ilə atılan bütün addımları dəstəklədiyini yazır: “Bir daha əmin oldum ki, xalqımızın həyatı, sağlamlığı Sizin üçün hər şeydən üstündür”.

O, Birinci vitse-prezident Mehriban xanım Əliyevanın yaşadığı kəndin aztəminatlı ailələrinə göndərdiyi ərzaq yardımının insanlar tərəfindən yüksək qiymətləndirildiyini qeyd edir.

Bunlardan əlavə, Salyan rayonunun Qarabağlı kəndindən N.Xəlilov adına tam orta məktəbin şagirdləri Zeynallı Rəşidə və Rəşid, Ağcabədi rayonunun Kürdlər kəndindən şəhid anası İbrahimova Səringül Məmməd qızı, Bakının Binəqədi rayonundan Qarabağ müharibəsi veteranı Quliyev Abbas Heyder oğlu, Azərbaycan Vətən Müharibəsi Veteranları İctimai Birliyi Tərtər regional bölməsinin üzvləri Məmmədzadə Vidadi (1-ci qrup müharibə əlili), Əliyev Mətləb (Çernobıl əlili), Məmmədov Sətər, Məmmədov Ayaz və Heydərov Nizami, Qubadlı rayonundan məcburi köçkünlər Məmmədov İsmayıl Hümmət oğlu, Hacıyeva Vüsalə Bəhrəm qızı, Dünyamalıyeva Pərvanə Vəliş qızı və Hüseynova Nüşabə Kamran qızı, Cəbrayıl rayonundan məcburi köçkün Muradov Nüsrət Qüdrət oğlu, Bakının Qaradağ rayonundan Abdullayev Ayxan, Bərdə rayonundan 7-ci sinif şagirdi Səlimov Sakit, Abşeron rayonunun Saray qəsəbəsindən Əməkdar müəllim Hüseynova Təyyibə Yəhya qızı, Bakının Səbail rayonundan Həsənova Xədicə Fərrux qızı, Xocavənd rayonundan Xəlilzadə Zahid Raqif oğlu, Salyan rayonunun Yeni Uluxanlı kəndindən tələbələr Süleymanlı Vüsalə İsrafil qızı və Müslümov Maqsud Rizvan oğlu, Zərdab rayonundan Abdullayev Natiq Rahil oğlu, Mustafayev Mustafa Abış oğlu və Əlyarlı Nürəddin İlqar oğlu, Bakının Xətai rayonundan Ermənistandan qaçqın düşmüş Qaziyev Murtuz Yaqub oğlu, Bakının Qaradağ rayonunda məskunlaşmış Füzuli rayonundan məcburi köçkün İsmayılov Atabəy Xəzər oğlu və başqaları koronavirusla mübarizədə qəbul etdiyi qabaqlayıcı və qətiyyətli qərarlara görə Prezident İlham Əliyevə minnətdarlıqlarını bildirirlər.

Suraxanıdan Əhmədov Rafiq Bəylər oğlu, Tovuzun Düz Qırıqlı kəndindən Məhərrəmov Ədalət, Daşkəsəndən Hüseynova Şəbnəm Firudin qızı, Cəlilabadın Əliabad kəndindən Şahzadə Rəvazi Sənaf oğlu, Salyanın Xələc kəndindən Ağabəyli Naseh Əlibəy oğlu, Rayon Mərkəzi Xəstəxanasının həkimi Ağabəyova Tehran, rayon sakini Mənəfova Vüsalə Sabir qızı, Bərdənin Dəymədağıldı kəndindən Məmmədov Rahib Rafiq oğlu, Zərdabdan Məmmədquliyeva Aysel, Masallıdan Rufullayeva Cəmilə Nəsirağa qızı, Sumqayıtdan Abbasova Ləman Cahangir qızı, Cəbrayıln Böyük Mərcanlı kəndindən Musayev Mahmud Musa oğlu, Göygöldən Əliyeva Bəsdi Qələndər qızı, Göyçayın İncə kəndindən Muradov Asif Qurban oğlu, Şirvandan Qasımova Fatma Məhəmmədəli qızı, Xəzər rayonunun Mərdəkan qəsəbəsindən Şirinova Mər ziyyə Cəmal qızı, Kürdəmir rayonundan Mürsəliyeva Gülnamə Əlağa qızı və Ağsunun Təklə kəndindən Sabirov Cüməqulu da Azərbaycan Prezidentinə təşəkkür məktubları ünvanlayıblar.

Paşa ƏMİRCANOV

Xalq qəzeti 2020.- 5 may.- S.6.