Hər məktubda bir sevinc, hər sətirdə təşəkkür...

Son zamanlar Azərbaycan Prezidenti İlham Əliyevə ünvanlanan məktubların sayı­nı, sanbalını, sətirlərdə ifadə olunan hissləri, məktubların yazıldığı coğrafiyanın genişliyini görəndə Şərqin böyük mütəfəkkiri Mahatma Qandinin sözləri yada düşür: “Mən Hindis­tanın azadlığı uğrunda mübarizəyə başla­yanda nə silahım vardı, nə qoşunum, nə də vəsaitim . Amma mənim xalqa inamım var idi, xalqın isə mənə etimadı. Həmin inam və etimadla nəyə nail olduqsa, hamı bilir”.

Doğrudur, İlham Əliyevin siyasi hakimiyyətə gəldiyi illərin Azərbaycanını Mahat­ma Qandinin dövrünün Hindistanı ilə müqayisə etmək mümkün deyil. Çünki ulu öndər Heydər Əliyev həmin vaxta qədər Azərbaycanı ayaq üstünə qaldırmışdı. Amma xalqın inam və etimadı məsələsi tam yerinə düşür. Söhbət ölkə əhalisinin dövlət başçımıza son bir neçə ayda göndərdiyi məktublardan gedir. Amma xalqın Prezident İlham Əliyevə olan inam və etimadı son 17 ilin hər ayında, hər günündə özünü göstərib və həmin tendensiya son zamanlar daha geniş miqyasda davam edir.

Bu da səbəbsiz deyil. Belə ki, Prezident əvvəllər xalqın arzu və istəklərini yerinə yetirdiyinə, sosial məsələləri daim gündəlikdə saxladığına, regionların sosial-iq­tisadi inkişafını təmin etdiyinə, islahatla­rın genişləndirilməsinə, milli dövlətçilik maraqlarını hər şeydən üstün tutduğuna, Aprel döyüşlərində ordumuzun qazandığı uğurlara, son iki-üç ildə beynəlxalq aləmdə Ermənistan rəhbərliyini dəfələrlə ifşa etdiyinə görə xalqın inam və etimadını qaza­nıb. Son üç-dörd ayda isə dövlət başçımızın poçtu görünməyən düşmənə – koronavirus pandemiyasına qarşı mübarizədə nüma­yiş etdirilən müdriklik və uzaqgörənliyə, tədbirlilik və qətiyyətə, canıyananlıq və xalqın mənafelərinin qorunduğuna görə çoxsaylı minnətdarlıq məktublarına ünvan olur. Həmin məktubların hamısı olmasa da, bir çoxu mətbuat səhifələrinə də çıxarılır və etiraf edək ki, oxuduğumuz və ya ekran – efir vasitəsilə eşitdiyimiz məktubların hamısında sadə insanların səmimi fikirləri, böyük sevgi­si ilə rastlaşırıq.

Göygölün adına layiq saf hisslər

Siyasi xəritəmizdəki yeni ra­yonlardan olan Göygöl sakinləri -- Aynur Hüseynova, Məsmə Əliyeva, Səidə Ələsgərova və başqaları xa­tırladırlar ki, Prezident İlham Əliyev ulu öndər Heydər Əliyevin siyasi kursunun layiqli davamçısı kimi hakimiyyətə gəldiyi gündən bəri Azərbaycan hüquqi, dünyəvi və müstəqil ölkə kimi daim inkişaf edir, beynəlxalq aləmdə özünəməxsus yer tutur. Aparılan uğurlu daxili və xarici siyasət Azərbaycanın Avropa və dünya strukturlarına inteqrasi­yası, xalqımızın maddi və mənəvi inkişafının təmin olunması məqsədi daşıyır.

Son zamanlar isə “bütün dün­yanı zəbt etmiş COVID-19 pande­miyası dövlətimizi də qayğılandır­dı. Lakin Sizin qətiyyətiniz ölkəmizi böyük ziyanlardan qorudu. Əminik ki, Sizin rəhbərliyinizlə bu bəladan da şərəflə və üzüağ çıxacağıq. Vətəndaşların sağlamlığı Sizin üçün hər şeydən önəmlidir. Sizin çıxışlarınız, açılışlarında şəxsən iştirak etdiyiniz səhiyyə ocaqları bunun bariz nümunələridir”.

“Gənclər şəhəri”ndən yazırlar

Sumqayıt sakini Mehrəngiz Qurbanovanın fikrincə, dünyanın nəhəng dövlətlərinin COVID-19 qarşısında aciz qaldığı bir za­manda Azərbaycan xalqın xi­laskar Prezidentinin uzaqgörən siyasəti sayəsində bu bəladan minimum ziyan gördü. Pande­miyanın üzə çıxdığı ilk gündən etibarən əhalinin mütəmadi olaraq məlumantlandırılması, qabaqlayıcı tədbir olaraq kütləvi toplanmaların qarşısının alınması, az bir vaxt­da yeni tipli xəstəxanaların inşa edilməsi, ölkəmizdən kənarda olan vətəndaşlarımıza belə dövlət səviyyəsində qayğı və dəstək göstərilməsi, aztəminatlı ailələrə maddi yardım göstərilməsi və digər tədbirlər Prezidentin yüksək liderlik, təşkilatçılıq qabiliyyətinizin nəticəsidir”.

Siz hər bir azərbaycanlının layiqli Prezidentisiniz!

Bu, Laçın Rayon Ağsaq­qallar Şurasının sədri Ağayar İsmayılovun qətiyyətidir. İxtiyar soydaşımız yazır ki, ölkəmizdə koronavirus pandemiyasının geniş yayılmasının qarşısının alınma­sı istiqamətində cənab İlham Əliyevin rəhbərliyi ilə görülən işlər xalqımızın bu bəladan qorunmasında böyük əhəmiyyət kəsb etdi: “Həmişə olduğu kimi, bu çətin günlərdə də xalqımızın ən etibarlı arxa və dayağı kimi vətəndaşlarla birlikdə olmağı­nız, hər bir ailənin rifah halını və sağlamlığını düşünərək, bu istiqamətdə göstərdiyiniz maddi və mənəvi dəstək bir daha nümayiş etdirir ki, Siz hər bir Azərbaycan vətəndaşının layiqli Prezidenti­siniz... İnanırıq ki, ölkəmiz Sizin müdrik rəhbərliyiniz sayəsində tezliklə bu bəladan xilas ola­caq, həyatımız əvvəlki axarına düşəcəkdir”.

Bu virus ölkəmizin cəzaçəkmə müəssisələrində yayılmadı

Dövlət başçımıza ünvanlanan məktubların hamısı qətiyyətli oldu­ğu qədər də kövrək və səmimidir. Şuşadan məcburi köçkün düşüb Şamaxıda yaşayan Cavanşir Əbilovun məktubu isə daha səmimi və ürəkdən gələndir:

“Mənim oğlum məhkumluq həyatı yaşayır. Tez-tez bizimlə telefon əlaqəsi saxlayır. Sizin qabaqlayıcı tədbirləriniz, qayğı­keşliyiniz sayəsində cəzaçəkmə müəssisələri də bu bəlaya qarşı tam gücü ilə mübarizə apa­rır. Gördüyünüz işlər müsbət nəticələrini verməkdədir. Oğlu­mun dediyinə görə, cəzaçəkmə müəssisələrində hər gün de­zinfeksiya işləri, antisanitariya tədbirləri yüksək səviyyədə aparılır. Bütün bunların nəticəsidir ki, başqa ölkələrdən fərqli olaraq Azərbaycandakı cəzaçəkmə müəssisələrində bu virus yayıl­madı”.

Kənd təsərrüfatını da unutmursunuz

Ağdaş Suvarma Sistemləri İdarəsinin kollektivi adından dövlət başçımıza məktub ün­vanlayan Əməkdar mühəndis Əhliman Hacıyev yazır ki, bütün dünyanı dəhşətə gətirən korona­virus pandemiyası beş gün tez, beş gün gec mütləq təslim ola ­caq. Xüsusilə, Prezident İlham Əliyev kimi müdrik və uzaqgörən siyasət yeritməyi bacaran liderin rəhbərlik etdiyi ölkələrdə həmin proses daha tez baş verəcək. Ona görə də bu çətin günlərdə də kənd təsərrüfatının diqqət mərkəzində saxlanılması əsl müdriklik nümunəsidir: “Meliora­siya və su təsərrüfatı sahəsinə göstərdiyiniz diqqət və qayğı, Sizin rəhbərliyinizlə ölkəmizdə bu sahədə həyata keçirilmiş önəmli genişmiqyaslı layihələr sayəsində əkin sahələrinin suvarma suyu ilə təminatı yaxşılaşdırılır, kənd təsərrüfatı məhsullarının istehsalı artır. Bütün bunlar bir daha sübut edir ki, xalqımızın gələcəyi əmin əllərdədir”.

Sabaha ümidlə baxırıq

Prezidentə Şirvan şəhərindən məktub ünvanlayan Əməkdar bədən tərbiyəsi və idman xadi­mi Vaqif Cəfərov bu fikirdədir. O, yazır ki, pandemiya ölkələrin iqtisadiyyatına və əhalisinə böyük zərər vurdu: “Amma bizim ölkəmiz Sizin qətiyyətiniz, uzaqgörən siyasətiniz və iradəniz sayəsində pandemiyaya qarşı mübarizədə də öncüllər sırasın­dadır. İnsanlarımızın daha az zərər görməsi, güclü iqtisadiy­yatımızın qorunub saxlanması istiqamətində atdığınız addımlar, həyata keçirdiyiniz qabaqlayıcı tədbirlər bir vətəndaş, idman ve­teranı kimi, məni sevindirir, işıqlı sabahımıza ümidlə baxmağa ruhlandırır”.

Dağlar diyarından Heydər Əliyev Fonduna minnətdarlıq

Qusarın Yasab kəndindən dövlət başçımıza minnətdarlıq məktubu ünvanlayan Mafiyat Bədəlovanın fikrincə, xalqımızın sosial rifahının və sağlamlığının dövlətimiz üçün ən ümdə vəzifə olması vətəndaşların hamısını sevindirir. İnsanlar çətin korona­virus dövründə bunun bir daha şahidi oldular: “Ulu öndərimiz Heydər Əliyevin adını daşıyan fondun bizə yardım etməsinə, bizi sevindirməsinə görə Sizə “Çox sağ olun!” deyirik. Allah Sizə və Mehriban xanım Əliyevaya uzun ömür, cansağlığı versin!

Ümid edir və inanıram ki, dünyanı ağuşuna alan bu CO­VID-19 infeksiyası tez bir zaman­da başımızın üstündən gedəcək, Azərbaycan yenidən çağlayan və dinamik inkişaf edən həyatına dönəcək”.

Müraciətlərin əks-sədası

Gədəbəydən Ənvər İsgəndərov, Şahin Kazımov, Həsrət Məhərrəmov, Famil Alıyev və başqalarının dövlət başçımıza ünvanladığı məktubda qeyd edilir ki, dünyada gözlənilmədən yayı­lan koronavirusla əlaqədar ölkə rəhbərliyinin gördüyü qabaqlayıcı tədbirlər Azərbaycan xalqını yaşa­ya biləcəyi acınacaqlı vəziyyətdən çıxartdı. Bir çox ölkələr isə bu bəlaya hazırlıqsız yaxalandı və təsirli tədbirlər görə bilmədiyindən kütləvi yoluxma və ölüm halla­rına məruz qaldı. Bu müqayisə özlüyündə Azərbaycanın qüdrətinin təzahürüdür.

“ Cənab Prezident, Sizin və Mehriban xanım Əliyevanın xalqa müraciətlərinizdə yer alan fikirlər, görülən əməli tədbirlər xalqa nə qədər bağlı olduğunuzu bir daha göstərdi. Xalqımız da Sizə bağlıdır və Sizi sevir. Siz dediyiniz kimi, “Biz birlikdə güclüyük!” Sizə daim sağlamlıq və firavan həyat arzu edirik”.

Vətəndaşlara fərdi şəkildə diqqət yetirilir

Bu, Qəbələ rayonunun Vəndam qəsəbəsindən dövlət başçımıza məktub ünvanlayan Nuriyə Çələbizadənin fikiri­dir. O yazır: “ Dünyada cövlan edən koronavirusun ölkəmizdə yayılmasının qarşısını almaq məqsədilə gördüyünüz tədbirlər sözlə ifadə olunmayacaq qədər əvəzsiz və təqdirəlayiqdir. Bütün vətəndaşlara ayrı-ayrılıqda diqqət yetirməyiniz bizləri çox sevindi­rir. Bir müəllim kimi bizə xüsusi diqqət göstərməyiniz, xüsusilə virtual məktəb layihəsi məni və şagirdlərimi çox sevindirdi. Biz dərslərlə davamlı şəkildə məşğul oluruq… Belə çətin an­larda vətəndaşlara göstərdiyiniz qayğı və yardım hər bir insanın həyatının Sizin üçün nə qədər dəyərli olduğunu təcəssüm etdirən ən bariz nümunədir. Sizə hər zaman dəstəyik”.

Naxçıvanlı tələbə: Siz bu xalq üçün çalışırsınız

Dövlət İdarəçilik Akade­miyasının tələbəsi, Naxçıvan şəhərində doğulub böyümüş Sultan Məmmədzadə yazır ki, təməli ümummilli lider Heydər Əliyev tərəfindən qoyulan müstəqil Azərbaycanın bugünkü inkişafı Sizin müvəffəqiyyətlə davam etdirdiyiniz uğurlu siyasətlə bağ­lıdır: “Hazırda dünyada sürətlə yayılan koronavirus pandemiya­sının Azərbaycanda yayılmasının qarşısını almaq məqsədilə hazır­lanan və həyata keçirilən dövlət proqramı bir daha sübut edir ki, Siz bu xalq üçün çalışırsınız və hər zaman hər bir vətəndaşınızın yanındasınız”.

Pensiyaçı müəllim: Sizin çağırışınız xalqı həmrəy etdi

Şirvan şəhərinin sakini, pensiyada olan müəllim Laləzər Məmmədova yazır ki, dünyada qlobal pandemiya hesab olu­nan koronovirus infeksiyasının ölkəmizdə yayılmasının qarşısının alınması və vətəndaşlarımızın, xüsusilə də məktəblilərin, 65 yaşdan yuxarı olan insanların təhlükəsizliyini təmin etmək məqsədilə verdiyiniz qərarlar, gör­düyünüz təxirəsalınmaz tədbirlər, ən əsası, Sizin çağırışınız ətrafında xalqımızın həmrəyliyə dəvət olunması çox mühüm təşəbbüs və addımlardan oldu: “ Siz hər zaman vətəndaşların yanında olub, onların sevincinə də, kədərinə də şərik çıxmısınız, öz qayğınızı əsirgəməmisiniz. Biz, Azərbaycan xalqı olaraq inanırıq ki, məhz Sizin rəhbərliyinizlə bu çətin günlərdən də alnıaçıq çıxacağıq”.

Bütün məktublar barədə söz aça bilməsək də...

Yuxarıda qeyd etdiyimiz kimi, məktublar yüzlərlədir və onların hamısı barədə qəzet səhifəsində söz açmaq mümkün deyil. Amma bəzi məktub müəlliflərinin adlarını sadalanmaq istərdik. Qubadan Minbər Osmanov, Füzuli rayonun­dan Ağayar Səfiyarov, Bakıdan Elnur Kərimov, Qaxdan Elmir Həşimli, Ucardan Mirzağa Solta­nov, Lənkərandan Rafiq Ağayev, Kürdəmirdən Rüfət Babaşov, Zaqataladan Gülafət Qurbanova, Cəbrayıldan Nüsrət Hümbətəliyev, Ağsudan Sübhan Bəşirov, Şəkidən Xatırə Qənbərova, Ağcabədidən Fəxri Əsədov, Ağstafadan Gü­nay Məmmədli, Masallıdan Amin Rəhimli, Qubadan Faiq Abduləlimov, Beyləqandan Orxan Quliyev və digər soydaşlarımızın hər biri Prezident İlham Əliyevə göndərdikləri məktubda günün re­allıqlarını müxtəlif dormada qələmə alırlar. Amma bütün məktubların əsas qayəsi belədir: “Cənab Prezi­dent, biz Sizə minnətdarıq və daim Sizi dəstəkləyirik!”

 

 İttifaq MİRZƏBƏYLİ

Xalq qəzeti  2020.- 6 may.- S.3.