Prezident İlham Əliyevin təşəbbüsləri dünyada yüksək dəyərləndirilir

 

ABŞ Prezidenti D. Trampın 28 May – Respublika Günü münasibətilə Azərbaycan Prezidenti İlham Əliyevə ünvanla­dığı məktub hazırda iki dövlət ara­sında olan münasibətlərin strateji tərəfdaşlıq səviyyəsinin yeni inkişaf mərhələsinə keçdiyinin göstəricisi kimi dəyərləndirilir.

D.Trampın məktubunda korona­virus pandemiyası ilə üzləşdiyimiz bir vaxtda Birləşmiş Ştatların Azərbaycan xalqının yanında ol­duğu vurğulanır. Eyni zamanda, məktubda qeyd edilir ki, Birləşmiş Ştatlar və Azərbaycan beynəlxalq təhlükəsizliyi gücləndirmək, Avro­panın enerji marşrutlarını, eləcə də mənbələrini şaxələndirmək, həmçinin iki böyük xalqın insanlarına parlaq gələcək qurmaq naminə təxminən 30 il əməkdaşlıq ediblər. Bununla yanaşı, Prezident Donald Tramp ABŞ-ın regional təhlükəsizliyin möhkəmləndirilməsinə xidmət edəcək ATƏT-in Minsk qrupunun həmsədri kimi bu vasitəçilik prosesində Ermənistan–Azərbaycan, Dağlıq Qarabağ münaqişəsinin sülh yolu ilə həllinə sadiqliyini vurğulayıb.

Bunun ardınca, mayın 15-də CISCO şirkətinin təşəbbüsü ilə Azərbaycan Prezidenti İlham Əliyevlə bu şirkətin rəhbərləri arasında vide­okonfransda da xüsusi qeyd edildi ki, dövlət başçısının təşəbbüsləri təkcə regionda deyil, dünyada da yüksək dəyərləndirilir. CISCO şirkətinin baş maliyyə direktoru xanım Kelli Kramer bu təşəbbüsləri yaxşı və xoş təəssürat bağışla­yan hal kimi dəyərləndirərək eləcə də, həmin işlərə rəhbərlik etdiyinə görə Azərbaycan Prezidentinə minnətdarlığını bildirdi: “COVID-19 vi­rusu ilə əlaqədar Türkdilli Dövlətlərin Əməkdaşlıq Şurasının toplantısında və Qoşulmama Hərəkatının görü­şünün təşkil edilməsində liderlik səylərinizi nümayiş etdirdiniz”. Bunun­la yanaşı, xanım Kelli Kramer bildirdi ki, Azərbaycan Prezidenti kimi liderin texnologiyaya belə açıq olması, eyni zamanda, onun ölkə üzrə tətbiqinə hazır olması məmnunedici haldır və dövlət başçısı İlham Əliyev təkcə regionda deyil, dünya miqyasın­da da texnologiyaya dəstək verən liderlərdəndir.

Qeyd etmək lazımdır ki, Azərbaycan nəinki milli səviyyədə COVID-19-la mübarizədə səmərəli tədbirlər görür, eyni zamanda, regional və qlobal miqyasda da koronavirusa qarşı həmrəyliyin və əməkdaşlığın gücləndirilməsinə əhəmiyyətli töhfəsini verir. Azərbaycan Prezidenti, Türkdilli Dövlətlərin Əməkdaşlıq Şurasının sədri İlham Əliyevin təşəbbüsü ilə bu il aprelin 10-da Türk Şu­rasının videokonfrans vasitəsilə fövqəladə Zirvə görüşü də keçirilib. Bunun davamı olaraq, Qoşulma­ma Hərəkatının sədri Azərbaycan Prezidentinin təşəbbüsü ilə hərəkatın təmas qrupu forma­tında mayın 4-də videokonfrans vasitəsilə koronavirusla mübarizəyə həsr olunmuş “COVID-19-a qar­şı birlikdəyik” mövzusunda Zirvə görüşü onu söyləməyə əsas verir ki, bu tədbirlər ölkəmizin qlobal səviyyədə beynəlxalq həmrəyliyin və əməkdaşlığın daha da möhkəmləndirilməsi istiqamətində mühüm əhəmiyyət kəsb edir.

CISCO şirkətinin vitse-prezidenti Qay Ditrix bildirdi ki, müzakirə etmək istədikləri üç sahə – “Smart ölkə”, təhsil və kibertəhlükəsizlikdir. Qay Ditrix ölkəmizdə icra olunan birgə layihələrdən danışdı, bu layihələrin çox gözəl nəticələr verdiyini bildirdi. CISCO şirkətinin vitse-prezidenti Azərbaycanın müvafiq strukturları ilə çox uğurlu əməkdaşlığın həyata keçirildiyini dedi və əlaqələrin təcrübə qazanmaq baxımından əhəmiyyətini vurğulayaraq təmsil etdiyi şirkətlə “Quantelo” şirkəti arasında həyata keçiriləcək əməkdaşlığın perspektivləri barədə də danışdı, vahid məlumatlar sisteminin yaradıl­ması istiqamətində görülən işləri qeyd etdi, eləcə də bunun ümumi daxili məhsulun artımı, iş yerlərinin yaradıl­ması və innovasiyaların tətbiqi işinə xidmət edəcəyini bildirdi.

CISCO şirkətinin Rusiya və MDB ölkələri üzrə vitse-prezidenti Conatan Spərrou xüsusi vurğuladı ki, təmsil etdiyi şirkətinin Azərbaycan Respubli­kası ilə əməkdaşlığı fantastik olmuş­dur və biz bu əməkdaşlığın davamlı olmasını arzulayırıq. CISCO-nun Azərbaycan üzrə regional direktoru Vladimir Orlov, CISCO-nun Ukrayna üzrə regional direktoru Oleq Bod­nar kibertəhlükəsizlik sahəsində əməkdaşlıqdan danışdılar.

Bununla yanşı, CISCO heyəti və Azərbaycan arasında keçirilmiş bu görüşün çox səmərəli olduğunu bildirən xanım Kelli Kramer dövlət başçısı İlham Əliyevin təşəbbüslərini dəyərləndirərək bir daha qeyd etdi ki, Azərbaycan liderinin texnologiyaya belə açıq olması və onun ölkə üzrə tətbiqinə hazır olması məmnunedici haldır və əməkdaşlığın davamlı olmasını arzulayıram. “...Siz təkcə regionda deyil, dünya çapında texno­logiyaya dəstək verən liderlərdənsiniz və bu işdə öndə getdiyinizə görə, Sizə təşəkkür edirəm. Düşünürəm ki, biz bu tərəfdaşlığı yaratmaqla ölkəniz haqqında da çox şey öyrənə bilərik”.

Azərbaycan Prezidenti İlham Əliyev 2020-ci ilin yanvar ayında Dünya İqtisadi Forumunda iştirakı zamanı çıxışında qeyd etmişdir ki, XXI əsrdə XX əsrin baxışı ilə uğur qazanmaq olmaz. Eyni zamanda, ölkəmizdə həyata keçirilən struk­tur və kadr islahatları səmərəli, işlək idarəçilik mexanizminin daha da inkişaf etdirilməsini və müasir dövrün tələblərinə uyğunlaşdırılma­sını nəzərdə tutur. Bu baxımdan, Azərbaycanda həyata keçirilən islahatlar dünyanın aparıcı dövlətləri, o cümlədən ABŞ, eləcə də bir sıra ekspertlər, iqtisadi-maliyyə qurumları tərəfindən yüksək qiymətləndirilir.

Bütün bunlar onu deməyə əsas verir ki, Azərbaycan yalnız regionda gedən proseslərə deyil, eyni za­manda, beynəlxalq aləmdə cərəyan edən hadisələrə də təsir göstərmək imkanı qazanmışdır. Ona görə də bu gün dünyanı narahat edən və həyati əhəmiyyətli bir sıra problemlərdə apa­rıcı dövlətlərin başçıları və beynəlxalq qurumların rəhbərləri Azərbaycan rəhbərinin mövqeyi ilə hesablaşır və onu yüksək qiymətləndirirlər.

 

Elçin ƏHMƏDOV

Azərbaycan Respublikasının Prezidenti yanında Dövlət İdarəçilik Akademiyasının professoru, siyasi elmlər doktoru

Xalq qəzeti  2020.-21 may.- S.5.