Azərbaycan ədaləti bərpa edir!

Azərbaycan torpaqları 30 il idi ki, təcavüzkar Ermənistanın iş­ğalçılıq siyasəti nəticəsində düşmən tapdağı altında inləyirdi. Yüz minlərlə insan Dağlıq Qarabağ və ətraf rayonlardakı doğma ocaqlarından, yurd-yuvalarından məhrum olaraq qaçqınlıq, məcburi köçkünlük statuslu ağır yükü, məşəqqəti öz üzərində daşıyırdı. 30 il idi ki, Azərbaycan dövləti nüfuzlu beynəlxalq təşkilatlarda ədalətin bərpası, Ermənistan–Azərbaycan, Dağlıq Qarabağ münaqişəsinin sülh yolu ilə həlli üçün çağırışlar edir, ATƏT-in Minsk qrupunun həmsədrlərinin vasitəçiliyi ilə danışıqlar masasına oturur, müxtəlif təkliflərlə çıxışlar edirdi. Azərbaycan dövləti ötən 30 il ərzində münaqişənin, məhz müharibəsiz, qansız-qadasız həll olunması üçün kifayət qədər böyük səbir, təmkin nümayiş etdirdi. Lakin bütün bu cəhdlərə baxmayaraq, işğalçı ölkə öz iddialarından əl çəkmirdi.

Təəssüf ki, Ermənistan qeyri-konsruktiv mövqe tutur, mülki insanlarımız – qadınlarımız, uşaq­larımız, yaşlılarımız erməni tərəfinin silahlı hücumlarına məruz qalırdı, hədəfə çevrilirdilər. Təkcə, atəşkəs dövründə həyatlarını itirmiş Azərbaycan vətəndaşlarının sayı yüzlərlədir, Ermənistanın baş naziri Nikol Paşinyan isə sələflərindən daha irəli gedərək, hətta yeni torpaqlar uğrunda yeni müharibə tezisi ilə çıxış etdi, hərbi təxribatların miqyasını genişləndirdi.

Sentyabrın 27-dən başlaya­raq Azərbaycan tərəfi düşmənin təxribatlarına layiqli cavab verməyə baş­ladı. Bunun bir sıra obyektiv səbəbləri var. Bildiyimiz kimi, Azərbaycan Prezidenti, cənab Ali Baş Koman­dan İlham Əliyev Ermənistan silahlı qüvvələrinin və qondarma “DQR”in quldur hərbi birləşmələrinin əzəli torpaqlarımızdan dərhal, qeyd-şərtsiz çıxarılmaları üçün qarşı tərəfə son şans vermişdi. O, BMT-nin Təhlükəsizlik Şurasının dörd qətnaməsini, habelə Avropa İttifaqının və Avropa Şurasının qərarlarını əsas tutaraq, münaqişənin daha gərgin mərhələyə keçməsinin qar­şısını almağa çalışdı. Ancaq göründüyü kimi, qarşı tərəf bu şansdan da istifadə etmədi, yaxud etmək istəmədiyini dinc şəhərlərimizi, mülki obyektlərimizi, vətəndaşlarımızı artilleriya və raket zərbələrinə məruz qoymaqla nümayiş etdirdi. Qondarma və separatçı “DQR”in saxta “prezidenti” ni seçib “andiçmə” mərasimini də qədim Azərbaycan şəhəri Şuşada keçirdi, üstəlik, Ermənistanın baş naziri Nikol Paşinyan da həmin “mərasimə” qatıldı, məclislər təşkil edildi və s. Əlbəttə ki, həmin faktı özündə milli-mənəvi ruh daşıyan heç bir azərbaycanlı qəbul edə bilməzdi və Ali Baş Koman­danımız İlham Əliyev cənablarının da vurğuladığı kimi bu cür münasibət Azərbaycan xalqına qarşı düşünülmüş təhqiramiz münasibət idi...

Belə olan halda isə təbii ki, uzun illər formalaşaraq Cənubi Qafqazın ən güclü silahlı qüvvələrinə çevrilmiş, dünyanın 50 ən güclü orduları sırasında yer alan Azərbaycan Ordusu cənab Ali Baş Ko­mandanın əmri əsasında cavab tədbirləri görməli idi.

Prezident İlham Əliyev cənabları ulu öndər Heydər Əliyevin siyasi stra­tegiyasını, inkişaf konsepsiyasını uğurla davam etdirərək, əvvəllər həyata keçirilməsi mümkün görünməyən işləri son 17 ildə reallaşdırmağa müvəffəq oldu.

Təbii ki, Azərbaycan dövləti bu gücü-qüdrəti reallaşdırmaq üçün çox uzun yol qət etdi, iqtisadi imkanlarını gerçəkləşdirdi, neft və qeyri-neft sek­torunda nəhəng layihələr reallaşdırdı, dünyanın ən böyük şirkət və korpora­siyaları ilə müqavilələr imzaladı. İqti­sadi gücünü formalaşdıran və artıran Azərbaycan dövlətinin rəhbəri, Prezident İlham Əliyev cənabları ulu öndər Heydər Əliyevin siyasi strategiyasını, inkişaf konsepsiyasını uğurla davam etdirərək, əvvəllər həyata keçirilməsi mümkün görünməyən işləri son 17 ildə reallaş­dırmağa müvəffəq oldu. Əldə edilən kapital gəlirləri dövlətin qüdrətlənməsinə, insan resurslarına, vətəndaşlarımızın rifahına xərcləndi. Əbəs deyil ki, cənab Prezident İlham Əliyev iqtisadiyyatdan əldə edilən kapitalın insan kapitalına çevriləcəyini vurğulayırdı və bu gün biz bu uğurlu siyasətin məntiqi nəticələrini görməkdəyik.

Digər tərəfdən, həmin uğurlar çərçivəsində mövcud olan xalq–hakimiyyət birliyi amili ölkəmizin dövlətçilik maraqlarının möhkəm təməllərə söykənməsinə kifayət qədər geniş imkanlar verdi və bu gün həmin birlik sarsılmazdır. Əlbəttə, xarizmatik, praqmatik və qətiyyətli lider faktoru da bu kimi məsələlərdə öz sözünü dedi və deməkdədir. Əbəs deyil ki, bu gün İlham Əliyev dedikdə, liderliklə yanaşı, həm də yenilməz, müzəffər sərkərdə obrazı canlanır. Bu gün Azərbaycanda olan tükənməz ruh birliyi analoqu olmayan bir hadisədir və tarixə yazılan həqiqətdir.

İqtisadi uğurlardan əldə olunan gəlirin əsas hissəsi sosial məsələlərlə yanaşı, həm də ordu quruculuğu prosesinə cəlb olunurdu. Bu gün Azərbaycanın şanlı ordusunun Qara­bağ cəbhəsində apardığı əks-hücum əməliyyatları və torpaqlarımızın düşmən işğalından azad olunması yönündə həyata keçirilən tədbirlər qələbə və zəfərlərlə müşayiət olunmaqdadır. Azərbaycan Ordusu ən müasir hərbi döyüş texnologiyaları ilə şəhər və kəndlərimizi, qəsəbələrimizi işğaldan azad edir. Artıq məlumdur ki, dünyanın diqqətində olan Qarabağ cəbhəsində ən unikal hərbi əməliyyatlar keçirən müasir Azərbaycan Silahlı Qüvvələri bir çox hərbi strateqləri sözün həqiqi mənasında heyrətləndirir. Azərbaycan Ordusu dünyanın müasir hərb elminə yenilikləri ilə imza atır və tarix yazır. Dünya artıq Azərbaycanı yeni texno­logiyaları, ən müasir siyasi-iqtisadi və hərbi modelləri ilə qəbul edir, nümunələr götürür. Amma onu da unutmamalıyıq ki, hərbi uğurlarımızın təməlində da­yanan əsas faktor Azərbaycan əsgəri, Azərbaycan zabiti və qəlbləri onlarla bir döyünən xalqın tükənməz dəstəyidir. Bu gün Azərbaycan əsgəri düşmənlə qar­şılaşmağa böyük əzmlə gedir və gözü də arxada qalmır. Çünki bilir ki, arxada onun ailəsinə sahib çıxan Azərbaycan dövləti, qeyrətli Azərbaycan xalqı dayanır. Əgər biz cəbhədə Azərbaycan əsgər və zabitlərinin şücaətlərinə, qəhrəmanlıq salnamələrinə, eyni zaman­da şəhidlərimizin valideyinlərinin “Vətən sağ olsun!” kəlmələrini nə qədər qürurla səsləndirdiklərinə nəzər salsaq, zəfərin, qələbənin nə qədər yaxında olduğunu açıq-aydın görərik.

Bəs Ermənistanda, düşmən or­dusunda vəziyyət necədir? Əslində bu sualın cavabı baş verən hadisələr fonunda aydındır. Ən adi bir misal gətirməklə deyə bilərik ki, bu gün ordu­muz işğalçı düşmənin ərazilərimizdən çıxarılmasına nail olursa, demək düşmən qaçır, düşmən fərarilik edir. Hazırda Ermənistanda yeridilən yarıt­maz, uğursuz, mənfur siyasət xalqın mövcud hakimiyyətə qarşı narazılığını artırmaqdadır. Xaotik bir vəziyyətdə başını itirmiş bir ölkənin və dünya birliyi içində özünəməxsus yeri və rolu olan Azərbaycan səfərbərlik faktlarını müqayisə edək. Misal üçün, Azərbaycan qismən səfərbərlik elan edib və gənclərdən tutmuş orta yaşı insanlarımı­za qədər hər kəs cəbhəyə, döyüşməyə can atır. Çünki bilirlər ki, onlar öz tor­paqlarının işğaldan azad olunmasında iştirak edəcəklər. Bəs erməni tərəfində nə baş verir? Polis və hərbi polis gücləri küçələrdə insanları zorla avtobuslara yığmaqla cəbhəyə göndərir. Yaxud, insanlar hərbi komissarlıqlara müxtəlif vasitələrlə rüşvətlər təklif edib, övladla­rının Qarabağa yollanmasının qarşısını almağa çalışırlar. Eləcə də məlum olub ki, cəbhəyə getməyən kişilərin yeni doğulmuş övladlarına doğum evləri heç bir sənəd vermir, üstəlik həmin uşaqlara doğum haqqında şəhadətnamələrin də verilməsi yasaqlanıb.

Nikol Paşinyan hökumətinin yalançı pafos üzərində səsləndirdiyi saxta vətənpərvərlik çağırışları artıq heç bir ef­fekt vermir və hətta bu pafoslu çağırışla­rın təsiri altına düşərək cəbhəyə gedənlər indi fərarilik edir, qaçıb-gizlənirlər. Və bu həmin Nikol Paşinyandır ki, hakimiyyətə yiyələnəndə pafoslu, odlu-alovlu çıxışlar edib, xalqını aldadırdı, indi isə erməni xalqını uçuruma sürükləyir.

Beləliklə, Azərbaycan dövləti bu gün ədaləti bərpa edir – BMT-nin, Avropa İttifaqının və s. beynəlxalq qurumların 30 ildir ki, kağız üzərində qalmış, həyata keçirilməmiş qətnamə və qərarlarının icrasını reallaşdırır. Bu təşkilatlar Azərbaycan Prezidenti cənab İlham Əliyevin sərgilədiyi iradəsinə, qətiyyətinə görə ona minnətdar olmalıdırlar. Çün­ki Azərbaycan dünyada dondurulmuş münaqişələrin hərb yolu ilə də həlli yolunun olmasının nümunəsini yaradır. Həm də minnətdar olmalıdırlar ona görə ki, faşizmi, terrorçuluğu dövlət siyasətinə çevirmiş Ermənistanı yerinə oturdur, bu siyasətin regiona və dünyaya təsir göstərmək şanslarını heçə endirir. O, müasir dünyanın tarixini və gələcək üçün sərkərdəlik, liderlik tarixi yazır, özü də qızıl hərflərlə.

 

Bəhruz QULİYEV,

“SƏS” qəzetinin baş redaktoru, fəlsəfə üzrə fəlsəfə doktoru

Xalq qəzeti  2020.- 7 noyabr.- S.3.