Döyüşən ordu Ali Baş Komandandan ilham alır

Azərbaycan Prezidenti İlham Əliyev noyabrın 4-də, Dağlıq Qarabağdakı müharibənin altıncı həftəsində İspaniyanın EFE informasiya agentliyinə verdiyi müsahibədə cəbhədəki vəziyyətlə bağlı suallara cavablarda ordumuzun üstünlüyünə diqqət çəkdi. 30 il işğal altında olan ərazinin böyük hissəsinin bir – birinin ardınca azad edildiyini, Azərbaycan Ordusunun uğurlu hücum əməliyyatlarının davam etdiyini vurğuladı. Qeyd etdi ki, biz güclü ölkəyik və öz torpağımızda döyüşməklə, Azərbaycanın beynəlxalq səviyyədə tanınan ərazi bütövlüyünü bərpa edirik. Eyni zamanda, BMT Təhlükəsizlik Şurasının Ermənistan qoşunlarının bizim ərazilərimizdən çıxarılmasını tələb edən, lakin ötən illər ərzində əməl olunmayan qətnamələrini icra edirik.

Sonra dövlət başçısı faktiki olaraq, ya tamamilə, ya da qismən azad edilən ərazilərimizi qeyd edərək, digər rayonların işğaldan azad edilməsinin aktiv mərhələdə olduğunu bildirdi. Müharibə başlayandan xarici media qurumlarına verdiyi bütün müsahibələrində olduğu kimi, yenə jurnalistin atəşkəslə bağlı verdiyi “Nəyə görə müharibəni üç dəfə durdurmaq və danışıqlara başlamaq mümkün olmamışdır?”-- sualına geniş açıqlama verdi. Bu atəşkəslərin işləməməsinin səbəblərindən biri kimi Ermənistanın azad edilmiş ərazilərimizi geri almağa cəhd göstərdiyini, buna nail ola bilməyəndə, Ermənistan ərazisindən Azərbaycanın ikinci böyük şəhəri olan Gəncəyə ballistik raketlə iki dəfə hücum etdiklərini, üçüncü atəşkəsdə dinc şəhər olan Bərdəyə hücum etdiklərini göstərdi. Bərdədə bir gündə 21 nəfər mülki şəxsin qətlə yetirildiyini, 70 nəfərin yaralandığını, beləliklə, hər 3 dəfə atəşkəsin Ermənistan tərəfindən pozulduğunu dedi.

Ermənistanın kompromisə hazır olduğu fikrinə münasibət bildirən dövlət başçısı dedi: “İlk növbədə, bizim mövqeyimiz demək olar ki, bu 40 gün ərzində artıq dəfələrlə bəyan edilib. ...Əgər Ermənistan bizə qulaq assaydı və məntiqlə davransaydı, bu gün biz hazırda qarşılaşdığımız vəziyyətdə olmazdıq. Müharibə bəlkə də bir ay əvvəl bitərdi. Ona görə də Ermənistan tərəfdən kompromis çox dəqiq olmalıdır. Hələ də işğal altında olan Ağdam rayonunun bir hissəsini, Kəlbəcər və Laçını boşaltmaq üçün vaxt cədvəli bizə təqdim edilməlidir, Ermənistanın baş naziri bunu şəxsən bəyan etməlidir. Lakin onlar nəinki bizə vaxt cədvəli vermirlər, onlar həmin əraziləri boşaldacaqlarını demirlər. ...Belə olan halda, onlar 7 rayonun qaytarılmasını təmin etmək üçün bu prinsipləri işləyib hazırlamış Minsk qrupunun həmsədrlərinə faktiki olaraq hörmətsizlik nümayiş etdirirlər və faktiki olaraq daha çox eskalasiyaya gətirib çıxarırlar”.

Prezident bildirdi ki, Ermənistan tərəf Kəlbəcər, Laçın və Ağdamın qalan hissəsini boşaldacaqlarını açıq şəkildə deməsə, hərbi variant qaçılmaz olacaq. “Biz hərbi əməliyyatları davam etdirmək istəmirik və mən dəfələrlə demişəm və bu gün də təkrar edə bilərəm, əgər Ermənistanın baş naziri şəxsən özü, bu qan tökülməsinə görə məsuliyyət daşıyan şəxs belə bir bəyanat versə, biz dərhal dayanmağa hazırıq, dərhal”, -- deyən Prezident vurğuladı ki, Ermənistan vaxt qazanmaq istəyir, daha çox hərbi yardım əldə etmək üçün atəşkəs istəyir, Azərbaycana qarşı yeni hücumlar etmək və bizim azad etdiyimiz əraziləri geri almaq üçün bu atəşkəsdən istifadə etmək istəyir. Onun niyyəti bundan ibarətdir.

Paşinyanla bir masa arxasında oturmağın mənasızlığını, son iki il ərzində onunla çoxsaylı görüşləri olduğunu, lakin onların hamısının tamamilə səmərəsiz olduğunu qeyd edən dövlət başçımız dedi: “O, mənə söz vermişdi ki, ...Ermənistanda siyasi cəhətdən öz mövqeyini gücləndirəcək və sonra əsas prinsipləri yerinə yetirmək üçün konstruktiv şəkildə işləməyə hazır olacaq. Bu, onun Ermənistanda rəhbərliyinin ilk aylarında mənə söylədikləri idi. Lakin bir ildən sonra o, tamamilə fərqli sözlər dedi. O dedi ki, Azərbaycana qaytarılası bir santimetr belə torpaq yoxdur. Dedi ki, “Qarabağ Ermənistandır”. Dedi ki, Azərbaycan Dağlıq Qarabağdakı qondarma qurumun dırnaqarası “rəhbərliyi” ilə danışıqlar aparmalıdır. Beləliklə, o, danışıqlar prosesini pozmaq üçün hər şeyi etdi. Ona görə də hazırda mən onunla görüşməkdə bir məna görmürəm”.

Beləliklə, Azərbaycan Prezidenti İlham Əliyevin qeyd etdiyi kimi, biz öz ərazimizdə, işğalda olan torpaqları azad etmək üçün vuruşuruq, mülki əhaliyə atəş açmırıq. Amma onlar dinc şəhərlərə atəş açmaqla qalmır, hətta dəfn mərasiminə toplaşanları da hədəfə alırlar. Yetərincə silah – sursatımız, ordumuz var. Bizdə heç bir muzdlu döyüşmür və onlara ehtiyacımız yoxdur. Bizi ittiham etməyə çalışan ölkə rəhbərləri rəqib tərəfdəki əcnəbi döyüşçüləri görmək istəmirlər. Amma əldə əcnəbi pasportları olan zərərsizləşdirilmiş insanların siyahısı var. Amerikalı, fransalı, kanadalı, livanlı, iraqlı, postsovet məkanı ölkələrindən, onlarca Gürcüstandandır. Bəli, onlar o ölkələrdə yaşayan ermənilərdir, lakin bu, heç bir fərq etmir. Əgər onlar başqa ölkələrin vətəndaşlarıdırsa, onların orada olması qanunsuz hesab edilir.

Prezidentin cavabları beynəlxalq ictimai fikrin düzgün formalaşması, Azərbaycan həqiqətlərinin yayılması, tirajlanması üçün örnəkdir və verdiyi müsahibələr əsgər və diplomatlarımızın mübarizəsini əks etdirir. Bəli, hərbçilərimiz ön cəbhədə, diplomatlarımız diplomatik-siyasi cəbhədə mübarizə aparırlar. Hər iki cəbhədə mübarizə aparan Azərbaycan oğullarının ilham aldığı, örnək götürdüyü və inandığı ən birinci insan müzəffər Ali Baş Komandanımızdır.

Elçin QULİYEV,iqtisad üzrə fəlsəfə doktoru

Xalq qəzeti 2020.- 8 noyabr.- S.3.