Cənnət Qarabağda bu gözəlliyə layiq bir həyat yüksələcək

“Tezliklə Azərbaycan Ordusu Ali Baş Komandanın rəhbərliyi altında zəfər yürüşünü qələbə ilə başa vuracaq və respublikamızın ərazi bütövlüyü təmin ediləcək. Məhz bundan sonra qaçqın və məcburi köçkünlərin öz yurdlarına köçürülməsi ilə bağlı böyük qayıdış üçün ikinci mərhələ başlayacaq. Bunun üçün beynəlxalq hüquqa söykənən “Repatriasiya haqqında” qanun qəbul olunacaq. Könlü istəyən vətəndaş işğaldan azad edilmiş torpaqlarda yaşayacaq, iş quracaq”.

Bu barədə qəzetimizə açıqlama verən Milli Məclisin Əmək və sosial siyasət komitəsinin sədri Musa Quliyev bildirdi ki, insanların öz torpaqlarına qayıdışı bir günün içində həll ediləcək məsələ deyil:

– Bu, illərlə davam edən bir proses olacaq. Digər tərəfdən, Prezident İlham Əliyevin idarəçilik məktəbinin seçilən istiqaməti və üslubu proqramlarla idarəetmədir. Dövlət başçımızın ölkəmizə rəhbərliyinin başlanğıcında imzaladığı ilk fərman “Regionların sosial-iqtisadi inkişafı” ilə bağlı dövlət proqramı olub. Bundan sonra isə hər növbəti beş il üçün dövlət proqramı qəbul olunub. İşğaldan azad olunmuş torpaqlarımıza qayıdış da dövlət başçısının rəhbərliyi, müxtəlif dövlət qurumları cəlb olunmaqla proqramlar çərçivəsində icra ediləcək.

Eyni zamanda, dünya təcrübəsində var: belə proseslərə dünyanın müxtəlif qurumları – BMT, UNİCEF, UNESCO və s. təşkilatlar da qoşulur. Amma bütün bu işləri Azərbaycanın özü də görmək iqtidarındadır. Şübhəsiz ki, torpaqların minalardan təmizlənməsi, əraziyə dəyən maddi, ekoloji, mədəni ziyanın miqdarı müəyyənləşəndən, ərazidə yaşamağın mümkünlüyü, hər cür təhlükəsizlik təmin olunandan sonra orada yaşayış evləri, infrastruktur da yaradılacaq, iş yerləri də açılacaq. Məhz bundan sonra vətəndaşlarımızın həmin torpaqlara köçməsi təmin olunacaq.

Proqramda hansı kənddən, rayondan neçə nəfər, neçə ailə köçübsə, o qədər də ev tikiləcək. Amma Azərbaycanın işğaldan azad edilmiş yerlərinə köçmək istəyində əlavə vətəndaşlar olacaqsa, təbii ki, bu, istisna edilmir, onlara da lazımi şərait yaradılacaq. İstəyən şəxs işğaldan azad edilmiş torpaqlara köçə, orada özünə ev tikə və iş qura da bilər. “Repatriasiya haqqında” qanuna əsasən, bu işlər addım-addım həyata keçirilə bilər. İndiki məqamda əsas hədəfimiz torpaqlarımızın tam olaraq işğaldan azad edilməsidir.

Komitə sədri Qarabağa böyük qayıdışdan sonra burada hər iki icmanın birgə yaşaması imkanlarına da münasibət bildirdi:

– Cənab Prezident xalqa son müraciətlərində və xarici media ilə beynəlxalq aləmə açıqlamalarında Dağlıq Qarabağda yaşayan erməni vətəndaşlarla bağlı məsələyə də aydınlıq gətirib. Azərbaycan lideri müstəsna bir humanizm göstərərək deyir ki, erməni xalqı ilə birlikdə əvvəl olduğu kimi, birgə yaşaya bilərik. İndinin özündə Gürcüstanda, Rusiyada ermənilərlə azərbaycanlılar birgə yaşayırlar.

Dünyada elə millətlər yoxdur ki, onların genetik düşmənçiliyi olsun. Ermənilərlə azərbaycanlılar arasındakı bu düşmənçilik millətçi-separatçı erməni siyasətçiləri və onları bu bədnam addıma təhrik edən dairələr tərəfindən yaradılıb. Dağlıq Qarabağda yaşayan erməni əhali isə on illər boyu onların girovuna çevrilmişlər. Kimlər ki, əlinə silah alıb Azərbaycana qarşı təxribat törədibsə, qanunla öz cəzasına çatacaq, təqsiri və cinayəti olmayanlar isə Qarabağda qalıb dinc həyata qovuşacaq.

Deputat sonda dedi ki, böyük qayıdışdan sonra illərdir həllini tapmayan bəzi problemlər də tədricən aradan qalxacaq:

– Biz azad edilmiş torpaqlarımızda təkcə infrastruktur və yaşayış evləri tikməyəcəyik. Qayıdışdan sonra bölgə mərkəzləri də yaradılacaq. Təhsil müəssisələri, institutlar, kolleclər, ali məktəblər də inşa olunacaq. Yəni söhbət rayonlardakı həyatın əvvəlki qaydada bərpasından getmir. Bəzi universitetlərimizi, tibb müəssisələrimizi, mədəniyyət mərkəzlərini həmin rayonlara, şəhərlərə köçürə, yenilərini yarada bilərik. Bunların hamısı Qarabağda bu cənnət diyara layiq bir həyatın dirçəldilməsinə və yüksəlişinə xidmət göstərəcək.

Hazırladı: T. AYDINOĞLU,

Xalq qəzeti 2020.- 8 noyabr.- S.4.