Qələbələrdən – qələbələrə inamla addımlayırıq

“Biz onları döyüş meydanında məğlub etdikdə onlar Azərbaycanı dayandırmaq üçün hər kəsə zəng edir və hər kəsə yalvarırlar. Biz müharibənin başlanmasına görə məsul deyilik. Dediyim kimi, biz Azərbaycanın işğal edilmiş ərazilərində yerləşən Ermənistan ordusunun hücumuna məruz qalmışdıq. Bundan əlavə, Ermənistandakı indiki rejim danışıqlar prosesini məhv etmək üçün hər bir şeyi etmişdir. Düz bir il bundan əvvəl Ermənistanın baş naziri Azərbaycanın işğal olunmuş ərazisində keçirilən aksiyada “Qarabağ Ermənistandır” bəyan etmişdir. Bu bəyanat faktiki olaraq danışıqlar prosesini məhv etdi. Çünki danışıqlar masasında olan və münaqişənin həlli üçün əsas təşkil edən prinsiplər işğal altındakı ərazilərin Azərbaycana qaytarılmasını tələb edir”. Ölkə Prezidenti, Ali Baş Komandan İlham Əliyev bu sözləri dünyanın aparıcı medialrından biri olan “Euronews” televiziyasına müsahibəsində deyib.

Hərb meydanında Ali Baş Komandan, sərkərdə kimi zəfər qazanan, tarix yazan ölkə Prezidenti siyasət, diplomatiya, informasiya məkanında və səngərdə də dərs verir. Dövlət başçımızın həm “Euronews”-a, həm Rusiyanın nüfuzlu “Perviy Kanalı”ına, həm də Türkiyənin “CNN-Türk” televiziyasına müsahibələri düşmənə, onun havadarlarına, Azərbaycanın əleyhdarlarına tərs sillə oldu.

Artıq bütün bunlar öz nəticəsini göstərdi və Ermənistanın baş naziri danışıqlar masasında oturmağa məcbur oldu. Bu barədə Rusiyanın paytaxtı Moskvada keçirilən Azərbaycan, Rusiya və Ermənistan xarici işlər nazirlərinin üçtərəfli görüşü zamanı birgə bəyanat da qəbul edilib.

Ölkə Prezidenti bütün müsahibə-lərində bir daha Azərbaycan – Qarabağ həqiqətlərini olduğu kimi, bütün dünya ictimaiyyətinə çatdırdı, həmçinin düşmənin, onun havadarlarının, açıq-gizli dəstəkçilərinin iç üzünü açaraq, beynəlxalq aləmə nümayiş etdirdi. Ali Baş Komandan sərrast, tutarlı, məntiqli arqumentləri ilə düşmənin və dəstəkçilərinin anti- Azərbaycan təbliğatını, yalanlarını yerlə-yeksan etdi. Bir daha dünyaya nümayiş etdirdi ki, işğalçı kimdir, işğala məruz qalan kim, haqsız kimdir, haqlı kim.

Ali Baş Komandan sentyabrın 27-də düşmənin növbəti qanlı təxribatından sonra baş verənlərə bir daha toxunaraq, birmənalı şəkildə qeyd etdi ki, müharibənin başlanmasına görə, biz məsul deyilik. Biz Azərbaycanın işğal edilmiş ərazilərində yerləşən Ermənistan ordusunun fiziki hücumuna məruz qalmışıq. “Ermənistandakı indiki rejim danışıqlar prosesini məhv etmək üçün hər bir şeyi etmişdir. Düz bir il bundan əvvəl Ermənistanın baş naziri Azərbaycanın işğal olunmuş ərazisində keçirilən aksiyada “Qarabağ Ermənistandır” – deyə bəyan etmişdir. Bu bəyanat faktiki olaraq danışıqlar prosesini məhv etdi. Çünki danışıqlar masasında olan və münaqişənin həlli üçün əsas təşkil edən prinsiplər işğal altındakı ərazilərin Azərbaycana qaytarılmasını tələb edir. Ermənistanın baş naziri Azərbaycana bir santimetr torpağın belə qaytarılmayacağını, “Qarabağ Ermənistandır” – deyəndə, onlar Cenevrə Konvensiyasının kobud pozuntusu sayılan əcnəbi şəxslərin işğal olunmuş ərazilərdə məskunlaşmasını təşkil edəndə danışıqlar prosesini məhv edirlər. Bundan sonra bizi buna görə günahlandırmaq üçün onlar bizə üç dəfə – iyul, avqust və sentyabr aylarında hücum edirlər” – deyən Prezident bildirdi ki, biz onları – düşməni, işğalçını döyüş meydanında məğlub etdikdə, onlar Azərbaycanı dayandırmaq üçün hər kəsə zəng edir və hər kəsə yalvarırlar.

Bəli, dayanmaq istəyirik, lakin biz işğalın dayanmasını istəyirik. Buna görə Ermənistanın ünvanına əsas mesaj ondan ibarət olmalıdır ki, biz öz torpağımızdayıq. Eyni zamanda, hər üç müsahibədə düşmənin havadarlarına, o cümlədən, ATƏT-in Minsk qrupunun, həmsədrlərinə qarşı ittihamlar səsləndirən Prezident İlham Əliyev xüsusilə, ermənilərdən daha çox ermənilik edən həmsədr Fransanın və onun bədnam dövlət rəhbəri Makronun ünvanına sərt və haqlı iradlar söylədi. Xüsusilə də Azərbaycan tərəfində muzdluların olması, döyüşməsi barədə Fransa Prezidentinin səfsəfəsini alt-üst etdi: “Mən bütün bu günlər ərzində bu barədə deyirəm. Belə informasiya tullantılarına görə heyrətlənirəm və Fransa Prezidenti ilə telefon söhbətlərimdə mən bizim mövqeyimizi kifayət qədər əsaslandırılmış şəkildə müdafiə etmişəm. Əvvələn, sübutlar təqdim etməsini, əgər belə sübutlar yoxdursa, onda Azərbaycan xalqından üzr istəməsini xahiş etmişəm. İkincisi, mən demişəm ki, bizim muzdlulara ehtiyacımız yoxdur”.

Bu gün Azərbaycan Ordusu bütün beynəlxalq reytinqlərə görə, dünyanın ən güclü 50 ordusunun siyahısına daxildir. Ehtiyatda olanları, döyüşə hazır olan digər hərbiləşdirilmiş dəstələri nəzərə almasaq, bizim nizami orduda 100 min döyüşçümüz var. Bu gün Azərbaycan Ordusu ərazilərimizi düşməndən azad edir.

Dövlətimizin başçısı bildirdi ki, döyüş əməliyyatları yerindən çəkilmiş videolarda bizim artilleriyanın, pilotsuz uçuş aparatlarının necə işləməsi, azərbaycanlı əsgər və zabitlərin işğaldan azad edilmiş torpaqlarda bayraqlarımızı necə ucaltmaları görünür. Buna görə də həmin ittihamlar əsassızdır, biz onları qətiyyətlə rədd edirik və bu cür şayiələrin, yoxlanılmamış məlumatların ictimai rəylə manipulyasiya edilməsinə yol verə bilmərik.

Ölkə Prezidentinin də qeyd etdiyi kimi, qoy, sübutlar təqdim etsinlər, fakt ortaya qoysunlar. Ancaq fəal döyüş əməliyyatlarından on gündən artıq vaxt keçsə də, bu barədə Azərbaycana heç bir sübut təqdim edilməyib. Edə də bilməzlər, çünki ortada fakt-sübut yoxdur. Bəli, bunlar bir daha düşmənin və onun havadarlarının ancaq və ancaq yalana, böhtana, iftiraya, qarayaxma kampaniyasına üstünlük verdiklərini, haqdan, ədalətdən uzaq olduqlarını göstərir. Bəli, bizə qarşı qara təbliğat indi deyil, uzun illər ərzində aparılır. Bunun da bir neçə səbəbi var. Onlardan biri də Azərbaycanın dünya miqyasında müstəqil siyasət aparmasıdır. Aparılan siyasətin mərkəzində də Azərbaycan xalqının maraqları dayanır. Biz başqa ölkələrin əlində alət olmamışıq, olmaq da istəmirik və olmayacağıq. Bugünkü Azərbaycanın bütün istiqamətlər üzrə əldə etdiyi inkişaf göstərir ki, Azərbaycan haqq yolundadır.

Bizim beynəlxalq münasibətlərdə böyük uğurlarımız var. Bu gün Azərbaycan dünya miqyasında məsuliyyətli və etibarlı ölkə kimi tanınır. Biz hazırda Birləşmiş Millətlər Təşkilatından sonra ikinci böyük beynəlxalq təsisata, Qoşulmama Hərəkatına sədrlik edirik. Buna 120 ölkənin dəstəyi ilə nail ola bilmişik. Azərbaycan bu gün Avropa ilə Asiya arasında həm siyasi, həm coğrafi, həm də enerji körpüsüdür. Yəni, bütün bu uğurları, müstəqil siyasət sayəsində əldə etmişik. Bu, bəzi ölkələrin xoşuna gəlmirdi və Azərbaycana yuxarıdan aşağı baxmağa çalışırdılar. Ancaq bizim qətiyyətli mövqeyimiz buna imkan verdi. Ona görə bizə olan təzyiqlərin səbəblərinin biri də məhz budur ki, müstəqil siyasət aparırıq, öz yolumuzla gedirik, heç kimin sözü ilə oturub-durmuruq, heç kimin qarşısında baş əymirik. Bundan sonra da belə olacaq, belə davam edəcəyik, öz müstəqil inkişaf yolumuzla zəfərlərdən-zəfərlərə, qələbələrdən-qələbələrə doğru inamla addımlayacağıq.

Jalə ƏLİYEVA, Milli Məclisin deputatı, professor

Xalq qəzeti 2020.- 14 oktyabr.- S.5.