Uğurlu xarici siyasət ölkəmizin tərəfdaşlarının sayını getdikcə artırır

Biz xarici siyasətimizlə öz milli maraqlarımızı qoruyuruq və mümkün olan riskləri azaldırıq. Bizim xarici siyasətimiz, məhz, milli maraqlar üzərində qurulub. Milli maraqlar nəyi diktə edirsə, biz xarici siyasətdə onu da etməliyik və edirik. Deyə bilərəm ki, buna müvəffəq olmuşuq.

İlham ƏLİYEV

Azərbaycan Respublikasının Prezidenti

Son 17 il ərzində həyata keçirilən məqsədyönlü xarici siyasət nəticəsində Azərbaycan regional və qlobal əhəmiyyətli iqtisadi, siyasi və humanitar layihələrin mərkəzinə, dünyada mühüm söz sahibinə çevrilib, eyni zamanda, bir sıra beynəlxalq əhəmiyyətli əməkdaşlıq formatlarının təşəbbüskarı olub. Prezident İlham Əliyevin rəhbərliyi ilə həyata keçirilən bərabərhüquqlu qarşılıqlı əməkdaşlıq prinsipinə əsaslanan xarici siyasət kursu tanınmış ekspertlər tərəfindən təqdir olunan model kimi qiymətləndirilib. Dövlətimizin başçısının müəyyənləşdirdiyi xarici siyasət strategiyası bütünlüklə milli maraqlara söykənir.

Hazırda Azərbaycan dünyada sabitlik adası kimi tanınır. Bu, ölkəmizin ən böyük nailiyyətlərindən hesab olunur. Respublikamızda yaradılmış sabitlik, əmin – amanlıq ölkəyə daha çox investorların cəlb olunmasına şərait yaradır. İndiki dövrdə iri şirkətlər və inkişaf etmiş dövlətlər daha çox sabitliyin hökm sürdüyü ölkələrə investisiya qoyurlar. Ölkədə yaradılmış sabitlik iqtisadi imkanlarımızdan istifadə edib, xalqımızın rifah halının yaxşılaşdırılması istiqamətində daha qətiyyətli addımlar atılmasına, iri infrastruktur layihələrin reallaşdırılmasına imkan yaradır. Dünyanın başı üzərini almış koronavirus pandemiyasının tüğyan etdiyi bir zamanda da bunun şahidi olduq. Belə bir çətin məqamda Azərbaycanın iri infrastrukur layihələri reallaşdırması beynəlxalq aləmdə də yüksək qiymətləndirilir.

Azərbaycan dinamik inkişaf yolunda inamlı addımlarla irəliləyir, ölkəmizin beynəlxalq mövqeyi davamlı olaraq möhkəmlənir. Bununla yanaşı, zamanın çağırışlarına uyğun olaraq genişmiqyaslı islahatlar həyata keçirilir, ölkəmizin qüdrətinin daha da artmasına xidmət edən mühüm addımlar atılır. Son zamanlar Prezident İlham Əliyevin imzaladığı fərman və sərəncamlara uyğun olaraq həyata keçirilən tədbirlər sosial, iqtisadi və digər sahələri əhatə edən islahatların davamlı xarakter daşıdığını göstərir. Yəni, bütün bu tədbirlər uzunmüddətli islahatlar paketinin tərkib hissəsidir.

Azərbaycanın xarici siyasətinin prioritetlərindən biri dünyada sülhün və təhlükəsizliyin təmin olunmasıdır. Bu mənada, Prezident İlham Əliyevin düşünülmüş, uzaqgörən daxili və xarici siyasəti nəticəsində ölkəmizlə əməkdaşlıq etmək istəyən dövlətlərin sayı getdikcə artır. Tərəfdaşlarımızın sayının artmasında mühüm rol oynayan amillərdən biri də Azərbaycanın sülhyaratma prosesində fəal iştirakı, mütəmadi olaraq səmərəli təklif və təşəbbüslərlə çıxış etməsi, öz praktiki fəaliyyəti ilə sülhün və təhlükəsizliyin möhkəmləndirilməsinə dəyərli töhfələr verməsidir. Dövlət başçısının məqsədyönlü xarici siyasəti nəticəsində ötən dövr ərzində Azərbaycan regional və qlobal əhəmiyyətli iqtisadi, siyasi və humanitar layihələrin mərkəzinə çevrilmiş və bir sıra əhəmiyyətli əməkdaşlıq formatlarının təşəbbüskarı olmuşdur.

Dövlətimizin başçısı müsahibələrinin birində bildirib ki, bəzən bizim xarici siyasətimizi tarazlaşdırılmış kurs kimi qələmə verirlər. Ancaq bizim xarici siyasətimiz milli maraqlar üzərində qurulub. Möhtərəm Prezidentimiz bu açıqlamanın təsadüfən verilmədiyni qeyd edərək deyib ki, bəzi xarici mətbuat orqanlarında, ekspert cəmiyyətlərində belə bir fikir söylənilir ki, Azərbaycan balanslaşdırılmış, tarazlaşdırılmış siyasət aparır: “Bu, belə deyil. Biz balans axtarmırıq. Biz, sadəcə olaraq, xarici siyasətimizlə öz milli maraqlarımızı qoruyuruq və mümkün olan riskləri azaldırıq. Bizim xarici siyasətimiz, məhz, milli maraqlar üzərində qurulub. Milli maraqlar nəyi diktə edirsə, biz xarici siyasətdə onu da etməliyik və edirik. Deyə bilərəm ki, buna müvəffəq olmuşuq. Biz bu coğrafiyada, bu regionda yaşayırıq. Əlbəttə ki, qonşularla əlaqələrimiz xüsusi əhəmiyyət daşıyır, hər bir ölkə üçün. Mən hesab edirəm ki, hər bir ölkə istəyər ki, onun qonşuluğunda dost bir ölkə olsun. Biz son illər ərzində bütün qonşularla – təbii ki, Ermənistan istisna olmaqla – dostluq münasibətlərimizi daha da gücləndirmişik, yeni səviyyəyə qaldırmışıq. Həm ikitərəfli formatda, həm də bizim təşəbbüsümüzlə qonşularla artıq üçtərəfli, hətta, dördtərəfli əməkdaşlıq formatı mövcuddur. Onu da bildirməliyəm ki, bunun təşəbbüskarı da Azərbaycandır”.

Beynəlxalq aləmə də bəllidir ki, bu gün Azərbaycan Avrasiyanın nəqliyyat mərkəzinə çevrilib. Bu, bir daha təsdiqləyir ki, qonşularla yaxşı münasibətlər olmadan enerji, nəqliyyat layihələrini istənilən səviyyədə icra etmək mümkün olmaz. Bütün bunların fonunda dövlət başçısı qeyd edib ki, nəinki yaxın qonşularımızla, biz daha böyük coğrafiyanı əhatə edən əməkdaşlıq formatı yaradırıq. Məhz bu əməkdaşlıq formatı imkan verir ki, biz öz nəhəng, transmilli layihələrimizi uğurla və vaxtında icra edək. Ona görə bu, bizim üçün strateji əhəmiyyət daşıyan bir yanaşmadır. Mən şadam ki, bu gün qonşularımızla bizim əlaqələrimiz dostluq, mehriban qonşuluq, əməkdaşlıq üzərində qurulub və bu əməkdaşlığın çox böyük gələcəyi var.

Ölkəmiz beynəlxalq və regional təşkilatlarla əməkdaşlığın uğurla davam etdirilməsini daim diqqət mərkəzində saxlayıb. Söz yox ki, bəzi qərəzli təşkilatlar ikili standartlardan əl çəkməyərək respublikamıza qarşı böhtan və iftira kampaniyasını davam etdirirlər. Ancaq öz məkrli niyyətlərinə nail ola bilmirlər. Çünki ölkəmiz heç bir dövlətdən asılı olmayaraq müstəqil siyasət yeridir və beynəlxalq təşkilatlarla əməkdaşlığı davam etdirir. Son illər Azərbaycan BMT, Qoşulmama Hərəkatı, ATƏT, Avropa Şurası, Avropa İttifaqı, İslam Əməkdaşlıq Təşkilatı, QİƏT, GUAM, Türkdilli Dövlətlərin Əməkdaşlıq Şurası, Şanxay Əməkdaşlıq Təşkilatı və sair təşkilatlarla sıx əməkdaşlıq edib.

Koronavirus pandemiyası bəşəriyyətin başı üzərini alana qədər ölkəmiz önəmli beynəlxalq tədbirlərə ev sahibliyi edib. Türkdilli Dövlətlərin Əməkdaşlıq Şurasının, Qoşulmama Hərəkatının zirvə görüşlərinin Azərbaycanda keçirilməsi ölkəmizə olan inam və etimadın göstəricisidir. BMT-dən sonra ikinci böyük beynəlxalq təsisata – Qoşulmama Hərəkatına 120 ölkənin yekdil qərarı ilə 3 il ərzində sədrlik etməsi Azərbaycanın xarici siyasət sahəsində qazandığı ən böyük uğurlardan biridir. Bu fakt bir daha təsdiləyir ki, ölkəmizin dünya birliyindəki reytinqi getdikcə yüksəlir. Təbii ki, respublikamızın bu nüfuzlu quruma 3 il ərzində rəhbərliyi dövründə üzv ölkələrlə ikitərəfli əlaqələrin möhkəmləndirilməsi ilə yanaşı, əsas problemimiz olan Dağlıq Qarabağ münaqişəsinin həlli istiqamətində də bütün imkanlardan istifadə ediləcək. Məlum olduğu kimi, artıq Qoşulmama Hərəkatına üzv ölkələr Dağlıq Qarabağ məsələsində Azərbaycanın haqlı mövqeyini birmənalı şəkildə müdafiə edir, münaqişənin ancaq ölkəmizin ərazi bütövlüyü çərçivəsində, beynəlxalq hüquq prinsiplərinə əsasən həllini dəstəkləyirlər. Hərəkat bu mövqeyini Bakıda keçirilən növbəti sammitində bir daha bəyan edib.

Ermənistan – Azərbaycan, Dağlıq Qarabağ münaqişəsinin həlli Azərbaycanın xarici siyasətinin prioritetini təşkil edir. Son illər bu istiqamətdə aparılan danışıqlar prossesinin nəticəsiz qalmasının əsas günahkarı, məhz, işğalçı Ermənistan tərəfidir. Bunun əsas səbəbi işğalçı ölkənin qeyri-konstruktiv mövqeyi, işğalçı siyasətdən əl çəkməməsidir. Artıq Azərbaycan tərəfinin səbir kasası daşmaq üzrədir. Dövlət başçımızın dediyi kimi, Azərbaycan heç vaxt işğalla barışmayacaq. Bu, birmənalıdır və heç kim buna şübhə edə bilməz. Azərbaycan Ordusunun gücünə, qüvvəsinə və döyüş qabiliyyətinə arxalanan Prezident İlham Əliyev ölkəmizin döyüş meydanında öz sözünü deyəcəyinə əmindir. Həm Ermənistan, həm də dünya birliyi artıq bunun şahidi olub.

Xatırladım ki, 2016-cı ilin Aprel döyüşlərində cəmi dörd gün ərzində Azərbaycan Ordusu Ermənistan silahlı qüvvələrinə ağır zərbə vurdu və bununla da “güclü Ermənistan ordusu” mifi puç oldu. Bu döyüşdə uzun illər düşmən əsarətində qalmış ərazilərimizin 2 min hektarı azad edildi və bir neçə starteji əhəmiyyətli yüksəklik ordumuzun nəzarətinə keçdi. 1992-ci ildə erməni silahlı birləşmələri tərəfindən işğal edilən Şərur rayonunun Günnüt kəndi 26 ildən sonra Azərbaycan Ordusunun nəzarəti altına keçdi. Həmin əməliyyatda 11 min hektardan artıq ərazi düşməndən azad edildi. Bu il iyulun 12-16-da Tovuz rayonunda sərhədboyu ərazilərdə təxribat törətmək istəyən düşmənə layqli cavab verildi. Ermənistan ordusu növbəti dəfə ağır məğlubiyyətə düçar oldu. Arxasındakı qüvvələrə güvənən işğalçı ölkənin hazırkı məyusluğunu bir fakt da təsdiqləyir.

Azərbaycanın ədalətli mövqeyi dünya birliyi tətəfindən də dəstəklənir. Məhz bu siyasətin nəticəsidir ki, Ermənistanın beynəlxalq aləmdə nüfuzu getdikcə zəifləməyə başladı. Artıq nüfuzlu beynəlxalq qurumlar tərəfindən yayılan bəyanatlar və qəbul edilən qərarlar da bunu təsdiqləyir. Bu ilin aprel ayında Rusiya xarici siyasət idarəsinin rəhbəri Sergey Lavrov Dağlıq Qarabağın, eləcə də ətraf rayonların işğaldan azad olunmasının qaçılmaz olduğunu bildirib. İyun ayının əvvəlində Avropa Parlamenti işğal altında olan Qarabağdan Ermənistana yeni yol çəkilməsini pislədi. Elə həmin ayın sonunda Avropa İttifaqı xarici qoşunların Azərbaycanın işğal olunmuş ərazilərindən çıxarılmasını tələb edən qətnamə qəbul etdi.

Siyasət və müharibə meydanında məğlubiyyətlə qarşılaşan Paşinyan hakimiyyəti özünə dəstək axtarışına başladı. Bir vaxtlar düşmən münasibəti bəslədiyi KTMT-dən imdad dilədi. Ermənistanın baş naziri hesab edirdi ki, onun bu təşkilata qarşı ögey münasibəti tezliklə unudulacaq. Halbuki, bir müddət əvvəl rəsmi İrəvan heç bir ölkə ilə razılaşmadan bu təşkilatın baş katibini həbs etmiş və Belarus nümayəndəsinin KTMT-yə baş katib təyin olunmasınun əleyhinə çıxmışdı. Bir qədər əvvəl baş verənlər unudulmadığından Paşinyana layiq olduğu yer göstərildi.

Ermənistanın sonuncu təxribat törətmək cəhdi beynəlxalq aləmdə bu ölkəyə qarşı nifrət hissini daha da artırdı, Azərbaycana isə dəstək ifadə olundu. İlk dəstək dost Türkiyədən gəldi. Qardaş ölkənin Prezidentinin “Bütün imkanlarımızla dost və qardaş Azərbaycanın yanındayıq və buna davam edəcəyik” – deməsi dünyaya mesaj oldu. Türkdilli Dövlətlərin Əməkdaşlıq Şurası və 57 ölkəni özündə birləşdirən İslam Əməkdaşlıq Təşkilatı da ölkəmizə dəstək oldu. Ən böyük dəstək isə 120 ölkənin təmsil olunduğu Qoşulmama Hərəkatından gəldi.

Əslində, bu dəstəklərin təməlində ölkəmizin digər dövlətlərin maraqlarına toxunmayan faydalı və əməkdaşlığa töhfə verən, düzgün müəyyənləşdirlmiş xarici siyasəti dayanır. Həmişə başqa dövlətlərə və ikili standartlardan hələ də əl çəkməyən bəzi beynəlxalq təşkilatlara güvənərək hədə-qorxu dili ilə danışan Ermənistan bu dəfə həm hərbi, həm də siyasi məğlubiyyətdən qaça bilmədi. İndi həm benəlxalq ictimaiyyəti, həm də erməniləri düşündürən əsas məsələ Ermənistan rəhbərliyinin bundan sonra hansı addımı atacağıdır. Çünki artıq onların özlərinə də məlumdur ki, bu ölkənin manevr emək imkanları, demək olar ki, tükənib.

Əliqismət BƏDƏLOV

Xalq qəzeti 2020.- 12 sentyabr.- S.3.