Balaxanı qəsəbəsində gördüyüm abadlıq işləri məni heyrətləndirdi

Azərbaycan Respublikasının Prezidenti İlham Əliyev və birinci xanım Mehriban Əliyeva sentyabrın 23-də Bakının Balaxanı qəsəbəsində aparılan abadlıq işləri ilə tanış olublar. Mən bu hadisə barədə reportajı televiziyadan diqqətlə izlədim və çox sevindim.

Səhərisi gün yolumu Balaxanıya saldım. Nə gizlədim, burada gördüklərimə inana bilmirdim. Axı, Balaxanının bundan qabaq nə vəziyyətdə olduğuna yaxşı bələd idim. İndi qəsəbənin dünəni ilə bugünü arasında yerlə göy qədər fərq yaranıb. Bir sözlə, qəsəbənin bu qədər dəyişərək gözələşəcəyini təsəvvür etmirdim.

Burada görülən işlərin vüsəti və həcmi adamı, həqiqətən heyrətə gətirir. Qəsəbədəki inam və inanc yerləri, su ovdanları, hamamlar, digər maddi-mədəniyyət obyektləri xüsusi zövq və səliqə ilə bərpa olunub.

Qəsəbə sakinləri, təbii ki, öz sevinc və minnətdarlıq hisslərini gizlətmirdilər. Kimlə görüşüb həmsöhbət oldumsa, hamı bir ağızdan möhtərəm Prezidentimiz İlham Əliyevə, Birinci vitse-prezident Mehriban xanım Əliyevaya dərin minnətdarlığını bildirirdi.

Qeyd etmək lazımdır ki, Balaxanı Bakının ən qədim yaşayış yerlərindən biridir. XX əsrin əvvəllərindəki neft bumuna qədər Balaxanı Böyük İpək Yolunun üstündə yerləşdiyindən strateji mövqeyə sahib idi. Uzun əsrlər boyu bu yer Çindən İspaniyaya qədər uzanan karvan yolunun əsas məntəqələrindən biri olub.

Bakının bu qədim qəsəbəsi artıq yeni turizm marşrutu kimi təsdiqlənib. Bu, qəsəbədə yeni sahibkarlıq subyektlərinin, xüsusilə, sənətkarlıq, xidmət və ticarətin inkişafına təkan verəcək.

Abadlıq prosesi həm də yerli sakinlər üçün yeni iş yerləri deməkdir. Təmir-bərpa işlərində iştirak edənlərin 70 faizi məhz yerli sakinlərdən ibarətdir.

Mən uzun illərdir turizm sahəsində çalışmışam. Demək istəyirəm ki, son illər ölkəmizdə, bütövlükdə, turizmin, o cümlədən mədəni turizmin inkişafına diqqət və qayğı artıb. Məsələn, bir neçə il əvvəl Heydər Əliyev Fondu tərəfindən bərpa edilərək istifadəyə verilən Qala Arxeoloji Etnoqrafik Muzey Kompleksi hazırda minlərlə yerli və xarici turistin axışdığı məkanlardandır.

Dövlətimizin qayğısı ilə “Atəşgah” məbədi” Dövlət Tarix- Memarlıq Qoruğu cəlbedici turizm obyektinə çevrilib. Bundan əlavə, Abşeron təbiətinin bənzərsiz guşəsi olan Yanardağda təbiət və dövlət qoruğu yaradılıb. Bunlar, eləcə də dünya şöhrətli Qobustan Dövlət Tarixi-Bədii Qoruğu açıq səma altında muzeylərdir. Azərbaycan Milli Tarix Muzeyi, Azərbaycan Milli Ədəbiyyat Muzeyi, Azərbaycan Milli Xalça Muzeyi və digər muzeylər turistlərin ən çox ziyarət etdikləri məkanlardır.

Mən zərrə qədər şübhə etmirəm ki, Balaxanı qəsəbəsi də tezliklə yerli və xarici turistlərin sevimli məkanına çevriləcək.

Minaxanım ƏSƏDLİ,

Azərbaycan Turizm və Menecment Universitetinin professor

Xalq qəzeti 2020.- 26 sentyabr.- S.7.