Vədə sadiq Prezident

 

 

 Azərbaycanın Vətən müharibəsindəki möhtəşəm qələbəsi şərəfinə ötən il dekabr ayının 10-da paytaxtımızda keçirilən Zəfər paradı təcavüzkar Ermənistanın 30 il ərzində işğal altında sax­ladığı torpaqlarımızın azad olunmasını, ordumuzun gücünü, xalqımızın mübarizə əzmini, yumruq kimi bir olmağını ifadə edən təntənənin nümayişi idi. Prezident, Ali Baş Komandan İlham Əliyev Vətən müharibəsində müzəffər Silahlı Qüvvələrin qazandığı qələbəyə həsr olunan həmin pa­raddakı çıxışında dedi: “Bundan sonra Azərbaycan yalnız inkişaf edəcək. Bizim azad edilmiş torpaq­lara bundan sonra həyat qayıdacaq... Azadlıq meydanında paradlar çox keçirilib. Ancaq bu paradın xüsusi önəmi var. Bu, Zəfər paradıdır. Bu, tarixi hadisədir. Bu tarixi günün şahidi bizik, Azərbaycan xalqıdır. Biz bundan sonra ancaq və ancaq irəli gedəcəyik”.

 

Dövlətimizin başçısı bu sözlərlə bir çox həqiqətləri ifadə edirdi. Belə ki, Azərbaycan uzun illər ərzində misilsiz bir inkişaf yolu keçsə də, beynəlxalq aləmdə sülh, barış, əməkdaşlıq ça ­ğırışları ilə böyük nüfuz qazansa da, bu uğurlar yarımçıq sayılırdı. Çünki torpaqlarımızın 20 faizi erməni faşizminin əsarətində idi. Ərazilərimizin işğaldan azad edilməsi yönündə aparılan mübarizə heç bir nəticə vermirdi. Düşmən BMT Təhlükəsizlik Şurasının dörd qətnaməsinə, eləcə də digər beynəlxalq təşkilatların bu yöndə qəbul etdikləri sənədlərə məhəl qoymayaraq, havadar­larına arxalanıb müxtəlif vasitələrlə qəsbkarlığını davam etdirir, təmas xəttində daim təxribatlar törədir, yeni torpaqlarımızı ələ keçirəcəyi iddia ­sını səsləndirməkdən belə çəkinmirdi. Düzdür, bu illər ərzində ordumuz işğalçıya təxribatlarına görə layiqli dərs vermişdi: 2016-cı ilin aprelin 2-də, bundan iki il sonra – 2018-ci ilin mayında, nəhayət, ötən il iyul ayının 12-16-da düşmənin təcavüzkar hərəkətinin qarşısı mərdliklə alın­mışdı. Lakin erməni xisləti ona Azərbaycanın səbir kasasının nə vaxtsa daşacağını, ordusunu tamamilə darmadağın edəcəyini anlamağa imkan vermirdi.

 

Belə bir gün gəldi: Ermənistan hərbi birləşmələri 2020-ci il sentyabrın 27-də növbəti təxribat törədərək, ölkəmizə hücuma keçdi, yaşayış məntəqələrimizi və hərbi mövqelərimizi müxtəlif istiqamətlərdən atəşə tutdu. Bu cinayətin qar­şılığında isə Azərbaycan Silahlı Qüvvələri əks-hücum əməliyyatlarına başladı, Prezident, Ali Baş Komandan İlham Əliyevin rəhbərliyi ilə cəmi 44 gün ərzində möhtəşəm qələbə qazanaraq, dünya hərb tarixinə yeni şanlı səhifələr yazdı, “güclü, məğlubedilməz erməni ordusunu” darmadağın etdi.

 

İkinci Qarabağ müharibəsində xalqımızın birliyi, ölkə rəhbərinin möv­qeyini dəstəkləməsi də qələbəmizi şərtlədirən əsas amillərdən biri oldu. Etiraf edək ki, düşmən bunu gözləmirdi. İşğalçı savaş günlərində dinc əhalini atəş altında saxlamaq­la, cəbhə bölgəsindən kənar şəhər və rayonlarımıza raket zərbələri endirməklə daxildə təfriqə yara­da biləcəyini düşünürdü. Lakin bu istəyinə nail ola, xalqımızı ruhdan sala, mübarizə əzmini qıra, zəiflədə bilmədi.

 

Müharibədə hər bir əsgər və za­bitimiz qəhrəmanlıq, cəsarət, şücaət nümayiş etdirdi, Şuşanı bıçaq, süngü ilə aldı, o müqəddəs şəhəri qaya­lıqları dırmaşaraq, ölümün gözünə dik baxaraq, qanı-canı bahasına azadlığa qovuşdurdu. Bir nəfər olsun belə fərari qeydə alınmadı. Amma “məğlubedilməz” erməni ordusu çətin məqamda döyüşə girməkdən çəkindi, düşmənin 10 mindən çox hərbçisi fərariyə çevrildi.

 

Tarixi hadisəyə çevrilən bu qələbə, zəfər paradının dövlətimizin başçısı­nın həmin gün etdiyi çıxışda vurğu­ladığı kimi, misli-bərabəri yox idi, əvvəlki hərbi paradlardan fərqlənirdi. Bəli, bu parad dünyanın heyrətlə izlədiyi, tədqiq etdiyi, 44 günlük Vətən müharibəsində qazanılan möhtəşəm zəfərin, misilsiz uğurun məntiqi sonluğu idi. Bu parad Azərbaycan xalqının 200 illik tarixinin bəlkə də ən şərəfli, ən fərəhli-sevincli bir gününün nümayişi idi. Bu parad xalqımızın bö­yüklüyünün, dövlətimizin qətiyyətinin, ordumuzun şücaətinin, Prezident, Ali Baş Komandan İlham Əliyevin uğurlu siyasətinin təsdiqi idi.

 

Zəfər paradı Azərbaycan Prezidentinin, necə deyərlər, sözünün ağası olduğunu, verdiyi vədə sadiq qaldığını bir daha bütün dünyaya nü­mayiş etdirdi. Bu fikri əsaslandırmaq üçün çox sayda nümunələr gətirə bilərik. Ancaq bu məqamda bir hadisəni xatırlatmağı zəruri bilirik. Belə ki, dövlətimizin başçısının 2018-ci ilin iyununda iştirak etdiyi Azadlıq meydanındakı hərbi paradda 2016-cı ilin Aprel döyüşlərində düşməndən təmizlənən Lələtəpə yüksəkliyində qaldırılan bayraq dalğalandırılmışdı. O zaman Prezident, Ali Baş Koman­dan İlham Əliyev paradın tribunasın­dan çıxış edərək, Şuşada və digər torpaqlarımızda qaldırılmış bayrağı­mızın da nə vaxtsa Azadlıq meydanı­na gətiriləcəyini əminliklə vurğulamış­dı. Bəli, cənab İlham Əliyev iki il əvvəl dediyi sözlərə əməl etdi. Bununla Prezidentimiz verdiyi vədə sadiqliyini, uzaqgörənliyini, müdrik siyasətini bir daha sübuta yetirdi: 28 illik işğaldan sonra müzəffər ordumuz tərəfindən azad edilən Azərbaycanın incisi, mədəniyyət paytaxtı Şuşa şəhərinin üzərində qaldırılan Zəfər bayrağı Zəfər paradında dalğalandırıldı. Bundan böyük xoşbəxtlik, bəxtəvərlik necə ola bilər?!.

 

Otuz ilə yaxın bir zaman ərzində Azərbaycan haqlı olmasına, torpaq­larının işğal edilməsinə, milyonla he­sablanan əhalisinin yurd-yuvasından didərgin salınmasına baxmayaraq, dünya birliyi, nüfuzlu beynəlxalq qu­rumlar bu ədalətsizlik önündə susdu, qəsbkarı yerində oturtmağa belə cəhd göstərmədi. Ancaq bir neçə dövlət, xüsusilə qardaş Türkiyə bu məsələdə hər zaman xalqımıza siyasi-mənəvi dəstək verdi, siyasi tribunalardan ədalətli mübarizəmizə qoşuldu. Vətən müharibəsinin getdiyi günlərdə də bu, təkrarlandı. İkinci Qarabağ savaşın­da möhtəşəm zəfərimizin sevinci də birgə bölüşüldü.

 

Zəfər paradında da 3 min Azərbaycan əsgəri və zabiti ilə bərabər, qardaş Türkiyənin də hərbçiləri iştirak edirdilər. Tarix boyu çətin, ağır anlarda, sevinc, fərəh yaşanan günlərdə bir yerdə olan iki qardaş xalqın övladları, iki qardaş ölkənin rəhbərləri yenə də bir yerdə cəmləşdi, bir yerdə bu tarixi hadisəyə şahidlik etdi.

 

***

 

Prezident İlham Əliyev Zəfər paradındakı çıxışında dediyi “Bun­dan sonra Azərbaycan yalnız inkişaf edəcək. Bizim azad edilmiş torpaqla­ra bundan sonra həyat qayıdacaq...”,- sözləri savaşdan ötən bir il ərzində öz təsdiqini tapıb. Məhz bu məqam da dövlətimizin başçısının sözü ilə əməlinin vəhdət təşkil etdiyini, vədinə sadiqliyini göstərir. Zəfər paradından sonra həyata keçirilən işlərin miq­yasını təsəvvürümüzə gətirəndə bu, açıq-aşkar nəzərə çarpır. Qarabağ və Şərqi Zəngəzurda bu müddətdə bəlkə də on illər ərzində görülə biləcək tədbirlər reallaşdırılıb, layihələr icra olunub. Şuşaya Zəfər yolu çəkilib, Zəngilanda “ağıllı kənd”lərin salınma­sına başlanıb, erməni vandallarının Xirosimaya çevirdikləri Ağdamın yenidən tikilməsi istiqamətində xeyli iş görülüb, Qarabağın hava qapısı – Füzuli Beynəlxalq Hava Limanı istifadəyə verilib. Bölgə elektrikləşdirilib, suyu qurudulan bu­laqların gözü açılıb, yolların bərpası, kommunikasiyaların qurulması diqqətdə saxlanıb.

 

Prezidentlər İlham Əliyev və Rəcəb Tayyib Ərdoğanın bir yerdə Zəngəzur dəhlizinin təməlini qoy­maları isə tarixi hadisəyə çevrilib. Dövlətimizin başçısının vurğu­ladığı kimi, Zəngəzurdan keçən nəqliyyat, kommunikasiya, infrast­ruktur layihələri bütün türk dünyasını birləşdirəcək, eyni zamanda, digər ölkələr, o cümlədən Ermənistan üçün əlavə imkanlar yaradacaq. Ermənistanın hazırda İranla, Rusiya ilə dəmir yolu əlaqəsi yoxdur. Belə bir əlverişli əlaqə Naxçıvan vasitəsilə təmin edilə bilər. Azərbaycan Türkiyə ilə, Orta Asiya isə Avropa ilə birləşər.

 

Zəfər paradında Azərbaycanın hərbi gücünün bir hissəsi–150-dək hərbi texnika, o cümlədən silahlan­maya yeni qəbul edilən müasir hərbi texnika, raket və artilleriya qurğu­ları, hava hücumundan müdafiə sistemləri, eləcə də hərbi gəmi və katerlər nümayiş etdirildi. Bu, Prezident İlham Əliyevin uzun illər ərzində apardığı uğurlu xarici və daxili siyasətlə bərabər, ordu quruculuğu sahəsində fədakar fəaliyyətinin parlaq göstəricisi idi. Azərbaycan məhz belə bir müasir texnika ilə XXI əsrin müharibəsini apararaq qalib gəldi.

 

Paradda Ermənistan ordusunun döyüşlərdə qənimət olaraq ələ keçi­rilmiş hərbi texnikasının bir hissəsinin nümayişi isə faşizmin hansı sonluqla nəticələndiyindən xəbər verirdi...

 

Vaqif BAYRAMOV

 

Xalq qəzeti .- 2021.- 11 dekabr.- S.5.