Məqsəd Şamaxı filialını təhsil, tədqiqat

və innovasiya mərkəzinə çevirməkdir

 

Müasir dünyada hər bir ölkənin uğurlu gələcəyi həmin ölkədə təhsilin səviyyəsi ilə müəyyən olunur. Təsadüfi deyil ki, Azərbaycan Prezidenti İlham Əliyev “Təhsil Azərbaycanın davamlı inkişaf strategiyasının ən öncül istiqamətlərindən biridir” deməklə bu sahənin inkişafedici aspektlərinin yüksəldilməsi ilə bağlı təhsil işçiləri qarşısında çox ciddi vəzifələr qoymuşdur. Bu baxımdan Azərbaycan Dövlət Pedaqoji Universitetinin (ADPU) Şamaxı filialının kollektivi də təhsilin inkişafı sahəsində öz üzərinə düşən məsuliyyəti layiqincə yerinə yetirməyə çalışır. Şamaxı filialının fəaliyyət göstərdiyi 30 illik tarixə nəzər salsaq, onun bu illər ərzində böyük inkişaf yolu keçdiyini görərik.

Şamaxı filialının direktoru, filologiya üzrə fəlsəfə doktoru, dosent Tünzalə Yusifova ilə söhbətimiz də təhsil ocağının dünəni və bu günü, tələbələrin yüksək ixtisaslı kadr kimi yetişdirilməsi üçün tədris işinin qurulması, mədəni-kütləvi tədbirlərin keçirilməsi, tələbələrdə vətənpərvərlik ruhunun gücləndirilməsi barədədir.

 

Tünzalə xanım, ötən tədris ili ölkəmizin təhsil tarixində gərgin dövr oldu. Pandemiya, 44 günlük Vətən müharibəsi 30 illik tarixi olan filialda təhsil prosesinə çətinlik yaratmadı ki?

– Öncə onu qeyd edək ki, ADPU- nun Şamaxı filialı Nazirlər Kabinetinin 1991-ci il tarixli qərarına əsasən fəaliyyətə başla­mış, və Prezident İlham Əliyevin 2000- ci il tarixli fərmanı ilə onun bazasında Azərbaycan Müəllimlər İnstitutunun (AMİ) Şamaxı filialı yaradılmışdır. Dövlət başçısının sərəncamı ilə 2015- ci ildə AMİ filialları ilə birgə ADPU-ya qoşul­muş və biz həmin ali məktəbin Şamaxı filialı olaraq fəaliyyətimizi davam etdirmişik. Yarandığı ilk illərdə filialın elmi potensialı kifayət etmədiyindən kafedraların forma­laşdırılması mümkün olmamış, professor-müəllim heyəti paytaxt­da yerləşən digər nüfuzlu ali təhsil müəssisələrindən dəvət olunmuş­dur. Bu gün filialda 1 pedaqoji fakültə və 3 kafedra – sosial və pedaqoji elmlər, riyaziyyat və kompüter elmləri, dil-ədəbiyyat və onların tədrisi texnologiyası kafed­raları daxil olmaqla, ümumilikdə 11 bölmə və şöbə fəaliyyət göstərir və 7 ixtisas üzrə kadr hazırlığı aparılır. Ötən illərdə filialda 2500- dən şox ali təhsilli pedaqoji kadr hazırlanmışdır.

ADPU-nun Şamaxı filialının qarşısında duran əsas vəzifə ölkənin və regionun sosial-iq­tisadi inkişafının tələblərinə uyğun bilik və bacarığa malik mütəxəssislər yetişdirmək və filialı təhsil, tədqiqat, innovasiya mərkəzinə çevirməkdir. Bu ba­xımdan əməkdaşlar respublikada təhsil sahəsində həyata keşirilən innovativ layihələrin iştirakçısı olmaqla bərabər, eyni zamanda bu layihələrin təşkilatçısı kimi də fəaliyyət göstərirlər.

Qürurverici haldır ki, pandemi­ya dövründə həm vətəndaşların sağlamlığı, həm də sosial rifa­hı ölkə başçısının diqqətindən kənarda qalmadı. Prezidentin düzgün siyasi xətti sayəsində pandemiya dalğasının qarşısının alınması istiqamətində mühüm işlər ğörüldü, səhiyyə sistemi gücləndirildi, əhaliyə davamlı dəstək mexanizmi işə salındı. Pandemiyanın kütləvi itkilərlə müşayiət olunması və hələ xeyli müddət davam edəcəyi ehtimalını göz önündə saxlayaraq təhsilin fasiləsizliyinin təmin edilməsi məqsədilə bir sıra tədbirlər həyata keçirildi. Təhsil Nazirliyinin “Evdə qal, təhsildən qalma!” – çağırışı­na bütün ali təhsil müəssisələri kimi Azərbaycan Dövlət Pedaqoji Universiteti, o cümlədən onun Şamaxı filialı da tam qüvvəsi ilə qoşuldu. Professor – müəllim heyəti qısa müddət ərzində məsafədən təhsilin şərtlərinə uyğun təlimatlandırıldı, texniki təchizat məsələləri həll edildi. Bü­tün ixtisaslar və fənlər üzrə tədris qaldığı yerdən onlayn rejimdə davam etdirildi. 2020-ci ilin mart – may aylarında, demək olar ki, respublikanın əksər bölgələrindən olan tələbələrimiz elektron for­mada mühazirə materialları ilə təmin edildi. Respublikanın ucqar kəndlərində yaşayan tələbələrin dərslərə qoşulmasında problemlər yaranmasını nəzərə alaraq, həmin tələbələrlə zəng və ya elektron poçt ünvanı vasitəsilə əlaqə saxlanıldı və daha geniş təlim im­kanları yaradıldı. Kollektivin əzmi sayəsində bütün çətinliklərdən uğurla çıxa bildik. Ötən dövrdə tədrislə yanaşı mədəni kütləvi tədbirlər də onlayn qaydada həyata keçirildi. Filialın Elmi Şurasının, kafedraların iclasları, bir sözlə bütün tədbirlər onlayn şəkildə təşkil edilir.

Ali Baş Komandan İlham Əliyevin rəhbərliyi ilə torpaqla­rımızın işğaldan azad edilməsi və ölkəmizin ərazi bütövlüyünün təmin edilməsi ilə başa çatan Vətən müharibəsi ADPU- nun Şa­maxı filialının kollektivi tərəfindən böyük qürur hissi ilə dəstəkləndi və sosial şəbəkələrdə işıqlandı­rıldı. Ümumilikdə, filial fəaliyyət göstərdiyi müddətdə regionun yeganə ali təhsil müəssisəsi olaraq həm ixtisaslı kadrla­rın yetişdirilməsində, həm də gənc nəslin vətənpərvər ruhda tərbiyə olunmasında cəmiyyətdə özünə müsbət imic qazanmış­dır. Qeyd edək ki, bu şanlı tarixə məzunlarımız da öz imzalarını atdılar. Onlarla məzunumuz döyüşlərdə göstərdikləri şücaətə görə Ali Baş Komandanın sərəncamı ilə orden və medal­larla təltif olundular. Təəssüflə qeyd edim ki, şəhidlik zirvəsinə ucalan məzunlarımız da oldu. Biz onların xatirəsini daim uca tuta­raq filialın həyətyanı sahəsində əbədiləşdirmişik.

– Filialın tələbə kontingenti necədir? Hansı bölgədən qəbul üstünlük təşkil edir?

– Filialın qəbul planlarının statistikasında bölgənin tələbatı nəzərə alınır. Yeni tədris ilindən fizika müəllimi və təhsildə sosial psixoloji xidmət ixtisasları üzrə kadr hazırlığı da məhz bu baxım­dan nəzərdə tutulmuşdur. Başa vurduğumuz tədris ili üçün filialda tələbə sayı 540 nəfərdir. Res­publikanın bütün bölgələrindən tələbələrimiz olsa da, böyük əksəriyyəti Şirvan bölgəsinin təmsilçiləri olur ki, bu da bölgədə müəllim kadrları hazırlığını həyata keçirən filialın əhəmiyyətli oldu­ğunu təsdiq edir. Son illərdə filiala 500- dən artıq balla qəbul olan tələbələrin sayı artıb.

– Təhsil prosesinin təşkili ilə bağlı fikrinizi də öyrənmək istərdik.

– Filialda tədrisin təşkili günün tələblərinə uyğun quru­lur. Belə ki, istər maddi-texniki baza, istər müəllim heyətinin hazırlığı və səriştəliliyi, istərsə də tələbələrimizin tədrisə məsuliyyətli münasibəti uğurlarımızın əsasını təşkil edir. Tədris ADPU-nun təsdiq olunmuş tədris planları­na və tədrisin kredit sistemi ilə təşkili qaydalarına uyğun olaraq həyata keçirilir. Filialda İKT-nin multimedia və internet imkanla­rının zənginləşdirilməsi və onlar­dan səmərəli istifadənin təşkili, elektron dərslik, dərs vəsaitlərinin hazırlanması həyata keçirilir, təcrübə mübadiləsinin və qabaqcıl təcrübənin yayılması məqsədilə kafedralar tərəfindən açıq dərslər və onların müzakirəsi təşkil edilir. Filial əməkdaşlarının müxtəlif təlim kursları və seminarlarda iştirakı təmin olunur. Tədris prosesində in­novativ pedaqoji texnologiyalardan istifadə olunması, nəzəri və praktik məsələlərin vəhdətdə aşılanması gələcək kadrların istər pedaqoji təcrübə, istər MİQ imtahanlarında, istərsə də pedaqoji fəaliyyətləri zamanı heç bir çətinliklə üzləşməməsi ilə nəticələnir. 2020-ci il məzunları arasında MİQ imtahanlarında yüksək nəticə göstərən məzunlarımızın sayının çox olması buna bariz nümunədir. Qeyd etmək istərdik ki, son illərdə filialın qazandığı bütün uğurlarda ADPU- nun rektoru, professor Cəfər Cəfərovun daim diqqət və qayğısını hiss etmışik.

– Filialın maddi-texniki bazası, kadr potensialı müasir tələblərə cavab verirmi?

– Son illərdə filialın tədris korpusunda təmir işləri aparılmış, infrastruktur və maddi-texniki bazası xeyli yaxşılaşdırılmış­dır. Tədris binası 3 mərtəbədən ibarətdir. Binada tədris üçün nəzərdə tutulmuş 25 auditoriya, 16 xidməti otaq, 2 oxu zalı və 3 kitabxana fondu saxlanılan otaq, 120 nəfərlik yeməkxana, tibb otağı, 150 nəfərlik akt zalı, 60 nəfərlik Heydər Əliyev Lektoriyası və İnklüziv Təhsil Mərkəzi möv­cuddur. 25 tədris auditoriyasının hər birində kompüter, 4 otaqda elektron lövhə, 6 otaqda proyektor yerləşdirilmişdir. Sürətli fiberoptik internetə qoşulma internetlə bağlı problemləri aradan qaldırmışdır. Rəsmi saytımız (www.shamakhi-adpu.az) daim fəaliyyətdir.

Hazırda filialda 95 əməkdaş çalışır. Onlardan 37 nəfəri pro­fessor–müəllim heyəti, 24 nəfər tədris –köməkçi heyəti, 13 nəfər inzibati –idarə heyəti, 21 nəfəri isə xidmətedici heyətin üzvü­dür. Müəllim heyətinin tərkibinin elmi dərəcəlilərin hesabına artırılmasına və müəllimlərin elmi fəaliyyətlərinin davam etdirilməsinə ciddi fikir verilir. Professor –müəllim heyətindən 4 nəfəri dosent, 7 nəfəri fəlsəfə doktoru, baş müəllim, 4 nəfəri baş müəllim, 22 nəfəri isə müəllim kimi çalışır. Eyni zamanda profes­sor–müəllim heyətindən 2 nəfər elmlər doktoru, 7 nəfər fəlsəfə doktoru proqramı üzrə disser­tantdırlar. Həmçinin filialda tədris üçün ölkənin nüfuzlu ali təhsil müəssisələrindən yüksək elmi potensiala malik 14 müəllim (1 professor, 12 dosent, 1 fəlsəfə doktoru) dəvət olunmuşdur. Bu gün filialda çalışan əməkdaşlar arasında müxtəlif dövrlərin məzunları öz müəllimləri ilə bərabər çiyin-çiyinə çalışırlar.

– Filialda hansı ixtisaslar üzrə kadr hazırlanır və nə yeniliklər gözlənilir?

– 2020 – 2021-ci tədris ilinin sonunadək filialda dövlət təhsil standartlarının tələblərinə əsasən bakalavr təhsil pilləsində ibtidai sinif, tarix və coğrafiya, riyaziyyat və informatika, Azərbaycan dili və ədəbiyyat və məktəbəqədər təlim və tərbiyə ixtisasları üzrə kadr hazırlığı həyata keçirilib. 2021 – 2022-ci tədris ilindən bölgədəki kadr ehtiyacını nəzərə alaraq, göstərilən ixtisaslarla yanaşı, yeni iki ixtisas – fizika və təhsildə sosial psixoloji xidmət ixtisasları üzrə də kadr hazırlığı aparılacaq. Bu yenilikləri nəzərə alaraq, həmin ixtisaslar üçün də kabinetlər təşkil olunur. Filialda fizika müəllimliyi ixtisası üzrə kadr hazırlığı AMEA-nın N.Tusi adına Şamaxı Astrofizi­ka Rəsədxanası ilə əməkdaşlığın da genişlənməsinə zəmin yaradır. Həmçinin bütün ixtisaslar üzrə ink­lüziv təhsil fənninin tədris olunma­sı nəzərdə tutulur. İnklüziv təhsil mərkəzinin işinin təkmilləşdirilməsi məqsədilə mərkəzin fəaliyyətinin laboratoriya kimi davam etdirilməsi qərara alınmışdır. Günün tələblərinə müvafiq olaraq ADPU-nun Şamaxı filialı yeniliklərə açıq bir müəssisə olduğunu tədrisə innovativ baxışlar ilə sübut edir.

Hər dəfə məzunlarla görüşlərdən sonra qürur hissi keçi­ririk ki, onların arasında müxtəlif rayonların təhsil şöbələrinin işçiləri, elmi dərəcəli, “Tərəqqi medal”lı, “Əməkdar müəllim” və “İlin müəllimi” adını almış, MİQ imtahanlarında yüksək göstəricilər əldə etmiş məktəb rəhbərləri, müəllimlər var. Məzunlarımız həmçinin müxtəlif rayonların idarəetmə orqanlarında, eləcə də dövlət əhəmiyyətli bir çox sahələrdə öz vəzifələrini layiqincə yerinə yetirirlər.

 

Müsahibəni qələmə aldı:

İlqar HƏSƏNOV

 

Xalq qəzeti.- 2021.- 10 iyul.- S.7.