Azad Mirzəcanzadə fenomeninə işıq salan yeni nəşr

Kitabın annotasiyasında qeyd olunduğu kimi, təqdim olunan toplu XX--XXI əsrlərin görkəmli Azərbaycan ziyalıları sırasında yer almış alim, öz sahəsində məktəb yaratmış müəllim, akademik Azad Mirzəcanzadənin həyat və yaradıcılığına, pedaqoji fəaliyyətinə, neft sənayesində müəllifi olduğu fundamental yeniliklərə, elmi və elmi-populyar əsərlərinə həsr olunub. Dünya neft elminə önəmli töhfələr vermiş Azad Mirzəcanzadə öz fəlsəfi dühası, fitri istedadı və ensiklopedik bilgiləri ilə də fenomen şəxsiyyət sayılıb. Ömrünün son illərini neft sənayesində nanotexnologiyaların yaradılması tələbatına həsr etmiş alimin irəli sürdüyü ideyalar elmi cəhətdən bu gün də ciddi şəkildə araşdırılır və tətbiq olunur.

Akademik yeni kitaba da daxil edilmiş bir müsahibəsində vaxtilə bildirmişdi: “Mən düşünürəm ki, insanların çoxu bədbəxtliyə savadsızlıqdan yox, sadəlövhlükdən düçar olurlar. Bu cəhət mənim xalqıma xasdır. Çox vaxt öz səhvləri ucbatından bədbəxtliyə düçar olduqlarını düşünənlər, buna eynən düşünülməmiş addım atdığını dərk etməyən uşaqlar kimi sadəlövhlük üzündən düçar olduqlarını anlamırlar. İlk növbədə, özüm haqqında demək istəyirəm. Mən orta adamam, lakin peşəkaram. Bizdə məndən xeyli istedadlı adamlar var, lakin onların bəzilərində dözüm və səbr çatmır. Mən hesab edirəm ki, Azərbaycan istedadların sayına görə bütün sivil ölkələri qabaqlayır”.

Özünü və ətrafındakı adamları olduğu kimi tanımağa imkan verən bu belə müdrik mülahizələr və digər maraqlı matteriallar dünya şöhrətli neftçi alim Azad Mirzəcanzadənin özünü də çağdaş nəsillərə gerçək epizod və detallarla tanıdır. Unudulmaz alimin zəngin və mənalı ömür yoluna işıq salan yeni kitab geniş oxucu kütləsi üçün nəzərdə tutulub.

Akif ƏHMƏDGİL

Xalq qəzeti 2021.- 9 yanvar.-S.7.