Oxu tar, səni kim unudar?

Azərbaycan Milli Konservatoriyası hər zaman olduğu kimi, bu dəfə də bir ilkə imza atdı. Respublikamızda məhz Azərbaycan Milli Konservatoriyasının səhnəsində ilk “Tar festivalı” keçirildi, lakin daha gürurverici başlıq altında: “Şuşa ili çərçivəsində Tar festivalı!”

Öncə onu qeyd edim ki, bu festivalın keçirilməsi bilavasitə Azərbaycan Milli Konservatoriyasının rektoru, Xalq artisti, professor Siyavuş Kəriminin təşəbbüsü ilə ərsəyə gəlmişdir. Ümumiyyətlə, Azərbaycan Milli Konservatoriyasının yaradılması ilə istər milli alətlərimiz, istərsə də xanəndəlik sənətimiz yeni mərhələyə qədəm qoydu. Neçə-neçə istedadlı gəncimiz ustad sənətkarların bu musiqi ocağındakı yorulmaz fəaliyyəti sayəsində “ecazkar” musiqi sənətinin bütün dərinliklərinə və incəliklərinə yiyələnmiş olur. Bu musiqi məbədi indi neçə-neçə yaşlı nəsil sənətkarlara ruh verir, onların həyat eşqini artırır, çünki məhz bu ustad sənətkarlarımız musiqi məbədi adlandırdığımız Azərbaycan Milli Konservatoriyasında gənclərə öz ustadlarından miras aldıqları sənəti ötürürlər. Məhz elə bu amalla da Siyavuş Kərimi növbəti missiyasını həyata keçirərək “Tar festivalı” adı altında üç nəsil tarzənləri bir arada cəmlədi.

Dörd gün ərzində Azərbaycan Milli Konservatoriyasının səhnəsində əsl bayram yaşandı. Bəli, əsl “Tar bayramı!”. İndi tarın səsi də bir başqa cür səslənirdi, onu ifa edən tarzənin ifası da bir başqa idi. Çünki illərdir, qəlbimizdə daşıdığımız və tarın səsi ilə daha da köksümüzü “deşən” o nisgil artıq yoxdur. Amma yenə də tar bizi kövrəltdi, sevinc göz yaşlarına qərq olduq.

Sanki bu dörd gündə Azərbaycanımızın istedadları yarışırdı. Onların sırasında hər zaman fəxrlə adlarını çəkdiyimiz, dünya şöhrətli sənətkarlarımız Ağasəlim Abdullayev, Firuz Əliyev, Möhlət Müslümov, Malik Mansurov, Elçin Həşimov kimi Xalq artistləri öz çıxışları ilə, sözün əsl mənasında, hər bir tamaşaçını valeh etdilər. Bu sənətkarların ifasında biz nəinki hər zaman eşitməyə alışdığımız ənənəvi xalq mahnılarımızı və dəstgahlarımızı, həmçinin onların yeni ifadə vasitələri ilə uğurlu birləşmələrini dinləmiş olduq. Əməkdar artistlər Vüsal İsgəndərzadə, Səbuhi Cəfərov, Şəhriyar İmanov, habelə qeyri-adi istedad sahibi Arslan Növrəslinin ifalarında milliliyi qoruyub saxlamaqla, bu milliliyə “Avropa” ahəngi qatmış olmalarının çox uğurlu və zövqlü nümayişini seyr etdik. Gənc olmalarına baxmayaraq, tanınmış və çox istedadlı tarzənlərimiz də bu festivala öz töhfələrini vermiş oldular. Onlardan Rövşən Qurbanov, Kamal Nuriyev, Əli Əsgər Məmmədov, Bəhruz Zeynal da müəllimlərinin qarşısında ifaları ilə bu alətə sevgi və ehtiramlarını sübut etdilər. Elman Sadıqov və Ayaz İmanovun ifaları isə tamaşaçıları “füsnkar” aləmə apardı.

Azərbaycan musiq mədəniyyəti tarixində əlamətdar hadisə kimi qalacaq bu festival, xalqımızın dərin kökləri, istedadı, əzmkarlığının və milli dəyərlərə bağlılığının gösrəricisidir. Ürəkdən inanırıq ki, yaxın zamanlarda “Tar festivalı” hüdudları aşaraq, beynəlxalq status qazanmış olacaq! Nakam şairimiz Mikayıl Müşfiqin bu misralardakı ürək çırpıntıları beynəlxalq aləmdəki dostlarımızda da xoş ovqat yaradacaq.

“Oxu, tar, oxu, tar!

Səsindən ən lətif şeirlər dinləyim.

Oxu, tar, bir qadar!

Nəğməni su kimi alışan ruhuma çiləyim.

Oxu, tar!

Səni kim unudar?

Ey geniş kütlənin acısı, şərbəti–

Alovlu sənəti!”

Cəmilə MIRZƏYEVA,

sənətşünaslıq üzrə fəlsəfə doktoru, dosent

Xalq qəzeti 2022.- 9 aprel.- S.11.