Azərbaycanın nüfuzu durmadan artır

 

Biz heç vaxt imkan verə bilmərik ki, xalqımıza, dövlətimizə, ərazi bütövlüyümüzə hər hansı bir təhdid yaradılsın. Ölkə hüdudlarından kənarda olsa da, əgər bu təhdidi biz görsək, heç kim bizi dayandıra bilməz.

 

İlham ƏLİYEV

 

Azərbaycan Respublikasının Prezidenti,

 

Silahlı Qüvvələrin Ali Baş Komandanı

 

 

 

Prezident İlham Əliyevin dünyada gedən geosiyasi və geoiqtisadi proseslərə böyük uzaqgörənliklə yanaşması, hadisələri düzgün qiymətləndirmək qabiliyyəti həyata keçirilən xarici siyasətin uğurlarını şərtləndirən əsas faktorlardan biridir. Azərbaycan XXI əsrdə ilk Qələbə paradı keçirən dövlət kimi adını dünya tarixinə yazıb. Bu, dövlət başçımızın təcrübəli siyasətçi, qlobal məsələləri böyük peşəkarlıqla həll edən lider olmasından və mürəkkəb situasiyalarda düzgün seçim etməsindən xəbər verir. Azərbaycan tarixinin şanlı səhifələrindən olan tarixi Qələbə dövlət başçımızın liderlik keyfiyyətlərini, eyni zamanda, ölkəmizin sosial-iqtisadi, siyasi, mədəni, hərbi sahələrdəki nailiyyətlərini dünyaya nümayiş etdirdi.

 

Vətən müharibəsində şanlı Zəfərin əldə olunması Prezident İlham Əliyevin həyata keçirdiyi uğurlu xarici siyasət və keçmiş Dağlıq Qarabağ münaqişəsinin həlli istiqamətində apardığı ardıcıl, qətiyyətli diplomatik mübarizənin, eyni zamanda, ordu quruculuğuna xüsusi önəm verməsinin nəticəsidir. Artıq 19-cu ildir ki, Azərbaycanın dövlət müstəqilliyinin möhkəmləndirilməsi və milli maraqlarının təmin olunması sahəsində Prezident İlham Əliyevin həyata keçirdiyi xarici siyasət kursu respublikamızı beynəlxalq aləmdə etibarlı tərəfdaş ölkə kimi tanıdır. Ermənistan üzərindəki tarixi Qələbəmizdən sonra Azərbaycanla əməkdaşlıq etmək istəyən dövlətlərin sayı da artır. Çünki bu Zəfər ölkəmizin Cənubi Qafqazın aparıcı dövləti kimi dünya birliyində mövqeyi­ni möhkəmləndirdi və reytinqini yüksəltdi. Dövlət başçımızın siyasi kursunun qayəsini ölkələrin suverenliyinə, ərazi bütövlüyünə və daxili işlərinə qarışmamaq prinsipi təşkil edir. Bu siyasət ölkəmizin dünya dövlətləri arasında qarşılıqlı faydalı və bərabərhüquqlu əməkdaşlığını daha da möhkəmləndirir.

 

Ötən həftə Brüsseldə Azərbaycan Prezidenti İlham Əliyevin Avropa İttifaqı Şura­sının prezidenti Şarl Mişel və Ermənistan baş naziri Nikol Paşin­yan ilə görüşü və həmin görüşdə ölkəmizin təklif etdiyi 5 baza prinsipinin Ermənistan tərəfindən qeyd-şərtsiz qəbul edilməsi növbəti diplomatik uğurumuz kimi qiymətləndirilir. Bundan əvvəl isə ABŞ Prezidenti Co Baydenin Novruz bayramı münasibətilə Azərbaycan Prezidenti İlham Əliyevə təbrik məktubu, Rusi­ya Prezidenti Vladimir Putinin Azərbaycanla Rusiya arasında diplomatik münasibətlərin qu­rulmasının 30 illiyi münasibətilə dövlət başçımızı təbrik etməsi, İran İslam Respublikasının Prezdenti İbrahim Rəisinin təbrik məktubu, Polşanın xarici işlər naziri, ATƏT-in fəaliyyətdə olan sədri Zbiqnev Raunun başçılıq etdiyi nümayəndə heyəti, eləcə də Avropa Şura­sının baş katibi xanım Mariya Peyçinoviç Buriçin rəhbərlik etdiyi nümayəndə heyəti ilə keçirilən yüksək səviyyəli görüşlər respub­likamızın beynəlxalq aləmdəki reytinqinin daha da yüksəldiyindən xəbər verir. Həmin məktublardakı bəzi faktları, eləcə də avropalı diplomatlarla keçirilən görüşlərdəki zəruri məqamları diqqətə çat­dırmaqla Azərbaycanın dünya birliyindəki nüfuzunun artdığını təsdiqləmiş olarıq.

 

Təbii ki, ABŞ Preziden­ti də çox yaxşı bilir ki, hazırda Azərbaycan Cənubi Qafqazda, Xəzər hövzəsində mühüm oyunçu, Qarabağda həyata keçirilən anti-terror əməliyyatının, daha dəqiq desək, Ermənistanın ölkəmizə qarşı başladığı müharibənin qali­bidir. Prezident Bayden, eləcə də dünya birliyi Azərbaycanın güclü və qalib dövlət olduğunu etiraf edir. Həmçinin ölkəmiz bölgədə həyata keçirilən iri infrastruk­tur layihələrinin müəllifi kimi, həm də bu layihələrin həyata keçirilməsində aparıcı rol oynayır. Bütün bunlara rəğmən ABŞ-ın milli təhlükəsizlik və strateji maraqları Cənubi Qafqazda Azərbaycanla əməkdaşlığı diktə edir. Prezident Baydenin məktubunun məğzini də məhz bu amillər təşkil edir.

 

Prezident Co Baydenin dövlət başçısı İlham Əliyevə ünvanla­dığı təbrik məktubu ABŞ-ın yeni Administrasiyasının Azərbaycanla əməkdaşlığın daha da inkişaf etdirilməsində maraqlı olduğunu, iki ölkə arasında əlaqələrin strateji əhəmiyyət kəsb edən münasibətlər səviyyəsinə yüksəldiyini, dostluq və tərəfdaşlıq xarakteri daşı­dığını nümayiş etdirir: “Mənim administrasiyam təhlükəsizliklə bağlı ümumi narahatlıqlar və regional barışıq məsələlərinin həlli istiqamətində Azərbaycanla birgə çalışacaqdır… Biz, həmçinin iqtisadiyyatınızın şaxələndirilməsi və Xəzər dənizində enerji imkan­larının inkişafı ilə bağlı səylərinizi dəstəkləyirik. Amerika Birləşmiş Ştatları iqtisadi əməkdaşlıq üçün yeni imkanları nəzərdən keçirmək arzusundadır”.

 

Rusiya Prezidenti Vladimir Putinin iki ölkə arasında diploma­tik münasibətlərin qurulmasının 30 illiyi münasibətilə Azərbaycan Prezidentinə ünvanladığı təbrik məktubunda da son onilliklər ərzində Rusiya – Azərbaycan münasibətlərinin yaxşı dostluq və qarşılıqlı hörmət ənənələrinə əsaslandığı qeyd edilir. İki ölkə arasında konstruktiv siyasi dialo­qun genişlənməsi, ticarət-iqtisadi, elmi-texniki, humanitar və digər sahələrdə səmərəli əməkdaşlıq ölkəmizin etibarlı tərəfdaş olmasın­dan xəbər verir. Rusiya Prezidenti keçən il və daha öncə bağlan­mış üçtərəfli sazişlərə əsasən, rəsmi Bakı və Moskvanın Cənubi Qafqaz regionunda sabitliyin və təhlükəsizliyin möhkəmləndirilməsi üçün birgə işləməsi zərurətini ön plana çəkir.

 

Belə faktlar İran İslam Res­publikasının Prezdenti İbrahim Rəisinin də təbrik məktubunda öz əksini tapıb. Bu, ölkəmizin qonşu dövlətlərlə qarşılıqlı münasibətlərin yüksək səviyyədə olmasından xəbər verir.

 

Artıq nüfuzlu beynəlxalq qurumlar da Azərbaycanın haqq-ədalət tərəfdarı olduğunu, postmüharibə dövründə Cənubi Qafqazda yaranmış reallıqları etiraf edirlər. Bu günlərdə Pol­şanın xarici işlər naziri, ATƏT-in fəaliyyətdə olan sədri Zbiqnev Raunun başçılıq etdiyi nümayəndə heyətinin dövlət başçımızla keçir­diyi görüş zamanı “Azərbaycanın hazırda regionun əsas nəqliyyat-logistika mərkəzlərindən birinə çevrildiyini” vurğulaması postmüharibə dövründə ölkəmizin inkişafına verilən yüksək dəyərdir. Azərbaycanla Polşa arasında ikitərəfli münasibətlərin uğurla inkişaf etdiyini deyən Zbiqnev Rau iqtisadi-ticari əlaqələrin genişləndirilməsi məqsədilə qarşı­dan gələn aylarda hökumətlərarası komissiyanın iclasının keçiriləcəyini də diqqətə çatdırdı.

 

Zbiqnev Raunun Azərbaycanın işğaldan azad olunmuş ərazilərində aparılan bərpa-quruculuq işlərində Polşa şirkətlərinin də maraqlandığını vur­ğulaması ölkəmizlə əməkdaşlığa hazır olduqlarını bildirməsidir. Bütün bunlar xarici siyasətimizin uğurlarının təcəssümüdür. Dövlət başçımızın bir neçə gün əvvəl Avropa Şurasının baş katibi xanım Mariya Peyçinoviç Buriçin rəhbərlik etdiyi nümayəndə heyəti ilə ke­çirdiyi görüş zamanı səsləndirilən fikirlər də ölkəmizin nüfuzlu beynəlxalq təşkilatlarla yüksək səviyyəli əməkdaşlığından xəbər verir. Görüş zamanı Mariya Buriçin Azərbaycanın Avropa Şurasında üzvlüyünü yüksək dəyərləndirmiş, ölkəmizin AŞ-ın çox sayda kon­vensiya və müvafiq sənədlərinə qoşulduğunu, həmçinin, bu istiqamətlərdə işin aparıldığını diqqətə çatdırdı.

 

Azərbaycanın sülh tərəfdarı olması, Ermənistanın işğalçı­lıq siyasətindən əl çəkməməsi, keçmiş Dağlıq Qarabağın tarixi ilə bağlı dünya ictimaiyyətinə son illərdə dolğun məlumatlar çatdı­rılıb. Dövlət başçımız hər dəfə Azərbaycanın prinsipial mövqe­yini BMT, ATƏT, NATO, Avropa Şurası, Avropa İttifaqı, İslam Əməkdaşlıq Təşkilatı, Müstəqil Dövlətlər Birliyi kimi beynəlxalq və regional təşkilatların tribuna­larından səsləndirib, Ermənistanı işğalçılıq siyasətindən əl çəkməyə, dünya dövlətlərini isə problemin aradan qaldırılması üçün fəallıq göstərməyə çağırıb. Lakin dünya­da baş alıb gedən ikili standart, siyasi riyakarlıq, islomofobiya və bir sıra beynəlxalq təşkilatların ölkəmizə qarşı qərəzli mövqe­yi, işğalçılara isə himayədarlığı erməniləri daha da şirnikləndirib. Bu havadarlıqdan istifadə edən Ermənistan 2020-ci il sentyabrın 27-də ölkəmizə qarşı müharibəyə başladı. Təbii ki, düşmənin azğın­lığı və torpaqlarımızın işğalda qal­ması əbədi ola bilməzdi. Ölkəmizə qarşı genişmiqyaslı təxribatlara, sonra isə müharibəyə başlayan işğalçı Ermənistan qoşunları rəşadətli ordumuz qarşısında cəmi 44 gün davam gətirə bildi. 2020-ci il noyabrın 10-da Ermənistan rəhbərliyi Azərbaycan Ordusu qarşısında diz çökdü və təslim olduğunu rəsmən təsdiqlədi.

 

Tarixi Qələbəmiz regionda yeni reallıqlar yaradıb. Qələbədən sonra ölkəmizin müdafiə qüdrətinin daha da artırılması istiqamətində mühüm əhəmiyyətli tədbirlər həyata keçirilir. Artıq dünyanın əksər dövlətəri Azərbaycanla əməkdaşlığa maraqlı olduqlarını gizlətmirlər. İşğaldan azad edil­miş ərazilərimizdə genişmiqyaslı yenidənqurma, abadlıq-quruculuq işlərinə xarici şirkətlərin qoşulması da bundan xəbər verir.

 

Azərbaycan Prezidenti, Silahlı Qüvvələrin Ali Baş Komandanı İlham Əliyevin göstərişinə əsasən Azərbaycan Ordusunun döyüş qabiliyyətinin daha da artırılma­sı istiqamətində görülən işlər davam etdirilir. Müharibədən sonra ölkə Prezidentinin tapşırığı ilə müharibənin nəticələri təhlil edilərək yenidən Azərbaycan Ordusunda təşkilat tədbirləri həyata keçirilir. İşğaldan azad edilmiş ərazilərdə yeni yaradılan komando hərbi hissəsi peşəkar hərbçilərdən təşkil olunub. Haqqın­da danışılan yeni hərbi hissələrdə xidmət edənlər Türkiyədə təlim keçərək bu sahədə təcrübə toplayıblar. Onlar artıq hərbi hissələrimizdə fəaliyyətə baş­layıblar. Prezident, Ali Baş Ko­mandan İlham Əliyev işğaldan azad edilmiş ərazilərdə hərbi hissələrin yaradılmasını yüksək dəyərləndirib. Dövlət başçımız həmin hərbi hissələrdən birinin açılış mərasimindəki çıxışında deyib: “Bu gün Hadrutda yeni hərbi hissənin açılması, bir daha demək istəyirəm ki, çox əlamətdar hadisədir. Həm ona görə ki, bu, bölgə strateji əhəmiyyət daşı­yır. Hadrutda bizim güclü silahlı birləşməmiz təhlükəsizliyimizi, ölkəmizin təhlükəsizliyini qoruya­caq, - digər tərəfdən ona görə ki, bu, azad edilmiş keçmiş Dağlıq Qarabağ Muxtar Vilayətinə aid olmuş yerdə yerləşir. Eyni zaman­da, bu hərbi hissənin ən böyük əhəmiyyəti ondan ibarətdir ki, biz müharibədən sonra ordu quruculu­ğu prosesini dayandırmamışıq və orduya ayrılan xərcləri azaltmamı­şıq, əksinə, artırmışıq”.

 

Azərbaycan yenə də nüfuzlu beynəlxalq tədbirlərə evsahibliyi edir. Bu, ölkəmizin uğurlu diploma­tiyasının göstəricisidir. Düşünül­müş xarici siyasət nəticəsində əldə olunmuş nailiyyətlər Azərbaycanın müstəqil, demokratik, hüquqi və dünyəvi dövlət kimi inkişafına mühüm təsir göstərir. Hazırkı dövrdə, necə deyərlər, dünyanın nizamı pozulduğu bir vaxtda, beynəlxalq aləmdə baş verən geosiyasi ziddiyyətlərə, qloballaş­manın özü ilə gətirdiyi çətinliklərə baxmayaraq, Azərbaycan davamlı inkişaf yolu ilə irəliləyən dövlət kimi dünya ölkələri arasında özünə layiqli yer tutur. Milli maraqlara və praqmatizmə əsaslanan xarici siyasətin aparılması beynəlxalq ictimaiyyətdə Azərbaycana böyük inam və etimad qazandırır.

 

Əliqismət BƏDƏLOV

 

Xalq qəzeti  2022.- 16 aprel - S.4.