Moskva Bəyannaməsi regional əməkdaşlıq üçün də önəmlidir

“Şuşa Bəyannaməsi Türk dövlətləri, diasporlar və bölgədəki digər ölkələr üçün vacib bir sənəddir. Digər tərəfdən, Azərbaycan müstəqil dövlətdir, istənilən ölkə ilə müttəfiqlik bəyannaməsi bağlaya bilər”. Bu açıqlamasının davamında Azərbaycan və Rusiya arasında fevralın 22-də imzalanmış Moskva Bəyannaməsinə münasibət bildirən Türkiyə Böyük Millət Məclisinin deputatı, Türkiyə –Azərbaycan Parlamentlərarası dostluq qrupunun rəhbəri Şamil Ayrım həmin sənədi müsbət qiymətləndirdiyini söyləyib:

– Bu məsələdə bizim üçün vacib olan Azərbaycanın qərarlarıdır. Müstəqil dövlət olaraq Azərbaycan öz mənfəətinə uyğun müqaviləyə imza ata bilər. Rusiya və Azərbaycan arasında əlaqələr normal vəziyyətdədir. Qarabağ müharibəsində də Rusiya Türkiyə ilə birlikdə önəmli yeri tuturdu. Bizim bu müqavilədən gözləntimiz bölgədə əmin-amanlığa təminat yaratmasıdır. Ümumilikdə isə deyə bilərəm ki, bu bəyannamənin imzalanması iki qonşu və dost ölkə arasında normal prosedurdur.

Eyni zamanda, bu müqavilə barədə kimlərsə fərqli düşünə bilər. Hazırda Ukrayna müharibəsi var. Bu məsələdə kənardan Rusiyanın sanki Azərbaycanı öz tərəfinə çəkməsi kimi şərh edilə bilər. Amma bunu belə düşünmək lazım deyil. Günlərin və illərin birində tarixən qardaş və dost olmuş Rusiya ilə Ukrayna da indiki qarşıdurmanı arxada buraxıb belə bir müqavilə bağlaya bilər. O ki qaldı, Azərbaycan və Türkiyə arasında bağlanan Şuşa müqaviləsinə, o, beynəlxalq hüquqa əsaslanır və bu hüquqla da qorunur.

Türkiyə Böyük Millət Məclisində AKP deputatı Şamil Ayrım Moskva Bəyannaməsinin Şuşa bəyannaməsi ilə ziddiyyət təşkil etmədiyini vurğulayaraq bildirib:

– Moskvada bu günlərdə Azərbaycan Prezidenti İlham Əliyevin və Rusiya Prezidenti Vladimir Putinin Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında bəyannaməni imzalamaları iki ölkə ilə yanaşı, rejional əməkdaşlığın genişlənməsi üçün də önəmli addım sayıla bilər.

Hazırladı: T.RÜSTƏMOV

Xalq qəzeti .- 2022.- 26 fevral.- S.10.