Türkün gücünü dünyaya göstərən “TEKNOFEST”

Türkiyə ilə Azərbaycan dostluğu, qardaşlığı 30 il ərzində bütün geosiyasi proseslərdən uğurla çıxan iki dövlət arasındakı münasibərlərin təzahür formasıdır. Ölkəmizdə ilk dəfə keçirilən “TEKNOFEST Azərbaycan” festivalında prezidentlərin çıxışlarından da gördük ki, artıq Türkiyə ilə Azərbaycan arasındakı münasibətlərdən doğacaq yeni mərhələ, qlobal yanaşma və strateji məsələlər var. Bunların da kökündə qardaşlıq, dostluq durur və bu gün dünyada gedən proseslər fonunda bu iki dövlətin bir yerdə olması dünyaya sülh, əmin-amanlıq, yenilik gətirir. Dünya şöhrətli alim Əziz Səncərın Şuşaya getməsi, orada fəxrlə “Mən öz torpağımdayam” – deməsi onu sübut edir ki, hər bir türk harada yaşamasından asılı olmayaraq, Şuşanı özününkü bilir, Qarabağı doğma yurdu hesab edir. Birliyimiz onu göstərir ki, hər bir türk üçün Azərbaycan Vətəndir, doğmadır, onu qorumağa da hər an hazırdır.

Festivalda iştirak etdim. Çox qürurverici anlar yaşadım. Gənclərin daha çox Səlcuq Bayraqdarın ətrafına toplaşdıqlarını müşahidə etdim. Onlar Səlcuq bəylə şəkil çəkdirir, tövsiyələrini dinləyir, suallar verirdilər. Festivalda öz ixtiraları ilə iştirak edən azərbaycanlı gənclər də vardı. Sevindirici haldır ki, mükafat alanlar arasında onlar da oldu. Bu, bizdə böyük qürur və sevinc hissi yaradır.

Vətən müharibəsində yaratdığı PUA-larla düşmənə qan udduran Səlcuq Bayraqdarın festivalla bağlı fikirləri maraqlı oldu. Səlcuq bəy dedi ki, ”TEKNOFEST” müstəqilliyi, qardaşlığı, elmi və əxlaqı əldə rəhbər tutan bir ruhdur. Bu ruh ölkələrimizi tam müstəqil və firavan edəcək, səmalarımızı, dənizlərimizi, torpaqlarımızı qoruyub dirçəldəcək yüksək texnologiyaları bütün cəmiyyətlə birlikdə inkişaf etdirmək səfərbərliyidir: “Mənə dünən ilk dəfə görməyin nəsib olduğu işğaldan azad edilmiş qədim şəhərimiz Şuşada, Cıdır düzündə, o geniş düzdə azad şəkildə gəzərkən bu ruhu daha da dərindən hiss etdim. “TEKNOFEST”i niyə keçiririk?” – deyə soruşduğum universitet tələbəsi gənc bir qız bu ruhu belə ifadə edərək dedi: “Dünya türkün gücünü görsün, yerini bilsin”. Biz də bu yola bu amalla çıxmışıq, “TEKNOFEST”in şüarının artıq düşüncələrdə yer aldığını görürük. Bundan sonra üzərimizə düşən vəzifə türk nəsillərinin yolunu açmaq üçün dayanmadan çalışmaqdır”.

Fəaliyyət göstərdiyi Amerikadan Bakıya gələn Nobel mükafatı laureatı, görkəmli alimimiz Əziz Səncərin gənclərə müraciəti daha ibrətamiz oldu: “Mardin vilayətinin Savur rayonundan çıxan və oxuma-yazma belə bilməyən bir ailənin uşağına bu şansı verən millətimizə güvənin. Vətənimizin – Vətənimiz dediyim zaman mən həm Türkiyə, həm də Azərbaycanı nəzərdə tuturam, onu da açıqlayım, – yüksəlməsi üçün lap çox çalışın. İşlər qaydasında getmədikdə belə düzəltmək üçün mübarizə aparın, inadkar olun və məğlubiyyəti əsla qəbul etməyin”.

Azərbaycan Prezidenti İlham Əliyev Türkiyə ilə münasibətlərin yüksək səviyyədə olduğunu xatırladaraq, yaxşı günlərdə də, çətin günlərdə də hər zaman bir - birimizin yanında olduğumuzu vurğuladı və dedi ki, elə etməliyik və edəcəyik ki, qarşıda ancaq yaxşı günlər olsun. Türkiyə – Azərbaycan qardaşlığı, birliyi xalqlarımız üçün əsas yol istiqamətidir, bölgə üçün, dünya üçün də çox önəmli amildir, təhlükəsizlik, sabitlik amilidir: “Nə qədər Türkiyə və Azərbaycan bir yerdə inamla addımlasa, bölgəmizdə sülh və barış o qədər də möhkəm olacaqdır. Bunu biz və bütün dünya İkinci Qarabağ müharibəsi zamanı gördük. Türkiyə bizim yanımızda idi. Əziz qardaşım, hörmətli Prezident Rəcəb Tayyib Ərdoğanın müharibənin ilk saatlarında “Azərbaycan tək deyil, Türkiyə onun yanındadır” – deməsi bizə əlavə güc verdi, ruh verdi, inam verdi. Azərbaycan xalqı bunu heç vaxt unutmayacaq”.

Dövlət başçımız türk dünyasının böyük oğlu, dünya şöhrətli alim Əziz Səncərin “TEKNOFEST”in hörmətli qonağı olduğunu vurğuladı və gənclərə müraciət etdi: “Əziz bəylə keçən görüşümü xatırlayıram, mənə dedi ki, onun böyük arzusu var idi hər zaman – Şuşaya getmək. Mənimlə görüşdən sonra Şuşaya getmişdir və bildirmişdir ki, artıq həyatda nəyə nail olmaq istəmişəmsə, ona nail olmuşam – Şuşanı da gördüm. Bu, bizi də çox xoşbəxt etdi. Əziz Səncər kimi insanlar gənclər üçün örnəkdir, nümunədir – həm alim, həm vətəndaş, həm türkçü, həm vətənpərvər insan. Siz gənclər, Əziz bəyə oxşamağa çalışmalısınız.”

“TEKNOFEST”in ölkə xaricində ilk dəfə Azərbaycanda təşkil edildiyini qeyd edən Türkiyə Prezidenti R.T.Ərdoğan festivalı Azərbaycan gəncliyinin bacarığını, istedadını nümayiş və inkişaf etdirməsi üçün önəmli bir platforma kimi dəyərləndirdi: “TEKNOFEST” yarışlarında öz işləri ilə fərqlənən siz gənclərimiz sabahın pilotsuz uçuş aparatlarını, süni zəkalarını, rəqəmsal texnologiyalarını istehsal edən və inkişaf etdirən alimləri olacaqsınız”.

Türkiyə ilə Azərbaycan dostluğu – qardaşlığı sarsılmazdır. Prezident İlham Əliyevin dediyi kimi, iki ölkə prezidenti arasındakı qardaşlıq bütün Türkiyə və Azərbaycan xalqına örnək olmalıdır.

Aydın HÜSEYNOV,

Milli Məclisin deputatı

Xalq qəzeti .- 2022.- 4 iyun.- S.8.