Azərbaycanın inkişaf və tərəqqi dövrünün başlanğıcı

 

Bu gün böyük insan Heydər Əliyevin ömür yolu hər birimiz üçün xalqa, Vətənə xidmət etməyin rəmzinə çevrilib. Bu gün onun ən sevimli kəlmələrindən birini–“Mən fəxr edirəm ki, mən azərbaycanlıyam” kəlməsini təkrar edərək biz onun unudulmaz xatirəsi qarşısında baş əyirik.

 

İlham ƏLİYEV

 

 Azərbaycan Respublikasının Prezidenti

 

Milli qurtuluşa aparan yol 29 il əvvəl baş verənləri gözlərimiz önündə canlandırır və bizə tariximizi vərəqləməyi diktə edir. XX əsrin sonlarında dövlət müstəqilliyini bərpa edən Azərbaycan çox keçmədən böyük təhlükələrlə üzləşdi. Müstəqilliyimizin ilk illərində ölkəyə rəhbərlik edənlərin dövlət idarəçiliyindəki səriştəsizliyi mərd oğul və qızlarımızın qanı bahasına bərpa edilmiş müstəqilliyimizi addım-addım uçuruma yaxınlaşdırırdı. Bir tərəfdən ölkədə tez-tez baş verən hakimiyyət dəyişikliyi, sərhədlərin müdafiəsinin unudulması, digər tərəfdən ayrı-ayrı şəxslərə xidmət edən qeyri-qanuni silahlı birləşmələrin respublikamızda xof yaratması və qanunlara tabe olmaması, o cümlədən ölkədə yaranmış hakimiyyətsizlikdən istifadə edib torpaqlarımızı hissə-hissə zəbt edən Ermənistan ordusunun törətdiyi vəhşiliklər Azərbaycanı parçalanmaq həddinə çatdırırdı.

Həmin dövrdə hakimiyyəti ələ keçirmiş AXC-Müsavat cütlüyü zi­yalıları, tanınmış ictimai-siyasi xadimləri, həmçinin ağsaqqalları, elm adamlarını yaxına buraxmır, onlarla məsləhətləşmir və hakimiyyəti özlərinin zəif təfəkkürləri ilə “idarə edirdilər”. Bu cütlüyün vəzifəyə təyin etdiyi şəxslər , əsasən, savadsız, dövlət idarəçiliyində heç bir təcrübəsi olmayan, əsas amalı var-dövlət toplamaq olan naşı adam­lar idi. Vəziyyət getdikcə ağırlaşırdı. Qanunlara tabe olmayan ayrı-ayrı şəxslər ətraflarına topladıqları qeyri-qanuni silahlı birləşmələrlə hakimiyyəti ələ keçirmək üçün min bir oyundan çıxırdılar.

1993-cü ilin iyun ayı. Məhz bu tarixdə müstəqilliyini yenicə bərpa edən Azərbaycan xalqı Sovet İtifa­qının əsarətindən qurtulduğu üçün sevinməyə macal tapmamış, fəlakətə sürükləndi. AXC-Müsavat iqtidarının ölkəyə kor-koranə rəhbərliyi respublika­mızı kiçik xanlıqlara bölür və bununla da Azərbaycan dünya xəritəsindən silinmək ərəfəsinə yetişirdi. Xalqın taleyini yalnız öz maraqlarını güdən, “kreslo” davasına çıxan naşı adamlar həll edirdi.

Azərbaycan idarəolunmaz vəziyyətə çatmış ölkəyə çevrilirdi. Hakimiyyətdə olanların ölkənin tanınmış ictimai-si­yasi xadimlərinə güvənməsi əvəzinə xarici ölkələrdəki himayədarları ilə məsləhətləşmələri xalqla iqtidar ara­sında uçurum yaradırdı. Xalqın narazı­lıqlarına əhəmiyyət verməyən AXC-Müsavat cütlüyü yalnız hakimiyyəti saxlamağı düşünərək, respublikamıza faciə gətirmiş, günahsız insanların həlak olmasına şərait yaratmış­dı. Dövlət əmlakının talan edilməsi xalqı acınacaqlı duruma salmışdı və suverenliyimizə təhdid yaratmışdı. Bütün ölkələrlə münasibətlər kor­lanmış, bəzi ölkələrə qarşı iddialar irəli sürməklə Azərbaycanı qonşu dövlətlərlə düşmən etmişdi və respub­likanı təcrid vəziyyətə salmışdı. AXC-Müsavat cütlüyünün bir illik hakimiyyəti ölkədə anarxiya, xaos, özbaşınalığın tüğyan etməsi, iqtisadiyyatın çökməsi, əhalinin sosial durumunun son dərəcə ağırılaşması, torpaqlarımızın işğalı ilə nəticələnmişdi.

1993-cü ilin 4 İyun hadisələri vəziyyəti daha da gərginləşdirdi. AXC-Müsavat iqtidarının Milli Qəhrəman səviyyəsinə yüksəltdiyi, korpus komandiri Surət Hüseynov hakimiyyətə tabe olmur, öz silah yol­daşları ilə birlikdə iqtidara meydan oxu­yurdu. O, hakimiyyətin istefasını tələb edir, ölkədə birinciliyi öz əlinə almaq istəyirdi. Gəncədə baş verənlər ölkədə vəziyyətin təhlükəli həddə çatmasının əsas sübutu idi. Ovaxtkı hakimiyyətin səriştəsizliyi, baş alıb gedən siyasi xaos ölkəni vətəndaş müharibəsi ilə üz-üzə qoydu. İqtidarın Surət Hüseyno­vu və rəhbərlik etdiyi hərbi birləşməni tərksliah etmək üçün göndərdiyi silahlı qüvvələr ağır məğlubiyyətə uğradı. Qardaş qanı axıdıldı, günahsız insan­lar qətlə yetirildi. Vəziyyət daha da ağırlaşdı və ölkə vətəndaş müharibəsi həddinə çatdı.

Azərbaycan torpaqlarının Ermənistan silahlı qüvvələri tərəfindən davamlı işğalı, getdikcə gərginləşən siyasi vəziyyət, əhalinin gündən-günə ağırlaşan sosial durumu ölkəni bu bəlalardan xilas edə biləcək, xalqı öz arxasınca aparmağa qadir liderə ehtiyac olduğunu şərtləndirirdi. Cəmiyyətin bütün təbəqələri əmin idilər ki, müstəqilliyini yenicə bərpa etmiş ölkəni düşdüyü ağır və dözülməz vəziyyətdən çıxarmağa qadir yeganə şəxsiyyət dövlət idarəçiliyində zəngin təcrübəsi olan, dünya şöhrətli siyasi xadim Heydər Əliyev ola bilər. Əslində, bu istək bütün xalqın ürəyinin səsi idi. Xalqımız Heydər Əliyevin ətrafında sıx birləşməklə öz gələcək taleyini özü həll etmək niyyətində idi. Beləliklə, xalq ölkəni fəlakətdən qurtarmaq üçün ulu öndər Heydər Əliyevə müraciət etdi.1993-cü il iyunun 9-da Heydər Əliyev xalqın çağırışına səs verərək Bakıya qayıtdı və Azərbaycan Xalq Cümhuriyyətinin taleyindən daha dəhşətli hadisələrin gözlənildiyi ölkəmizi bəlalardan xilas etdi. Həmin gün, sözün həqiqi mənasında, res­publikamızın taleyində dönüş anı oldu. Xalqımızı nicata aparan yol bilavasitə həmin gündən başlandı.

Xalqın təkidi ilə Naxçıvandan Bakı­ya gələn ulu öndər əvvəlcə Gəncəyə gedib baş verən hadisələrlə yerində tanış olmağı qərara aldı. “Əminik ki, Gəncə hadisələri diqqətlə araşdırı­lacaq, mübahisəli məsələlər bütün Azərbaycan xalqının mənafeyi, milli dövlət quruculuğu naminə danışıq­lar, qarşılıqlı anlaşma və sülh yolu ilə həll ediləcək” söyləyən ulu öndər Gəncəyə yollanmaqla əsl həqiqəti öyrənməyə çalışdı. Bu səfərin çox təhlükəli olduğu hamıya bəlli idi. Hətta, hakimiyyət hərisləri ulu öndərə qəsd də edə bilərdilər. Ancaq bu təhdidlərin, təhlükələrin heç biri Heydər Əliyevi qərarından döndərə bilmədi. Ümummilli lider Gəncəyə yollandı. Gəncəlilər xi­laskar lideri böyük hörmət və ehtiramla qarşıladılar.

1993-cü il iyunun 15-də Heydər Əliyev Azərbaycan Respublikası Ali Sovetinin Sədri seçildi. Xalqımı­zın taleyində böyük əhəmiyyəti olan günlərdən biri də məhz tariximizə qızıl hərflərlə yazılmış 15 İyun – Milli Qurtu­luş Günüdür. 1993-cü il iyunun 24-də Milli Şuranın qərarı ilə Azərbaycan Res­publikası Prezidentinin səlahiyyətləri Ali Sovetin Sədri Heydər Əliyevə verildi. Ulu öndərin hakimiyyətə qayıdışı ilə Azərbaycan dərin ictimai-siyasi və iqtisadi böhrandan xilas oldu, inkişafın sarsılmaz təməlləri qoyuldu, beynəlxalq aləmə inteqrasiya olunmağa başladı və dost qonşu dövlətlərlə əlaqələr tədricən bərpa olundu. 1997-ci ilin iyun ayında Milli Məclis 15 iyun gününü bayram elan etdi.

Prezident İlham Əliyev Milli Qur­tuluş Gününü Azərbaycan tarixində dönüş nöqtəsi adlandırıb. Danılmaz həqiqətdir ki, Azərbaycanın müasir və müstəqil dövlət kimi mövcudluğu, inkişafı XX əsrdə ikinci dəfə qa­zandığımız müstəqilliyin ilk illərinə təsadüf edən Milli Qurtuluş Günü ilə əlaqədardır.

Dövlətçilik tariximizin şanlı qürur səhifəsi olan 1993-cü ilin 15 iyunu, eyni zamanda, Azərbaycanın tənəzzüldən xilas olaraq, tərəqqi yoluna çıxması, dünya miqyasında müstəqil siyasət həyata keçirən dövlət kimi tanınması, beynəlxalq aləmdə layiqli yerini tutması ilə səciyyələnir. Ulu öndərin xalqımız və tariximiz qarşısında ən böyük xidmətləri kəskin geosiyasi ziddiyyətlərin möv­cud olduğu bir şəraitdə Azərbaycan dövlətçiliyini xilas etməsində, ölkəmizi parçalanıb yox olmaq təhlükəsindən qurtarmasında idi. Dövlətimizin qoru­nub saxlanılması isə azadlığımızın, müstəqilliyimizin möhkəmləndirilməsı, qurtuluşu deməkdir.

Ulu öndər Heydər Əliyev ölkəyə rəhbərlik etməklə müstəqilliyimizi qorudu və əbədiləşdirdi. Respublika­da tüğyan edən ictimai-siyasi böhranı aradan qaldırdı, xalqın ciddi narahat­lığına səbəb olan qeyri-qanuni silahlı birləşmələri zərərsziləşdirdi, ordudakı pərakəndəliyi aradan qaldırdı və vahid ordu formalaşdırdı. Tədricən iqtisadi sahədə əsaslı dönüş yaratdı, daya­nıqlı inkişafın təməlini qoydu. Heydər Əliyevin adı tariximizə Vətənin və xalqın xilaskarı kimi yazılıb. Ümummilli lider problemlərin həlli üçün ölkədə vətəndaş həmrəyliyini, sabitliyi son dərəcə vacib sayırdı: “Əgər respub­likada ictimai-siyasi sabitlik olmasa, sağlam ictimai-siyasi mühit olmasa, heç bir sosial-iqtisadi proqramdan, yaxud problemlərin həll edilməsindən söhbət gedə bilməz”.

Həmin vaxt möhkəm təməllər üərində qurulmuş sabitlik Prezident İlham Əliyev tərəfindən daha da inkişaf etdirildi. Möhtərəm Prezidenti­miz ölkəmizin beynəlxalq təşkilatlarla əməkdaşlığı istiqamətində bütün im­kanlardan istifadə etdi və Azərbaycanı dünyada sülh tərəfdarı, Ermənistanı isə işğalçı ölkə kimi tanıtdı. Bu illər ərzində möhtərəm Prezidentimizin qarşıya qoyduğu prioritet vəzifə ordu quruculuğunu daha da inkişaf etdirmək idi. Dövlət başçımız qarşısına qoyduğu məqsədə nail oldu. Məhz ulu öndərin ordu quruculuğu istiqamətində başladı­ğı işlər və müəyyənləşdirdiyi strategiya sayəsində bu gün Azərbaycan Silahlı Qüvvələri dünyanın ən güclü orduları sırasında yer alır.

2020- ci il sentyabrın 27- də Ermənistan ordusu sərhədboyu ərazilərimizdə təxribatlar törədərək, ölkəmizə müharibə elan edən zaman qarşılarında güclü Azərbaycan Or­dusunu gördü. Cəmi 44 gün davam gətirə bilən Ermənistan silahlı qüvvələri darmadağın edildi və təslim oldu. Rəşadətli ordumuzun qazandığı tarixi Qələbə Azərbaycanın dünya birliyndəki nüfuznu daha da yüksəltdi.

Azərbaycan ulu öndər Heydər Əliyev ideyalarının işığında böyük inki­şaf yolu keçib. Ölkəmiz Heydər Əliyevin görmək istədiyi azad, müstəqil, ərazi bütövlüyü təmin olunmuş, dünyada söz sahibi olan Azərbaycandır.

 

Məlahət İBRAHİMQIZI,

 

Milli Məclisin deputatı

 

Xalq qəzeti .- 2022.- 18 iyun.- S.7.