“Xarıbülbül” festivalı – milli musiqi tariximizin şanlı səhifəsi

 

Hələ sovetlər dönəminin sonunda 1989-cu ildə Qarabağın tacı olan Şuşada böyük musiqi bayramı keçirildi. “Xarıbülbül” Beynəlxalq Musiqi Festivalının Şuşada keçirilməsi təsadüfi deyildi. Əvvəla, Şuşa məşhur musiqi xadimlərinin doğma yurdu idi, digər tərəfdən bu şəhərin gözəlliyinə musiqi yeni çalarlar gətirirdi.

 

Məlumat üçün bildiririk ki, “Xarıbülbül” Beynəlxalq Musiqi Festivalı məşhur xanəndə Seyid Şuşinskinin 100 illik yubileyi ilə əlaqədar keçirilməyə başlanıb.

 

1990-cı ildə Xarıbülbül festivalı beynəlxalq status alıb. Sonrakı dövrdə tədbirdə Yaponiya, ABŞ, Türkiyə, Almaniya, İsrail, Holandiya, İtaliya, İspaniya, Avstriya, Əfqanıstan, SSRİ ölkələrinin iştirakı ilə baş tutub. Festival beynəlxalq status daşıdığın­dan, təkcə Azərbaycanın deyil, SSRİ-nin mühüm mədəniyyət tədbirlərindən biri hesab olunub.

 

İkinci festival çərçivəsində bəzi konsertlər Qarabağın digər şəhərlərində – Bərdə və Ağcabədidə də keçirilmişdi. Ümumiyyətlə, festivala dün­yanın hər yerindən təxminən 170 nəfər qatılmışdı.

 

Üçüncü festival 1991-ci ildə baş tutmuşdu. Bu tədbirə 25 ölkədən, təxminən 300 nəfər gəlmişdi. Keçən illərdə iştirak edən ölkələrə Amerika və Avstraliyadan sənətçilər də qoşulmuşdu. Festivalın qərargahı Mingəçevir şəhərində idi. Tamaşaçı çoxluğu səbəbindən festival çərçivəsində konsertlər stadi­onlarda keçirilmişdi. 1990–1991-ci il final konsertləri Bakıdakı Respublika Sarayın­da baş tutmuşdur.

 

Dördüncü festival 1992-ci il mayın 15-də başlamalı idi. Burada dünyanın 30-dan çox ölkəsindən 500 nəfərin iştira­kı planlaşdırılırdı. Lakin festi­val Qarabağda müharibənin başlaması və mayın 8-də Şuşa şəhərinin erməni silahlı qüvvələri tərəfindən ələ keçirildiyinə görə ləğv edilmişdir.

 

Azərbaycan Prezidenti İlham Əliyev 2021-ci il 7 may tarixli sərəncamı ilə Şuşa şəhərini ölkənin mədəniyyət paytaxtı elan etmişdir. Bu sərəncamla Vaqif Poeziya Günləri və “Xarıbülbül” fes­tivalı da bərpa olunmuşdur. 2021-ci il mayın 12–13-də “Xarıbülbül” festivalı düşməndən azad olunmuş Şuşada keçirilmişdir.

 

Festival Azərbaycan Respublikası Prezidenti İlham Əliyevin çıxışı ilə başlamışdır. Prezident demişdir: “Biz bu gözəl ənənəni bərpa etdik və bundan sonra “Xarıbül­bül” festivalı Şuşada hər il keçiriləcək. Builki festival Azərbaycanda yaşayan xalq­ların nümayəndələrini əhatə edir. Bugünkü festivalda ölkəmizdə yaşayan müxtəlif xalqların nümayəndələri çıxış edəcəklər.

 

Bu tövsiyəni festivalın təşkilatçısı olan Heydər Əliyev Fonduna mən vermişdim, çünki Vətən müharibəsində Azərbaycanda yaşayan bütün xalqların böyük payı vardır. Vətən müharibəsi bir daha onu göstərdi ki, Azərbaycanda bü­tün xalqlar dostluq, qardaşlıq, həmrəylik şəraitində yaşayır və bu 44 günlük müharibə bir daha onu göstərdi ki, ölkəmizdə milli birlik, milli həmrəylik vardır”.

 

Daha sonra Azərbaycanda yaşayan xalqların folklor ansamblla­rının çıxışları baş tutmuş­dur. Sənətçiləri səhnədə Azərbaycan Dövlət Akademik Filarmoniyasının Dövlət Rəqs Ansamblının musiqiçiləri müşayiət etmişdir. Həmçinin müxtəlif illərdə Şuşada lentə alınan azərbaycanlı müğənnilər Bülbül, Seyid Şuşinski, Xan Şuşinski, Rəşid Behbudov, Şövkət Ələkbərovanın ifaları ilə vide­olar nümayiş olunmuşdur.

 

Festivalın ikinci günü qala-konsert baş tutmuşdur. Azərbaycan bəstəkarlarının klassik musiqi əsərləri təqdim edilmişdir. Konsert proqramı Azərbaycan Dövlət Simfo­nik Orkestri və Azərbaycan Dövlət Xor Kapellasının ifa­sında “Koroğlu” operasından üvertura ilə açılmışdır.

 

İndi növbəti “Xarıbülbül” festivalına hazırlıq görü­lür. “Şuşa ili”nin ilk böyük tədbiri bu ilin may ayında Mədəniyyət Nazirliyi, Heydər Əliyev Fondu və Şuşa Şəhəri Dövlət Qoruğu İdarəsinin təşkilatçılığı ilə keçiriləcək “Xarıbülbül” Beynəlxalq Folk­lor Festivalı olacaq.

 

İnanırıq ki, növbəti festi­val milli musiqi sənətimizin əsl təntənəsinə çevriləcək.

 

M.MÜKƏRRƏMOĞLU

 

Xalq qəzeti  2022.- 15 mart.- S.6.