Xüsusi Təyinatlı Qüvvələr Azərbaycan hərb tarixinə yeni qəhrəmanlıq səhifələri yazdılar

Zəfər yolu ilə Şuşaya yaxınlaşarkən, o sıldırım qayaları görəndə hər dəfə mənim gözlərimin önünə siz gəlirsiniz. Bu alınmaz qala necə alındı – yüngül silahlarla, şəhər döyüşlərində, əlbəyaxa döyüşlərdə. Qarşıda, yuxarıda, dağın başında təpədən dırnağa qədər silahla, topla, tankla silahlanmış ermənilər sizin qarşınızda aciz idilər.

Azərbaycan Prezidenti, Ali Baş Komandan İlham Əliyevin Xüsusi Təyinatlı Qüvvələrin yaradılmasının 23-cü ildönümü münasibətilə aprelin 30-da Müdafiə Nazirliyinin Xüsusi Təyinatlı Qüvvələrinin “N” saylı hərbi hissənin şəxsi heyəti qarşısındakı çıxışından

İkinci Qarabağ müharibəsindən ilyarım vaxt keçməsinə baxmayaraq, xalqımız hələ də işğalçı Ermənistan üzərində qazandığımız şanlı Qələbənin sevinci ilə yaşayır. Hərbi ekspertlər, konfliktoloqlar Azərbaycanın qazandığı parlaq Zəfərdən və hərbçilərimizin göstərdikləri şücaətdən bu gün də danışırlar. Əfsanəvi qəhrəmanlıq dastanına çevrilmiş İkinci Qarabağ müharibəsində qazandığımız şanlı Qələbədən, Azərbaycan Ordusunun qəhrəmanlığından bəhs edən məqalələr dünyanın aparıcı kütləvi informasiya vasitələrinin səhifələrindən hələ də düşməyib. Bu gün dünyanın müxtəlif ölkələrində yaşayan və fəaliyyət göstərən soydaşlarımız azərbaycanlı olmasından qürur duyurlar. Axı, respublikamız dünyada qalib ölkə kimi tanınır. Biz otuz il işğal altında qalan torpaqlarını öz ordusunun gücü ilə azad edən ölkəyik.

Vətən müharibəsində qazandığımız şanlı Qələbə ilə Azərbaycan tarixinə yeni bir səhifə yazıldı. Bu şanlı zəfər ölkəmizi bütövləşdirdi, Ermənistanın 30 illik işğalına birdəfəlik son qoyuldu. Bu qələbə ölkəmizin dünya birliyindəki mövqeyini daha da möhkəmləndirdi. Əvvəlki illərlə müqayisədə Azərbaycanın beynəlxalq aləmdəki reytinqi də xeyli yüksəldi. Dövlət başçımızın qeyd etdiyi kimi, Azərbaycan Silahlı Qüvvələrinin şanlı Zəfəri bizim tariximizdə əbədi qalacaq: “Biz müzəffər xalq kimi, qalib dövlət kimi bundan sonra əbədi yaşayacağıq. Bu sevinci bizə bəxş edən bizim övladlarımız, əsgər və zabitlərimiz olub. Bütün Silahlı Qüvvələr bu Qələbənin əldə olunmasında öz dəyərli töhfəsini vermişdir və cəmi 44 gün ərzində tarixi Zəfər əldə olundu, düşmən bizim qabağımızda diz çökdü və məcbur oldu öz əli ilə kapitulyasiya aktına imza atdı. Bu, tariximizin və mənim həyatımda bəlkə də ən yaddaqalan, ən sevincli, ən qürurlu anlardan biridir, bəlkə də birincisidir. Ermənistanın kapitulyasiya aktına imza atması mənim həyatımda ən qürurlu hadisədir”.

Azərbaycan Silahlı Qüvvələrinin , o cümlədən, Xüsusi Təyinatlı Qüvvələrin hər bir üzvü yüksək peşəkarlığı, qəhrəmanlığı və qibtə olunacaq Vətən sevgisi ilə bu işğalla barışmayacağını dünyaya əyani şəkildə nümayiş etdirdi. 30 il düşmən əsarətində olan həmin ərazilərdə indi əzəmətli Azərbaycan bayrağı dalğalanır. Şuşada, Cıdır düzündə musiqi festivallarının, beynəlxalq tədbirlərin, dünyamiqyaslı idman yarışlarının, poeziya günlərinin keçirilməsi tarixi Qələbəmizin bariz nümunəsidir. Bu qələbədə bütün hərbçilərimizin xidməti yüksək dəyərə malikdir. Xüsusilə, Xüsusi Təyinatlı Qüvvələrin Şuşanın işğaldan azad edilməsi zamanı göstərdiyi qeyri-adi qəhrəmanlıq dillər əzbəri olub.

Azərbaycan Prezidenti, Ali Baş Komandan İlham Əliyev Xüsusi Təyinatlı Qüvvələrin yaradılmasının 23-cü ildönümü münasibətilə Müdafiə Nazirliyinin Xüsusi Təyinatlı Qüvvələrinin “N” saylı hərbi hissənin şəxsi heyəti qarşısındakı çıxışı zamanı da bu məsələni diqqətə çatdırdı. Qeyd etdi ki, XTQ-çilər gücü, iradəsi, peşəkarlığı və Vətən sevgisi ilə düşməni diz çökdürdü. Dövlət başçımız görüş zamanı dedi ki, siz öz Vətəniniz uğrunda, doğma torpaqda vuruşurdunuz. İşğalçı düşmən isə Azərbaycan torpağında sizin qarşınızda duruş gətirə bilməzdi. Şuşanın azad olunması müharibənin ən parlaq səhifəsidir. Bu gün dünyanın aparıcı hərbi məktəblərində Şuşa əməliyyatı, Hadrut əməliyyatı, digər əməliyyatlar öyrənilir.

Ümumiyyətlə, Azərbaycan Ordusunda Xüsusi Təyinatlı Qüvvələr özünəməxsus çəkiyə və əhəmiyyətə malikdir. Hələ 2016-cı ilin Aprel döyüşlərində Xüsusi Təyinatlı Qüvvələr yüksək döyüş hazırlığı ilə işğalçını diz çökdürməyə layiq olduqlarını sübut etmişdilər. Həmin döyüşlərdə xüsusi təyinatlılarımız düşmənin çoxsaylı hərbi texnikasını və canlı qüvvəsini məhv etdi. XTQ-çilər düşmənə təkcə hərbi müstəvidə deyil, psixoloji baxımdan da böyük zərbə vurdular. Aprel döyüşləri, həmçinin Azərbaycan Ordusunun qüdrətini, onun qarşıya qoyulan istənilən tapşırığı yerinə yetirməyə hazır olduğunu bütün dünyaya göstərdi.

İkinci Qarabağ müharibəsində isə Xüsusi Təyinatlı Qüvvələr, sözün həqiqi mənasında, tarix yazdılar. Təkcə Şuşa şəhərinin düşməndən azad edilməsində xüsusi təyinatlıların göstərdiyi qəhrəmanlıq heç vaxt unudulmayacaq. Bu döyüşlərdə Xüsusi Təyinatlı Qüvvələr düşmənə elə sarsıdıcı zərbələr vurdu ki, işğalçı erməni əsgərləri sonadək müqavimət göstərə bilmədi və silah-sursatları atıb qaçdılar. Düşmənlər, hətta, öz yaralılarını, cəsədlərini belə götürmədən döyüş yerindən qaçaraq, canlarını xilas etməyə çalışdılar. Bütün bu faktlar Xüsusi Təyinatlı Qüvvələrin Vətən müharibəsində necə böyük fədakarlıq sərgilədiyini bir daha sübut edir.

Prezident, Ali Baş Komandan İlham Əliyev çıxışı zamanı bu məqamları bir daha diqqətə çatdırdı. Dedi ki, bizim bütün əsas həlledici əməliyyatlarımızda xüsusi təyinatlılar ön sırada idilər. Digər hərbi birləşmələr ilə birlikdə şəhər və kəndlərimizi azad edən xüsusi təyinatlıların rolunu vurğulayan dövlət başçımız uğurlu əməliyyatlardan sonra yolumuzun Şuşaya açıldığını bildirdi: “Yolumuz deyəndə, o yol yox idi. Uğurlu Hadrut əməliyyatından sonra, – hansı ki, Ermənistanda fərarilərin sayını kəskin artırmışdır, – onlar inanmırdılar ki, biz o istiqamətdə gedəcəyik. Onlar bizi başqa yerlərdən gözləyirdilər. Amma bizim aslanlarımız, igidlərimiz olmayan yerdə yol açdılar, öz əlləri ilə, öz ayaqları ilə, öz sinələri ilə. Dərələrdən, meşələrdən, cığırlardan keçərək istiqamət Şuşaya idi”.

XTQ yarandığı gündən Vətən müharibəsinədək həmişə öndə olub. Ancaq İkinci Qarabağ döyüşlərində bu “aslanlar” tarixdə silinməz iz buraxdılar. Xatırladaq ki, 1999-cu ildə ulu öndər Heydər Əliyevin fərmanı ilə Azərbaycan Ordusunun ən çevik və yüksək döyüş qabiliyyətinə malik bölmələrindən biri –Xüsusi Təyinatlı Qüvvələr yaradılmışdı. XTQ-nin formalaşmasında Birinci Qarabağ müharibəsinin iştirakçıları olan zabit və gizirlər fəal iştirak ediblər. Ümummilli lider tərəfindən vahid komandanlıq altında birləşdirilən Azərbaycan Ordusunun bu bölmələri Türkiyə Silahlı Qüvvələri və onun Xüsusi Təyinatlı Qüvvələri ilə sıx əməkdaşlıqla formalaşdırılıb.

Ordu quruculuğunu daim diqqqət mərkəzində saxlayan Prezident, Ali Baş Komandan İlham Əliyev Xüsusi Təyinatlı Qüvvələrin fəaliyyətinə, təchizatına, gündəlik məşqlərinə mütəmadi nəzarət edib. Heç də hər hərbçi Xüsusi Təyinatlı Qüvvələrin üzvü seçilmək hüququnu qazana bilmir. Bunun üçün ağır təlimlər, hərbi imtahanlar, güclü iradə nümayişi vacib şərtlərdəndir. Çünki burada əlbəyaxa döyüş, bacarıqlı kəşfiyyat, risk edərək düşmən arxasına keçmə, mühəndis, atəş, psixoloji, desant, dalğıc, tibbi və sair kimi hazırlıqlar üzrə təlimlər keçirilir.

Xüsusi Təyinatlı Qüvvələrin şəxsi heyəti 2016-cı ilin Aprel döyüşlərində düşmənə vurduğu ağır zərbələrlə nəyə qadir olduqlarını nümayiş etdirdi. Ancaq işğalçılar Azərbaycan Ordusunun gücündən özləri üçün nəticə çıxarmadılar. Onların faşizm xisləti işğalçılıq siyasətini dayandırmağa imkan vermədi. Hətta, 2018-ci ildə Naxçıvanın Günnüt əməliyyatı zamanı aldıqları ağır zərbə də düşmənə ibrət olmadı. 2020-ci il sentyabrın 27-də yenidən sərhədboyu ərazilərimizə hücum etdilər. Bu, artıq təxribat yox, müharibə idi. Bu müharibədə Azərbaycan Ordusunun Xüsusi Təyinatlı Qüvvələri hərb tariximizə yeni qəhrəmanlıq səhifələri yazdılar. Ən mühüm əməliyyatların, ilk növbədə, Şuşa əməliyyatının keçirilməsində həlledici rol oynadılar. Peşəkarlıqla bərabər, burada fədakarlıq, ölümün üzərinə atılma həlledici amillərdən idi. Dövlət başçımız çıxışında hərbçilərimizin qəhrəmanlığını yüksək qiymətləndirdi: “Biz cəmi 44 gün ərzində 300-dən çox şəhər və kəndi düşmənin əlindən aldıq, döyüş meydanında bu Zəfəri qazandıq, danışıqlar yolu ilə yox, kiminsə güzəşti ilə yox, qan tökərək, şəhidlər verərək. Bizi irəliyə nə aparırdı? Vətən sevgisi, Vətənə sevgi, düşmənə nifrət! Bax, biz gənc nəsli bu əhval-ruhiyyədə yetişdirmişik, bu əhval-ruhiyyədə bizim ordumuz yetişib və ordumuzun ən döyüşkən birləşməsi olan xüsusi təyinatlılar bu amalla, bu ideya ilə irəliyə gedirdi, öz sinəsini qabağa verirdi”.

Artıq dünya ictimaiyyətinə də məlumdur ki, Azərbaycan Ordusu müharibə zamanı düşmənin 53 “Tank əleyhinə” vasitələrini, 4 “Smerç”ini, 97 “Qrad”ını , 2 “Uraqan”ını, bir “YARS”ını, TOS odsaçanını , 7 ədəd “S-300” zenit-raket komplekslərini - atıcı qurğusunu məhv etdi. Bundan əlavə, Ermənistan ordusunun atıcı qurğuları , “S-300” radiolokatoru və “S-300” aşkaretmə stansiyaları da sıradan çıxarıldı. Əgər düşmənin məhv edilmiş silah-sursatını bir-bir sadalasaq, uzun bir siyahı alınar.

Bu gün Bakıda yaradılmış Hərbi Qənimətlər Parkında nümayiş etdirilən məhv edilmiş və qənimət götürülmüş düşmən texnikaları Ermənistana və onun havadarlarına göz dağıdr. Hətta bəzi ermənipərəst təşkilatlar həmin parkın yığışdırılması tələbini irəli sürmüşdülər. Çünki havadarlıq etdikləri işğalçı ölkənin beynəlxalq aləmdə bu şəkildə rüsvay olmasını həzm edə bilmirdilər. Lakin həmin qərəzli və riyakar ermənipərəstlərin sözlərini özlərindən başqa eşidən olmadı.

Xüsusi Təyinatlı Qüvvələrin mənsubları döyüş tapşırıqlarını uğurla yerinə yetirdiklərinə görə, dövlət başçısının müvafiq sərəncamları ilə “Azərbaycanın Milli Qəhrəmanı”, “Vətən Müharibəsi Qəhrəmanı” fəxri adlarına layiq görüldülər. Eləcə də müxtəlif orden və medallarla təltif olundular.

İkinci Qarabağ müharibəsindən sonra Xüsusi Təyinatlı Qüvvələrin sayı 2 dəfə artırıldı. Hazırda bu bölməyə seçimin daha sərt olmasına baxmayaraq, maraq da böyükdür və müraciət edənlərin sayı durmadan artır. Bu seçimin əsas şərtləri mənəvi-psixoloji keyfiyyətlər, fiziki hazırlıq, peşəkarlıq və ən önəmlisi Vətən sevgisidir.

Prezident, Ali Baş Komandan İlham Əliyevin tapşırığı əsasında silahlı birləşmələrimizdə islahatlar davam etdirilir, xüsusi əməliyyatları aparmaq iqtidarında olan yeni hərbi birləşmələr yaradılır. Bütün bunlar Azərbaycan Ordusunun daha da güclənməsindən xəbər verir. Bu gün Azərbaycan Silahlı Qüvvələri müharibə dövründəkindən də güclü və qüvvətlidir.

Əliqismət BƏDƏLOV

Xalq qəzeti .- 2022.- 7 may.- S.8.