Professor Con Hankok: Azərbaycan iqtisadi inkişaf yolunu davam etdirir

Azərbaycan Respublikası Prezidenti yanında Dövlət İdarəçilik Akademiyasında “Beynəlxalq Ticarət Münasibətləri və Diplomatiya, Ümumdünya Ticarət Təşkilatı və onun əsas prinsipləri” mövzusunda təlim kursu keçirilmişdir.

Ali təhsilin bakalavr və magistr pillələri üzrə təhsil alan tələbələr üçün nəzərdə tutulmuş təlim kursunu akademiyanın rektoru, əməkdar elm xadimi, professor Seyfəddin Qəndilov açaraq qonaqları salamlamış və adı çəkilən təlim kursları çərçivəsində DİA-da Ümumdünya Ticarət Təşkilatı Katibliyinin rəsmisi, professor Con Hankokun “ÜTT tarixçəsi, ÜTT-nin əsas prinsipləri, ÜTT və qlobal iqtisadi böhran” mövzusunda mühazirəsinin təşkilini müsbət hal kimi qiymətləndirmişdir. O, ÜTT ilə ölkəmiz arasında əlaqələrin günbəgün genişləndiyini və Prezident İlham Əliyevin bu istiqamətdəki səylərini xüsusi qeyd etmişdir.

ÜTT Katibliyinin rəsmisi, professor Con Hankok məruzəsində təmsil etdiyi qurumun siyasi, iqtisadi, təhsil və digər sahələrdə gördüyü işlərdən, iqtisadi böhranın törətdiyi çətinliklərdən ətraflı danışmışdır. Buna baxmayaraq, Azərbaycanın iqtisadi inkişafının davam etdiyini, böhranın bu inkişafa ciddi təsir etmədiyini diqqətə çatdırmışdır. O qeyd etmişdir ki, bu, iqtisadi bazanın möhkəm təməllər üzərində qurulmasından xəbər verir. C.Hankok Azərbaycanın sürətli iqtisadi inkişafını yüksək qiymətləndirmiş, səmimi və maraqlı keçən görüşə görə DİA-nın rəhbərliyinə təşəkkür etmiş, akademiyanın professor-müəllimlərinin, habelə tələbələrin çoxsaylı suallarını cavablandırmışdır.

Sonra Dövlət İdarəçilik Akademiyasının rektoru, professor S.Qəndilov maraqlı çıxışına görə ÜTT rəsmisi Con Hankoka öz minnətdarlığını bildirmişdir.

Sona MƏMMƏDBƏYOVA,

DİA-nın mətbuat və

informasiya xidmətinin rəhbəri

Xalq qəzeti.- 2009.- 2 aprel.- S. 3.