Azərbaycanın gələcək taleyi milli təhsilimizin səviyyəsindən çox asılıdır

Bu gün Qafqazda lider dövlət kimi çox önəmli bir ad qazanmış Azərbaycan Respublikası dünyanın böyük beynəlxalq təşkilatları tərəfindən ən islahatçı dövlət kimi də tanınır. Bu islahatlar ulu öndər Heydər Əliyev ideyalarından güc aldığından ölkəmizi yeni zirvələrə doğru aparır. Bu gün Azərbaycana məhz ümummilli lider Heydər Əliyevin siyasi kursuna sadiq bir rəhbər başçılıq edir. Çox hörmətli Prezidentimiz İlham Əliyev ölkəmizin hərtərəfli inkişafını təmin etmiş, Azərbaycan ildən–ilə yeni zəfərlər diyarına çevrilmişdir.

Sosial institutlar sırasında cəmiyyətin inkişafında əhəmiyyətli yer tutan təhsili ulu öndər Heydər Əliyev millətin gələcəyi adlandırırdı.

Xoşbəxtlikdən, bizim ölkədə təhsilə böyük qayğı ilə yanaşan ulu öndər Heydər Əliyev kimi rəhbər olmuş və bu gün onun kursunu inamla davam etdirən İlham Əliyev kimi rəhbər vardır. Dünyanın heç bir ölkəsində beş il ərzində təhsilin inkişafına xidmət göstərən 16 Dövlət Proqramı qəbul edilməmişdir.

Dəfələrlə deyilib ki, Heydər Əliyevin hakimiyyətə ikinci qayıdışı ərəfəsində Azərbaycan təhsili məhv olmaq təhlükəsi ilə üzləşmişdi. 1993-cü ildən isə vəziyyət, demək olar ki, dəyişdi. İqtisadi vəziyyət sabitləşən kimi ulu öndər “Təhsil İslahat Proqramı”nı təsdiq etdi. Dünya Bankı ilə səmərəli əməkdaşlıq Proqramın maliyyələşməsində əhəmiyyətli rol oynadı. Tezliklə təhsilin məzmununun dəyişməsi ilə bağlı islahatlara başlandı, yeni nəsil dərsliklər, tədris proqramları hazırlandı.

Məktəblərin vəziyyəti onsuz da acınacaqlı idi. Ona görə də ilkin olaraq ulu öndər məktəb tikintisi ilə bağlı Dövlət Proqramına imza atdı. Bu Proqramın reallaşması isə məhz Prezidentimiz İlham Əliyevin hakimiyyəti illərində baş tutdu. Cənab İlham Əliyevin birinci prezidentliyi dövründə ölkədə 160 yeni məktəb və məktəblərə əlavə korpus inşa olundu. Müasir tipli bu məktəblər həm də müasir avadanlıqlarla təchiz edildi. Bu gün ölkəmizin elə bir bölgəsi yoxdur ki, orada hansısa kənddə, yaxud rayon mərkəzində yeni məktəb binası tikilməmiş olsun. Söz yox ki, bu işdə YUNESKO-nun və İSESKO-nun xoşməramlı səfiri, Milli Məclisin deputatı, Heydər Əliyev Fondunun prezidenti Mehriban xanım Əliyevanın da xüsusi xidmətləri vardır.

Azərbaycan təhsili dünyada baş verən yenilikləri tədricən mənimsəməyə başladı. Artıq dünyanın mütərəqqi ölkələrinin məktəblərində informasiya texnologiyalarının tətbiqinin neçə illik təcrübəsi vardır. Amerikanın, Yaponiyanın, Almaniyanın, Fransanın, Türkiyənin təhsil sistemində informasiya texnologiyalarından səmərəli şəkildə istifadə olunurdu. Ona görə də cənab İlham Əliyev orta ümumtəhsil məktəblərinin informasiya-komunikasiya texnologiyaları ilə təmin edilməsi ilə bağlı xüsusi Dövlət Proqramı imzaladı. 2005-2007-ci illəri əhatə edən bu Proqram artıq reallaşmışdır. İndi Azərbaycanda, demək olar ki, bütün məktəblərdə kompyuter otaqları var və onun tədrisi ilə məşğul olan ixtisasçı müəllimlər də yetişdirilmişdir. Əgər Proqramda Azərbaycanda orta ümumtəhsil məktəbləri şagirdlərinin hər 33 nəfərinə bir kompyuter nisbəti nəzərdə tutulmuşdusa, artıq bu gün hər 29 şagirdə bir kompyuter nisbəti təmin olunmuşdur. Bu çox mütərəqqi bir addımdır. Məktəblərimizdə uşaqlar kompyuterdən sərbəst istifadə edir, bəzi məktəblərdə artıq internet sistemi işləyir. Yaxın gələcəkdə isə bütün məktəblər internetə qoşulmaq imkanı əldə edəcəklər. Bundan başqa, elektron dərsliklərin yaradılması prosesinə başlanmışdır. Artıq bir neçə fənn üzrə belə dərsliklər var və onlar məktəblərə göndərilmişdir. Bu, zamanın tələbidir. Və biz çalışırıq ki, uşaqlar informasiya texnologiyaları ilə daha sıx təmasda olsunlar, kompyuterlərlə işləmək vərdişləri artsın.

Bu gün milli təhsilimizin ən mühüm problemlərindən biri tədrisin keyfiyyəti məsələsidir. Keyfiyyət nəticəni müəyyən edən amildir. Ona görə də keyfiyyətli tədrisin yaranması əslində əsas məqsəd olmalıdır. Və bu gün Təhsil Nazirliyi bu məsələyə çox ciddi önəm verir. Təhsilin keyfiyyəti ilk növbədə pedaqoji kadrların hazırlığı ilə bağlıdır. Bu sahədə keçirilən islahatlar da öz müsbət nəticəsini vermişdir. Bu gün məktəblərimizdə çox təcrübəli müəllimlərlə yanaşı, yüksək hazırlıqlı gənc kadrlar da çalışırlar. Onların səviyyəsini yüksəltmək üçün müxtəlif müsabiqələr keçirilir. Ötən il cənab Prezidentimizin sərəncamı ilə keçirilən “Ən yaxşı müəllim”, “Ən yaxşı məktəb” müsabiqələrində 100 müəllimin hər biri 5000 manat, 50 məktəb isə 10000 manat məbləğində mükafatlandırıldılar. Bu müsabiqə hər il keçiriləcək və söz yox ki, müəllimlərimizin daha hazırlıqlı olmasına öz təsirini göstərəcəkdir.

Mən daha bir məsələyə də öz münasibətimi bildirmək istəyirəm. Son illər buraxılış imtahanlarının mərkəzləşmiş test üsulu ilə keçirilməsinə başlanılmışdır. Nəticələr sevindiricidir. Belə ki, təhlillər göstərir ki, test üsulu ilə imtahan götürülən məktəblərdə ali məktəblərə qəbul daha çox olur. Bu o deməkdir ki, uşaqlar daha fəal hazırlaşır, həm də ali məktəblərə qəbulda test imtahanlarına hazır olurlar.

Ümumiyyətlə, təhsilin keyfiyyət göstəricilərinə təsir göstərən bir sıra tədbirlər də həyata keçirilmişdir ki, onların da nəticələri sevindiricidir.

Rəhbərlik etdiyim Heydər Əliyev adına lisey haqqında bəzi məlumatları da oxucuların diqqətinə çatdırmaq istəyirəm. Liseyimizin ulu öndərin adını daşıması kollektivimizin üzərinə böyük məsuliyyət qoyur. Son illər liseyimiz təhsilin inkişafında əsaslı nailiyyətlər qazanmışdır. Ötən il liseyimiz Prezidentimizin sərəncamı ilə keçirilən “Ən yaxşı məktəb” nominasiyasının qalibi olmuşdur. Məlumdur ki, 2008-2009- cu tədris ilindən etibarən orta ümumtəhsil məktəblərində kurrikulum islahatı keçirilir. Təhsil Nazirliyinin hazırladığı “Ümumtəhsil sistemində dərslik siyasəti”nə uyğun olaraq hazırlanmış “Riyaziyyat-1" dərslik komplekti (dərslik, müəllim üçün vəsait, şagirdlər üçün iş dəftəri) liseyimizdə uğurla istifadə olunur. Hələ ötən ilin oktyabr ayında ”Həyat bilgisi" dərslik komplektini müzakirə etmişdik.

Respublika Prezidentinin imzaladığı “Xüsusi istedada malik olan uşaqların (gənclərin) yaradıcılıq potensialının inkişafı üzrə Dövlət Proqramı”na uyğun olaraq biologiya və riyaziyyat fənləri üzrə müvafiq olaraq liseyimizin XI sinif şagirdləri Turan Mehdizadə və Orxan Şəkərli I və II diploma layiq görülmüşlər.

Martın 18-də keçirilən referendum zamanı liseyimizdə fəaliyyət göstərən Xətai rayonunun 36-cı seçki dairəsinin 3-cü və 4-cü seçki məntəqələrində səsvermə yüksək səviyyədə keçirilmiş, heç bir insident qeydə alınmamışdır.

Məktəbimizdə yeniliklər çoxdur. İstəyirik ki, bu il məktəbimizin müəllimlərindən “Ən yaxşı müəllim” nominasiyasında qalib gələnlər olsun. Artıq 5 müəllimimiz Təhsil Nazirliyində bu məsələ ilə bağlı yaradılmış komissiyaya sənədlərini təqdim etmişdir.
Ümumiyyətlə, kollektivimiz çalışır ki, ölkə Prezidenti cənab İlham Əliyevin təhsilə yüksək qayğısına yeni nailiyyətlərlə cavab versin.

Fikrət XƏLİLOV,

Heydər Əliyev adına

liseyin direktoru, əməkdar

müəllim

Xalq qəzeti.- 2009.- 2 aprel.- S. 5.