Azərbaycan İslam mədəniyyəti
örnəkləri ilə
zəngin ölkədir
Ulu öndər Heydər
Əliyevin ölkəmizə rəhbərlik etdiyi dövrlərdə
bir çox milli-mənəvi dəyərlər yenidən
rişələnib formalaşmışdır. Ümummilli
liderimiz Azərbaycanda insan hüquq və
azadlıqlarının təşəkkülünə, din və
vicdan azadlığının təmin olunmasına
böyük önəm vermiş, gənclərin milli ruhda tərbiyə
almasını, sağlam əqidə sahibi olmasını vacib
sayırdı.
Bu nəcib ənənəni
bu gün Azərbaycan Prezidenti İlham Əliyev uğurla davam
və inkişaf etdirir. Azərbaycanda etiqad azadlığı
və tolerantlıq bir çox ölkələr
üçün gözəl örnəkdir. Ötən il
oktyabrın 24-də Prezident İlham Əliyev andiçmə
mərasimindəki nitqində vurğulamışdır:
Müstəqil siyasət,
milli maraqlarımızın qorunması, milli ləyaqət,
milli qürur, milli və dini tolerantlıq — budur bizim
uğurlarımızın əsas şərtləri. Azərbaycanda
bütün xalqlar qardaşlıq şəraitində, mehriban
şəraitdə yaşayırlar”.
Fevral ayında
“Bakı—İslam mədəniyyətinin paytaxtı—2009" Mədəniyyət
ilinin təntənəli açılış mərasimi bir
daha göstərmişdir ki, xalqımızın dəyərli
olan hər şeyə xüsusi münasibət göstərməsi
dünyanın diqqətindən yayınmır. Tədbirdə
İSESKO-nun baş direktoru, İslam Konfransı Təşkilatı
baş katibinin müavini, çoxsaylı diplomatlar və
xarici qonaqlar iştirak edirdilər. İslam aləmində,
bütün dünyada elmin, mədəniyyətin, təhsilin
inkişafına dəstək verən İslam Təhsil, Elm və
mədəniyyət Təşkilatının Bakını
özünə bir illik paytaxt elan etməsi çox fərəhli
hadisədir. Bakı ”İslam Mədəniyyətinin
paytaxtları" proqramında müəyyən edilən
bütün meyarlara tamamilə uyğun gəldiyi
üçün bu şərəfə nail olmuşdur. İftixarla
xatırladım ki, hələ 2006-cı ildə
münaqişələrin qarşısının
alınmasında, sivilizasiyalararası dialoqun
aparılmasında xidmətlərinə, uşaqlara diqqətinə,
təhsilə, həmçinin islam aləmində
görülən işlərə böyük dəstəyinə
görə Heydər Əliyev Fondunun prezidenti Mehriban xanım Əliyevaya
İSESKO-nun xoşməramlı səfiri adı
verilmişdir. Bu ada indiyədək islam dünyasının
nüfuzlu 4 ictimai və dövlət xadimi layiq
görülüb və Azərbaycanın birinci xanımı
bu sırada ilk qadındır. Ötən ilin martında
İSESKO-nun Baş Qərargahında (Rabat) Azərbaycan Mədəniyyəti
Günləri də milli-mənəvi örnəklərimizin
dünyada təbliği baxımından çox böyük
önəm daşımışdır.
Azərbaycan dünya
müsəlman birliklərində yaxından iştirak edir, bu
sahənin bütün beynəlxalq tədbirlərində fəallıq
göstərir. Bu qəbildən olan konfrans və
simpoziumların vaxtaşırı Bakıda təşkili də
qürur doğurur. 1998-ci ilin dekabrında paytaxtımızda
“İslam sivilizasiyası Qafqazda” mövzusunda ilk beynəlxalq
simpozium, iki il öncə “Sivilizasiyaların dialoqu: siyasi
partiyaların rolu” mövzusunda beynəlxalq konfrans, həmçinin
“Tolerantlıq örnəyi—Azərbaycan” konfransı və digər
tədbirlər də bu qəbildəndir.
Son illərdə Azərbaycan
hökumətinin fəaliyyəti ölkəmizdə dini
durumun stabilliyinin möhkəmlənməsində böyük
rol oynamışdır. DQİDK-nın dini qurumlarla səmərəli
əməkdaşlıq əlaqələri qurulub və neqativ
hallara qarşı birgə uğurlu mübarizə
aparılır. Ölkəmizin dindarları arasında
radikallıq meylləri yoxdur. Müxtəliflikdə bir
harmoniya olan tolerantlıq insanın əsas hüquq və
azadlıqlarının etiraf edilməsi əsasında
formaşmış aktiv münasibətlər sisteminə
çevrilmişdir.
Martın 18-də
ölkəmizin Əsas Qanununa əlavə və dəyişikliklərlə
bağlı referenduma çıxarılmış bəzi
müddəalar insan hüquqları ilə bağlı təminatların
təkmilləşdirilməsinə xidmət etmişdir. Biz də
hər kəsin və hər bir qrupun qanun çərçivəsində
fəaliyyət göstərməsinin tərəfdarıyıq.
Lakin bəzən bu prinsipi pozmaq cəhdləri olur ki,
bunların da qarşısı alınır. Məsələn,
Sumqayıtda dini kitabların satışı ilə məşğul
olan 25-dən çox mağaza fəaliyyət göstərir.
Bunların bəzilərində istifadəsi qadağan
olunmuş ədəbiyyatların satılması halları
olub. Biz mağazalara vaxtaşırı baxış
keçirir və qeyri-qanuni ədəbiyyatları
götürərək, DQİDK-yə təhvil veririk.
Maarifləndirmə işinə də mühüm əhəmiyyət
veririk. Sumqayıt şəhəri Kimyaçılar mədəniyyət
sarayında 250 nəfərin iştirakı ilə
seminar-treninq, şəhər icra hakimiyyətinin akt zalında
Dini Qurumlarla İş üzrə Dövlət Komitəsinin sədri
Hidayət Orucovun, Qafqaz Müsəlmanları İdarəsinin
sədri şeyxülislam hacı Allahşükür
Paşazadənin, şəhər icra hakimiyyətinin
başçısı Vaqif Əliyevin, habelə şəhərin
idarə, müəssisə və təşkilat rəhbərlərinin,
şəhərdə fəaliyyət göstərən dini
qurumların nümayəndələrinin iştirakı ilə
müşavirə keçirilmiş, şəhərdəki
dini durum müzakirə olunmuşdur.
“Xəzər” Səhmdar
Cəmiyyətinin akt zalında “Heydər Əliyev və dini dəyərlər”
mövzusunda konfrans da maraq doğurmuşdur. Konfransda Dini
Qurumlarla İş üzrə Dövlət Komitəsinin
şöbə müdiri Ceyhun Məmmədov və YAP gənclər
Birliyinin sədri Ramin Həsənov da iştirak etmişlər.
Son bir ildə şəhərin 25 orta ümumtəhsil məktəbində
“Məktəb və din” mövzusunda görüşlər
keçirilmişdir.
Ümumiyyətlə,
vaxtaşırı şəhərdə fəaliyyət
göstərən dini qurumlarla müntəzəm
görüşlər keçirilmiş, onların fəaliyyətinə
nəzarət gücləndirilmişdir.
Sumqayıt şəhər
hüquq-mühafizə orqanlarının nümayəndələri
ilə də dəfələrlə görüşlərimiz
olmuşdur. Onlarla, əsasən Sumqayıt şəhərində
dini vəziyyətin bugünkü durumu haqqında fikir
mübadiləsi aparmışıq.
Azərbaycan İslam dəyərlərinin
uca tutulduğu, Şərq mədəniyyətinin örnək
nümunələrinin qorunduğu ölkədir. Bu baxımdan
qloballaşan dünya üçün bizdən
görüb-götürməli nümunələrin çox
olması fərəhlidir.
Neman ƏHƏDOV,
Dini Qurumlarla İş
üzrə Dövlət Komitəsinin
Şimal bölgəsi üzrə aparıcı
mütəxəssisi
Xalq qəzeti.- 2009.- 3 aprel.- S. 4.