Ulu öndərin Sumqayıta tarixi səfərini şəhər sakinləri ehtiramla xatırlayırlar

Sumqayıtın tarixində ulu öndər Heydər Əliyevin 2003-cü il aprelin 3-də bu şəhərə səfərinin xüsusi yeri var.

O vaxt unudulmaz böyük şəxsiyyətin gənclik şəhərinə gəlişi, fəallar yığıncağında söylədiyi nitq, bildirdiyi iradlar, verdiyi tövsiyələr Sumqayıtın ictimai-siyasi həyatına yeni nəfəs vermiş, burada təmiz mənəvi ab-hava yaranmasına təkan olmuşdur.

Artıq altı ildir ki, Sumqayıtda ümummilli liderin tarixi səfərinin ildönümü qədirbilənliklə qeyd edilir. Ənənəyə sadiq qalan sumqayıtlılar da aprelin 3-də yenə də ulu öndərin şəhərdəki möhtəşəm abidəsinin qarşısına toplaşmışdılar. Əvvəlcə maraqlı bədii kompozisiya təqdim olundu. Altı il öncə həmin gün dövlət başçısının sərəncamı ilə şəhərə rəhbər təyin edilmiş Vaqif Əliyev ictimaiyyət nümayəndələrinin qarşısında məruzə ilə çıxış etdi. O, bildirdi ki, ulu öndərin Sumqayıta son səfəri şəhərin yeni inkişaf tarixinin başlanğıcı olub, burada sağlam mənəvi-siyasi iqlim bərpa edilib. Dahi rəhbərin nitqindən irəli gələn müddəalar fəaliyyət proqramı kimi həyata keçirilib, etimadı layiqli işlərlə doğruldan sumqayıtlılar ötən altı ildə böyük sosial-iqtisadi, mədəni inkişaf yolu keçiblər. Prezident İlham Əliyevin gündəlik qayğısı ilə əhatə olunan Sumqayıt şəhəri tanınmaz dərəcədə dəyişib, gözəlləşib, abadlaşıb. Ulu öndərin tarixi səfəri beləcə xoş xatirələrlə anıldı, onun xeyir-duası ilə başlanan işlərin fərəhli nəticələrindən ətraflı bəhs olundu.

Sonra şəhər ictimaiyyətinin nümayəndələri, sənaye, elm, təhsil, mədəniyyət kollektivləri, ziyalılar ulu öndərin möhtəşəm abidəsini böyük ehtiramla ziyarət etdilər, gül dəstələri qoydular. Müasir şəhərsalma meyarlarına tam uyğun gələn, genişliyi və abadlığı ilə göz oxşayan və 2004-cü ilin aprelindən dahi rəhbər Heydər Əliyevin adını daşıyan küçədə — abidənin qarşısındakı meydanda mərasim bir neçə saat davam etdi. Qəlbinin hökmü ilə buraya gəlmiş hər bir sumqayıtlı ümummili liderin ölməz xatirəsi qarşısında baş əydi.

***

Aprelin 3-ü həm də Sumqayıtda yenicə tikilmiş Ağsaqqallar evinin təntənəli açılış mərasimi ilə yadda qaldı. Açılışın məhz həmin günə salınması rəmzi xarakter daşıyırdı. 2003-cü ilin aprelində Sumqayıta tarixi səfər edən böyük el ağsaqqalı, dünyada tanınmış görkəmli siyasi xadim, ulu öndər Heydər Əliyev hər zaman milli-mənəvi dəyərlərə özəl münasibət bəsləyib, əmək və müharibə veteranlarına, ağsaqqallara və ağbirçəklərə hörmət-izzət örnəyi nümayiş etdirib. Təsadüfi deyil ki, yeni, gözəl binanın foyesində zövqlə tərtib edilmiş Heydər Əliyev güşəsində ulu öndərin müdrik fikri ilk baxışdan diqqət çəkir: “Ağsaqqal milli-mənəvi həyatımızın qızıl fondudur”.

Sumqayıt Şəhər İcra Hakimiyyətinin başçısı Vaqif Əliyev mərasimdə nitq söylədi. Ağsaqqallara, veteranlara göstərilən qayğı və diqqətdən konkret misallarla söhbət açdı və onları Ağsaqqallar evinin açılışı münasibəti ilə təbrik etdi, ən xoş arzularını çatdırdı.

Ağsaqqallar Şurasının sədri Müzəffər Gülümov 40 ərazi şurasında, 265 dayaq məntəqəsində birləşən minlərlə ağsaqqal və ağbirçək adından bu gözəl töhfəyə görə şəhər rəhbərliyinə minnətdarlıq bildirdi. Şəhər ictimaiyyətinin ən fəal qanadlarından olan Ağsaqqallar Şurasının bundan sonra da vətənin çiçəklənməsində, gənclərin tərbiyəsində fədakarlıq göstərəcəyini bildirdi.

Rəmzi lent kəsildikdən sonra binaya ictimai baxış oldu. Şəhərin mərkəzində tikilmiş 2 mərtəbəli, 7 otaqdan ibarət, 180 nəfərlik zalı və hər cür şəraiti olan Ağsaqqallar evinin hər güşəsi sözün əsl mənasında göz-könül oxşayırdı. Bu, Sumqayıtın qarşıdan gələn 60 illik yubileyi ərəfəsində şəhərin inkişafında zəhməti olan müdrik nəslin nümayəndələrinə ən gözəl hədiyyə kimi qiymətləndirildi.

Əli NƏCƏFXANLI

Xalq qəzeti.- 2009.- 5 aprel.- S. 4.