Barak Obama Türkiyədə rəsmi səfərdədir

Dünən İstanbulda II Mədəniyyətlərin İttifaqı Forumu öz işinə başlayıb. Eyni zamanda ABŞ Prezidenti Barak Obamanın Türkiyəyə səfərinin rəsmi hissəsi başlayıb. Bu barədə Türkiyənin TRT-2 telekanalı xəbər verib.

Məlumata əsasən, Birləşmiş Ştatların Prezidenti əvvəlcə Atatürkün mavzoleyini ziyarət edib və onun məzarı üzərinə əklil qoyub. Bundan sonra Obamanın Türkiyə Prezidenti Abdullah Gül və Baş nazir Rəcəb Tayyib Ərdoğanla görüşləri olub.

BMT-nin Baş katibi Pan Gi Mun isə forumda çıxış edərkən bildirib ki, mədəniyyətlərarası dialoq dünyada mövcud olan problemləri həll etməyə kömək edəcək. “Sivilizasiyalar arasında dialoq olmasa, biz real sülhə nail ola bilməyəcəyik”, – deyə Pan Gi Mun İstanbulda keçirilən beynəlxalq tədbirdə bəyan edib.

Onun sözlərinə görə, BMT həmişə böhran anında problemlərin həllinə qarışıb. Pan Gi Mun bu dialoqun bəşəriyyət qarşısında duran problemlərin tezliklə həllinə imkan yaradacağına əmin olduğunu qeyd edib. “Bu forum müxtəlif sivilizasiyalara bir-birini daha yaxşı tanımaq imkanı verəcək. Müxtəlif milliyyətli, müxtəlif dini məzhəbli insanlar birləşə biləcəklər”, – deyə Pan Gi Mun bildirib.

Qeyd edək ki, Türkiyədəki tədbirdən əvvəl Londonda “Böyük iyirmilik”in toplantısı və Praqada NATO-nun 60-cı yubiley sammiti keçirilib. Ankaraya yola düşməzdən əvvəl ABŞ Prezidenti Barak Obama Türkiyənin Avropa Birliyinə üzvlüyünü dəstəklədiyini bildirib. Onun sözlərinə görə, Türkiyənin AB-yə üzv qəbul edilməsi müsəlman dünyası üçün vacib siqnal ola bilər.

Lakin Obamanın bu çağırışı Fransa Prezidenti Nikola Sarkozi tərəfindən narazılıqla qarşılanıb. “AB haqqında danışılırsa, bu barədə qərarı AB üzvləri verməlidir. Fransa Türkiyənin AB-yə üzvlüyünə qarşıdır. Doğrudur, Obama ilə çiyin-çiyinə çalışırıq, amma son sözü AB üzvləri deməlidir. AB ölkələrinin böyük əksəriyyəti Fransanın mövqeyini müdafiə edir. Türkiyə çox böyük bir ölkədir, həm Avropanın, həm də ABŞ-ın müttəfiqidir. Ona görə də Türkiyə AB-də imtiyazlı bir tərəfdaş olaraq qalmalıdır” - deyə Sarkozi bildirib.

Fransa Prezidentinin mövqeyini Almaniyanın Baş naziri Anqela Merkel də dəstəkləyib. “Hələlik bu barədə son qərarımız yoxdur. Müsəlman dünyası və xüsusilə də Türkiyə ilə sıx münasibətlər bizim üçün vacibdir, ancaq məsələnin hansı şəkildə həll olunacağı, yəni bunun tam üzvlük, yoxsa imtiyazlı tərəfdaşlıq olacağı məsələsini hələ müzakirə edirik” - deyə Merkel əlavə edib.

Avropa Komissiyasının rəhbəri Joze Manuel Barrozu isə Barak Obamanın Türkiyənin AB-yə üzvlüyü məsələsinə dəstək verməsindən məmnun qaldıqlarını, Türkiyənin tam üzvlüyü ilə bağlı müzakirələrə başladıqlarını bildirib.

Beynəlxalq müşahidəçilər Obamanın Türkiyəyə rəsmi səfərini Corc Buşun prezidentliyi dövründə bir qədər pisləşmiş ABŞ-Türkiyə münasibətlərini nizamlamaq cəhdi kimi qiymətləndirirlər. Onların fikrincə, ABŞ Türkiyə ilə elə münasibətlər qurmağa çalışır ki, bu zaman rəsmi Ankaranın artmaqda olan regional nüfuzu nəzərə alınsın, İranla münasibətlər və Əfqanıstan müharibəsi ilə bağlı problemlərin həllinə real kömək olsun.

Paşa ƏMİRCANOV

Xalq qəzeti.- 2009.- 7 aprel.- S. 6.