Ölkəmizin iqtisadi inkişafı regionlarda öz həqiqi əks-sədasını tapır

Azərbaycan inkişaf edir, ölkəmiz müasirləşir, dövlət müstəqilliyimizin əbədiləşdirilməsi istiqamətində çox mühüm addımlar atılır. Zamanın tələb etdiyi bütün islahatları uğurla reallaşdıran dövlət başçımız müstəqil respublikamızın dünyanın inkişaf etmiş ölkələrinin sırasına çıxarılmasını əsas məqsəd kimi qarşıya qoymuşdur. Biz masallılar böyük məmnunluq içərisindəyik ki, həmin məramı məhz cənab Prezidentin özündən və öz rayonumuzda eşitdik. Ötən il oktyabrın 7-də Masallıya gələn cənab İlham Əliyev rayon ictimaiyyətinin nümayəndələri ilə görüşdə həmin məramı açıq və aydın şəkildə ifadə etdi: “...mən dəfələrlə demişəm, Azərbaycan inkişaf etmiş ölkələrin sırasına daxil olmalıdır. ”İnkişaf etmiş ölkələr" — bu, elə termindir ki, çox ölkəni əhatə etmir, çox məhdud sayda ölkə özünü belə hesab edə bilər. Amma bizim tam imkanımız var ki, o ölkələrin sırasında olaq. Çünki çox güclü insan potensialımız var, intellektual potensialınız yüksəkdir".

Azərbaycan xalqına nicat, milli dövlətçiliyimizə qurtuluş gətirmiş ulu öndər Heydər Əliyevin siyasi kursunu böyük ustalıq və incəliklə davam etdirən Prezident İlham Əliyev dövlətimizi inkişaf etmiş ölkələr sırasına çıxarmaq üçün möhtəşəm dövlət proqramlarının icra edilməsinə nail olur. Bu gün Azərbaycanda cəmiyyət həyatının elə bir sahəsi yoxdur ki, onun inkişaf etdirilməsi üçün xüsusi dövlət proqramı tərtib edilməsin və reallaşdırılmasın. Son beş ildə təkcə təhsil sektorunun müxtəlif sahələrini əhatə edən 15-dək dövlət proqramı təsdiq edilibdir. Qeyd edilməli xüsusi məqamlardan biri “Azərbaycan Respublikası regionlarının sosial-iqtisadi inkişafı Dövlət Proqramı (2003-2008-ci illər)” adlı möhtəşəm sənədin icrası zamanı əldə edilmiş uğurlarımızın region ölkələri üçün əlçatmaz olmasıdır. Üstəlik, bu proqramın davamı olacaq növbəti bir analoji sənədin imzalanması ərəfəsindəyik.

Əldə edilmiş sosial-iqtisadi uğurlar və ictimai-siyasi nailiyyətlər bir tərəfdən dövlətin qüdrətləndirilməsinə, ölkə vətəndaşlarının sosial-rifah halının yaxşılaşdırılmasına zəmin yaradırsa, digər tərəfdən də dövlətin müxtəlif qurumlarında çalışanların fəaliyyətini asanlaşdırır. Ölkədəki hazırki durum rəhbər kadrlara, icra strukturlarının məsul işçilərinə və ümumiyyətlə, dövlətin bütün təmsilçilərinə qarşı tələbkarlığı artırmaqla yanaşı, həm də istənilən problemin həllinə zəmin yaradır. Bu baxımdan “Dövlət qulluğu haqqında” və “Dövlət qulluqçularının etik davranış qaydaları haqqında” Azərbaycan Respublikasının qanunları mühüm əhəmiyyət kəsb edir. Masallı rayonu rəhbərliyi təkcə hansısa əlamətdar günlərdə və ya hesabat tədbirlərində deyil, ümumiyyətlə, bütün fəaliyyəti boyu bu qanunlara yüksək səviyyədə əməl edilməsini təmin edə bilmişdir. Kadrların hazırlanması və seçilib yerləşdirilməsi zamanı məhz bu qanunlara yüksək səviyyədə əməl edildiyinə görə rayonumuz respublikanın ümumi ictimai-siyasi inkişafına xüsusi töhfələr vermişdir. Fikrimcə, bütün bunlar Azərbaycanı inkişaf etmiş ölkələr sırasına çıxarmaq istəyən dövlət başçımızın siyasətinin yerlərdə genişmiqyaslı dəstəklənməsinin təzahürüdür.

Bəzən belə fikirlər söyləyirlər ki, Azərbaycanın dünya miqyasında inkişaf etməsi üçün neft strategiyasının uğurla davam etdirilməsi, neft və qaz ixrac kəmərləri şəbəkəsinin, eləcə də Şərq-Qərb, Şimal-Cənub nəqliyyat dəhlizlərinin genişləndirilməsi kifayətdir. Başqa ekspertlərin fikrincə isə, özünün enerji təhlükəsizliyini tamamilə təmin etmiş Azərbaycanın Avropa ölkələrinin enerji təhlükəsizliyinin təmin edilməsindəki fəal iştirakı əslində bizi inkişaf etmiş ölkələr sırasına doğru aparır. Hətta kosmosa rabitə-informasiya xarakterli süni peyk çıxarmaq üçün atdığımız addımları da bu baxımdan yetərli sayan mütəxəssislər vardır. Ancaq cənab Prezident İlham Əliyevin fikrincə, respublikamızı inkişaf etmiş ölkələr sırasına çıxarmaq üçün daha qısa və daha əhəmiyyətli bir yol vardır: “Biz neft sektorundan əldə edilmiş kapitalı insan kapitalına çevirməklə öz ölkəmizi və dövlətimizi daha da inkişaf etdirə bilərik. Elə ölkələr var ki, onların heç bir təbii sərvəti olmasa da insan kapitalına, intellektual kapitala görə böyük inkişafa nail olublar. Biz bu yolla gedəcəyik”. Mən ölkənin maliyyə sistemində çalışan bir mütəxəssis kimi məmnuniyyətlə qeyd edirəm ki, bu gün Azərbaycanda cənab Prezidentin həmin çağırışına yüksək səviyyədə əməl edilir. Elə yuxarıda dövlət proqramları barədə söz açarkən təhsil sektorunu əhatə edən 15-dən çox proqramın təsdiq edildiyini xatırlatmağımız da təsadüfi deyildi.

Bu məqamda bir məsələni xüsusilə qeyd etmək istərdim. Belə ki, biz maliyyə mütəxəssisləri istənilən mövzu ətrafında söz açarkən konkret faktlara və rəqəmlərə istinad etməyi daha üstün tuturuq. Bu baxımdan qeyd etmək istədiyim məsələ nədən ibarətdir? Bu il yanvar ayının 16-da Azərbaycan Prezidenti İlham Əliyevin sədrliyi ilə Nazirlər Kabinetinin 2008-ci ildə sosial-iqtisadi inkişafın yekunlarına həsr olunmuş iclasında maliyyə naziri cənab Samir Şərifov dövlət başçısının son bir ildə imzaladığı sərəncamları xarakterizə edərək söyləmişdir: “Bu sərəncamlarla elm, təhsil, səhiyyə, sosial təminat, mədəniyyət sahələrində, habelə, dövlət büdcəsindən maliyyələşən digər təşkilatlarda çalışanların əmək haqları orta hesabla 50 faiz, Milli Elmlər Akademiyasının tabeliyində olan elmi-tədqiqat müəssisələrində çalışanların əmək haqları 50 faiz, ali təhsil müəssisələrində çalışanların əmək haqları iş stajından və tələbələrin sayından asılı olaraq 50 faizdən 1 dəfəyə qədər, aspirantlara, ali, orta ixtisas, peşə məktəbləri və peşə liseylərinin tələbələrinə və şagirdlərinə verilən təqaüdlərin aylıq məbləği orta hesabla 40 faiz artırılmışdır”. Qeyd edim ki, Azərbaycanda dövlət büdcəsindən maliyyələşən onlarla ünvan arasında ən çox büdcə vəsaiti ayrılan üç ünvandan biri (hərbi xərclər, sosial müdafiə sistemi, elm və təhsil) məhz intellektual kapital yaradılmasında mühüm xidməti olan sahədir. Cəmi 5 ildə 1500 məktəb tikilibsə və bütün məktəblər informasiya-kommunikasiya texnologiyaları ilə təmin edilibsə, deməli, ölkə ictimaiyyəti cənab Prezidentin çağırışına yüksək səviyyədə əməl edir. Mən çox şadam ki, son iki ildə Masallıda 10-dan çox məktəb binası tikilmiş, hamısı yeni, müasir avadanlıqla təmin edilmişdir.

Əlbəttə, mən maliyyə işçisiyəm. Amma bu o demək deyildir ki, biz ölkənin həyatındakı digər sahələrdə baş verən yeniliklərlə maraqlanmırıq. Əksinə, Heydər Əliyev siyasi məktəbi bizə Azərbaycanla, Azərbaycançılıqla bağlı olan bütün məsələlərlə maraqlanmağı, vətəndaş mövqeyi nümayiş etdirməyi öyrətmişdir. Azərbaycanın beynəlxalq aləmdəki nüfuzunun artması, respublikamızın inkişaf etmiş ölkələr sırasına çıxarılması üçün həyata keçirilən tədbirlər, bu proseslərin Ermənistan-Azərbaycan, Dağlıq Qarabağ münaqişəsinin ədalətli şəkildə həllinə zəmin yaratması bizi daim maraqlandırır və məmnun edir. Daha bir məmnunluq ünvanımız isə adı çəkilən məsələlərin həllində masallıların az və ya çox dərəcədə xidmətinin olmasıdır. Fəxrlə qeyd edirik ki, ölkəmizin iqtisadi qüdrətinin artması respublikanın regionlarında da öz həqiqi əks-sədasını tapır.

Səməd ABİYEV,

Masallı Rayonu üzrə

Maliyyə İdarəsinin rəisi

Xalq qəzeti. – 2009.- 10 aprel.- S. 7.