Türkiyə şəhidlərin ruhuna ehtiram əlaməti olaraq Ermənistanla sərhədi açmamalıdır

Son zamanlar regionda gedən ictimai-siyasi proseslərin şaxələnməsi təkcə Azərbaycanda deyil, eləcə də Xəzər—Qaradəniz bölgəsində böyük maraqla izlənilir. Proseslərin şaxələnməsi nə deməkdir? Əvvəla, ABŞ, Rusiya və Türkiyə bu həssas bölgədəki münaqişələrin həllinin tezləşdirilməsinə çalışırlar. Planetin üç qütbünü təmsil edən bu dövlətlərin hər birinin özünəməxsus və müsbət layihələri, təklifləri mövcuddur. Yəni proseslər müsbət məcrada davam edir.

Ancaq təşəbbüskarlığın və təkliflərin artdığı bir zamanda Cənubi Qafqazda mənfi məcraya yönələn proseslər də müşahidə edilir. Türkiyə—Ermənistan sərhədlərinin açılmasına (daha doğrusu, açdırılmasına) edilən cəhdlər məhz həmin mənfi meylin təməlini qoymuşdur. Qeyd edilən mənfi yüklü xəbərlərin yayılması fonunda möhtəşəm bir müsbət tendensiya da formalaşır. Özü də iti sürətlə. Belə ki, həm Türkiyədə, həm də Azərbaycanda ictimaiyyət Ermənistan—Türkiyə sərhədlərinin açılacağı barədə xəbərləri böyük etirazla qarşılayır. Təbii ki, yenə də öndə gedən ziyalılardır.

Tofiq BAKIXANOV, Bakı Musiqi Akademiyasının professoru, xalq artisti:

— Müasir dünyadakı bəzi siyasi qüvvələrin Türkiyə—Ermənistan sərhədlərinin açılmasına cəhd etməsi xəbəri mənə başqa bir tarixi prosesi xatırladır. Bir dövlət bizə 1905–1906-cı illərdə, daha sonra isə 1918-ci ildə ermənilərin azərbaycanlılara qarşı törətdiyi soyqırımını, vəhşilikləri unutdurmaq istəmişdi. Biz də yüz illərdən bəri xalqımıza qarşı edilən düşmənçilikləri unudaraq erməniləri bağışlamışdıq. Nəticədə nə oldu?

Çörəyimizi yeyib , suyumuzu içdilər və imkan düşən kimi yenə də torpağımızı işğal etdilər. Belə kəmfürsət xalqı, məqam gözləyən dövləti qətiyyən bağışlamaq olmaz. Mən tam əminəm ki, dünyada gedən hansısa, növbəti bir proses zamanı ermənilər dərhal türklərə və Türkiyəyə qarşı amansız bir düşmənçilik edəcəklər. Bunu yüz illərin tarixi hadisələri sübut edir. Ona görə də əminəm ki, Türkiyə dövləti belə bir səhv addımı atmayacaqdır.

Mən başqa bir məqamı da yada salmaq istəyirəm. Həm 1918-ci ilin may ayında, həm də 1991-ci ilin oktyabrında Azərbaycan öz dövlət müstəqilliyini əldə edən kimi bizim dövlətimizi tanıyan ilk dövlət Türkiyə olmuşdur. Bu, bir tarixi faktdır, Türkiyə dövlətinin bizim müstəqil dövlətimizə göstərdiyi sayğı və sevgilərin, sədaqətin sübutu olan fakt. Bir sənət adamı kimi Türkiyəyə hər səfərim zamanı öz xalqıma və Azərbaycan dövlətinə məhəbbəti Türkiyənin hər bir vətəndaşında da görmüşəm.

Bəs elə isə Ankara Azərbaycanın dövlət müstəqilliyinə qənim kəsilən, torpaqlarımızı işğal edən düşmən dövlətə necə nicat verə bilər? Ümumiyyətlə, bu, ağlabatandırmı? Əsla yox. Bu fakt bir də ona görə ağlabatan deyil ki, ermənilər Azərbaycana etdikləri düşmənçiliklərdən qat-qat artıq vəhşilikləri Türkiyə dövlətinə və xalqına qarşı etmişlər. Odur ki, mən Türkiyənin indiki rəhbərliyinin tarixi türk qətiyyətinə sadiq qalacağına inanıram.

Leyla GƏRAYZADƏ, Əsgər Anaları Şurasının sədri:

— Mən öz çıxışlarımda, müsahibələrimdə, ali məktəb auditoriyasındakı mühazirələrimdə daim Türkiyə dövlətinin və türk xalqının tarix yaratmaq keyfiyyətlərindən söz açmışam. Fəxr etdiyim bir məqamı tələbələrimə tez-tez xatırladıram: Türkiyədə əsgərin şəhid olmasına ağlamır, onunla fəxr edirlər. Hətta, qardaş ölkədə “şəhidin mübarək! — ifadəsi də var. Yəni Anadolu türkləri şəhid ruhuna dünyanın heç bir yerində olmayan şəkildə ehtiram göstərirlər. Türkiyə rəsmilərinin və sadə türklərin Bakıdakı Şəhidlər Xiyabanını necə ehtiramla yad etdiyini, bəlkə də, bütün azərbaycanlılar görüblər. Bəs indi nə oldu?

20 min azərbaycanlı gəncin həyatını əlindən alimış erməni vandallarına nicat vermək, onları iqtisadi böhran girdabından çıxarmaq Ankaranın nəyinə lazımdır? Avropa Birliyinə üzv olmaq istəyi min illərdən bəri formalaşmış türk qürurunu, mərdanəliyini bu qədərmi ucuzlaşdırdı? İnanmıram. Ola bilməz. Türk qüruru ucuzlaşmamalıdır.

Həmkarlarımla söhbət zamanı belə bir ifadə eşitdim. Guya, bu gün qardaş ölkədə iqtidarda olan Ədalət və İnkişaf Partiyası islamyönlü olduğuna görə, İslam dininin isə bütün dünyada ən rəhmli, ən humanist din olduğuna görə aclıqdan və səfalətdən əzab çəkən ermənilərə rəhm edilir. Mən bunun həqiqət olduğuna inanmıram. Çünki AKP rəhbərlərinin hamısı islami dəyərləri dərindən bilən adamlardır. Onlar bilirlər ki, müqəddəs kitabımız işğalçıya, qaniçənə, qəsbkara, yolkəsənə, yurdları viranə qoyana, on minlərlə günahsız insanı öldürənə, şəhərləri yandırana deyil, fağıra, şikəstə, yetimə, əlsiz-ayaqsıza, xəstəyə, təbii fəlakətdən zərər çəkənlərə rəhm etməyi tövsiyə edir. Erməniyə nə rəhm?

Məgər onlar 1918-ci ildə Türkiyə dövlətini qorumaq üçün ölüm-dirim savaşına girmiş türk ordusuna arxadan zərbə vuranda kiməsə rəhm etmişdilərmi? Yoxsa, Xocalı şəhərini yerlə yeksan edib minlərlə şəhər sakinini qətlə yetirəndə hansısa körpəyə aman vermişdilər? Olmayıb. Yüz illərdən bəri insan qanı içən vandallara rəhm edilməsi barədə qərar qəbul olunubsa, çox təəssüf.

Mən çox şadam ki, bu gün Türkiyəyə rəhbərlik edən Predizent Abdullah Gül də,Baş nazir Rəcəb Tayyib Ərdoğan da Bakıda olublar. Onlar Şəhidlər Xiyabanında dəfn edilmiş nə qədər günahsız uşaqlarımızın olduğunu görüblər. Ona görə də əminəm ki, Türkiyə dövləti bu səhv addımı atmayacaqdır.

Eyni zamanda, bütün bunlar o demək deyildir ki, biz Türkiyə—Ermənistan sərhədlərinin açılmaması üçün yalvarırıq. Qətiyyən yox. Biz öz dövlət başçımız cənab İlham Əliyevin qətiyyətindən və cəsarətindən böyük məmnunluq hissi keçiririk. İstənilən hadisənin baş verməsindən asılı olmayaraq Azərbaycan xaqı öz liderinin, ordumuz öz Ali Baş Komandanının ətrafında daha da sıx birləşərək milli maraqlarımızı qoruyacaqdır.

İttifaq MİRZƏBƏYLİ

Xalq qəzeti.- 2009.- 11 aprel.- S. 4.