Azərbaycanın düzgün xarici siyasəti ölkəmizin beynəlxalq nüfuzunu daha da artırır

Viktor YUŞŞENKO: Prezident İlham Əliyev Azərbaycanın inkişafı, möhkəmlənməsi üçün bu mühüm, nadir bir vaxtda ölkəsini daim müsbət qiymətləndiriləcək bir yolla aparır

Ölkəmizin sosial-iqtisadi inkişafı, rəsmi Bakının regionun və ümumiyyətlə, Avrasiyanın bir çox problemlərinin həllində təşəbbüskarlıqla çıxış etməsi, ordu quruculuğundakı nailiyyətlərin iti sürətlə artması və bir çox başqa məqamlar Azərbaycanın beynəlxalq aləmdəki nüfuzuna öz müsbət təsirini göstərməkdədir. Xüsusən, əsas insan hüquq və azadlıqlarının qorunması məsələsində Azərbaycanın əldə etdiyi uğurlar beynəlxalq aləmdə daha böyük maraqla qarşılanır. Ancaq region siyasətçiləri və politoloqlar ölkəmizin ən böyük nailiyyətlərinin məhz xarici siyasətdə əldə edildiyini söyləyirlər. Bu isə, ilk növbədə Ermənistan-Azərbaycan, Dağlıq Qarabağ münaqişəsinin ədalətli şəkildə həll edilməsi üçün aparılan danışıqların rəsmi Yerevanı dalana dirəməsində, eləcə də Ermənistan dövlətinin beynəlxalq aləmdə təklənməsində özünü göstərir.

Təbii ki, Azərbaycan öz dövlət müstəqilliyini əldə edəndən sonra dünyanın digər ölkələri ilə yanaşı, ənənəvi tərəfdaşlarımız olan region ölkələri ilə də əməkdaşlığı genişləndirdi. Bu baxımdan Rusiya, Türkiyə, İran, Ukrayna, Gürcüstan, Qazaxıstan və başqa ölkələrlə olan tarixi münasibətlər daha da geniş miqyas aldı. Aprelin 9-10-da Azərbaycanda rəsmi səfərdə olan Ukrayna Prezidenti Viktor Yuşşenkonun Bakıda keçirdiyi görüşlər, aparılan danışıqlar və imzalanan sənədlər ölkələrarası əlaqələrin miqyasını daha da genişləndirdi. Sənədlərin imzalanması mərasimindən sonra Ukrayna Prezidentinin mətbuat üçün verdiyi bəyanatda həmin məqam daha aydın şəkildə görsənirdi: “Biz indiyə qədər 27 müqavilə, rəsmi məlumat, memorandum imzalamışıq. Bu gün onların sırasına daha 8 ikitərəfli müqavilə və saziş əlavə etdik. Bizim strateji xarakterli münasibətlərimiz bu gün daha geniş normativ hüquqi baza əldə etdi”.

Qeyd edək ki, Ukrayna dövlətlərarası münasibətlərin bütün sahələrində olduğu kimi, Ermənistan-Azərbaycan, Dağlıq Qarabağ münaqişəsinin ədalətli şəkildə həll edilməsi məsələsində də daim Azərbaycanın mövqeyini müdafiə etmişdir. Cənab Yuşşenko bu məqamı Azərbaycan Prezidenti İlham Əliyevin ali qonağın şərəfinə verdiyi rəsmi ziyafətdəki nitqində daha aydın şəkildə ifadə etmişdir: “Aramızdakı etimad elə səviyyədədir ki, qarşılıqlı milli dövlət siyasətini — bu və digər dövlət üçün səciyyəvi olan həssas məsələlərə çox həssaslıqla reaksiya verən siyasəti qurmağa imkan verir. Mən nəyi nəzərdə tuturam? Onu nəzərdə tuturam ki, Dağlıq Qarabağda siyasətdən, Birləşmiş Millətlər Təşkilatının Baş Məclisində qəbul edilmiş məsələlərdən söhbət gedəndə, Ukrayna dost Azərbaycanı bu məsələdə dəstəkləməkdən başqa ayrı bir variantın olması barədə heç düşünmədi də”. Yuxarıda qeyd etdiyimiz kimi, artıq bütün dövlətlər belə düşünür və Azərbaycan Ermənistanın təklənməsinə nail olur.

Ermənistan siyasətçilərinin Azərbaycanın xarici siyasətinin gedişləri qarşısındakı acizanə duruma düşdüyünü özündə əks etdirən bir çox məqamlar vardır. Aprelin 2-də Litvanın paytaxtı Vilnüsdə ölkəmizi təmsil edən sərbəst güləş ustalarından üç nəfərin Avropa çempionu adına layiq görülməsi dünyanın idman ictimaiyyəti tərəfindən böyük maraqla qarşılandı. Bizim idmançılarımız 4 qızıl medal alanda ermənilərin cəmi 2 aşağı əyarlı medalı var idi. Belə nəticəni yüksək qiymətləndirən APA informasiya agentliyinin internet saytında maraqlı sərlövhə verilmişdi: “Avropa çempionatında Azərbaycan fırtınası”. Həmin sərlövhəni oxuyanda fevral ayında Ermənistan internet saytlarının birində oxuduğumuz səhifə yada düşürdü: “Azərbaycanın xarici siyasəti Ermənistanda fırtına törədir”. Bədxah qonşularımızın həqiqəti obyektiv qiymətləndirməyi bacaran siyasətçiləri Ermənistanın beynəlxalq aləmdə təklənməsinin səbəbini Azərbaycan dövlətinin xarici siyasətində axtarır və tapırlar. Fikrimizcə, bizim xarici siyasətimizə dünyanın aparıcı dövlət xadimlərinin, nüfuzlu politoloqların və mötəbər beynəlxalq təşkilatların verdiyi qiymətlə yanaşı düşmənlərimizin münasibəti də önəm kəsb edir. Yəni ermənilər Azərbaycan diplomatiyası qarşısında aciz qaldıqlarını açıq şəkildə etiraf edirlər.

Qonşu ölkənin “Tert.am” və “Tert.am.am” internet saytları tez-tez Ermənistanın aparıcı mətbuat vasitələrinin əsas materialları barədə söz açırlar. Ermənistan qəzetləri Azərbaycan-Gürcüstan, Azərbaycan-Rusiya, Azərbaycan-ABŞ, Azərbaycan-Avropa əməkdaşlığı barədə bütün məqamları ən incə detallarına qədər izləyir, öz dövlət rəhbərlərini ayıq olmağa çağırırlar: “Azərbaycanın sosial-iqtisadi inkişafı və öz ordusunu möhkəmləndirməsi də bizim üçün Bakının xarici siyasəti qədər təhlükəli deyildir”. Biz erməni mətbuatında “İlham Əliyev Xəzər nefti hesabına Avropanı Ermənistandan üz döndərməyə vadar etdi”, “Yeni Əliyevin Rusiyaya hər səfəri Ermənistan üçün ağır nəticələr verir”, (aprelin 16-da bu qəbildən olan növbəti səfər baş tutacaqdır) “ABŞ-ın Ermənistana münasibətinin soyumasının kökləri Vaşinqtonda deyil, Bakıda axtarılmalıdır” — və sairə ifadələrə tez-tez rast gəlirik. Bütün bunlar Azərbaycan Prezidentinin hələ iki il əvvəl ölkəmizin xaricdəki diplomatik nümayəndəliklərinin rəhbərlərinin ənənəvi toplantısında söylədiyi “Biz bədxahlarımıza, torpaqlarımızı işğal etmiş bədnam qonşularımıza qarşı daim hücum mövqeyində durmalıyıq” — çağırışının nəticələridir. Həmin çağırışdan sonra, ümumiyyətlə isə 2003-cü ilin payızından bəri Azərbaycan diplomatiyası işğalçı Ermənistana öz yerinin göstərilməsi istiqamətində çox qətiyyətli addımlar atmışdır. Bu addımları Heydər Əliyev Fondunun həyata keçirdiyi layihələr və gündən-günə daha da mütəşəkkilləşən Azərbaycan diasporunun çoxsaylı tədbirləri daim zənginləşdirmiş, səmərəli etmişdir.

Azərbaycan Respublikasının Prezidenti İlham Əliyev ulu öndər Heydər Əliyevin işləyib hazırladığı xarici siyasət kursumuzun məhz ulu öndərin arzu etdiyi səviyyədə icra edilməsinin verdiyi nəticələri yüksək qiymətləndirir: Mart ayının 20-də Bakıda izdihamlı Novruz bayram şənliyində nitq söyləyən dövlət başçımız rəsmi Bakının münaqişənin həll edilməsi üçün aparılan danışıqlara sədaqət göstərməsindən, sülh yolu ilə həllin gündəlikdə əsas məsələ olaraq qalmasından, beynəlxalq təşkilatların vasitəçiliyinə ehtiramla yanaşılmasından danışmışdır. Ancaq eyni zamanda, dövlət başçımız Azərbaycan Respublikasının qətiyyətini də nümayiş etdirmişdir: “Biz bütün imkanlardan istifadə edirik ki, bu məsələni ədalətli, beynəlxalq hüquq normalarına uyğun şəkildə həll edək. Həm iqtisadi imkanlarımızı, həm də diplomatik səylərimizi artırırıq. Eyni zamanda, hərbi gücümüzü artırırıq və ötən il Azərbaycanda keçirilmiş hərbi parad bizim nə qədər güclü ordu potensialına malik olduğumuzu bütün dünyaya sübut etdi. Biz çalışırıq ki, məsələ sülh yolu ilə həll edilsin. Ancaq eyni zamanda, məsələ ədalətli həll olunmalıdır, beynəlxalq hüquq normalarına uyğun şəkildə, Azərbaycanın ərazi bütövlüyü çərçivəsində həll edilməlidir.

Qondarma Dağlıq Qarabağ rejiminə heç vaxt müstəqillik verilməyəcəkdir. Azərbaycan öz torpaqlarının itirilməsi ilə heç vaxt barışmayacaqdır. Biz nə qədər güclü olsaq, məsələnin həlli bir o qədər yaxın olacaqdır. Son beş il ərzində bu istiqamətdə çox böyük diplomatik, siyasi, iqtisadi, hərbi tədbirlər, təbliğat işləri görülmüşdür".

Yeri gəlmişkən qeyd edək ki, Azərbaycanın Avrasiyadakı bir çox iqtisadi layihələrin iştirakçısı və hətta, onların əksəriyyətinin təşəbbüskarı olması bilavasitə Ermənistan-Azərbaycan, Dağlıq Qarabağ münaqişəsinin ədalətli şəkildə həll edilməsinə mühüm zəmin yaradır. Avrasiya enerji sammitləri, xüsusən, ötən il Bakıda keçirilmiş Beynəlxalq Enerji Sammiti ölkəmizin regiondakı aparıcı rolunu qat-qat artırmış oldu. Bakı-Tbilisi-Qars dəmir yolu layihəsinin reallaşması üçün rəsmi Bakının göstərdiyi prinsipiallıq isə bir çox Avropa və Asiya ölkəsinin Azərbaycana münasibətini köklü surətdə korrektə etməsi ilə nəticələndi. Hələ üç-dörd il əvvələ qədər ikili standartlardan əl çəkə bilməyən ölkələr və siyasətçilər birmənalı şəkildə bəyan etdilər ki, Dağlıq Qarabağ münaqişəsi Azərbaycanın ərazi bütövlüyünün bərpa edilməsi şərtiylə həll edilməlidir. 2005-ci ilə qədər “Biz Azərbaycan və Ermənistan rəhbərliyinin gələcəyi istənilən ortaq məxrəci dəstəkləyirik” — deyə hər iki dövlətin rəğbətini qazanmaq istəyən beynəlxalq təşkilat rəhbərləri nəinki Azərbaycan rəsmiləri ilə, hətta Ermənistanın dövlət başçıları ilə görüşlərdə də açıq bəyanat verməkdən çəkinmədilər: “Dağlıq Qarabağ müstəmləkə deyildir, müstəqil Azərbaycan dövlətinin bir hissəsidir”. Yaxud, “Torpaqların silah gücünə ələ keçirilməsi, hansısa dövlətin ərazisində zor gücünə yeni dövlət yaradılması ənənəsi orta əsrlərdə qalmışdır” və sairə. Yəni Prezident İlham Əliyevin yeritdiyi prinsipial və ardıcıl siyasət nəticəsində Dağlıq Qarabağ münaqişəsi ətrafında yaranmış duman dağılır və məsələnin həllində aydınlaşma prosesi yaranır.

Dağlıq Qarabağ münaqişəsi ətrafında aydınlaşma prosesi getdikcə isə ermənilər beynəlxalq aləmdəki erməni lobbisinin son qüvvələrindən istifadə etməklə olsa belə Türkiyə-Ermənistan sərhədlərinin açılmasına çalışdılar. Bu məsələyə hətta dünyanın ən önəmli siyasətçilərini də qata bildilər. Ancaq Azərbaycan dövləti, xüsusən Prezident İlham Əliyev dünya ictimaiyyətinə aydın şəkildə başa saldı ki, Dağlıq Qarabağ münaqişəsi həll edilməyincə, Azərbaycanın ərazi bütövlüyü bərpa olunmayınca Türkiyə-Ermənistan sərhədlərinin açılması regiondakı siyasətdə ciddi korrektələrə səbəb ola bilər. Azərbaycan xalqı bu məsələyə ciddi şəkildə etiraz etməklə yanaşı, Türkiyə ictimaiyyətinin də açıq münasibət bildirməsini tələb etdi. Bütün hallarda olduğu kimi xalqımız yenə də öz milli maraqlarını qorumaq məsələsində dövlətin siyasətini kifayət qədər dəstəklədi.

Azərbaycan xalqının öz liderinə olan inam və etimadının gündən-günə artmasının əsas səbəblərindən biri məhz Dağlıq Qarabağ münaqişəsinin həlli üçün həyata keçirilən tədbirlər zamanı dövlət başçımızın göstərdiyi qətiyyətdir. Azərbaycan Respublikası Prezidenti Administrasiyasının rəhbəri, akademik Ramiz Mehdiyevin bu il mart ayının 30-da “İzvestiya” qəzetində verilmiş geniş müsahibəsində də xalqın öz liderinə olan inamı, dövlətimizin qüdrətlənməsi və beynəlxalq aləmdə Azərbaycana münasibətin yeni çalarlarla zənginləşməsi öz əksini tapmışdır: “Biz on il əvvəlki ölkə deyilik. Biz dəyişmişik və özümüzə qarşı münasibəti də dəyişirik”.

İttifaq MİRZƏBƏYLİ

Xalq qəzeti.- 2009.- 12 aprel.- S. 1.