Azərbaycanda Elektron İmza layihəsinin pilot versiyasının təqdimatı keçirilib

Azərbaycan Respublikası Rabitə və İnformasiya Texnologiyaları Nazirliyində ULTRA şirkətinin rəhbərliyi ilə Microsoft və Azerin şirkətlərinin də daxil olduğu konsorsium tərəfindən E-İmza layihəsinin son istifadəçilər üçün həllinin pilot versiyasının təqdimatı keçirilib.

Rabitə və İnformasiya Texnologiyaları Nazirliyinin Məlumat Hesablama Mərkəzində keçirilən təqdimat zamanı layihədə nəzərdə tutulmuş şəkildə fiziki və hüquqi şəxslər üçün E-İmza kartlarının hazırlanması və onlardan istifadə olunma qaydalarının (qeydiyyat prosesi, sənədlərin imzalanması və təqdim edilməsi, yoxlanılması) nümayişi keçirilib. Nümunə üçün E-İmza kartları çap olunub.

Beləliklə, E-İmza pilot layihəsinin uğurlu təqdimatını keçirən ULTRA şirkəti ölkə üçün zəruri olan e-İmza sistemini tam olaraq bu ilin oktyabrında istifadəyə verməyi planlaşdırır.

Qeyd edək ki, Rabitə və İnformasiya Texnologiyaları Nazirliyinin Məlumat Hesablama Mərkəzinin 2008-ci ildə respublikada elektron imzanın tətbiqinin əsas komponenti olan “Mərkəzi açıq açar” infrastrukturunun qurulması üzrə tenderinin qalibi ULTRA şirkətinin yaratdığı Microsoft və Azerin şirkətlərindən ibarət konsorsium elan edilmişdir.

Məlumat üçün bildirək ki, Azərbaycanın aparıcı İT-şirkətlərindən biri olan ULTRA şirkəti Azərbaycanda İntel, Microsoft, HP, Cisco korporasiyalarının rəsmi tərəfdaşıdır. 10 ildir ki, fəaliyyət göstərən şirkət elektron hökumət həlləri təqdim etməklə ölkədə elektron təhsil, elektron sənəd dövriyyəsi, elektron məhkəmə layihələrini həyata keçirməkdədir. ULTRA Azərbaycanla yanaşı, Orta Asiya və Şərqi Avropa ölkələrində də fəaliyyət göstərir.

M. MÜKƏRRƏMOĞLU

Xalq qəzeti.- 2009.- 16 aprel.- S. 16.