Problemlər yerində həll olunmalıdır

Kəlbəcər Rayon İcra Hakimiyyətinin rəhbərliyi yerlərdə müntəzəm görüşlər keçirməklə əhali ilə sıx ünsiyyət yarada bilmişdir

Nə az, nə çox, düz 59 rayon və şəhərdə məskunlaşıblar kəlbəcərlilər. Yəni Azərbaycanın hər bölgəsində köçkün həyatı yaşayan, doğma torpaq niskilini ürəyində gəzdirən kəlbəcərli var. Artıq 16 ildən çoxdur ki, onların həyatı bax beləcə davam edir. Rayon icra hakimiyyətinin başçısı, çox qısa vaxt ərzində həmyerlilərinin dərin hörmətini qazanmış Vidadi Məhərrəmovla tez-tez görüşüb söhbət edirəm. Hər dəfə də deyir ki, kəlbəcərliyə burada qızıldan ev tikdir, yenə doğma elinə-obasına qayıtmağı üstün tutacaq.

Ömrünün artıq son günlərini yaşayan 94 yaşlı bir qarı ilə söhbətim heç vaxt yadımdan çıxmır. Gəncədəki Azərbaycan Dövlət Aqrar Universitetinin yataqxanasında darısqal bir otağa nəvə-nəticələri ilə sığınmış qarı yataqda uzanıb gözlərini bir nöqtəyə zilləmişdi. 5-6 yaşlarında qumral saçlı nəticəsi birdən “nənə, Kəlbəcərə gedəkmi ?”, — deyə dilləndi. Qarı başını ehmalca tərpədib, əlləri əsə-əsə uşağın saçını tumarladı və zəif səslə “bala, mən gedə bilmədim, amma sən mütləq gedəcəksən”, — dedi.

Bu söhbətdən on ildən çox vaxt keçib. Bu illərdə neçə-neçə kəlbəcərli dünyasını dəyişib, neçə-neçə övlad dünyaya gəlib. Elə yeniyetmələr var ki, artıq orta məktəbi qurtarır, amma kəlbəcərin üzünü belə görməyib. Valideynləri sanki onlara “Kəlbəcər nağılı” danışıb və bu nağılların xəyalı ilə tez-tez sıx meşələrə, büllur bulaqlara, əl çatmaz dağlara üz tuturlar.

... Qaçqın və köçkünə ən böyük təsəlli ona olan diqqətdir. Evindən-eşiyindən didərgin düşmüş, yaxınlarını, əzizlərini itirmiş insan üçün bundan qiymətli nə ola bilər?!

Rayon icra hakimiyyətinin başçısı Vidadi Məhərrəmov elə şəhər, rayon, kənd, qəsəbə yoxdur ki, orada olmasın, kəlbəcərli ailəsinə baş çəkməsin. Gəlin, razılaşaq ki, bu, olduqca çətin bir işdir. Bir yerdə məskunlaşan əhaliyə baş çəkməyə nə var ki... Amma 59 rayon, 600-dən çox yaşayış mətəqəsinin hər birinə baş çəkmək, adamların dərd-sərini, problemlərini öyrənmək, köməklik göstərmək üçün görün nə qədər vaxt lazımdır. Elə buna görədir ki, başçını iş kabinetində tapmaq çox çətin məsələdir. Bəzən günlərlə yollarda olur, başqa yerlərdə gecələyir. Uzağa getməyək. Təkcə bu ilin birinci rübündə rayon icra hakimiyyətinin başçısı Bakı, Gəncə, Mingəçevir, Naftalan şəhərlərində, Goranboy, Göygöl, Samux rayonlarının 18 yaşayış məntəqəsində 656 vətəndaşı şəxsən qəbul edib, dinləmişdir. Bu, yalnız şəxsi problemi olan köçkünlərdir. Elə də olur ki, yüzlərlə kəlbəcərli başçını əhatəyə alır, ümumi işlərdən, qayğılardan danışır, problemlərin həllində onlara köməklik göstərməsini xahiş edirlər. Məhz belə görüşlərdən sonra onların içməli su, işıq, qaz, mənzil şəraitinin yaxşılaşdırılması ilə bağlı ortaya çıxan problemlər həll olunmuşdur. Maraqlı, həm də diqqət çəkən məqam odur ki, bu işlərin hamısının icrasına başçı şəxsən nəzarət edir. İcra hakimiyyətinin aparat işçiləri, sturukturların rəhbərləri dəqiq bilirlər ki, Vidadi müəllim heç nəyi yadından çıxarmır. Görünür, bunun nəticəsidir ki, son vaxtlarda adlarını çəkdiyim strukturlarda yüksək nizam-intizam, məsuliyyəti hissi hökm sürür.

Qayğılar, problemlər hər gün, hər saat var. Yaxşı ki, rayon rəhbərliyi bunu bir an belə yaddan çıxarmır. Artıq dördüncü ayına qədəm qoyduğumuz 2009-cu ildə də belədir. 2009-cu ilin 3 ayı ərzində Azərbaycan Respublikası Nəqliyyat Nazirliyinin “Azəryolservis” ASC tərəfindən Gəncə şəhərində ADAU-nun 3 və 4 saylı yataqxanalarının 3000 kvm-lik dam örtükləri əsaslı təmir olunmuş, orada müvəqqəti məskunlaşmış məcburi köçkün ailələrinin yaşayış şəraiti yaxşılaşdırılmışdır.

Eyni zamanda, həmin təşkilat tərəfindən ADAU-nun 3 saylı yataqxanasında elektrik xətləri yenidən quraşdırılmış, qəza vəziyyəti aradan qaldırılmışdır.

ADAU-nun 4 saylı yataqxanasında isə su və kanalizasiya sistemi əsaslı təmir edilərək məcburi köçkünlərin narahatçılıqları aradan qaldırılmışdır.

Bundan başqa, Göygöl rayonunun Mixaylovka kəndindəki pansionat binasının dam örtüyü dəyişdirilərək paslanmayan dəmirlə əvəz edilmişdir.

Məcburi köçkünlərin işıq probleminin həll olunması istiqamətində də müəyyən işlər görülmüşdür. Belə ki, Zərdab rayonunun Bəyimli qəsəbəsindəki fermada müvəqqəti məskunlaşmış məcburi köçkünlərin işıq problemini həll etmək məqsədi ilə Dövlətqaçqınkomdan 1 ədəd 100/10 kv-lıq transformator və 3000 p/m elektrik naqili alınıb məcburi köçkünlərin istifadəsinə verilmişdir.

Müxtəlif bölgələrdə müvəqqəti məskunlaşmış məcburi köçkünlərin fasiləsiz elektrik enerjisi ilə təmin olunmaları üçün yerlərlə müntəzəm olaraq ələqə saxlanılmış, narazılıqların aradan qaldırılması üçün yanıb sıradan çıxmış transformatorlar vaxtında təmir edilmiş, elektrik enerjisinin verilişi bərpa edilmişdir.

Məcburi köçkünlərin mənzil şəraitinin yaxşılaşdırılması sahəsində də müəyyən işlər görülmüşdür. Bu baxımdan cari ildə Göygöl rayonu “Murovdağ” məcburi köçkün qəsəbəsi ətrafında Dövlətqaçqınkom tərəfindən 26 məcburi köçkün ailəsi üçün yaşayış evlərinin tikintisinə başlanılmış, hal-hazırda tikinti-quraşdırma işləri davam etdirilir.

Azərbaycan Respublikası Prezidentinin 2004-cü il 1 iyul tarixli 298 saylı sərəncamı ilə təsdiq edilmiş “Qaçqınların və məcburi köçkünlərin yaşayış şəraitinin yaxşılaşdırılması və məşğulluğun artırılması üzrə Dövlət Proqramı”na əlavələr edilməsi haqqında Azərbaycan Respublikası Prezidentinin 31 oktyabr 2007-ci il tarixli 2475 saylı sərəncamının icrası ilə əlaqədar Goranboy rayonunun EKO məcburi köçkün qəsəbəsində müvəqqəti məskunlaşmış 596 məcburi köçkün ailəsi üçün yeni qəsəbə salınmasına hazırlıq işlərinə başlanılmışdır. Bu günlərdə qəsəbənin tikintisinə başlanacaqdır və 2009-cu ilin sentyabr ayının sonunadək işlər başa çatdırılacaqdır.

Dövlət proqramına əlavələrə uyğun olaraq 39 kilometrlik Goranboy-Yuxarı Ağcakənd avtomobil yolunda əsaslı təmir işləri davam etdirilir.

... Bu günlərdə redaksiyamızın Gəncədəki müxbir məntəqəsinə Yevlax şəhərində məskunlaşan, özlərinin yazdığı kimi yataq xəstələri olan Dilqəm Əlişov və Sabir İsmayılovdan məktub daxil olub. Görün, nə yazırlar: “...İnanmırdın ki, başçı qapımızı döyüb bizə baş çəksin. Sağ olsun, bizə yardım göstərdi. Amma bundan daha vacib bizlə görüşməsi, diqqət göstərməsi oldu”.

Gəncədəki Azərbaycan Dövlət Aqrar Universitetinin yataqxanasında yaşayan birinci qrup əlil İsrafil Qurbanovun da məktubunu həyəcansız oxumaq olmur: “... Hərdən bu dünyada özümü artıq adam hiss edirdim. Amma birdən-birə adi bir gəliş, xoş söz, diqqət, qayğı həyata baxışlarımı dəyişdirdi”.

Yeri gəlmişkən qeyd edək ki, universitetin 2,3,4, və 5 nömrəli yataqxanalarında köçkünlərin müraciəti əsasında elektrik naqilləri dəyişdirilmişdir.

... Deyirlər, Kəlbəcərə gedən yolları ot-alaq basıb. Amma çox keçməyəcək on altı il qabaq bir yaz axşamı bu yollara, dağlara, dərələrə səpələnən kəlbəcərlilər yenidən həmin yerlərə ayaq basacaq. Bu dəfə ah-nalə ilə deyil, toy-bayramla, çal-çağırla. Vidadi müəllim deyir ki, o gün uzaqda deyil, çünki bizim Azərbaycan kimi qüdrətli dövlətimiz, İlham Əliyev kimi müdrik rəhbərimiz var.

Hamlet QASIMOV

Xalq qəzeti.- 2009.- 21 aprel.- S. 4.