Masallı: yeni Dövlət Proqramı sürətli sosial-iqtisadi inkişafa tam təminat verir

Azərbaycan Respublikasının Prezidenti İlham Əliyevin 14 aprel 2009-cu il tarixli fərmanı ilə təsdiqlənmiş “Azərbaycan Respublikası regionlarının 2009-2013-cü illərdə sosial-iqştisadi inkişafı Dövlət Proqramı” ölkənin hər yerində olduğu kimi, Masallı rayonunda da böyük ruh yüksəkliyi ilə qarşılanıb. Mətbuatda dərc edilmiş Dövlət Proqramının prioritet istiqamətləri, məqsəd və vəzifələri, həmçinin ayrı-ayrı iqtisadi rayonlar üzrə nəzərdə tutulan tədbirlərin mahiyyəti rayon mərkəzində, qəsəbə və kəndlərdə, kollektivlərdə ətraflı müzakirə olunur. Hər kəs Azərbaycan dövlətinin sosialyönümlü siyasətini ürəkdən bəyəndiyini, regionların mövcud potensialından daha səmərəli istifadə etməklə inkişafın sürətləndirilməsi məramını alqışlayır.

Qəzənfər AĞAYEV, Masallı Rayon İcra Hakimiyyətinin başçısı:

— Regionların inkişafına prioritet verilməsi dövlətimizin başçısının yeritdiyi daxili siyasətin uğurlu istiqamətlərindən biridir. Prezident İlham Əliyev 2004—2008-ci illəri əhatə edən 1-ci Dövlət Proqramının icrasını şəxsi nəzarətində saxlamış, bu məqsədlə vaxtaşırı bölgələrə səfərlərə çıxmışdır. Dövlət başçısı beş ildə təkcə bizim rayona 4 dəfə gəlmiş, işlərin vəziyyəti ilə tanış olmuş, tövsiyələr vermişdir. Bu isə yerlərdə məsuliyyət hissinin, eləcə də uğurların artmasına səbəb olmuşdur. Ötən beş ildə sosial-iqtisadi inkişaf sahəsində qazanılan mühüm nailiyyətlər bunu təsdiq edir. Baxın, beş ildə Azərbaycanda 27,5 mindən çox yeni müəssisə yaradılıb, 766 min iş yeri açılıb. Qeyri-neft sektoru dinamik inkişaf edib, ölkədə yoxsulluq səviyyəsi 13,2 faizədək azalıb. Dünyanın heç bir ölkəsi bu dövrdə Azərbaycan kimi sürətli inkişaf yolu keçməyib. Fərəhlidir ki, ötən il açıqlanan mötəbər beynəlxalq hesabata görə, Azərbaycan biznes mühitinin təkmilləşdirilməsi sahəsində dünya üzrə Ən İslahatçı Ölkə elan edilib.

Ötən beş il Lənkəran iqtisadi rayonuna daxil olan Masallıda da əsl dönüş və tərəqqi dövrü kimi səciyyələnib. Rayonumuzda buraxılan ümumi məhsul istehsalı 2003-cü illə müqayisədə 2,5 dəfə artaraq 235 milyon manata çatıb. Yeni yaradılan iş yerlərinin sayı 14 mini keçib. Təkcə ötən il rayonda sənaye yönümlü 18 yeni müəssisə açılıb, 19 mövcud müəssisənin istehsal həcmi genişlənib. Dövlət Proqramından öncə təkcə Masallı şəhəri təbii qaz alırdısa, indi 30-dan artıq yaşayış məntəqəmiz mavi yanacaqla təmin olunur. Rayonda 24 saat elektrik enerjisinin verilişi üçün şərait yaradılıb. İnfrastruktur təminatı xeyli yaxşılaşıb. Rayon mərkəzinə 6 kilometrlik məsafədən gətirilən içməli su xətti 17 kilometrlik rayondaxili şəbəkələrə paylanıb, içməli su 61 bulaq vasitəsilə əhalinin istifadəsinə verilib. Abonentlərin 75 faizi elektron ATS-lərin xidmətindən istifadə edir. Beş ildə Masallıda 21 məktəb tikilib. Müasir Olimpiya İdman Kompleksi əsl memarlıq incisini xatırladır. Z.Əliyeva adına Göz Xəstəlikləri İnstitutunun Masallı filialı regional əhəmiyyət daşıyır. Aztəminatlı ailələr üçün artıq 3-cü yaşayış binası tikilir. Altı bankın rayonumuzda filial və şöbələri fəaliyyət göstərir. Şəhərimizdə 9 mərtəbəli gözəl binalar tikilir. Hər tərəf abadlaşdırılıb.

Bu ilin ilk üç ayında da Masallıda tikinti-quruculuq işləri eyni sürətlə davam etdirilib. Yeni sosial-məişət, xidmət obyektləri istifadəyə verilib. Əgər dünyanı bürüyən iqtisadi böhran Azərbaycanda da çətinlik yaratmış olsaydı, biz bu qədər genişmiqyaslı quruculuq tədbirlərini reallaşdıra bilməzdik. Özünüz baxın: fevral ayında Yeyənkənd kəndində 480 yerlik yeni məktəb binası, Ərkivan qəsəbəsində Sağlamlıq mərkəzi, sonra “Bank Respublika”nın filialı üçün bina, 30-dan artıq fərdi yaşayış evi, mebel satışı mərkəzləri, xidmət və ticarət obyektləri tikilərək istifadəyə verilib. Tüklə kəndi istiqamətində 2,2 kilometr asfalt yol salınıb. İlin əvvəlindən 422 yeni iş yeri yaradılıb.

Yeni inkişaf proqramına nəzər salaq. Burada bizim Masallı rayonuna dair 16 bənddən ibarət tədbirlərin həyata keçirilməsi nəzərdə tutulub. Bunlar əsasən tikinti materialları və ağac emalının genişləndirilməsi, aqrar sahənin — heyvandarlıq, taxılçılıq və tərəvəzçiliyin dəstəklənməsi, yolların çəkilişi və əsaslı təmiri, elektrik enerjisi, istilik və qaz təchizatının yaxşılaşdırılması, Masallı şəhərinin su və kanalizasiya sisteminin yenidən qurulması, sosial müdafiənin gücləndirilməsi, təhsilin və səhiyyənin daha da inkişaf etdirilməsi ilə əlaqədardır. Proqramda tikinti-quruculuq işlərinə də geniş yer ayrılıb. Göründüyü kimi, dövlətin regionların, o cümlədən də Masallının inkişafına diqqəti və qayğısı qarşıdakı beş ildə daha artıq olacaq. Biz nəzərdə tutulan mühüm vəzifələrin layiqincə yerinə yetirilməsinə nail olmaqdan ötrü gecəli-gündüzlü çalışmaq əzmindəyik.

Masallıda məktəb tikintisi ilbəil genişlənir. RİH memarlıq və tikinti şöbəsinin müdiri Cəmil Məmmədovun bu barədə dedikləri:

— Dövlətimizin prioritet verdiyi sahələrdən biri və bəlkə də birincisi təhsil müəssisələrinin tikintisidir. 2004-2008-ci illərdə regional inkişaf Dövlət Proqramı üzrə ölkəmizdə 636 yeni məktəb inşa edilib, 192 məktəb əsaslı təmir olunub, 243 əlavə sinif otağı tikilərək istifadəyə verilib. Təkcə Heydər Əliyev Fondunun təşəbbüsü ilə ötən müddətdə 238 məktəbin tikintisi, 39 məktəbinsə əsaslı təmiri reallaşdırılıb. Bu baxımdan Masallı da istisna təşkil etməyib. Qeyd olunduğu kimi, beş ildə rayonumuzda 21 yeni məktəb tikilib, 5 məktəb əsaslı təmir edilib. “Dəfinə” liseyi, Yeddioymaq, 1-ci Şıxlar, Təzə Alvadı, Xanalion, Rüdəkənar, Kalinovka məktəbləri ötən il müasir avadanlıqla tam təchiz edilmiş halda istifadəyə verilib. Dövlət Proqramının tərkib hissəsi kimi ötən il inşasına başlanmış Hişkədərə kənd orta məktəbində isə indi artıq son tamamlama işləri gedir. Banbaşı kənd orta məktəbinin tikintisi davam edir. Cari ilin yanvar ayından Sığdaş kənd orta məktəbinin də inşasına başlanıb.

Yeni Dövlət Proqramını diqqətlə oxumuşam. Demək olar ki, bütün iqtisadi rayonlar üzrə yenə də məktəb binalarının, habelə əlavə sinif otaqlarının inşası və mövcud təhsil ocaqlarının əsaslı təmiri nəzərdə tutulub. Bu, o deməkdir ki, dövlətimiz strateji sahə sayılan təhsil sisteminin inkişafına çox böyük önəm verir. Bu da təbiidir. Axı, millətin gələcəyi məhz təhsil sisteminin səviyyəsindən asılıdır. Qarşıdakı dövrdə bizim Masallıda da yeni-yeni məktəblərin inşa ediləcəyi şübhəsizdir.

Yeni Dövlət Proqramında ölkədə sosial siyasətin başlıca məqsədi kimi əhalinin, o cümlədən regionlarda yaşayan vətəndaşların həyat şəraitinin daha da yaxşılaşdırılması nəzərdə tutulur. Masallı rayon Əhalinin Sosial Müdafiə Mərkəzinin direktoru Azər Abdullayev bununla bağlı ürək sözlərini bizimlə bölüşdü:

— Dövlət Proqramında əhalinin sosial müdafiəsinin daha da gücləndirilməsi əsas vəzifə kimi qarşıya belə qoyulub: “Əhalinin sosial müdafiəsi sahəsində aparılan tədbirlərin əsas istiqamətlərindən biri aztəminatlı əhali qrupları üzrə sosial müavinətlərin artırılması, sosial müdafiəyə ehtiyacı olan şəxslərin sosial vəziyyətinin, həyat şəraitinin yaxşılaşdırılması və ümumilikdə ölkədə yoxsulluq səviyyəsinin azaldılmasından ibarət olacaqdır. Vətəndaşların sosial müdafiəsinin və layiqli həyat səviyyəsinin təmin olunması məqsədilə pensiya təminatı sistemini təkmilləşdirmək və onun səmərəliliyini artırmaq sahəsində tədbirlərin davam etdirilməsi nəzərdə tutulur”. Bu məqsədlə aztəminatlı ailələrə ünvanlı sosial yardımın göstərilməsi üçün müvafiq tədbirlər davam etdiriləcək, Qarabağ əlilləri və şəhid ailələrinin mənzil şəraiti yaxşılaşdırılacaq, uşaq və ailə mərkəzləri, o cümlədən xüsusi istirahət mərkəzləri və ixtisaslaşmış xidmət müəssisələri yaradılacaq.

Fərəhli haldır ki, Masallı rayonu üzrə nəzərdə tutulan konkret tədbirlərdən biri burada yetkinlik yaşına çatmayan kimsəsiz uşaqlar üçün ixtisaslaşdırılmış müəssisələrin yaradılması ilə bağlıdır. Bu, əhalinin qayğıya daha çox ehtiyac duyan, cəmiyyətdən himayə uman təbəqəsinə, valideynlərini itirmiş məsum uşaqlara dövlətimizin böyük qayğısının daha bir parlaq təzahürü olacaqdır.

Yeni Dövlət Proqramında əhalinin sağlamlığının daha etibarlı qorunması, səhiyyənin inkişafı məqsədilə bir sıra konkret vəzifələr də öz əksini tapıb. Masallı Rayon Mərkəzi Xəstəxanasının baş həkimi Cəlil Nəzərov:

— Dövlət Proqramını rayonumuzun çoxsaylı tibb işçiləri diqqətlə oxuyublar. Səhiyyənin inkişafına göstərilən qayğıdan çox razıyıq. İnkişaf və tərəqqi ilə bağlı bu möhtəşəm dövlət sənədində 2009-2013-cü illərdə regionlarda həyata keçiriləcək tədbirlərin əhalinin sağlamlığına, tibbi xidmətlərin keyfiyyətinin yüksəldilməsinə, Azərbaycanda yüksək standartlara cavab verən səhiyyənin qurulmasına təminat verəcəyi qeyd olunub. Məqsədə nail olmaq üçün səhiyyə sahəsində dövlət siyasətinin əsas istiqamətləri də Proqramda aydın əksini tapıb. Bunlar pulsuz xidmətin genişləndirilməsi, aztəminatlı əhali təbəqəsinin müayinə və müalicəsi ilə bağlı tədbirlər sisteminin hazırlanıb həyata keçirilməsi, tibbi profilaktikanın yüksəldilməsi, ana və uşaqların mühafizəsi və qidalanmasının yaxşılaşdırılması, tibbi kadr hazırlığının təkmilləşdirilməsi, səhiyyə müəssisələrinin dərman və avadanlıq təminatı, maddi-texniki təchizat və yeni səhiyyə müəssisələrinin inşasından ibarətdir.

Masallı rayonunda səhiyyə dinamik inkişaf edən sahələrdəndir. Ötən illərdə burada regional təcili yardım stansiyası təşkil edilib. Rayonlararası Ağ Ciyər Xəstəlikləri Dispanseri əsaslı təmir olunaraq müasir avadanlıqla təchiz edilib. Ötən ilin payızında Prezident İlham Əliyevin Masallıya səfəri zamanı region üçün əhəmiyyətli və bölgələrdə ilk dəfə olaraq məhz bizim rayonda yaradılan Zərifə Əliyeva adına Göz Xəstəlikləri İnstitutunun filialı açılıb. Mərkəzi rayon xəstəxanasının şöbələrində əsaslı təmir işləri davam etdirilib, təchizat xeyli yaxşılaşıb. Ötən il Köhnə Alvadı, Hüseynhacılı, Köçəkli, Banbaşı kəndlərində feldşer-mama məntəqələri tikilib. Ərkivan Sağlamlıq mərkəzi də artıq əhalinin xidmətindədir. Rayonumuzun ağxalatlıları bir ildə əməkhaqlarının 37,9 faiz artmasından razıdırlar. Dövlət Proqramına əsasən, Səhiyyə Nazirliyi konkret olaraq gələn ildən Masallının səhiyyə müəssisələrinin təmiri, ən müasir zəruri avadanlıqlarla təchiz edilməsi və yenilərinin tikintisi üzrə genişəhatəli işləri həyata keçirəcək. Bununla da əhalinin sağlamlığının daha etibarlı qorunması təmin ediləcək.

İldırım ALLAHYAROV, sahibkar:

Mən İstisu “Fatimeyi-Zəhra” Şəfa Sanatoriyasına rəhbərlik edirəm. Yeni Dövlət Proqramında turizmin inkişafı istiqamətlərinə xüsusi yer ayrılıb. Rayonumuzda ötən beş ildə bu yönümdə az iş görülməyib. Elə bizim sanatoriya da xeyli abadlaşıb, böyüyüb, xidmət dairəsi genişlənib. Ötən mövsüm gündəlik 160 nəfərə xidmət edə bilmişik. Müxtəlif regionlardan, hətta xaricdən də buraya müalicəyə və istirahətə gələnlər olub.

Masallıda sahibkarlığa hərtərəfli dəstək göstərilir. İstehsal və xidmətlərin həcmində özəl bölmənin payı 98 faizə çatıb. Qəzənfər müəllim qayğı və problemlərimizin həllinə hər zaman həssaslıqla yanaşır, əlindən gələn köməkliyi əsirgəmir. Biz bundan ruhlanırıq, Vətənə daha çox xeyir verməyə çalışırıq. Qarşıdakı yay istirahət mövsümü ilə əlaqədar bir çox yeniliklərimiz var.

Ötən beş ildə Masallıda 36 turizm-istirahət mərkəzi fəaliyyətə başlayıb, bunun da yarıya qədəri artıq müvafiq lisenziya ilə xidmət göstərir. Rayonda gündəlik turist qəbulu ən azı 1100 nəfəri əhatə edir. 2009-2013-cü illərdə sosial-iqtisadi inkişafa dair Dövlət Proqramında göstərilir: “Turizmi iqtisadiyyatın yüksək gəlirli sahəsinə çevirmək, sosial və ekoloji tələblərə cavab verəcək səmərəli və rəqabətqabiliyyətli müasir turizm kompleksləri yaratmaq və bu sahədə yeni iş yerlərinin açılmasını təmin etmək qeyri-neft sektorunun inkişafı istiqamətində qarşıda duran mühüm vəzifələrdəndir”. Dövlət Proqramında həmçinin turizmin başlıca inkişaf istiqamətləri də göstərilib. Bu, qarşıdakı beş ildə sahibkarlıq fəaliyyətimizin əsas özəyini təşkil edəcək və daha sürətli inkişafa təkan verəcək. Dövlət başçısının xüsusi fərmanla təsdiqlədiyi proqramın bütün müddəalarını bəyənir və yüksək qiymətləndiririk.

Yeni Dövlət Proqramında Masallı rayonunun mədəniyyət müəssisələrinin təmiri və tikintisi, tarix-mədəniyyət abidələrinin bərpası və konservasiyası da nəzərdə tutulub. Bu tədbirlər 2010-2013-cü illərdə reallaşdırılacaq. Rayon mədəniyyət şöbəsinin müdiri, əməkdar mədəniyyət işçisi Lətifə Mövsümovanın fikirləri maraq doğurur:

— Həyatımız inkişaf etdikcə, güzəranımız yaxşılaşdıqca ölkəmizdə mədəniyyət sahəsinin inkişafı da labüdləşir. Artıq bölgələrdə, ən ucqar kəndlərdə belə klub və kitabxanaların təmir edilməsi, maddi-texniki bazanın möhkəmləndirilməsi adi hal alıb. Dövlətimiz qüdrətləndikcə mədəni-maarif müəssisələri də yenidən qurulur, müasir səviyyəyə çatdırılır. Hətta ayrı-ayrı vətəndaşlar da öz qəlblərinin hökmü ilə bu işə töhfələr verməkdən məmnunluq duyurlar.

Təsəvvür edin ki, Masallının ucqar kəndlərinin birində kimsə xeyriyyəçilik məqsədilə kitabxana və klubu təmir etdirməyi öz öhdəsinə götürür. Bu, təkcə maddi imkanın artması deyil, həm də vətənpərvər təşəbbüskarlığın, mədəni səviyyənin yüksəlməsi amilidir.

Son illərdə Masallıda yeni muzeylər, istirahət parkları yaradııb. Vaxtaşırı paytaxtın peşəkar musiqi kollektivləri, teatrların yaradıcı heyətləri rayonumuza qastrol səfərlərinə gəlir və böyük məhəbbətlə, istəklə qarşılanırlar. Camaat yaxşı çalışdığı, maddi tələbatını yetərincə ödədiyi kimi, yaxşı da dincəlmək, istirahət etmək istəyir. Bundan ötrü isə indi artıq hər cür şərait var. Şəhər mədəniyyətinin başlıca elementlərinin rayonlara, ucqar əyalət mərkəzlərinə də nüfuz etməsi fərəh doğurmaya bilməz. Dövlət Proqramında bu barədə mühüm müddəalar var. Bu möhtəşəm inkişaf və tərəqqi sənədində göstərilir ki, mədəniyyət sahəsində dövlət siyasətinin strateji məqsədləri ölkənin mədəni potensialının, sərvətlərinin və ənənələrinin qorunub-saxlanmasından və inkişaf etdirilməsindən, yaradıcılıq və təhsil sisteminin təkmilləşdirilməsindən ibarətdir. Bu məqsədlə regionlararası mədəni əlaqələrin möhkəmləndirilməsi, mədəni irsin qorunmasının təmin edilməsi, o cümlədən daşınar mədəniyyət sərvətlərinin, muzey fondlarının sayının artırılması, muzey işi sahəsində sistemli islahatların aparılması, kitabxana fondlarında müasir kompleksləşdirmə mexanizminin yaradılması, kitabxanaların informasiya təminatı şəbəkəsinin yaradılması kimi məsələlər önə çəkilib.

İnanıram ki, yeni Dövlət Proqramının da uğurlu icrası bütövlükdə mədəni həyatımızı daha da mənalı, maraqlı, zəngin edəcək, milli-mənəvi dəyərlərimizə hər kəsdə tükənməz ehtiram hissi aşılayacaqdır.

Masallıda söhbət etdiyimiz adamların hamısı yeni Dövlət Proqramının əhəmiyyətini beləcə layiqincə dəyərləndirdi. Kənd təsərrüfatının inkişafı, yeni iş yerlərinin yaradılması, sosial təminat, daxili bazarın qorunması və burada sağlam rəqabət mühitinin formalaşdırılması, infrastruktur layihələrin tətbiqi kimi həyati əhəmiyyətli məsələlərdə dövlətin qarşıya qoyduğu vəzifələrin sözsüz həyata keçiriləcəyinə möhkəm əminlik ifadə olundu. Obrazlı şəkildə desək, yeni Dövlət Proqramının daha aydın sabahlara, daha xoşbəxt gələcəyə aparan yolda mayak kimi parlayacağına əhali arasında güclü inam var.

Əli NƏCƏFXANLI

Xalq qəzeti.- 2009.- 18 aprel.- S. 6.