Azərbaycan Uşaq Fondu “Uşaq ili” ilə bağlı tədbirlərini açıqladı

 

Dünən Azərbaycan Uşaq Fondu 2009-cu ilin Prezident İlham Əliyev tərəfindən “Uşaq ili” elan edilməsi ilə bağlı fondun yerli şöbələrinin iştirakı ilə geniş yığıncaq keçirdi. Yığıncaqda fondun 2008-ci ildəki fəaliyyətinə də yekun vuruldu. Tədbirdə Nazirlər Kabinetinin, Ailə, Qadın və Uşaq Problemləri üzrə Dövlət Komitəsinin, Bakı Şəhər İcra Hakimiyyətinin və qeyri-hökumət təşkilatlarının nümayəndələri iştirak edirdilər.

Azərbaycan Respublikası Uşaq Fondunun sədri, akademik İsmayıl İbrahimov bildirdi ki, fond 1988-ci il aprelin 14-də yaradılıb. 1991-ci ildə Azərbaycan dövlət müstəqilliyini bərpa etdikdən sonra isə müstəqil şəkildə fəaliyyətini davam etdirib. İsmayıl İbrahimovun sözlərinə görə, Azərbaycanda Uşaq Fondunun yaradılması ideyasının gerçəkləşməsində ümummilli liderimiz Heydər Əliyevin böyük xidmətləri olub. Bu ideya meydana gələndə görkəmli dövlət və siyasi xadim Heydər Əliyev SSRİ Nazirlər Soveti sədrinin birinci müavini vəzifəsində çalışıb və SSRİ hökumətinin Azərbaycan Uşaq Fondunun yaradılmasına hərtərəfli dəstək verməsini təmin edib. Fond sədri bunu Heydər Əliyevin uşaqlara qarşı həmişə qayğıkeş və diqqətli olması ilə əlaqələndirdi.

Sədrin sözlərinə görə, ölkəmizdə Heydər Əliyevin siyasi kursunu uğurla davam etdirən Azərbaycan Prezidenti İlham Əliyev də ulu öndər tərəfindən qoyulmuş ənənələri yorulmadan davam etdirir. Məhz bunun nəticəsidir ki, Azərbaycan Uşaq Fondu son dövr tariximizin heç bir mərhələsində diqqətdən kənarda qalmayıb, inkişafını davam etdirib. Bu gün isə fond uşaqların daimi xeyirxahı, qayğıkeşi kimi fəaliyyətdədir. Hər il ölkəmizin paytaxtı Bakıda və rayonlarda uşaqların sağlamlığı və təlim-tərbiyəsinin yüksək səviyyədə təşkili üçün müxtəlif maraqlı layihələr həyata keçirir.

İsmayıl İbrahimovun fikrincə, Prezident İlham Əliyevin 2009-cu ilin “Uşaq ili” elan olunması ilə bağlı sərəncamı dövlət başçısının uşaqlara qayğı və diqqətinin bariz nümunəsi, Heydər Əliyev ənənələrinin layiqincə davam etdirilməsidir. Sərəncamdan irəli gələn vəzifələrin həlli üçünsə fond bütün rayon şöbələrinə öz ərazilərində keçiriləcək tədbirlərin hazırlanması ilə bağlı göstəriş verib. Artıq bu cür tədbirlər planı bütün rayon şöbələri tərəfindən hazırlanaraq fonda təqdim edilib. Bunların əsasında isə Uşaq Fondu ümumi tədbirlər planı hazırlayıb.

Fond sədri 2008-ci ildəki fəaliyyətlə bağlı hesabat məruzəsində bildirdi ki, keçən il aprelin 14-də fondun yaranmasının 20 illik yubileyi təntənə ilə qeyd olunub. Bu il isə təşkilatın 21 yaşı tamam olub. 20 illik yubiley ümummilli lider Heydər Əliyevin 85 illik yubileyi ilə eyni vaxta təsadüf edib və keçirilən tədbirlərdə uşaqların böyük qayğıkeşi olan ulu öndərin geniş və çoxşaxəli ictimai-siyasi fəaliyyəti haqqında da ictimaiyyətə ətraflı məlumatlar çatdırılıb

İsmayıl İbrahimovun sözlərinə görə, öz fəaliyyətində BMT-nin “Uşaq hüquqları haqqında” Konvensiyasını rəhbər tutan fond 2008-ci ildə uşaqların təlim-tərbiyəsi, sağlamlıqlarının qorunması, eləcə də xəstə, əlil və valideyn himayəsindən məhrum olmuş uşaqların müdafiəsi üçün çoxlu sayda faydalı işlər görüb. Konvensiya keçən il fond tərəfindən Azərbaycan dilinə tərcümə olunub, yüksək tirajla çap etdirilərək yerli şöbələrə göndərilib. Eyni zamanda, 2008-ci ildə Uşaq Fondu Azərbaycanda uşaq hüquqları haqqında qanun hazırlayaraq parlamentə təqdim edib və qanun qəbul edilib. Fond valideyn himayəsindən mərhum olan uşaqların müdafiəsi haqqında qanunun hazırlanmasında və qəbulunda da yaxından iştirak edib. Hazırda təşkilatın mərkəzi idarəsi və yerli şöbələri öz fəaliyyətində BMT-nin məlum konvensiyasından əlavə, bu qanunlara əsaslanır. Fond sədri əlavə etdi ki, 1988-ci ildə Ermənistanın Azərbaycana qarşı ərazi iddiaları ilə bağlı başlanmış və sonrakı illərdə böyük müharibəyə çevrilmiş münaqişə Azərbaycan uşaqlarından da yan keçməyib, onlara böyük mənəvi və fiziki ağrılar gətirib. Minlərlə uşaq müharibədə valideynlərini itirib. Onlara mənəvi və maddi dayaq durmaq da fondun başlıca qayğılarından biridir.

Sədrin sözlərinə görə, 2008-ci ildə Uşaq Fondu bu və digər xeyriyyəçilik tədbirləri üçün böyük məbləğdə vəsait xərcləyib. 7710 yetim uşağın müdafiəsi üçün 121755 manat, 14373 uşağın təlim-tərbiyəsi məqsədiləri üçün 144300 manat, 581 uşağın sağlamlığının bərpası üçün 13525 manat maddi vəsaitdən istifadə olunub. Ümumilikdə 2008-ci ildə fondun xeyriyyə xərcləri 2007-ci ildəkindən 100 min manat çox olub. Eyni zamanda, 1 iyun - Uşaqların Beynəlxalq Müdafiəsi Günü, tarixi günlər, Yeni il, Novruz bayramı və digər bayramlarda geniş tədbirlər keçirilib, uşaq sağlamlıq mərkəzləri, uşaq evləri ilə sıx əməkdaşlıq edilib.

Sədr fondun yerli şöbələrinin dəstəklənməsi xahişi ilə yerli icra hakimiyyəti orqanlarına müraciət etdiyini və artıq bir çoxlarından müsbət cavab aldığını bildirdi. Bu isə rayonlarda fəaliyyət göstərən 64 yerli şöbənin işinə gələcəkdə müsbət təsir göstərə bilər.

Uşaq Fondu sədrinin birinci müavini Flora Səlimova “Uşaq ili” ilə bağlı fondun tədbirlər planı haqqında məlumat verərək bildirdi ki, bu tədbirlər 20 bənddən ibarətdir. Planda əsasən, BMT-nin “Uşaq hüquqları haqqında” Konvensiyası və Azərbaycanın bu sahədəki qanunları ilə bağlı maarifləndirmə işlərinin aparılması, uşaqların yaradıcılığının, biliklərinin və intellektual səviyyəsinin artırılması, milli-mənəvi və ailə dəyərlərinin qorunub saxlanılması məqsədilə məktəblərdə maarifləndirmə işlərinin aparılması, istedadlı uşaqların aşkara çıxarılması, bu məqsədlə intellektual, idman və digər yarışların, müsabiqələrin, fənn olimpiadalarının, viktorinaların təşkili, uşaqlar arasında vətənpərvərlik tərbiyəsinin gücləndirilməsi üçün xüsusi tədbirlərin təşkili, eləcə də sağlamlıq və asudə vaxtın təşkili ilə bağlı geniş tədbirlər nəzərdə tutulub. Tədbirlər sırasında Azərbaycanın rayonlarındakı aztəminatlı, məcburi köçkün ailələrdən olan, valideyn himayəsindən məhrum olmuş və xüsusi qayğıya ehtiyac duyan uşaqlara maddi və mənəvi yardımlar göstərilməsi və s. də yer alıb. Tədbirdə fond sədrinin birinci müavini Aqil Məhərrəmov rayon şöbələrinin 2008-ci il üzrə fəaliyyətini qiymətləndirdi, fərqlənən və fəal şöbələrin adlarını çəkdi. Onun sözlərinə görə, Bakının Nəsimi rayon şöbəsi (sədri Almaz Zeynalova), Ağcabədi rayon şöbəsi və digərləri fondun fəaliyyətinin daha yaxşı təşkilində müsbət rol oynayırlar.

 

 

Paşa ƏMİRCANOV

 

Xalq qəzeti.- 2009.- 18 aprel.- S. 7.