İçərişəhər dünya mədəniyyəti irsinin nadir incisidir

Məlum olduğu kimi, hər il aprelin 18-i bütün dünyada Beynəlxalq abidələr və tarixi yerlər günü kimi qeyd olunur. Bu münasibətlə dünən Muğam Teatrında “İçərişəhər” Dövlət Tarix-Memarlıq Qoruğu İdarəsi tərəfindən “İçərişəhər — dünya mədəniyyəti irsinin nadir incisi” mövzusunda dəyirmi masa təşkil olunmuşdu.

Tədbiri giriş sözü ilə “İçərişəhər” Dövlət Tarix-Memarlıq Qoruğu İdarəsinin rəisi Mikayıl Cabbarov açaraq qeyd etdi ki, İçərişəhər tariximizin əvəzsiz yaddaşı, milli mədəniyyətimizin ensiklopediyasıdır. Bu abidənin gələcək nəsillər üçün qorunub saxlanılmasının vacibliyini qeyd edən Mikayıl Cabbarov öz çıxışında ulu öndər Heydər Əliyevin, dövlət başçısı Prezident İlham Əliyevin daim diqqət və böyük qayğısı nəticəsində İçərişəhərə ən yüksək səviyyədə dövlət qoruğu statusunun verildiyini, abidələrin əsaslı restavrasiyasına başlanıldığını bildirdi. O, İçərişəhərin mühafizəsi istiqamətində bundan sonra da bir sıra addımların atılacağını bildirdi.
Daha sonra çıxış edən AMEA-nın müxbir üzvü, tarix elmləri doktoru Məşədixanım Nemət, professor Əli Rəcəbli, sənətşünaslıq doktoru Kübra Əliyeva və başqaları Heydər Əliyev Fondunun prezidenti, YUNESKO-nun və İSESKO- nun xoşməramlı səfiri Mehriban xanım Əliyevanın “Ümumdünya İrs Siyahısı”nda olan İçərişəhərin zəngin maddi-mədəniyyət nümunələrinin üzə çıxarılmasında və bütün dünyada tanıtdırılmasında böyük rol oynadığını qeyd etdilər.

Dəyirmi masada 2009-cu ildə Bakı şəhərinin İslam mədəniyyətinin paytaxtı elan edilməsi ilə əlaqədar çəkilmiş və İçərişəhərə həsr olunmuş “Əsrlərin daş kitabəsi” adlı televiziya filminin ilk nümayişi oldu. İçərişəhərin zəngin mədəni irsini tədqiq etmiş tədqiqatçı alimlər onun memarlıq və şəhərsalma tarixindən, daş yazılarından qədim İslam mədəniyyətinin daşıyıcılarından, xalçaçılıq məktəbinin xüsusiyyətlərindən geniş söz açdılar.

Mahmud QƏZƏNFƏROĞLU

Xalq qəzeti.- 2009.- 18 aprel.- S. 7.