Taxtakörpü qəsəbəsi abadlaşır, gözəlləşir

Taxtakörpü qəsəbəsi son vaxtlar öz simasını əsaslı surətdə dəyişib. Burada çoxlu ictimai və yaşayış binaları tikilmiş, park və xiyabanlar, abad küçələr, səkilər salınmış, müasir işıqlandırma sistemi quraşdırılmış, yaşıllıq zolaqları artırılmışdır.

Əvvəllər Laçın rayonunun idarə, müəssisə və təşkilatları müxtəlif ərazilərdə fəaliyyət göstərirdi. Bu isə, əlbəttə, işin təşkilini çətinləşdirir, sakinlərin haqlı narazılığına, əlavə vaxt itkisinə səbəb olurdu. İndi isə vəziyyət tamam dəyişib. Belə ki, artıq idarə və müəssisələrin, demək olar ki, hamısı Taxtakörpü qəsəbəsində fəaliyyət göstərir.

Rayon icra hakimiyyətinin inzibati binası öz arxitektura görkəmi ilə diqqəti cəlb edir. Son vaxtlar binanın ətrafı xeyli abadlaşdırılmış, qarşıdakı meydanda Dövlət bayrağı ucaldılmış, 2 hektar sahədə Heydər parkı salınmışdır.

Yeri gəlmişkən, son vaxtlar tikilib istifadəyə verilmiş binalardan bəzilərinin adlarını sadalamaq istəyirik: Yeni Azərbaycan Partiyası Laçın rayon təşkilatı, 121 saylı Laçın seçki dairəsi, rayon rabitə qovşağı, rayon mədəniyyət evi, suvarma sistemləri idarəsi, “Kapital Bank”ın Laçın rayon filialı, rayon mərkəzi xəstəxanası üçün müasir üslubda yeni binalar tikilmişdir.

Bundan başqa, Bərdə, Ağcabədi və Saatlı rayonlarında çadır düşərgələrində məskunlaşmış məcburi köçkünlər üçün 37 və 21 evdən ibarət 2 qəsəbə də laçınlıların istifadəsinə verilmişdir.

Hazırda Taxtakörpü qəsəbəsində əhalinin sosial müdafiəsi və məşğulluq mərkəzləri, Dövlət Sosial Müdafiə Fondunun Laçın rayon şöbəsi üçün inzibati binaların tikintisi davam etdirilir.

Yeri gəlmişkən, onu da əlavə edək ki, son vaxtlar təkcə Taxtakörpü qəsəbəsində deyil, ümumiyyətlə, bu ərazidə məskunlaşmış obaların hamısında tikinti-abadlıq və quruculuq işləri sürətləndirilmiş, yeni yollar çəkilmiş, infrastruktur yaxşılaşdırılmışdır.

Məsələn, Azərbaycan Respublikası Nazirlər Kabinetinin, Dövlətqaçqınkomun yaxından köməyi və Məcburi Köçkünlərin Sosial İnkişaf Fondu ilə aparılmış məqsədyönlü iş nəticəsində Taxtakörpü ərazisindəki Qarıqışlaq obasına 5,1 kilometr, Şeylanlı-Katos obasına 5,4 kilometr, Ağcakənd obasına 5,1 kilometr, Hacılar-2 obasına 2,7 kilometr uzunluğunda çınqıl örtüklü avtomobil yolları çəkilmişdir. Daxili imkanlar hesabına Qarakeçdi, Vağazin, Alxaslı obalarında yollara çınqıl tökülmüşdür.

Təsərrüfatların suya olan təminatının yaxşılaşdırılması məqsədilə Taxtakörpü ərazisindəki Fingə, Vağazin, Qarıqışlaq obalarında elektrik nasosları və transformatorlar quraşdırılmış, 1600 metr elektrik hava xətti çəkilmişdir. İçməli su şəbəkəsində yararsız vəziyyətə düşmüş 21 kilometr uzunluğunda su kəməri yenisi ilə əvəz olunmuş, 7 ədəd elektrik su nasosu əsaslı təmir edilmişdir.

Taxtakörpü ərazisindəki Hacılar, Ərdəşəvi, Alxaslı, Qarıqışlaq və Malıbəy obalarında 4 nömrə tutumlu peyk rabitəli telefon stansiyası quraşdırılmış, ərazidə mobil telefon rabitəsinin tutumunun yaxşılaşdırılması məqsədilə Sadınlar obasında “Azərsell”in şəbəkə dairəsi genişləndirilmişdir. Taxtakörpü qəsəbəsindəki 256 nömrə tutumlu elektron tipli Avtomat Telefon Stansiyasının əhatə dairəsinin genişləndirilməsi istiqamətində işlər aparılmış, qəsəbədəki 110 yaşayış evinə telefon çəkilmişdir.

Hazırda rayonda əhali və fermer təsərrüfatlarında 27187 baş qaramal, 192862 baş qoyun-keçi vardır ki, bu da ötən ilin müvafiq dövrü ilə müqayisədə xeyli çoxdur. 2947 hektar taxıl sahəsindən ötən il 9127 ton məhsul əldə olunmuşdur. Bu isə 2007-ci ildə əldə olunmuş nəticə ilə müqayisədə 2 dəfə çoxdur.

Sonda onu da əlavə edək ki, laçınlılar Taxtakörpü qəsəbəsində, eləcə də bu ərazidəki obalarda nə qədər rahat və firavan yaşasalar da, qurub-yaratsalar da ən böyük arzuları doğma yurd yerlərinə, müqəddəs torpaqlara qayıtmaqdır. Onlar möhkəm inanır və ümid edirlər ki, ölkə Prezidenti İlham Əliyevin müdrik və qətiyyətli xarici siyasət xətti, diplomatik səyləri nəticəsində doğma torpaqları yağı düşməndən azad ediləcəkdir.

Ziyəddin SULTANOV

Xalq qəzeti.- 2009.- 22 aprel.- S. 4.