Azərbaycanda turizm inkişaf etməkdədir

Bu yaxınlarda Azərbaycanda VIII Beynəlxalq “Turizm və Səyahətlər” Sərgisi müvəffəqiyyətlə keçdi. Bu beynəlxalq sərgi bir daha təsdiq etdi ki, ölkəmizin turizm imkanları genişdir və xarici ölkələrin nüfuzlu turizm şirkətləri Azərbaycana böyük maraq göstərirlər. Son illər, doğrudan da, ölkəmizdə turizmin inkişafına xüsusi diqqət yetirilir və yeni infrastrukturlar yaradılır. Bu sahədə ətraflı məlumat əldə etmək üçün “Bakı Tur” Azərbaycan Turizm Agentliyinin və “Xəzər” Turist Bazasının direktoru Faiz Məmmədova müraciət etdik.

— Faiz müəllim, bir mütəxəssis kimi Azərbaycanda turizmin vəziyyətini necə qiymətləndirirsiniz?

— Bu yaxınlarda turizm işçiləri arasında belə bir müzakirə getdi ki, turizm nə deməkdi? Bu çox geniş məfhumdur. Biz qərara aldıq ki, bunu yalnız xidmət sahəsi kimi başa düşməməliyik. Turizm həm də böyük bir təsərrüfatdır. Turizmdə otellər, nəqliyyat, bələdiyyələr, mebel sənayesi, kənd təsərrüfatı, toxuculuq sənayesi var və s. Ümumiyyətlə, bu böyük bir şəbəkədir. İndi elə ölkələr var ki, onların əsas gəlirləri məhz elə turizmdəndir.

Bu gün Azərbaycanda da qeyri-neft sektorunda turizm öncül mövqedə durur. Ona görə də bu gün dövlətimiz tərəfindən Azərbaycanda turizmin inkişafına şərait yaradılır. Turizm haqqında qanunda dəyişiklik edilib, regionların sosial inkişaf proqramında turizm infrastrukturu yaradılmasına xüsusi əhəmiyyət verilib, turizm sahəsinə dair Dövlət Proqramı qəbul olunub. Bu ilin fevral ayında möhtərəm Prezidentimiz İlham Əliyevin imzaladığı kurortların inkişafı haqqında Dövlət Proqramında da Azərbaycanda turizmin inkişafına xüsusi önəm verilmişdir. Bu proqramın həyata keçirilməsinə artıq başlanılmışdır.

Azərbaycanda turizmlə bağlı sərgilər keçirilir. Bu sərgilərdə iştirak edən xarici ölkə nümayəndələri Bakını, ölkəmizin inkişafını görüb yenidən Azərbaycana qayıtmaq istəyirlər. 16-18 aprel tarixində keçirilən beynəlxalq turizm sərgisində iştirakçı dövlətlərin sayı bir daha göstərdi ki, Azərbaycanda turizm inkişaf yolundadır.

2008-ci ilin noyabr ayında Londonda keçirilən beynəlxalq turizm sərgisində mən də iştirak edirdim. Baxmayaraq ki, iqtisadi böhran təzəcə başlamışdı, bu nüfuzlu sərgiyə maraq xeyli azalmışdı. Ancaq Azərbaycanda keçirilən sərgidə iştirakçıların sayı 20 faiz artmışdı.

Sərgidə bir çox dövlətlərin nümayəndələri ilə görüşdük. Təsəvvür edin, İngiltərənin Mançester şəhərindən gələn qonaqlar deyirdilər ki, biz məmnuniyyətlə Azərbaycanda qalıb, burada yaşayardıq. 15 il bundan əvvəl yəqin ki, onlar bu sözləri deməzdilər. Amma bu gün Azərbaycan həqiqətən inkişaf etmiş bir ölkədir. Bu, biz turizm işçilərini çox sevindirir. Gürcülərin bir sözü var, deyirlər ki, Tibilisidən Bakıya baxanda Paris görünür. İngiltərədən olan nümayəndələr isə Yerevandan Bakıya gəlmişdilər. Biz onlara sual verdik ki, Yerevanla Bakını necə müqayisə edərdiniz? Dedilər ki, onlar arasında 20 dəfədən artıq fərq var. Bakı çox inkişaf edib.

— Biz müharibə şəraitində yaşayırıq. Adətən, belə yerlərə turistlər az gəlirlər. Amma bizdə əksinədir. Bunun səbəbini nə ilə izah edərdiniz?

— Məsələ ondadır ki, dünyada ölkələrin reytinqlərini müəyyənləşdirən təşkilatlar var. Bu müxtəlif sahələr üzrə müəyyənləşdirilir. Doğru deyirsiniz ki, müharibə şəraitində olan bir ölkəyə turistlər ehtiyatla yanaşırlar. Reytinq cədvəlində həmin ölkə münasib yerdə dayanmır. Buna baxmayaraq, Azərbaycanda elə sabit şərait yaranmışdır ki, turistlərin təhlükəsizliyi yüz faiz təmin olunub.

İkinci şərt odur ki, Azərbaycan özünü dünyaya tanıdıb. Ölkəmizin yeritdiyi xarici siyasət, dövlətimizin beynəlxalq konfranslarda iştirakı, təbliğat işinin genişlənməsi, Mədəniyyət və Turizm Nazirliyinin müxtəlif ölkələrdə keçirdiyi sərgilər Azərbaycana marağı xeyli artırmışdır. Mədəniyyət və Turizm Nazirliyinin səyi ilə ölkəmizdə İslam ölkələri mədəniyyət nazirlərinin konfransının keçirilməsi, Bakının İslam Mədəniyyətinin Paytaxtı elan olunması və s. bunlar Azərbaycanın beynəlxalq aləmdə tanınmasında əhəmiyyətli rol oynayır.

Göründüyü kimi, Azərbaycana maraq ildən-ilə artır və bu da turizmin inkişafına öz töhfəsini verir.

— Deyirsiniz ki, Azərbaycanda turizmin imkanları genişdir. Hansıları nəzərdə tutursunuz?

— Gəlin ötən 15 ili müqayisə edək. 15 il bundan öncə Azərbaycanda üç-dörd otel var idi, onlar da yararsız vəziyyətdə idilər. Yəni, turistlərin istirahəti üçün heç bir şərait yox idi. Bu gün isə Azərbaycanda son məlumata görə 370 otel fəaliyyət göstərir. Onun 50-si 2008-ci ildə istifadəyə verilib. Həm də onlar tək Bakıda deyil, regionlarda da yaradılmışdır.

Bundan başqa, turistləri qəbul etmək üçün nəqliyyat strukturu yaradılıb. Bu gün Azərbaycanda turistlərə yüksək komfortlu avtobuslar xidmət edir. 4 beynəlxalq standartlara cavab verən aeroport istifadəyə verilib.

Kadr məsələsində problemlər var. Əvvəlki illərlə müqayisədə onların sayı xeyli çoxalıb. Turizm İnstitutu yaradılıb ki, gələn il onun ilk buraxılışı olacaq. Orada beynəlxalq qrup var. Bu qrupda dərslər ingilis dilində keçirilir.

Biz xidmət sahəsini xeyli inkişaf etdirməliyik. Bütün xidmət sahələrində turistlərə münasibəti dəyişməliyik.

— Azərbaycanda turizmlə məşğul olan xeyli özəl şirkət fəaliyyət göstərir. Onlardan biri də sizin şirkətdir. Öz şirkətiniz barədə nə deyərdiniz?

— Mən iki şirkətə rəhbərlik edirəm. Onlar Azərbaycan Həmkarlar İttifaqları Konfederasiyasının “Bakı Tur” Azərbaycan Türizm Agentliyi və bir də “Xəzər” Turist Bazasıdır. “Bakı Tur” 17 ildir fəaliyyət göstərir. Biz bu vaxta kimi bir neçə ölkə ilə turizm əlaqələri yaratmışıq. Bu şirkət həm xarici ölkələrdən Azərbaycana və əksinə, Azərbaycandan xarici ölkələrə turist göndərməklə məşğuldur. Daxili turizm də bizim fəaliyyət sahəmizə aiddir. Həm də, bələdçi-tərcüməçi xidməti göstərir, turistləri nəqliyyat vasitələri ilə təmin edirik, eyni zamanda beynəlxalq konfransların, simpoziumların təşkili ilə məşğuluq.

Dünyanın 100-ə yaxın sanatoriyası ilə əlaqə yaratmışıq. Müalicə turlarına da turistləri göndərirdik.

“Bakı Tur”un Nabranda istirahət zonası var. 1996-cı ildən fəaliyyət göstərən bu istirahət zonası “Xəzər”in içərisindədir. “Xəzər” təmirə ehtiyacı olan bir istirahət zonasıdır. SSRİ dövründən yaranmış bu istirahət zonasında demək olar ki, çox şey yenidən qurulmalı idi. Biz burada xeyli iş görmüşük. 2009-cu ildə qarşıya məqsəd qoyulmuşdu ki, biz bu istirahət zonasını yeni tələblərə uyğun quraq.

Möhtərəm Prezidentimizin kurortların inkişafı ilə bağlı imzaladığı 10 illik dövrü əhatə edən Dövlət Proqramına uyğun olaraq “Xəzər”də yenidənqurma işləri aparmağa başladıq. Bir aydan sonra təmir işləri başa çatdırılacaq. Artıq “Xəzər” tanınmaz dərəcədə dəyişmişdir. Çox geniş giriş kompleksi yaratmışıq. İşçilərin şəraitini yaxşılaşdırmaq üçün yeni ofis inşa etmişik. Eyni zamanda maşınlar üçün xüsusi örtülü yerdə dayanacaq yaradılmışdır.

Burada Laçından olan qaçqınlar da məskunlaşmışdır. Qaçqınkomla əlaqə yaratmış, müvafiq təşkilatlara müraciət etmişik. Onların yaşadıqları ərazi indi tam izolyasiya edilmişdir. Bu da müvəqqəti çətinlikdir, yəqin ki, onlar da yaxın vaxtlarda tikiləcək yeni qəsəbələrə köçürüləcəklər.

“Xəzər” Turist Bazası artıq müasir tələblərə uyğun istirahət zonası kimi fəaliyyət göstərəcək.

Sonda Faiz müəllim onu da vurğuladı ki, Azərbaycan yaxın gələcəkdə turizmin geniş inkişaf etdiyi bir ölkəyə çevriləcək. Bunun üçün ölkədə hər cür şərait və imkan yaradılmışdır.

M. MÜKƏRRƏMOĞLU

Xalq qəzeti.- 2009.- 23 aprel.- S. 11.