Heydər Əliyev məktəb-muzeyi səmərəli fəaliyyət göstərir

Ümummilli lider Heydər Əliyev irsinin öyrənilməsi uzun illər, dərin araşdırmalar, çoxillik elmi tədqiqatlar tələb edir. Bu irsi öyrəndikcə dövlət idarəçiliyində, siyasi fəaliyyətdə və digər sahələrdə təcrübə toplayır, bilik qazanır, müasir tələblərə cavab verən kamil mütəxəssis kimi yetişirsən. Hazırda ali məktəblərdə, idarə və müəssisələrdə Heydər Əliyev Siyasi Universiteti müvəffəqiyyətlə fəaliyyət göstərir. Ziyalılar, alimlər, mühəndislər, müəllimlər və digər peşə sahibləri bu universitetdən bəhrələnərək dövlətçiliyimizin, müstəqilliyimizin qorunmasında, ölkəmizin inkişafında daha da fəal olurlar. Bu irsi qoruyub gələcək nəsillərə ötürmək hər birimizin ən ülvi vəzifəsidir.

Yasamal rayonundakı Heydər Əliyev məktəb-muzeyi bu gün hər bir ziyalının, tələbənin, şagirdin ən çox müraciət etdiyi zəngin bilik xəzinəsidir. Ötən ilin dekabrından qapılarını xalqın üzünə açan məktəb-muzey altı mərtəbədən ibarətdir. Bu bilik xəzinəsinin birinci mərtəbəsi sərgi salonu, ikinci mərtəbəsi iclas salonu, üçüncü mərtəbəsi kompyuter sinfi və kitabxana, dördüncü və beşinci mərtəbələri ulu öndərin həyat və fəaliyyətindən bəhs edən fotostendlər, eksponatlar və digər əyani vəsaitlərdən ibarətdir. Altıncı mərtəbə isə inzibati işlər üçün nəzərdə tutulub.

Onu da qeyd edək ki, məktəb-muzey fəaliyyətə başlayan gündən demək olar ki, hər gün insanların ən çox gediş-gəliş yerinə, böyük maraq dairəsinə çevrilib. Məktəb-muzeyin xatirə kitabının ilk səhifəsi möhtərəm Prezidentimiz İlham Əliyevin ürək sözləri ilə başlayır.

Azərbaycan Prezidenti yazır: “Heydər Əliyev muzeyində ulu öndərin həyat və fəaliyyətini əks etdirən fotoşəkillər böyük maraq doğurur. Bütün dövrlərdə Heydər Əliyev doğma xalqına sədaqətlə xidmət edirdi. 70-80-ci illərdə və müstəqillik dövründə onun müstəsna xidmətləri Azərbaycanın hərtərəfli inkişafını təmin edirdi. Bu gün Heydər Əliyev siyasəti yaşayır, yeni formalarla zənginləşir. Azərbaycan Heydər Əliyev yolu ilə uğurla irəliləyir”.

Məktəb-muzeyin zəngin kitabxanası, kompyuter mərkəzi, maraqlı eksponatları ölkəmizə gələn qonaqların da diqqətini cəlb edir. Xatirə kitabında BMT rəsmisinin yazdığı ürək sözlərini oxuyanda da bunun şahidi oluruq. Bundan başqa, akademik Budaq Budaqov, Avropa Elmlər Akademiyasının həqiqi üzvü, akademik Kərim Kərimov, Yasamal rayon məhkəməsinin sədri, Məhkəmə-Hüquq Şurasının üzvü Ələddin Cəfərov və digərlərinin yazdıqları ürək sözləri diqqəti cəlb edir. Professor Nizaməddin Şəmsizadə öz ürək sözlərini belə ifadə edib: “Heydər Əliyev irsi bizim milli sərvətimizdir. Onu qoruyub saxlamaq, nəsildən-nəsilə ötürmək bizim tarixi vəzifəmizdir. Bu baxımdan Heydər Əliyev məktəb-muzeyinin gördüyü işlər misilsizdir. Muzey azərbaycançılıq ideyasının fəlsəfi prinsipləri ilə işləyir, bu məfkurəni əzmlə təbliğ edir.

Azərbaycan gənclərinin milli ruhda tərbiyəsində bu muzeyin xidmətləri əvəzsizdir”.

Məktəb-muzeydə tədbir keçirmək artıq ənənə halını alıb. İndi bilik xəzinəsində hər gün ulu öndərin həyat və fəaliyyətinə həsr olunmuş açıq dərs keçirilir. Növbəti açıq dərslərdən birində biz də iştirak etdik. Yasamal rayonundakı 158 nömrəli məktəbin tarix müəllimi, əməkdar müəllim Babək Xubyarovun X sinif şagirdlərinə keçdiyi açıq dərsin mövzusu belə adlanırdı: “Heydər Əliyev milli dövlətçiliyimizin qurucusu-memarıdır”.

Əvvəlcə başda məktəbin direktoru Zemfira Səmədova olmaqla şagirdlər məktəb-muzeydə ulu öndərin büstü önünə əklil qoydular. Z.Səmədova şagirdlərə müdrik şəxsiyyət Heydər Əliyevin həyat və fəaliyyəti barədə qısa məlumat verdi. Ümummilli liderin anadan olmasının 86-cı ildönümünə həsr olunmuş tədbir şagirdlərin ifasında dövlət himninin oxunması ilə başlandı. Açıq dərsdə “Siyasətçilər”, “İqtisadçılar”, “Memarlar” və “Maarifçilər” qrupuna bölünən şagirdlər böyük tarixi şəxsiyyət Heydər Əliyevin bu sahələr üzrə fəaliyyətindən həvəslə danışdılar, yetişən gənc nəslin hərtərəfli biliyə malik olmalarında, bugünkü əmin- amanlığa, davamlı ictimai sabitliyə, firavan həyata görə ulu öndərə borclu olduqlarını dedilər. Şagirdlər Heydər Əliyev siyasi kursunun ən layiqli davamçısı möhtərəm Prezidentimiz İlham Əliyevə, Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevaya təhsilin inkişafına, uşaqlara göstərilən diqqət və qayğıya görə minnətdarlıqlarını bildirdilər.

Bakı şəhəri üzrə təhsil idarəsi rəisinin müavinləri Məhəbbət Qarabağlı və Məmməd Bayramov tədbirin yüksək səviyyədə keçdiyini və açıq dərsin müasir tələblərə cavab verdiyini qeyd etdilər, əməkdar müəllim Babək Xubyarova minnətdarlıqlarını bildirdilər.

Yasamal Rayon İcra Hakimiyyəti başçısının müavini Şahin Məmmədov ulu öndərin anadan olmasının 86-cı ildönümünə həsr olunmuş açıq dərsin çox yaxşı təşkilinə görə başda məktəbin direktoru Zemfira Səmədova olmaqla müəllim və şagird kollektivinə minnətdarlığını bildirdi. Qeyd olundu ki, belə dərslər hər gün keçiriləcək.

Tədbirin sonunda xalqımızın böyük oğlu Heydər Əliyevin həyat və fəaliyyətindən bəhs edən film nümayiş etdirildi.

Əliqismət BƏDƏLOV

Xalq qəzeti.- 2009.- 24 aprel.- S. 3.