Estoniyanın Vergi və Gömrük Şurasının nümayəndə heyəti ölkəmizdə səfərdədir

Azərbaycan Respublikası Vergilər Nazirliyinin ictimaiyyətlə əlaqələr şöbəsindən aldığımız məlumatda deyilir ki, Estoniya Vergi və Gömrük Şurasının Baş direktoru Enriko Aav və onun müavini Dmitri Yeqorovun daxil olduğu nümayəndə heyətinin səfərində məqsəd Azərbaycanın vergi sistemi ilə tanışlıqdır.

Bakıda səfərdə olan qonaqlar aprelin 27-də ilk öncə Fəxri Xiyabana gələrək Azərbaycan xalqının ümummilli lideri Heydər Əliyevin xatirəsini ehtiramla yad etmiş, abidəsi önünə əklil qoymuşlar. Qonaqlar görkəmli oftalmoloq alim Zərifə xanım Əliyevanın məzarına da gül dəstələri qoymuşlar.

Nümayəndə heyəti Fəxri Xiyabandan Şəhidlər Xiyabanına gəlmiş, burada Azərbaycanın müstəqilliyi uğrunda canından keçərək şəhid olmuş qəhrəman oğul və qızlarımızın xatirəsini ehtiramla yad etmiş, onların məzarlarına gül dəstələri qoymuşlar. Sonra nümayəndə heyəti “Əbədi məşəl”in qarşısına əklil qoymuş və şəhidlərimizin ruhlarına ehtiramlarını bildirmişlər.

Ziyarətdən sonra Estoniya Vergi və Gömrük Şurasının nümayəndələrini vergilər naziri Fazil Məmmədov qəbul etmişdir. Vergilər naziri Azərbaycanda həyata keçirilən iqtisadi siyasət, aparılan islahatlar barədə qonaqlara geniş məlumat vermiş, ölkəmizin beynəlxalq iqtisadi sistemə uğurla inteqrasiya etdiyini vurğulamışdır. Bildirilmişdir ki, həyata keçirilən islahatlar beynəlxalq maliyyə təşkilatlarının da diqqətini cəlb etmiş, ötən il Dünya Bankı və Beynəlxalq Maliyyə Korporasiyası Azərbaycanı islahatçı dövlət olaraq qiymətləndirmişdir. F.Məmmədov Azərbaycanda həyata keçirilən vergi islahatları barədə geniş məlumat vermiş, vergi inzibatçılığının təkmilləşdirilməsi istiqamətində son dövrlərdə ölkəmizdə görülən işlər, həyata keçirilən islahatlar, həmçinin vergi inzibatçılığı və informasiya texnologiyalarının tətbiqi sahəsində əldə edilən nailiyyətlər barədə onlara ətraflı bəhs etmişdir.

Estoniyanın Vergi və Gömrük Şurasının baş direktoru Enriko Aav Azərbaycanın vergi xidmətinin informasiya texnologiyalarının vergi sistemində tətbiq olunması sahəsində uğurlar əldə etdiyini bildirmiş, ölkəmizin bu sahədə, həmçinin ƏDV depozit hesabının tətbiqi ilə bağlı təcrübəsinin öyrənilməsində maraqlı olduqlarını qeyd etmişdir.

Görüşdə Vergilər Nazirliyi ilə Estoniya Respublikasının Vergi və Gömrük Şurası arasında əməkdaşlıq, qurumlar arasında təcrübə mübadiləsi və digər qarşılıqlı maraq doğuran məsələlər barədə ətraflı müzakirələr aparılmışdır.

Sonra Estoniya Respublikasının Vergi və Gömrük Şurası ilə Azərbaycan Respublikası Vergilər Nazirliyi arasında əməkdaşlıq memorandumu imzalanmışdır. Memorandumu Azərbaycan tərəfdən vergilər naziri Fazil Məmmədov, Estoniya tərəfdən isə Estoniya Vergi və Gömrük Şurasının Baş direktoru Enriko Aav imzalamışlar. Tərəflər memorandumun qarşılıqlı əməkdaşlıq prosesinə yeni bir təkan verəcəyini vurğulamışlar.

Sonra Vergilər Nazirliyində Estoniya nümayəndə heyəti üçün Avtomatlaşdırılmış Vergi İnformasiya Sistemi (AVİS) layihəsi, ƏDV depozit hesabları sistemi və fəaliyyətin qiymətləndirilməsi mövzularında təqdimatlar keçirilmişdir. Qonaqlara AVİS-in tətbiqinin vergi inzibatçılığına verdiyi üstünlüklər barədə məlumat verilmiş, ƏDV depozit hesabının işləmə mexanizmi izah olunmuşdur.

Səfər çərçivəsində qonaqlar Vergilər Nazirliyi yanında Xüsusi Rejimli Vergi Xidməti Departamentində olacaq, Azərbaycanda 2008-ci ildən tətbiq olunan sahibkarlıq subyektlərinin dövlət qeydiyyatına alınmasının “bir pəncərə” sistemi ilə tanış olacaq, Estoniya Vergi və Gömrük Şurasındakı struktur islahatları, “x-road” layihəsi və e-audit haqqında təqdimatlar keçirəcəklər.

Estoniya nümayəndə heyətinin səfəri davam edir.

Xalq qəzeti.- 2009.- 28 aprel.- S. 4.